MGOMBEA URAIS WA CCM,RAIS DKT MAGUFULI KUCHUKUA FOMU ZA KUGOMBEA URAIS WA JAMHURI YA MUUNGANO WA TANZANIA KESHO JIJINI DODOMA

NDG. JOHN POMBE JOSEPH MAGUFULI, MWENYEKITI WA CCM NA RAIS WA JAMHURI YA MUUNGANO WA TANZANIA KUCHUKUA FOMU ZA KUGOMBEA URAIS WA JAMHURI YA MUUNGANO KWA TIKETI YA CCM

_______________

Makao Makuu ya CCM, Dodoma

05 Agosti 2020

Chama Cha Mapinduzi (CCM) kinapenda kuujulisha umma wa wana CCM na watanzania kwamba Ndg. John Pombe Joseph Magufuli Mwenyekiti wa CCM, Rais wa Jamhuri ya Muungano wa Tanzania na Mgombea wa nafasi ya Urais wa Jamhuri ya Muungano wa Tanzania kwa tiketi ya Chama Cha Mapinduzi (CCM), kesho tarehe 06 Agosti, 2020 atachukua fomu ya kugombea Urais wa Jamhuri ya Muungano wa Tanzania kwa tiketi ya CCM katika Ofisi za Makao Makuu ya Tume ya Taifa ya Uchaguzi Tanzania (NEC) zilizopo Njedengwa Jijini Dodoma.

Ndg. Magufuli atachukua fomu majira ya saa 3:00 asubuhi na atasindikizwa na watu wachache wakiwemo viongozi wakuu wa chama, ikiwa ni kutekeleza matakwa na maelekezo ya Tume ya Taifa ya Uchaguzi (NEC).

Ndg. Magufuli ambaye ni Rais wa Jamhuri ya Muungano wa Tanzania anachukua fomu hiyo ili kugombea Urais kwa kipindi cha pili katika Uchaguzi Mkuu unaotarajiwa kufanyika tarehe 28 Oktoba, 2020.

Baada ya kuchukua fomu, Ndg. Magufuli atakwenda katika Ofisi za Makao Makuu ya CCM Jijini Dodoma (White House) ambako atakutana na wanachama, wapenzi na wakereketwa wa CCM na kuwasalimu.