RUWASA YAPATA BIL.78 FEDHA ZA MAPAMBANO DHIDI YA UVIKO19, KUSOGEZA HUDUMA YA MAJI VIJIJINI-KIVEGALO

 Na Mwamvua Mwinyi, Mafia

WAKALA Wa Maji na Usafi wa Mazingira Vijijini (RUWASA ) ,imepokea gawio la kiasi cha sh .Bilioni 78 kutoka katika fedha za mapambano dhidi ya ugonjwa wa Uviko19 ambapo kati ya fedha hiyo mkoa wa Pwani utapata miradi 8 yenye thamani ya Bilioni 3.7.

Akielezea kuhusu fedha hiyo waliyopokea kutoka serikalini , baada ya kutembelea miradi ya maji na visima Mafia, Mkurugenzi Mkuu RUWASA, Clement Kivegalo alisema ,fedha hiyo ni nyingi hivyo wataisimamia na kutekeleza miradi lengwa kwa wakati.

Nae Meneja RUWASA Pwani, Beatrice Kasimbazi alisema, asilimia 76 ya watu wanapata maji Mkoani humo , ikiwemo mjini wanapata maji kwa asilimia 84 na Vijijini asilimia 72.

Alieleza ,bajeti ya mwaka huu wametengewa kiasi cha sh.Bilioni 21 ambapo Bilioni 3.7  Ni kutoka katika fedha za Uviko19, Bilioni 15 kutoka mfuko wa maji huku fedha iliyosalia Bilioni 2.9  ni kwa ajili ya miradi ya PBR.

"Hapo tutatekeleza miradi Kama 30 Lakini katika gawio la fedha ya Uviko19 itatekeleza miradi 8 ,Tunashukuru Rais Samia Suluhu Hassan kwa kutoa fedha kwa ajili ya kutekeleza miradi ya maji Vijijini, :;"Huu ni utekelezaji wa ilani ya Chama Cha Mapinduzi kufikisha maji Vijijini na mjini,:"alifafanua Kasimbazi.

Kasimbazi alisema ,agizo lililopo ni kuhakikisha ikifika March 2022  miradi hiyo iwe imekamilika na itoe huduma ,hivyo basi amejipanga na mameneja wa wilaya na watendaji wake kutekeleza agizo hilo kwa vitendo.

Mkuu wa wilaya ya Mafia, Mhandisi Martin Ntemo, aliishukuru RUWASA kwenda kutembelea miradi na visima vinne wanavyochimba mwaka huu ndani ya vijiji  ambavyo wanategemea kuongezwa kufikia visima 10.

Aliwaelekeza viongozi wa vijiji na wananchi kulinda miundombinu na vyanzo vya maji .

Ntemo alisema, watakaoenda kinyume na hilo kwa kuchoma Moto,kufuga mifugo , ama kufanya shughuli za kijamii ,katika vyanzo vya maji  watachukuliwa hatua za kisheria.

Meneja wa RUWASA Mafia Clement Lyoto,alibainisha kwa mwaka huu wametenga milioni 50 kwa ajili ya kutafuta vyanzo vya maji vinne .