ugeni

leo kwenye mida ya saa sita hivi za mchana nilipata bahati ya kutembelewa ofisini daily news na mzee Juma a.s. ngotyagay ambaye ni mlemavu anaeishi tandika azimio, dar.

alikuja ofisini kunifuata baada ya kusikiliza idhaa ya kiswahili ya bbc majuma kadhaa yalopita kuhusu teknolojia ya blogu ambapo pamoja na kuisimulia mafanikio ya blogu ya issamichuzi.blogspot.com katika kupata wageni wengi, pia nilihojiwa mambo mengi ikiwa ni pamoja na nilianzaje-anzaje kublogu.

mzee saidi, ambaye ni msikilizaji mkubwa wa bbc aliamua kujaribu kuomba msaada toka kwa wasamaria wema duniani kote wanaosoma blogu hii, huku akiwa na kicheko cha imani kubwa kwamba kilo chake kitaweza kusikika endapo atatumia njia ya blogu yetu hii.

aliniambia yeye alizaliwa tarehe 09/02/1940 huko muhoro, rufiji, akiwa ni mtoto wa kwanza kwenye familia ya watoto watatu. anasema alizaliwa kawaida tu lakini alipofikisha umri wa miaka 3 ugonjwa wa ajabu (anahisi ni polio) ulimkumba na kujikuta analemaa na kuwa kiwete.

pamoja na hayo, alijiunga na shule ya msingi ya kilindi na kisha shule ya kati ya utete kabla ya kufaulu na kuelekea uganda alikosoma elimu ya sekondari katika shule ya kabale-busega eneo la mkono, njia ya kuelekea masaka, ambako alihitimu kidato cha nne mwaka 1965.

baada ya hapo alirejea nyumbani bongo alikobahatika kupata kazi katika shirika la maji akiwa kama karani wa masijala (registry clerk) ambako alitumikia kwa miaka 22 kabla ya kustaafu. yeye ni mmoja wa wafanyakazi waanzilishi wa 'nuwa' .

anakumbuka alifunga ndoa tarehe 18/12/1976 na bibie habiba shaaban ambaye alijaaliwa kuzaa naye watoto wanne ambao ni jafari (18) ambaye kwa bahati mbaya anasumbuliwa na ugonjwa wa akili. wa pili ni salumu (12) anayesoma, na kufuatiwa na Nazira (6) na kisha muzna (4) ambao wote wako shule.

Anasema muda wote huo ameweza kuishi na kuilea familia yake kwa kiwango cha kawida hadi pesa za pensheni alizopata kazini kumuishia na malipo ya kila mwezi kuwa madogo kukidhi mahitaji, na kujikuta hana jinsi ila kuomba msaada wa pesa, hata kama kwa mkopo, ili aendelee kuilea familia yake.

jitahada za kutafuta na kupata pesa za kuanzisha mradi zimegonga ukuta na aliposikia kuhusu blogu yetu hii akapata wazo la kuomba msaada kwa wadau kumuwezesha kutimiza malengo yake. na mradi alioubuni na ambao anahisi unaweza kumuondolea umasikini kiasi cha kumzuia asiende kuwa omba omba mitaani kama wafanyavyo watu kama yeye, ni mradi wa kufuga kuku wa mayai na nyama.

kwa elimu kiasi aliyonayo ameweza kuandika propoza ya mradi na thamani yake ambao aliniletea leo ofisini ili niweze kuutangaza na kumsaidia kupata wafadhili. ana imani kubwa kuwa wadau wa blogu hii pamoja na redio ya bbc watamsaidia na tayari ameshatanguliza shukurani zake kwa msamaria mwema yeyote ataejitokeza.

pamoja na kuwa msikilizaji mzuri wa idhaa ya kiswahili ya bbc, pia hobi zake zingine ni kusoma novo, akimtaja ian flemming mtunzi wa riwaya za james bond kuwa kipenzi chake, akifuatiwa na mtunzi aliemtaja kama peter cheyney.

kwa kusema kweli niliguswa sana na ugeni wa mzee said ambaye anasema nyumbani anaitwa 'baba gay' kama kifupisho cha jina lake la mwisho. chozi lilinitoka kuona mzee ambaye ni mlemavu amefunga safari toka tandika azimio (kiasi cha kilomita 17) kuja kwangu sio kuomba msaada wa pesa bali wa kutangaziwa shida zake kupitia blogu yetu hii.

"nimepata imani kubwa na blogu yako baada ya bbc kutangaza umefikisha zaidi ya wasomaji milioni moja", aliniambia mzee huyu mlemavu ambaye anatumia baisikeli ya kiti kutembelea.

kunradhi wadau kama nitakuwa nimewakwaza kwa hili 'gazeti' lakini kama usemi wa wahenga wetu wanavyosema, 'tarishi hauwawi'. hivyo niko chini ya miguu yenu kuomba wasamaria wema tumsaidie mdau mwenzetu huyu. anuani yake na akaunti yake ya benki nimebandika huko chini.

tafadhali naomba mdau usisite kunipitishia ujumbe humu bloguni kama uko tayari kumsaidia mzee saidi na kama utapenda taja kiwango ulichotuma kwenye akaunti yake. kumbuka kutoa ni moyo...

unaweza kuwasiliana na mzee saidi kwa namba ya simu yake ya mkononi +255 756 003 156 moja kwa moja.

naomba kuwasilisha huku nikiwa na imani wadau mtasikiliza kilio cha huyu mdau mwenzetu.