Bunge lapitisha bajeti ya wizara ya nishati na madini, ngeleja aibuka kidedea

Waziri wa Nishati na Madini William Ngeleja na Naibu wake Ili Malima wakipongweza baada ya kupitishwa Makadirio ya Bajeti ya Wizara yao 2011-2012 leo Dodoma.(PICHA ZOTE NA MWANAKOMBO JUMAA) 

Mbunge wa Same mashariki Anne Kilango Malecela akichangia Bungeni leo'

Mbunge wa Bumbuli na Mwenyekiti wa kamati ya Bunge ya Nishati na Madini Mh. January Makamba akichangia hoja leo

Msemaji wa kambi  ya Upinzani Bungeni Freeman Mbowe (miwani) akibadilishana mawazo na mbunge wa Ubungo (CHADEMA) John Mnyika wakati wa majadiliano ya kupitisha hoja ya Makadirio na Mapato na Matumizi ya Wizara ya Nishati na Madini kwa mwaka wa fedha 2011-2012 Dododma leo

Waziri wa Nishati naMadini William Ngeleja akiingia Bungeni leo

Waziri wa Nishati naMadini William Ngeleja akiwakilisha Makadirio ya matumizi na Mapato ya wizara yake leo Bungeni(Picha na Mwanakombo Jumaa-MAELEZO)

Na Ripota wa Globu ya Jamii, Dodoma

Bunge limepitisha makadirio ya mapato na matumizi ya Wizara ya Nishati na Madini iliyowasilishwa upya leo mjini Dodoma na Waziri wa wizara hiyo Mh. William Ngeleja.

Katika maelezo yake, Mh. Ngeleja amebainisha kwamba serikali imepania kutokomeza kabisa tatizo la umeme nchini haraka iwezekanavyo, na kulitafutia jibu la kudumu tatizo hilo sugu.

Mh. Ngeleja kaliambia Bunge kwamba kampuni ya Symbion Power ya Marekani na Shirika la Hifadhi ya Jamii nchini (NSSF) wamepewa zabuni ya kuingiza nchini mitambo ya kuzalisha umeme wa dharura, katika mpango huo wa serikali.

Symbion Power ni kampuni ambayo ilinunua mitambo iliyokuwa ikimilikiwa na kampuni ya Dowans Tanzania, imepewa zabuni ya kuzalisha megawati 205 za umeme, wakati NSSF wataingiza mitambo yenye uwezo wa kuzalisha megawati 150. 


Kwa mujibu wa taarifa ya Waziri wa Nishati na Madini, William Ngeleja, iliyowasilishwa na kujadiliwa mbele ya Kamati ya Bunge ya Nishati na Madini ambayo Mwananchi limeiona, mpango wa dharura kati ya Agosti 2011 na Desemba 2012 itaigharimu Serikali Sh1.24 trilioni. 


Kasema miradi inayotarajiwa kutekelezwa ni ya dharura itakayozalisha megawati 1,032 zikiwemo 572 kati ya sasa na mwezi Desemba mwaka huu na megawati 460 zaidi ifikapo Desemba 2012. 


“Ili kukabiliana na mgawo wa umeme kwa kipindi cha dharura, Serikali kwa kushirikiana na sekta binafsi, pamoja na taasisi za umma itatumia uwezo wa mitambo iliyopo nchini kukodisha na kununua mitambo ya kufua umeme itakayotosheleza mahitaji ya sasa na baadaye,” amesema Ngeleja, ambaye pia aliomba radhi kwa usumbufu uliopatikana wakati wa kuwasilisha bajeti hiyo mara ya kwanza wiki tatu zilizopita. 

Pamoja na kuung mkono hoja ya Waziri Ngeleja, Wabunge wameitaka serikali kuhakikisha kwamba kila lililoahidiwa linatekelezwa na kwamba hii hali ya dharura isiwepo tena katika sekta hiyo.

Katika kukamilisha Waziri Mkuu Mh. Mizengo Pinda amekubaliana na rai hizo za Wabunge na kusisitiza kwamba ahadi hizo zitatekelezeka endapo kama mapato yatakusanywa ipaswavyo na kuelezea matumani yake kwamba TRA itafanya kazi zake kwa umahiri ili kutimiza malengo ya kupata fedha za kutimiza ahadi hizo.