TAARIFA YA ZOEZI LA SENSA MKOA WA DODOMA KWA SIKU YA PILI

Zoezi la sensa limeendelea kufanyika maeneo mbalimbali ya Mkoa wa Dodoma na Wilaya zake kwa siku ya pili mfululizo.

Taarifa kutoka kwa Ofisi za Wakurugenzi wa Halmashauri za Wilaya zimeeleza kuwa hakukuwa na taarifa kutoka kwenye maeneo yao zilizoripotiwa juu ya uhalifu na hujuma dhidi ya zoezi la Sensa.

Kwa upande wa Vifaa, asubuhi ya Leo ofisi za Wakurugenzi wa Halmashauri walikuwa wameomba kuongezewa baadhi ya vifaa hususani Madodoso na baadhi ya Fomu kwa ajili ya kuchukulia na kuandikia taarifa mbalimbali zinazochukuliwa kwenye zoezi hilo la Sensa.

Nae Mratibu wa Sensa wa Mkoa wa Dodoma Bw. Idd Muruke amesema kuwa wameendelea kupokea vifaa zaidi kwa ajili ya zoezi hilo kulingana na mahitaji ambapo alfajiri ya leo baadhi ya vifaa kama madodoso yameendelea kusambazwa/kupelekwa kwenye baadhi ya maeneo yenye kuhitaji ambapo kwa kazi ya leo na kesho vinatosheleza na vitaendelea kuingia kulingana na mahitaji.