JK aijia juu wizara ya elimu kwa mishara ya waalimu

Na Mwandishi Maalum
Rais Jakaya Mrisho Kikwete ameuagiza uongozi wa Wizara ya Elimu na Mafunzo kuwahamisha, mara moja, kutoka Idara za Utawala na Fedha za wizara hiyo maofisa wa idara hizo ambao wamekuwa wanasababisha ukosefu wa utulivu miongoni mwa walimu nchini kwa kutokuwa waaminifu.

Aidha, Rais Kikwete ameagiza kuwa kuanzia sasa mwalimu yoyote nchini asihamishwe kwenye kituo chake kama hakuna fedha ya kumlipa pesa zake halali za uhamisho.

Vile vile, Rais Kikwete ameuagiza uongozi wa wizara hiyo kukomesha mara moja tabia ya kulimbikiza madai na malipo ya walimu nchini akisisitiza kuwa mwalimu mwenye haki ya kulipwa lazima alipwe mara moja.

Rais Kikwete ametoa maagizo hayo jana, Jumatano, Februari 18, 2009, wakati alipokutana na kuzungumza na uongozi wa Wizara hiyo, Ikulu, Dar Es Salaam, katika mwendelezo wa mikutano ya kutathmini utendaji wa Serikali yake kati yake na Wizara mbali mbali na mashirika yaliyoko chini ya Wizara hizo.

“Naelewa kuwa kwenye Serikali yatakuwapo madai wakati wowote ule. Lakini inakuwaje kuwa mwalimu anapandishwa cheo mara ya kwanza halipwi mshahara mpya? Anapandishwa mara ya pili halipwi mshahara mpya? Anapandishwa cheo mara ya tatu halipwi mishahara mpya?”

Rais amewauliza viongozi wa Wizara hiyo na kuongeza:
“Hili linatokea vipi wakati vyeo vyote vipya vimepangiwa fedha kwenye bajeti? Na kwenye mfumo wote wa Serikali kwa nini hili linatokea katika Wizara ya Elimu tu?”

Rais amesema kuwa anazo habari kuwa lipo genge la watu ambalo kazi yao ni kutunza risiti baada ya kuzilipa, na baadaye kuzilipa tena na tena.

Amesema Rais Kikwete: “Machi mwaka jana tulilipa madai ya walimu. Mwezi Julai tukapata madai makubwa zaidi kuliko yale ya Machi. Kama vile hiyo haikutosha, mwezi Septemba tukapata madai mengine makubwa zaidi kuliko hata yale ya Julai. Naambiwa wale watu wanatunza risiti zile zile na kuzitumia kutoa madai hewa.”

“Mnasimamia vipi risiti hizi? Hatuwezi kamwe kuendelea namna hii. Madai ni yale yale, risiti ni zile zile…hili lazima tulikomesha na watu hawa wahamishwe mara moja ili tuanze upya… miaka nenda, miaka rudi tumekuwa na tatizo hili… watu wamekuwa masultani pale na wanaendelea kuvuruga utulivu wa walimu,” amesema Rais Kikwete na kusisitiza:
“Hatuwezi kuendelea kuwaruhusu wavuruge. Nataka wahamishwe haraka iwezekanavyo. Hatuwezi kukataa kuwalipa watu mpaka tuingie katika kutokuelewana. Watu hawajali, wamejisahau, bora wao wanalipwa, basi hawajali kama watu wengine wanateseka. Mambo yao yananyooka, huku walimu wanaendelee kuteseka na kulalamika.”

Rais Kikwete amesisitiza kuwa hataki tena kusikia habari ya madai ya walimu. “Nataka kila mmojawetu atimize wajibu wetu. Nimechoshwa na mambo ya namna hii. Tunataka watu waaminifu.”
Kuhusu kuhamisha walimu bila kuwalipa fedha zao za uhamisho, Rais Kikwete ameelekeza kuwa kuanzia sasa mwalimu yoyote nchini asihamishwe bila kuwapo fedha za kulipia uhamisho huo.
“Kuanzia sasa hakuna kuhamisha mwalimu yoyote bila kuwapo pesa za kumlipa. Kama hakuna fedha za uhamisho, hakuna kuhamisha mwalimu. Ofisa yoyote atakayefanya hivyo basi mshahara wake ukatwe kulipia uhamisho huo. Na wakati mwingine watu wanahamishwa bila sababu zozote za msingi.”

Katika mkutano huo, Rais Kikwete pia ametaka kuimarishwa kitengo cha ukaguzi katika wizara hiyo akisisitiza kuwa kitengo chenye nguvu cha ukaguzi ndicho mkombozi wa elimu nchini.
“Idara imara zaidi ya ukaguzi itatusaidia zaidi katika kuimarisha elimu yetu. Ujumbe wangu kwetu ni ongezeni bidii,” amesema Rais Kikwete.