Habari Za Hivi Punde Habari Za Hivi Punde
Soma zaidi

at Sunday, November 08, 2026 0

Waziri wa Afya, Mhe. Mohamed Mchengerwa, leo tarehe 08 Novemba 2026, amefanya ziara ya kikazi ya katika Hospitali ya Taifa Muhimbili-Mloganzila iliyopo jijini Dar es Salaam, kwa lengo la kukagua utoaji wa huduma za matibabu pamoja na kuzungumza na wagonjwa na watumishi wa afya.

Katika ziara hiyo, Mhe. Mchengerwa amepongeza uongozi wa hospitali hiyo kwa usimamizi mzuri wa hospitali na kwa ubora mkubwa wa huduma za kibingwa na kibobezi zinazotolewa kwa wananchi na kubainisha kuwa Muhimbili-Mloganzila imekuwa nguzo muhimu na ya kimkakati katika sekta ya matibabu nchini.

Pamoja na kutoa pongezi hizo, Waziri Mchengerwa ametumia fursa hiyo ya kipekee kuzungumza na wananchi waliofika kupata huduma.

Mhe. Mchengerwa amesisitiza kuwa lengo kuu la ziara hiyo ni kujadili kwa pamoja namna ya kuimarisha mifumo ya utendaji kazi na kujenga misingi thabiti ya uwajibikaji wa pamoja na kuongeza kuwa ni lazima kila mtumishi ahakikishe wagonjwa wanapata huduma bora, zenye hadhi na heshima bila kukumbana na vikwazo vyovyote visivyo vya lazima.

"Mifumo yetu ya utendaji kazi lazima iimarishwe ili kujenga misingi thabiti ya uwajibikaji. Tunataka wananchi wapate huduma bora na za heshima bila vikwazo," amesema Waziri Mchengerwa

Hatua hii ya Waziri inakuja wakati Wizara ya Afya ikiwa imedhamiria katika kutekeleza mikakati endelevu inayolenga kuhakikisha Taasisi zote za Afya za Umma nchini zinajenga imani kubwa kwa wananchi kupitia utoaji wa huduma zenye kiwango na hadhi ya kitaifa na kimataifa.

Read more »

at Sunday, November 08, 2026 0

▪️︎ Akemea wananchi kunyimwa huduma kwa kukosa miadi

▪️︎ Ataka wagonjwa wa dharura wahudumiwe mara moja

WAZIRI MKUU Dkt. Mwigulu Nchemba amesema Serikali imechukua hatua za kufanya bei ya saruji kuwa himilivu kwa kuondoa kodi kwenye saruji inayoagizwa kutoka nje na malighafi zinazotumika kuizalisha.

Amesema hayo leo (Jumapili, Novemba 8, 2026), wakati akizungumza na wananchi katika Viwanja vya Shule ya Msingi Nyamikoma, Kata ya Kabita, Wilaya ya Busega, akihitimisha ziara yake ya kikazi mkoani Simiyu.

Dkt. Mwigulu amesema Serikali inatambua kupanda kwa bei za vifaa vya ujenzi, ikiwemo saruji, na imechukua hatua kupunguza gharama zinazochangia bei hizo.

“Tumefuta kodi kwenye saruji inayoagizwa na tumefuta kodi kwenye malighafi zinazotengeneza saruji,” amesema.

Ameeleza kuwa saruji itakayozalishwa kwa malighafi yenye gharama nafuu, pamoja na itakayoagizwa baada ya kuondolewa kwa kodi, inatarajiwa kusaidia kufanya bei kuwa himilivu katika siku zijazo.

Katika hatua nyingine, Waziri Mkuu amewataka watumishi wa umma kuacha kuwanyima wananchi huduma kwa kisingizio cha kutokuwa na miadi, wakati watumishi hao wapo ofisini na wanaweza kuwahudumia.

Amesema baadhi ya wananchi hutumia fedha nyingi kufuata huduma, hivyo kuwataka warudi siku nyingine bila sababu za msingi kunawaongezea gharama na usumbufu.

“Lazima tujue kuzifikia ofisi za umma, baadhi yetu wanakuwa wameingia gharama. Wengine wanatumia zaidi ya laki moja na nusu, wengine laki mbili,” amesema.

Kwa upande wa afya, Dkt. Mwigulu ameelekeza wagonjwa wa dharura, wakiwemo wajawazito waliozidiwa na uchungu na majeruhi, wapatiwe matibabu mara moja bila kucheleweshwa na taratibu za usajili.

“Majeruhi amefika anahitaji huduma ya kwanza ya haraka, mkimbizeni akatibiwe, mtamwandikishia pale pale. Siyo kusubirisha mtu ambaye anahitaji matibabu ya dharura, mnamsubirisha mapokezi,” amesema.

Vilevile, amesisitiza kuwa wagonjwa wanaohitaji kupelekwa hospitali za rufaa hawapaswi kuchangishwa fedha za mafuta ya ambulansi za Serikali.

Amesema Serikali imenunua magari hayo na kuajiri madereva ili yaokoe maisha ya wananchi, hivyo wasimamizi wahakikishe yanakuwa tayari kutoa huduma.

Kuhusu dawa, Waziri Mkuu amevitaka vyombo vya ulinzi na usalama kufuatilia kila mwezi fedha za dawa na matumizi yake, na kuwasilisha taarifa ili hatua zichukuliwe pale uvujaji utakapobainika.

Amehoji sababu za wagonjwa kuendelea kuelekezwa kununua dawa katika maduka binafsi wakati taarifa anazopewa zinaonesha utoshelevu mkubwa wa dawa katika vituo vya Serikali.

Aidha, Dkt. Mwigulu amesisitiza kutoshikilia vitendea kazi vya wananchi, vikiwemo bodaboda, bajaji na magari, kwa makosa ambayo adhabu yake ni faini.

Amesema mamlaka zinazohusika zifuatilie malipo ya faini kwa mujibu wa sheria bila kuzuia shughuli zinazowaingizia wananchi kipato.

“Haya mambo ya kutokujali mitaji ya watu yanarudisha nyuma maendeleo ya watu. Wengine ni mikopo hivyo vitendea kazi vyao,” amesema.











Read more »

at Sunday, November 08, 2026 0

London, Uingereza

Waziri wa Maliasili na Utalii, Mhe. Dkt. Ashatu Kijaji (Mb), leo Novemba 8, 2026, amekutana na kufanya mazungumzo na Mwenyekiti wa Baraza la Utalii na Usafiri Duniani (WTTC), Bw. Manfredi Lefebvre, katika Hoteli ya Hyatt jijini London, Uingereza.

Mazungumzo hayo yamejikita katika masuala mbalimbali ya kuimarisha ushirikiano katika sekta ya utalii, hususan uwekezaji katika maeneo ya hifadhi pamoja na kuongeza idadi ya watalii wanaotembelea Tanzania.

Katika kikao hicho, pande hizo zimejadili fursa za uwekezaji katika maeneo mbalimbali ya hifadhi nchini, yakiwemo Hifadhi ya Taifa ya Nyerere, Serengeti na maeneo mengine yenye vivutio vya kipekee vya utalii, kwa lengo la kuimarisha huduma za utalii na kuongeza mchango wa sekta hiyo katika uchumi wa Taifa.

Bw. Lefebvre, ambaye pia ni mmiliki wa kampuni ya kimataifa ya utalii ya Abercrombie & Kent, ni miongoni mwa wawekezaji wenye maslahi na shughuli za utalii nchini Tanzania.

Kupitia uwekezaji na shughuli zake za utalii wa kimataifa, ikiwemo huduma za meli za kitalii za Crystal Cruises, Tanzania imeendelea kunufaika na ujio wa maelfu ya watalii wanaotembelea maeneo mbalimbali nchini, yakiwemo Zanzibar, Kilwa na Dar es Salaam.

Mkutano huo ni sehemu ya mwendelezo wa ziara ya Waziri Dkt. Kijaji nchini Uingereza, yenye lengo la kuimarisha ushirikiano wa kimataifa, kuvutia uwekezaji na kuitangaza Tanzania kama kituo kinachotoa fursa mbalimbali za utalii na uhifadhi.

Kikao hicho kimehudhuriwa pia na Balozi wa Tanzania nchini Uingereza Mhe. Mbelwa Kairuki, Naibu Kamishna wa Uhifadhi katika Mamlaka ya Hifadhi ya Eneo la Ngorongoro Joas Mwakwati na Mkurugenzi Mkuu wa Bodi ya Utalii Tanzania, Dkt. Thereza Mugobi.












Read more »

at Sunday, November 08, 2026 0

Ni msichana wa kimasai kutoka kata ya Kakesio Ngorongoro aliyejiunga na Chuo Kikuu cha Mtakatifu Augustine tawi la Arusha kusoma shahada ya utalii na ukarimu kwa mwaka wa masomo 2026/2027 na kupata ufadhili wa Mamlaka ya Hifadhi ya Ngorongoro.

Pilanoi anasema kwamba akiwa Mtoto wa kike hatamani kuona wanawake wa kimasai wakiolewa wengi kwa pamoja na mwanaume mmoja ila hutokea hivyo kwa sababu baadhi wanakuwa hawajasoma.

“Jitahidini  kuwasaidia watoto wa kike ndani ya jamii ya kimasai,hatupendi kuolewa ndoa za mitala  bali ni umaskini tu”,anasema Pilanoi mara baada ya kuwa miongoni mwa wanafunzi waliofadhiliwa na Ngorongoro mwaka huu wa Masomo.

Pilanoi amesema kuingia kwake Chuo Kikuu kumemfanya kufika Dar es salaam kwa mara ya kwanza na hivyo kusisitiza kuwa atasoma kwa nguvu zake zote ili huko siku za mbele aweze kuwatumikia watanzania.

Kauli ya Pilanoi inaungwa mkono na katibu wa baraza la wafugaji Ngorongoro James Moringe ambaye amesema elimu ndiyo msingi wa watoto wa kike na jamii ya wafugaji.



Read more »

at Sunday, November 08, 2026 0
Shirika la Posta Tanzania (TPC) limeendelea kuonesha mchango wake katika kuimarisha usimamizi na utekelezaji wa miradi kwa kutoa Mfunzo katika Mkutano wa Mwaka wa Taasisi ya Wataalamu wa Usimamizi wa Miradi Tanzania (PMI Tanzania Project Management Week & Annual Conference 2026), uliofanyika Novemba 5, 2026, katika ukumbi wa mikutano wa Cate Hotel, mkoani Morogoro.

Mkutano huo ulilenga kuwakutanisha wataalamu wa usimamizi wa miradi, viongozi wa taasisi mbalimbali na wadau wengine kwa ajili ya kubadilishana maarifa, uzoefu, ubunifu na kujadili namna bora ya kuimarisha usimamizi na utekelezaji wa miradi nchini.

Katika mkutano huo, Shirika la Posta Tanzania lilipata nafasi ya kushiriki katika mjadala wa jopo (Panel Discussion) uliokuwa na mada isemayo “Project Management Office in the Public Sector” (Ofisi ya Usimamizi wa Miradi katika Taasisi za Umma), ambapo Meneja wa Ofisi ya Miradi wa Shirika la Posta Tanzania, Bw. Seleman Daffy, alikuwa mzungumzaji (Speaker), huku Mjumbe wa Bodi na Makamu wa Rais wa Masuala ya Wanaojitolea wa Jumuiya ya Wataalamu wa Usimamizi wa Miradi Tanzania, Bi. Rahma Kova, akiwa msimamizi wa mjadala huo (Moderator).

Akizungumza mara baada ya kushiriki mjadala huo, Bw. Daffy amesema, majadiliano hayo yalikuwa na manufaa makubwa, kwani yalitoa fursa ya kubadilishana uzoefu na kuonesha umuhimu wa taasisi za umma na binafsi kuwa na ofisi maalumu za usimamizi wa miradi.

Amesema kupitia mjadala huo, imeonekana kuwa taasisi nyingine zinaweza kujifunza kutokana na uzoefu wa Shirika la Posta Tanzania katika kutekeleza mfumo huo wa usimamizi wa miradi.

Kwa upande wake, Bi. Rahma Kova, amesema Posta ilipewa nafasi hiyo kutokana na kutambuliwa kwake kama miongoni mwa taasisi chache zenye ofisi maalumu ya usimamizi wa miradi, hivyo uzoefu wake ulikuwa muhimu kushirikishwa na wataalamu wengine waliohudhuria mkutano huo.

Kupitia ushiriki huo, Shirika la Posta Tanzania limepata fursa ya kutangaza uzoefu wake katika usimamizi wa miradi na kushiriki katika mijadala ya kitaalamu inayolenga kuimarisha utendaji wa taasisi, matumizi bora ya rasilimali na utekelezaji wenye tija wa miradi kwa maendeleo ya Taifa.














Read more »

at Sunday, November 08, 2026 0
Kampuni ya mawasiliano ya Yas Tanzania imeahidi kuendelea kuunga mkono kampeni ya Afya Bora, Maisha Bora iliyo chini ya taaisisi ya Zanzibar Maisha Boara Foundation kwa miaka mitatu ijayo ili wananchi wengi zaidi Zanzibar waweze kunufaika na huduma za uchunguzi na matibabu bila malipo.

Afisa Mtendaji Mkuu wa Yas Tanzania, Bw. Pierre Canton Bacara, ametangaza ahadi hiyo siku ya leo 07.11.2026, wakati wa kufunga kambi ya sita ya matibabu ya kampeni hiyo katika viwanja vya Kinduni Academy, Mkoa wa Kaskazini Unguja.

Akifunga kambi hiyo, Makamu wa Pili wa Rais wa Zanzibar, Mhe. Hemed Suleiman Abdulla, ambaye pia ni mlezi wa kampeni hiyo, alisema kwa siku tano wakazi wa eneo hilo wamepata fursa ya kuonana na madaktari, kufanyiwa uchunguzi na kupata matibabu bila malipo.

Mhe. Abdulla alimpongeza Mwenyekiti wa ZMBF, Mama Mariam Mwinyi, kwa kufikisha huduma hizo katika maeneo mbalimbali ya Zanzibar. Pia aliishukuru Yas kwa kudhamini kambi ya Kinduni na ahadi yao ya kuunga mkono kampeni hiyo kwa miaka mitatu ijayo. Alisema Serikali ya Mapinduzi ya Zanzibar itaendelea kushirikiana na kuziunga mkono taasisi ambazo zinazoleta huduma za kijamii karibu zaidi na wananchi.

Kwa upande wake, Waziri wa Afya Zanzibar, Mhe. Nassor Ahmed Mazrui, alisema zaidi ya watu 4,200 walifika kambini katika siku nne za kwanza. Amewahimiza wale waliobainika kuwa na tatizo la kiafya wakati wa uchunguzi kufika mapema katika kituo cha afya au hospitali ili waendelee kupata huduma kabla hali zao hazijawa mbaya.

Akiwasilisha taarifa ya kitaalamu ya kambi hiyo, Katibu Mkuu wa Wizara ya Afya Zanzibar, Dkt. Mngereza Mzee Miraji, alisema serikali inalenga kuhakikisha kuwa ifikapo mwaka 2030, aina zote za huduma za uchunguzi wa magonjwa na matibabu ya kibingwa zinapatikana Zanzibar. Alisema hatua hiyo itapunguza gharama wanazobeba wagonjwa wanaolazimika kusafiri nje ya Zanzibar kufuata matibabu.

Mapema mwezi Mei mwaka huu, Dkt. Miraji alitangaza kuwa serikali inapanga kutumia shilingi trilioni moja kwa ajili ya huduma za afya kuanzia mwaka 2026 hadi 2030. Sehemu ya fedha hizo itatumika kuboresha vituo vya kutolea huduma za afya na kuimarisha huduma za afya ya msingi

Naye Afisa Mtendaji Mkuu wa Yas Bw. Pierre Canton Bacara alimshukuru Mama Mariam Mwinyi kwa kuikaribisha Yas kuwa mshirika rasmi wa kambi hiyo na kuongeza kuwa “Kwa miaka mitatu ijayo, tutaendelea kushirikiana na Zanzibar Maisha Bora Foundation ili kambi hii ifanyike kila mwaka na kuwafikia Wazanzibari wengi zaidi,” alisema.

Yas pia ilitoa kiti cha matibabu ya meno pamoja na vifaa vyake na vishikwambi (tablets) 30 kwa matumizi ya wahudumu wa afya baada ya kambi kumalizika. Bw. Bacara aliongeza kuwa kupitia kampeni ya Tumaini, wafanyakazi wa Yas wameweza kusaidia kuboresha huduma za afya ya uzazi katika hospitali ya Mwera Pongwe, Unguja, na Hospitali ya wilaya ya Kinyasini, Pemba. Alisema zaidi ya akina mama 3,000 wamenufaika na kampeni hiyo kwa Zanzibar pekee.

Kwa upande wake, Afisa Mtendaji Mkuu wa ZMBF, Bi. Rehema Tukai, alisema ushirikiano na Wizara ya Afya uliwawezesha wataalamu katika kambi ya Kinduni kutoa huduma za uchunguzi wa magonjwa ya moyo na saratani, kufanya upasuaji mdogo na kutoa huduma za afya ya uzazi, macho na ngozi. Alisema taasisi hiyo itaendelea kuandaa kambi katika maeneo mbalimbali ya Zanzibar ili kuwafikia wananchi wengi zaidi.

Hafla ya kufunga kambi hiyo pia iliambatana na uzinduzi wa Build Resilience, kampeni ya Umoja wa Wake wa Marais wa Afrika kwa Maendeleo (OAFLAD).

Makamu wa Pili wa Rais wa Zanzibar na mlezi wa kampeni ya Afya Bora, Maisha Bora, Mhe. Hemed Suleiman Abdulla, akimkabidhi Afisa Mtendaji Mkuu wa Yas Tanzania, Bw. Pierre Canton Bacara, tuzo ya kutambua mchango wa Yas, wakati wa hafla ya kufunga kambi ya sita ya matibabu ya kampeni hiyo iliyofanyika Novemba 7 katika viwanja vya Kinduni Academy, Mkoa wa Kaskazini Unguja. Wanaoshuhudia ni Waziri wa Afya Zanzibar, Mhe. Nassor Ahmed Mazrui (wa pili kutoka kushoto), Waziri wa Habari, Vijana, Utamaduni na Michezo, Mhe. Dkt. Riziki Pembe Juma (kushoto), na Afisa Mtendaji Mkuu wa Zanzibar Maisha Bora Foundation, Bi. Rehema Tukai (kulia). Katika hafla hiyo iliyohitimisha kambi ya siku tano, Yas iliahidi kuendelea kuunga mkono kampeni hiyo kwa miaka mitatu ijayo.










Read more »

at Sunday, November 08, 2026 0
Na Mwandishi Wetu.

MWENYEKITI wa Makampuni ya Mati Group of Companies Ltd, David Mulokozi, amechangia Sh milioni 100 kupitia kampuni ya Mati Super Brands Ltd pamoja na familia yake binafsi, kusaidia miradi ya maendeleo ya Jimbo Katoliki la Mbulu.

Mchango huo umetolewa katika harambee iliyofanyika ndani ya Dekania ya Babati, ikiwa ni sehemu ya maandalizi ya maadhimisho ya Jubilei ya Almasi ya miaka 75 tangu kuanzishwa kwa Jimbo Katoliki la Mbulu, ambapo Mulokozi alikuwa mgeni rasmi.

Akizungumza katika hafla hiyo, Mulokozi alisema mchango wake umetokana na imani yake kwa Mungu, akieleza kuwa kila alichonacho ni zawadi kutoka kwake na kwamba kuchangia maendeleo ya Kanisa na nyumba za ibada ni njia mojawapo ya kumshukuru Mungu.
Alisema kusaidia shughuli za maendeleo ya Kanisa kwake ni sehemu ya imani na nadhiri yake mbele za Mungu, huku akihimiza jamii kuendeleza utamaduni wa kujitolea kwa kuchangia miradi ya maendeleo kulingana na uwezo wa kila mmoja.

Aliongeza kuwa maendeleo ya taasisi za kidini yanahitaji ushirikiano wa waumini, wadau na watu wenye mapenzi mema, akisisitiza kuwa kila mchango unaotolewa kwa moyo wa kujitolea una nafasi muhimu katika kufanikisha malengo yaliyowekwa.

Akisoma taarifa ya harambee hiyo, Dekano wa Dekania ya Babati, Reginald Kimati, alisema jumla ya fedha zilizopatikana pamoja na ahadi zilizotolewa zimevuka Sh milioni 200 zilizolengwa kukusanywa katika dekania hiyo.

Alisema Jimbo Katoliki la Mbulu limeweka lengo la kukusanya Sh bilioni mbili kwa ajili ya kutekeleza miradi mbalimbali ya maendeleo, ikiwemo ujenzi wa hosteli za malazi, ukumbi, jukwaa la kudumu kwa ajili ya maadhimisho ya kijimbo pamoja na kuchangia ujenzi wa kituo cha kichungaji mjini Babati.
Kimati alisema kukamilika kwa miradi hiyo kutasaidia kuboresha mazingira ya huduma za kichungaji na kuongeza uwezo wa Kanisa kuhudumia waumini pamoja na wadau mbalimbali watakaoshiriki shughuli za kijimbo.

Kwa upande wake, Askofu wa Jimbo Katoliki la Mbulu, Mhashamu Anthony Lagwen, alimpongeza Mulokozi kwa mchango wake na moyo wa kujitolea, akisema hatua hiyo ni mfano mzuri wa ushirikiano katika kuendeleza miradi ya Kanisa.
Alisisitiza kuwa fedha zitakazokusanywa zitatumika kwa malengo yaliyokusudiwa ili kuhakikisha miradi iliyopangwa inatekelezwa na kuleta manufaa kwa Kanisa na waumini wake.

Aidha, aliwahimiza waumini na wadau wengine kuendelea kushiriki katika kuchangia miradi hiyo ili kufanikisha lengo la Sh bilioni mbili na kuhakikisha maandalizi ya maadhimisho hayo yanakamilika kwa wakati.
 Maadhimisho ya Jubilei ya Almasi ya miaka 75 ya Jimbo Katoliki la Mbulu yanatarajiwa kufanyika Machi 2028, yakikumbuka historia ya kuanzishwa kwa jimbo hilo Machi 25, 1953.

Fupisha habari kuwa ya gazetiBoresha kichwa kivutie zaidiAndika kwa mtindo wa habari fupi.
Read more »
Older Posts
Subscribe to: Posts (Atom)

Top News