Habari Za Hivi Punde Habari Za Hivi Punde
Soma zaidi

at Thursday, November 05, 2026 0
Benki ya NMB imepata mkopo wa dola za Marekani milioni 30 kutoka Benki ya Maendeleo ya China (CDB) kwa ajili ya kuongeza upatikanaji wa mitaji kwa biashara ndogo na za kati nchini Tanzania. Makubaliano hayo yametiwa saini katika Makao Makuu ya NMB jijini Dar es Salaam, yakilenga kuchochea ukuaji wa biashara na kuimarisha ushirikiano wa kifedha kati ya Tanzania na China.

Akizungumza katika hafla hiyo, Mkurugenzi Mtendaji na Afisa Mtendaji Mkuu wa NMB, Ruth Zaipuna, amesema fedha hizo zitaongeza uwezo wa benki kufadhili wafanyabiashara wanaohitaji mitaji ya kupanua shughuli zao. Amesema upatikanaji wa fedha ni muhimu katika kukuza biashara, kuongeza uzalishaji na kuchochea ajira nchini.

Zaipuna amesema ushirikiano huo pia utaimarisha huduma za kifedha kwa wafanyabiashara wanaofanya biashara na China. Kupitia mfumo wa CIPS, NMB inatoa huduma za malipo kwa sarafu ya China (RMB), akaunti za biashara na ufadhili wa biashara za kimataifa, huku ikiunganisha wafanyabiashara wa Tanzania na wazalishaji wa China kupitia maonesho ya Canton Fair.

Makubaliano hayo yanafikiwa wakati NMB ikiwa imetambuliwa na jarida la Global Finance kuwa Benki Bora kwa Biashara Ndogo na za Kati Tanzania mwaka 2026. Mkopo huo unatarajiwa kuongeza fursa za mitaji kwa wajasiriamali, kuimarisha biashara kati ya Tanzania na China na kuunga mkono utekelezaji wa Dira ya Taifa ya Maendeleo 2050.









Read more »

at Thursday, November 05, 2026 0
Na Jane Mwakyoma, Rukwa

NAIBU Katibu Mkuu wa Chama Cha Mapinduzi (CCM) Zanzibar, Abdi Mahamoud Abdi, amewataka viongozi wa chama hicho mkoani Rukwa kulinda na kuendeleza umoja na mshikamano uliopo ndani na nje ya chama ili kuhakikisha unadumu na kurithishwa kwa vizazi vijavyo.

Abdi alimeyasema hayo Novemba 5, 2026, alipomwakilisha Mlezi wa CCM Mkoa wa Rukwa, Jamal Kassim Ali, ambaye pia ni Mjumbe wa Halmashauri Kuu ya Taifa (NEC), katika kikao cha Halmashauri Kuu ya CCM Mkoa kilicholenga kusimamia vikao vya tathmini ya Uchaguzi Mkuu wa mwaka 2025, kupitia utekelezaji wa majukumu ya chama na Serikali pamoja na kujadili mapendekezo ya utekelezaji wa Ilani ya Uchaguzi ya CCM.

Alisema umoja na mshikamano ni msingi muhimu wa maendeleo ya taifa, hivyo viongozi wa chama na Serikali wanapaswa kuudumisha kupitia utendaji wao wa kila siku.

Aidha, aliwashukuru viongozi hao kwa kuendelea kudumisha mshikamano na kuwataka kuulinda Muungano ulioasisiwa na viongozi waasisi wa Taifa, Hayati Mwalimu Julius Nyerere na Hayati Abeid Amani Karume.

"Kama wasingekuwa viongozi wetu hawa wawili, Mwalimu Nyerere na Rais Karume, nchi hizi mbili zisingekuwa na Muungano huu wala umoja huu. Muungano wa ASP na TANU ndiyo uliofanya CCM kuwa hapa. Nataka kuwaambia kuwa mshikamano ndiyo msingi wetu, hasa kwa nchi yetu," alisema  Abdi 

Alisisitiza kuwa viongozi hao wanapaswa kujiandaa na uchaguzi ndani ya chama kwa kuhakikisha unafanyika kwa amani, utulivu na demokrasia, huku wakiepuka vitendo vinavyoweza kuvuruga umoja uliojengwa ndani ya CCM.

"Nataka kuona mshikamano huu mlionionyesha hapa hata baada ya uchaguzi nione ukiendelezwa," alisisitiza.

Awali, Mwenyekiti wa CCM Mkoa wa Rukwa, Silafu Maufi, akimkaribisha Naibu Katibu Mkuu huyo, alisema kikao hicho kililenga kujadili tathmini ya kazi za chama na Serikali pamoja na mapendekezo ya utekelezaji wa Ilani ya Uchaguzi ya CCM.

Aliwataka wajumbe wa kikao hicho kujadili na kutathmini ajenda zilizowasilishwa kwa kuzingatia maslahi ya maendeleo ya taifa.

Maufi aliongeza kuwa siasa zinapotumika vizuri huwa chachu ya kujenga uchumi na kuleta maendeleo, hivyo viongozi wanapaswa kuzitumia kwa manufaa ya nchi.

"Siasa ni uchumi na siasa ni maendeleo, na ndani ya maendeleo kuna siasa," alisema Maufi.







Read more »

at Thursday, November 05, 2026 0

Kuimarika kwa uzalishaji wa bidhaa nchini kunatarajiwa kuwa miongoni mwa nguzo muhimu za kukuza uchumi jumuishi, kupanua fursa za ajira na kuongeza ushindani wa bidhaa za Tanzania katika masoko ya ndani na nje ya nchi, kupitia utekelezaji wa sera mpya ya Maendeleo Endelevu ya viwanda na sera ujasiriamali Ndogo na za kati ya mwaka 2003 Toleo la mwaka 2025.

Akizungumza na Waandishi wa habari Jijini Dodoma, Mkurugenzi Mkuu wa Taasisi ya Uhandisi na Usanifu Mitambo Tanzania (TEMDO) Eng. Profesa Frederick C. Kahimba, amesema sera hizo zimeweka msingi wa kuimarisha uwezo wa viwanda vya ndani kuchakata malighafi zinazopatikana nchini na kuzibadilisha kuwa bidhaa zenye thamani hatua itakayosaidia kuongeza mchango wa sekta hiyo katika uchumi wa taifa.

Akizungumza mara baada ya hafla ya uzinduzi wa sera hizo, Kahimba amesema maendeleo ya viwanda yana nafasi kubwa katika kutatua changamoto ya ukosefu wa ajira, akitoa mfano wa viwanda vikubwa vya nguo ambavyo vina uwezo wa kuajiri maelfu ya Watanzania na kuchochea shughuli nyingine za kiuchumi.

Amesema kuongeza uzalishaji wa bidhaa zinazotengenezwa nchini kutasaidia kupunguza utegemezi wa bidhaa kutoka nje, kulinda ajira za ndani na kupunguza matumizi ya fedha za kigeni, huku uzalishaji wa ziada ukifungua fursa za kuuza bidhaa za Tanzania katika masoko ya kimataifa.

Akifafanua mchango wa taasisi anayoiwakilisha katika kukuza sekta hiyo, Kahimba amesema ina majukumu ya kufanya tafiti za teknolojia za viwandani, kutoa huduma za kihandisi kwa viwanda, kuandaa mafunzo ya kitaalamu na kubuni teknolojia zinazoongeza thamani ya mazao na bidhaa mbalimbali.

Ameeleza kuwa teknolojia hizo zinahusisha sekta za kilimo, mifugo, madini na afya, kwa lengo la kuongeza tija na kujenga uwezo wa kutumia rasilimali zilizopo nchini kuzalisha bidhaa zenye thamani zaidi.

Aidha, amewahimiza Watanzania kuunga mkono bidhaa zinazozalishwa nchini kwa kuzitumia na kuziamini, akisisitiza kuwa mafanikio ya sera hizo yanahitaji ushirikiano wa Serikali, sekta binafsi, wajasiriamali na wananchi katika kujenga viwanda imara vitakavyopanua ajira na kuchochea ukuaji wa uchumi.

Taasisi ya Uhandisi na Usanifu Mitambo Tanzania (TEMDO) inabuni na kutengeneza mashine mbalimbali za kusaidia uzalishaji na kuongeza thamani ya malighafi, miongoni mwa mashine hizo ni za kukamua mafuta ya alizeti, kusindika matunda, kupukuchua mahindi, kusindika maziwa na asali, kutengeneza chakula cha mifugo na kuchakata ngozi, pia hutengeneza vifaa tiba kama vitanda vya wagonjwa, kwa lengo la kupunguza gharama za uzalishaji na kukuza viwanda vya ndani.





Read more »

at Thursday, November 05, 2026 0

Naibu Kamishna na Mkurugenzi wa Mipango na Masoko wa Wakala wa Huduma za Misitu Tanzania (TFS), Salehe Beleko, amesema kutoa elimu kwa watumishi wa Wakala huo kuhusu madhara ya rushwa, hatua za kukabiliana nayo, sambamba na kuimarisha maadili, uwajibikaji na uadilifu katika utendaji kazi, utaongeza uelewa na kuimarisha uwezo wa watumishi katika kupambana na vitendo vya rushwa.

Akizungumza katika semina ya maadili na mapambano dhidi ya rushwa kwa watumishi wa TFS jijini Dodoma, Beleko amesema pamoja na elimu inayotolewa lakini bado mapambano dhidi ya rushwa yanahitaji kuendelea kuimarishwa kupitia mafunzo na usimamizi wa utekelezaji wa miongozo iliyopo, ameeleza kuwa TFS ina utaratibu wa kuchukua hatua kali kwa watumishi watakaobainika kujihusisha na vitendo vya rushwa.

Aidha, amesisitiza kuwa wananchi wanapaswa kupata huduma kwa kufuata taratibu zilizowekwa na Serikali bila kulazimishwa kutoa fedha au rushwa ya aina yoyote, huku watumishi wakitakiwa kutoa taarifa sahihi kuhusu upatikanaji wa huduma na muda wa kuzitoa.

Kwa upande wake, Askari Daraja la Pili Jesicka Michael, amesema elimu ya kuzuia na kupambana na rushwa inapaswa kuendelea kutolewa kwa jamii ili kuwajengea wananchi uelewa na kuwahamasisha kutoshiriki vitendo hivyo, akisisitiza kuwa rushwa ni adui wa haki.

Naye Askari Mhifadhi Daraja la Pili wa TFS, Godfrey Raphael Mbazo, amesema mafunzo hayo yamemwongezea uelewa kuhusu maana ya rushwa, madhara yake na namna ya kukabiliana nayo, jambo litakalomsaidia kutekeleza majukumu yake kwa kufuata sheria bila upendeleo wala kushawishiwa na rushwa, amewataka watumishi wa umma kuzingatia sheria na viapo vyao vya kazi, kufanya kazi kwa uadilifu na kutoa elimu kwa jamii kuhusu madhara ya rushwa.

Semina hiyo iliyoanza Novemba 2 na kufungwa rasmi Novemba 3, 2026, ni sehemu ya juhudi za TFS kuimarisha maadili, uwajibikaji na mifumo ya kuzuia na kupambana na rushwa katika utekelezaji wa majukumu yake ya uhifadhi wa misitu nchini.





Read more »

at Thursday, November 05, 2026 0

Benki ya CRDB imesaini makubaliano ya kimkakati ya ushirikiano na Benki ya Maendeleo ya China (China Development Bank – CDB), yanayofungua fursa za ufadhili wa miradi mikubwa ya kimkakati, uwekezaji na maendeleo ya sekta muhimu za uchumi, ikiwa ni sehemu ya kuunga mkono utekelezaji wa Dira ya Taifa ya Maendeleo 2050. Ushirikiano huo pia unalenga kuimarisha biashara kati ya Tanzania na China, ambayo thamani yake inatarajiwa kuvuka Shilingi trilioni 31 mwaka 2026.

Makubaliano hayo yanafungua fursa za ufadhili katika sekta za nishati, madini, viwanda, biashara ndogo na za kati, pamoja na miradi ya maendeleo endelevu. Miongoni mwa miradi inayotazamwa kunufaika na fursa za ushirikiano huo ni ujenzi wa Kituo cha Kuhifadhi na Kuchakata Taarifa (Data Centre) Zanzibar na mradi wa kufufua na kuboresha Reli ya Tanzania na Zambia (TAZARA). 

Hafla ya utiaji saini iliyofanyika katika Makao Makuu ya Benki ya CRDB jijini Dar es Salaam imehudhuriwa na viongozi mbalimbali wa benki hiyo wakiongozwa na Mwenyekiti wa Bodi ya Wakurugenzi, Prof. Neema Mori, ambaye ameeleza kuwa ushirikiano huo ni hatua muhimu katika kuimarisha nafasi ya Benki ya CRDB kama mshirika wa kimkakati katika maendeleo ya Taifa, hususan katika kuvutia mitaji ya kimataifa kwa ajili ya utekelezaji wa miradi mikubwa itakayochochea mageuzi ya kiuchumi.

Kwa upande wake, Mkurugenzi Mtendaji wa Benki ya CRDB, Dkt. Abdulmajid Nsekela, amesema ushirikiano huo unafungua ukurasa mpya wa fursa za uwekezaji kwa kuunganisha mitaji ya kimataifa na mahitaji ya maendeleo nchini, huku ukitarajiwa kuchochea ukuaji wa viwanda, kuongeza ajira, kuimarisha miundombinu na kukuza ushindani wa Tanzania katika biashara za kikanda na kimataifa, na kufanikisha malengo ya Dira ya Taifa ya Maendeleo 2050.

Naye Rais wa Benki ya Maendeleo ya China, Huang Zhiqiang, ameeleza kuwa ushirikiano huo unaimarisha uhusiano wa kifedha na kiuchumi kati ya Tanzania na China, huku ukifungua fursa za kuendeleza miradi yenye tija na uwekezaji wa muda mrefu utakaonufaisha wafanyabiashara na wananchi wa nchi zote mbili.












Read more »

at Thursday, November 05, 2026 0




Bodi ya Usimamizi wa Stakabadhi za Ghala (WRRB) imeeleza hatua inazochukua kutekeleza maagizo ya Makamu wa Rais, Mhe. Deogratius Ndejembi, kuhusu kuongeza fursa za ajira kwa vijana nchini.

Maagizo hayo yalitolewa hivi karibuni jijini Arusha wakati wa Mkutano wa Watendaji Wakuu wa Taasisi za Serikali, ambapo Makamu wa Rais alielekeza kila mkuu wa taasisi kuhakikisha anaweka mpango madhubuti wa kuongeza fursa za ajira kwa vijana.

Akizungumza na waandishi wa habari jijini Dodoma kuhusu mchango wa Mfumo wa Stakabadhi za Ghala katika utekelezaji wa Sera ya Maendeleo Endelevu ya Viwanda ya Mwaka 2025 na Marejeo ya Sera ya Maendeleo ya Wajasiriamali Wadogo na wa Kati ya Mwaka 2003, Toleo la Mwaka 2025, Mkurugenzi Mtendaji wa WRRB, Bw. Asangye Bangu, amesema zaidi ya vijana 3,000 wamepata fursa za ajira kupitia mfumo huo kwa kufanya kazi katika maghala mbalimbali nchini.

Bw. Bangu amesema Mfumo wa Stakabadhi za Ghala umeendelea kuwa kichocheo cha ajira kwa vijana, hususan katika shughuli za upokeaji, uhifadhi, upimaji na usimamizi wa bidhaa ghalani, hatua inayochangia kuongeza ushiriki wao katika shughuli za kiuchumi.

Aidha, amesema kumekuwa na ongezeko kubwa la mwamko wa vijana kushiriki mafunzo yanayowawezesha kupata ujuzi wa kufanya kazi katika maghala yanayotumia Mfumo wa Stakabadhi za Ghala.

“Awali tulikuwa tunapata washiriki kati ya 15 hadi 20 katika mafunzo haya, lakini sasa idadi imeongezeka hadi kufikia vijana 150 wanaohudhuria mafunzo kwa wakati mmoja. Hii inaonesha namna vijana wanavyozidi kutambua fursa zilizopo katika Mfumo wa Stakabadhi za Ghala,” amesema Bw. Bangu.

Ameeleza kuwa WRRB itaendelea kuimarisha utoaji wa mafunzo na kuhamasisha vijana kuchangamkia fursa zinazotokana na kupanuka kwa matumizi ya Mfumo wa Stakabadhi za Ghala katika sekta mbalimbali, ikiwa ni sehemu ya kuunga mkono juhudi za Serikali za kuongeza ajira na kukuza uchumi wa wananchi.
Read more »

at Thursday, November 05, 2026 0
▪️︎ Ataka wakulima wapate masoko ya kudumu

▪️︎ Bei ya kununua mahindi yaongezwa hadi shilingi 500

WAZIRI MKUU Dkt. Mwigulu Nchemba ameitaka Wakala wa Taifa wa Hifadhi ya Chakula (NFRA) kuharakisha taratibu za kuuza mazao pindi masoko yanapopatikana, ili kuepuka kupoteza fursa hizo kutokana na michakato mirefu.

Vilevile, amezitaka taasisi zinazohusika kuendelea kutafuta masoko ya kudumu na kuwezesha uuzaji wa mazao nje ya nchi, huku akieleza kuwa bei ya kununua mahindi kupitia NFRA imeongezwa kutoka shilingi 450 hadi shilingi 500.

Amesema hayo Bungeni, jijini Dodoma leo (Alhamisi, Novemba 05, 2026), wakati wa kipindi cha maswali ya papo kwa papo kwa Waziri Mkuu, katika Mkutano wa Tano, Kikao cha Nane cha Bunge la 13.

Alikuwa akijibu swali la Mbunge wa Kongwa, Isaya Mngurumi Moses, aliyetaka kufahamu mikakati ya Serikali ya kutafuta masoko na kuboresha bei za mazao ili wakulima wanufaike na uzalishaji wao.

Dkt. Mwigulu amesema NFRA inapopata masoko inapaswa kukamilisha taratibu za mauzo kwa wakati, kwa sababu ucheleweshaji unaweza kuwafanya wanunuzi kupata mazao katika masoko mengine yenye michakato mifupi zaidi.

Amesema Serikali imekuwa ikitumia mazungumzo na viongozi wa mataifa mbalimbali kutafuta masoko ya mazao ya Tanzania na kupanua wigo wa biashara kwa wakulima.

Kuhusu bei ya mahindi, Waziri Mkuu amesema amekutana na Wizara yenye dhamana ya kilimo mara kadhaa kujadili namna ya kuboresha bei ya ununuzi kupitia NFRA.

Amesema bei hiyo iliongezwa kutoka shilingi 200 hadi shilingi 300, baadaye shilingi 450 na sasa shilingi 500.

“Tulikaa tena kwa mara ya mwisho, tukashauriana kwamba kama bado wanaweza kwenda juu zaidi, wafanye hivyo, na tulikubaliana sasa watapeleka iwe shilingi 500,” amesema.

Amewataka wakulima wenye mahindi wanayohitaji kuuza kufika katika ofisi za NFRA za mikoa na kanda ili kutumia fursa ya bei hiyo iliyoboreshwa.

Hata hivyo, amesema NFRA huenda isiweze kununua mahindi yote, hivyo jitihada za kupanua masoko na kuwezesha mauzo nje ya nchi zinapaswa kuendelea.

Katika hatua nyingine, Waziri Mkuu amewaelekeza Wakuu wa Mikoa kuchukua hatua kali dhidi ya watu wanaopeleka mifugo katika mashamba ya wakulima bila ridhaa yao, akisisitiza kuwa Serikali haitakubali uvunjaji wa sheria wa makusudi.

Akijibu swali la Mbunge wa Nachingwea, Fadhili Ally Liwaka, kuhusu migogoro ya wakulima na wafugaji, amesema hatua zinapaswa kuchukuliwa dhidi ya mtu aliyefanya kosa, bila kugeuza tukio hilo kuwa mgogoro kati ya jamii.

“Kama mmoja amefanya kosa hilo, achukuliwe hatua kali huyo huyo. Wala wakulima wasione wafugaji ni adui zao, na wala wafugaji wasione wakulima ni adui zao,” amesema.

Amewataka wananchi kuepuka kujichukulia sheria mkononi na badala yake kutumia vyombo vya sheria kutafuta haki.

Vilevile, amewaelekeza viongozi katika ngazi mbalimbali kuimarisha mipango ya matumizi bora ya ardhi na kusitisha ugawaji wa maeneo kinyemela. Amesema rushwa, matumizi mabaya ya ofisi na ugawaji wa ardhi usiofuata taratibu vinachochea migogoro katika jamii.

Kuhusu huduma za afya, Waziri Mkuu amesema Serikali itafanya uandikishaji wa awamu ya pili wa bima ya afya kwa wote ili kuendelea kuyafikia makundi ambayo bado hayajafikiwa.

Akijibu swali la Mbunge wa Viti Maalum, Stella Alex Ikupa, kuhusu matibabu kwa watu wenye ulemavu ambao bado hawajafikiwa na mpango huo, amezitaka taasisi za afya kuendelea kuwahudumia kupitia dirisha la msamaha wa matibabu.

“Pasitokee mtu kukosa matibabu kwa sababu ya hali yake ya ulemavu ama hali yake ya kifedha,” amesema.

Amewahimiza pia Watanzania kuendelea kujisajili katika mfumo wa bima ya afya kwa wote, akisisitiza kuwa mpango huo unalenga wananchi wote, wenye kipato na wasio na kipato.






Read more »

at Thursday, November 05, 2026 0

Waswahili husema Mchumia janga hula na wa kwao wakimaanisha unaweza sababisha hatari ya jambo kutokea na kudhuru wengine; Ndivyo ilivyo hatari ya kuwa karibu na faru ukiwa katika Hifadhi ya Ngorongoro hasa Kasoko ya Ngorongoro (Ngorongoro Crater) ambapo wanyama hao wamekuwa wakionekana kwa wingi na ukaribu usiozidi meter 150.

Wageni mamia kwa maelfu  wanaotembelea hifadhi ya Ngorongoro ambayo ni urithi wa dunia huwa na mshawasha au shauku ya kuwasogelea faru hasa kwa karibu wakiongozwa na waongoza watalii.

Jambo hili kisheria halikubaliki na kumsogelea Faru kwa ukaribu zaidi inapobainika  utapigwa faini kwani unaweza kusababisha usumbufu kwa mnyama, kumpa msongo wa mawazo na kusababisha maafa kwa wageni ambao wapo kwenye chombo cha usafiri hasa kutokana na tabia za faru za kutopenda usumbufu, bughdha au kelele

Faru hasa F aru Mweusi akiwa amekasirika anaweza kupindua gari na kusababisha kuua wageni wote ndani ya gari na ndiyo maana imekuwa ikisisitizwa kwamba unapokuwa ndani ya hifadhi ya Ngorongoro ni muhimu kufuata sheria na taratibu za uhifadhi.

Kitabia Faru ni miongoni mwa Wanyama wakali, wanahitaji eneo kubwa la malisho (home range), muda mwingi wa mchana anautumia kupumzika katika eneo ambalo ni tulivu lisilokuwa na wanyama wengi wasumbufu na mara nyingi kila eneo analopita huweka alama maalum ambazo kwake zinaashiria eneo la utawala.

Faru hapendi Kelele au sauti zenye usumbufu mithili ya Kariakoo au Mbagala na ndiyo maana akisikia kelele husimama kwa uangalifu na kusikilizia harufu na sauti inapotoka, akigundua ulipo hapo ndipo mwisho wa maisha yako na msemo wa Mchumia  janga hula na wa kwao huwa umetimia.



Read more »

at Thursday, November 05, 2026 0

Na Janeth Raphael - MichuziTv Bungeni 

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, amesema Serikali chini ya uongozi wa Rais Dkt. Samia Suluhu Hassan inaendelea kulipa uzito mkubwa suala la Katiba Mpya, huku akisisitiza kuwa dhamira ya kufufua mchakato huo ipo.

Dkt. Mwigulu amesema tayari Serikali imeweka wazi msimamo wake kuhusu umuhimu wa mchakato huo na mwongozo wa kuendeleza suala la Katiba Mpya umetolewa.

Waziri Mkuu ameyasema hayo leo Bungeni wakati akijibu swali la Mbunge wa Jimbo la Tunduru Kaskazini, Mhe. Ado Shaibu, aliyetaka kufahamu ni lini mchakato wa kupata Katiba Mpya utaanza na utakuwa na sura gani.

Akijibu hoja hiyo, Dkt. Mwigulu amesema suala la Katiba Mpya ni miongoni mwa masuala yenye umuhimu mkubwa kwa Watanzania, hivyo Serikali inalichukulia kwa uzito unaostahili.

Amesema dhamira ya Serikali katika kufufua mchakato huo pia imeainishwa katika Ilani ya Uchaguzi, jambo linaloonesha msimamo wa Serikali wa kuhakikisha suala hilo linapatiwa kipaumbele.

Kwa mujibu wa Waziri Mkuu, Serikali inaendelea kufanyia kazi mwelekeo uliowekwa ili kuhakikisha mchakato huo unapoendelea unazingatia maslahi mapana ya Watanzania na matarajio yao kuhusu mustakabali wa Taifa.

Kauli hiyo ya Waziri Mkuu imeweka msisitizo mpya kuhusu dhamira ya Serikali ya kuendeleza mchakato wa Katiba Mpya, huku Watanzania wakisubiri hatua na maelekezo zaidi kuhusu namna na muda wa utekelezaji wa mchakato huo.



Read more »

at Thursday, November 05, 2026 0
Kampuni ya Mawasiliano - Yas Tanzania imeahidi kuendelea kushirikiana na Taasisi ya Zanzibar Maisha Bora Foundation (ZMBF) ili kuhakikisha wananchi wengi zaidi visiwani humo wanapata huduma za kibingwa kupitia kambi za afya zinazoratibiwa na taasisi ya ZMBF.

Ahadi hiyo ilitolewa wakati wa ufunguzi wa kambi ya matibabu ya Afya Bora, Maisha Bora kwa kushirikiana na Wizara ya Afya Zanzibar huko Kinduni, Wilaya ya Kaskazini B chini ya udhamini wa Kampuni ya Mawasiliano ya Yas Tanzania. Kupitia kambi zake za afya, taasisi hiyo imefanikiwa kuwafikia zaidi ya watu 30,400 mpaka sasa.

Wakazi wa Mkoa wa Kaskazini Unguja wanaweza kufanyiwa uchunguzi wa saratani ya matiti na ya shingo ya kizazi katika kambi hiyo, pamoja na kupata huduma za macho, kinywa, masikio, pua na koo. Pia wana fursa ya kuchangia damu kwa hiari.

Akifungua kambi hiyo, Waziri wa Afya Zanzibar, Mhe. Nassor Ahmed Mazrui, alisema kuwaleta wataalamu karibu na wananchi kunapunguza gharama ambazo familia zingetumia kusafiri kutafuta matibabu. Alisema kambi hizo pia zinawapa wananchi fursa ya kujua hali zao za afya na kupata ushauri wa kitaalam kwa wakati.

Mazrui alisema Serikali ya Mapinduzi ya Zanzibar inaendelea kuboresha majengo ya kutolea huduma za afya, vifaa tiba na mazingira ya kazi ya watumishi wa afya. Katibu Mkuu wa Wizara ya Afya Zanzibar, Dkt. Mngereza Mzee Miraji, alisema uwekezaji wa Serikali katika kipindi cha kwanza cha uongozi wa Rais Dkt. Hussein Ali Mwinyi ulihusisha hospitali kumi za wilaya.

Naye, Afisa Mtendaji Mkuu wa Taasisi ya Zanzibar Maisha Bora, Bi. Rehema Tukai, alisema Afya Bora, Maisha Bora ni kampeni endelevu na akiwahimiza wananchi kutumia huduma za kinga na tiba zinazotolewa kupitia kambi hizo.

Kwa upande wake, Mkuu wa Yas Zanzibar, Ndugu Waqid Mohamed Waqid alisema, ni faraja kwa Kampuni ya Mawasiliano ya Yas kushiriki katika masuala ya kijamii nje ya kusogeza huduma za mawasiliano karibu kwa wakazi wa Zanzibar. "Tutaendelea kushirikiana na Taasisi ya Zanzibar Maisha Bora Foundation ili wananchi wengi zaidi waweze kuonana na madaktari bingwa na kupata msaada wa kitaalam."

Kwa upande wake Mkuu wa Mkoa wa Kaskazini Unguja, Galos Casian Nyimbo, aliwahimiza wakazi wa mkoa huo kujitokeza kwa wingi ili wafanyiwe uchunguzi na kupata ushauri wa madaktari bingwa.
Waziri wa Afya Zanzibar, Mhe. Nassor Ahmed Mazrui, akizungumza wakati wa ufunguzi wa kambi ya matibabu ya Afya Bora, Maisha Bora huko Kinduni, Wilaya ya Kaskazini B, Unguja. Anayeshuhudia kushoto ni Mkuu wa Yas Zanzibar, Bw. Mohamed Waqid. Yas Tanzania imeahidi kuendelea kusaidia kambi za afya zinazoandaliwa na Taasisi ya Zanzibar Maisha Bora Foundation ili wakazi wengi zaidi Zanzibar wapate huduma za madaktari bingwa karibu na maeneo wanayoishi.

Read more »

at Thursday, November 05, 2026 0

Ujenzi wa Ghala Jipya la Bohari ya Dawa (MSD) Kanda ya Kagera lililopo Chato, mkoani Geita, umefikia asilimia 97 ya utekelezaji, hatua inayotarajiwa kuongeza uwezo wa taasisi hiyo kuhifadhi bidhaa za afya kwa ufanisi zaidi katika mikoa ya Kagera, Geita na maeneo jirani pindi litakapoanza kutumika.

Ghala hilo lenye ukubwa wa mita za mraba 4,800 na kugharimu kiasi cha Shilingi Bilioni 19 linatarajiwa kuwa kitovu muhimu cha kuhifadhi na kusambaza bidhaa za afya, huku likiongeza wigo wa huduma kutoka halmashauri 11 zinazohudumiwa sasa hadi Halmashauri 17.

Meneja wa MSD Kanda ya Kagera, Kalendero Masatu, amesema kukamilika kwa ghala hilo kutawawezesha kuongeza uwezo wa kuhifadhi bidhaa nyingi zaidi katika ubora unaohitajika na kupanua huduma kwa wateja wake.

“Tunatoa huduma kutokea ofisi zetu zilizopo Wilaya ya  Muleba, Mkoa wa Kagera katika mazingira magumu kutokana na ufinyu wa nafasi ya kuhifadhi bidhaa pamoja na changamoto za hali ya hewa, hususan mvua nyingi zinazonyesha katika eneo hilo” amesema Masatu.

Ameeleza kuwa kupitia ghala jipya la Chato, Kanda hiyo itaongeza maeneo ya huduma kwa kujumuisha halmashauri zilizokuwa zikihudumiwa na Kanda ya Mwanza, pamoja na kuongeza halmashauri nyingine mbili kutoka Mkoa wa Kigoma, zilizokuwa zikihudumiwa na Kanda ya Tabora.

“Kwa uwepo wa ghala hili sasa tunaenda kutunza mzigo mkubwa na hivyo tutaweza kuwahudumia wateja wetu kwa upana zaidi. Pia, maeneo haya yako karibu nasi, hivyo tutarahisisha usambazaji na kupunguza gharama ambazo taasisi ilikuwa ikitumia,” amesema Masatu.

Kwa upande wa utekelezaji wa mradi, Mhandisi wa Kampuni ya HAINAN International Ltd, Patrick Laibo, amesema ujenzi ulianza Agosti 20, 2025 na ulipangwa kutekelezwa kwa kipindi cha miezi 14.

Amesema kwa sasa jengo la ofisi limefikia asilimia 99 ya utekelezaji, ghala kuu likiwa katika asilimia 96 kutokana na kazi za mwisho za ufungaji na ukamilishaji wa mfumo wa viyoyozi (AC), huku miundombinu ya nje ikiwa karibu kukamilika kwa asilimia 100.

Ameongeza kuwa kwa ujumla mradi umefikia asilimia 97 na kazi zilizobaki ni za ukamilishaji wa mifumo na maeneo machache ya mradi.

Mbali na kuimarisha miundombinu ya MSD, mradi huo umekuwa chanzo cha ajira kwa wananchi wa Chato, ambapo zaidi ya vijana 100 wamepata fursa za ajira kupitia utekelezaji wake. Mhandisi Laibo amesema mradi huo umechangia pia kuwajengea vijana uwezo na uzoefu wa kitaalamu kupitia ushiriki wao katika shughuli mbalimbali za ujenzi.

Akizungumzia mazingira ya kazi katika ghala hilo, Afisa Huduma kwa Wateja wa MSD Kagera, Julieth Msele, amesema jengo hilo lina nafasi kubwa na mazingira mazuri yatakayorahisisha utoaji wa huduma kwa wateja pamoja na uhifadhi wa bidhaa mbalimbali za afya.

Naye Fundi wa Mifumo ya Njia ya Hewa, Joseph Mwatoine, amesema mradi huo umekuwa fursa muhimu kwa vijana kupata ajira, kujiongezea kipato na kupata uzoefu wa kitaalamu kupitia ushiriki wao katika utekelezaji wa kazi mbalimbali za ujenzi.

Bi. Hellen Juma, mkazi wa Chato ameishukuru Serikali kwa kuleta mradi huo katika eneo hilo, akieleza kuwa mbali na kutoa ajira kwa wananchi, uwepo wa ghala hilo utarahisisha upatikanaji wa dawa kwa vituo vya kutolea huduma za afya vilivyopo maeneo ya jirani.










Read more »

at Thursday, November 05, 2026 0
Mratibu wa Mradi wa Tuinuke Pamoja kutoka Shirika la Aga Khan Foundation, Magreth Lushakuzi, amewahimiza wajasiriamali na vikundi vya wanufaika wa mradi huo katika Halmashauri zote nane za Mkoa wa Dodoma, kutumia maonesho ya biashara yanayofanyika katika maeneo mbalimbali nchini kama fursa ya kutafuta masoko, kujifunza teknolojia mpya na kupanua shughuli zao za biashara.

Akizungumza Novemba 4, 2026, jijini Dodoma, amesema ushiriki wa vikundi hivyo katika Maonesho ya Bidhaa za Viwanda na Biashara umeviwezesha kukutana na wajasiriamali wengine, viongozi wa Serikali na kampuni zinazotengeneza mashine na vifaa vya uzalishaji, hivyo kupata maarifa na fursa za kuboresha bidhaa na kuongeza uwezo wa uzalishaji.

Amesema kupitia Mradi wa Tuinuke Pamoja unaofadhiliwa na Ubalozi wa Ireland nchini Tanzania, Aga Khan Foundation inalenga kuwawezesha wanawake kiuchumi katika ngazi ya jamii kupitia kuwajengea uwezo na kuimarisha shughuli zao za kiuchumi, huku akiwataka wanufaika kutumia elimu na mitandao waliyoipata kukuza biashara zao na kujenga ujasiriamali endelevu.

Kwa upande wake, mnufaika wa Mradi wa Tuinuke Pamoja na mwakilishi wa Kikundi cha Kondoa Women Group mkoani Dodoma, Haruna Makunga, amesema ushiriki wao katika maonesho hayo umewapa fursa ya kutangaza bidhaa zao, kujifunza mbinu za kuboresha uzalishaji na kufahamu taratibu za usajili na viwango vya ubora ili kuongeza ushindani na kupanua wigo wa biashara zao.

Naye mnufaika wa mradi huo kutoka Kikundi cha JUWACHA kilichopo Chamwino Ikulu, amesema mafunzo waliyopata kupitia mradi huo yamewawezesha kuongeza thamani ya mazao ya kilimo, ikiwemo kujifunza uzalishaji wa mafuta ya mimea. Ameishukuru Serikali kwa kuwapa wakulima wadogo fursa ya kuonesha bidhaa zao na kujifunza kutoka kwa wajasiriamali wengine.

Aidha, Halima Salim Fundi, mwanakikundi wa Tujikomboe Makamaka Women Group, ameishukuru Aga Khan Foundation kwa kuwawezesha kushiriki maonesho hayo, akisema yamewapa fursa ya kujifunza mbinu mpya za kukuza biashara na kuboresha bidhaa zao ili ziweze kushindana katika masoko ya ndani na nje ya nchi.

Maonesho hayo yamefanyika sambamba na uzinduzi wa Sera ya Maendeleo Endelevu ya Viwanda ya Mwaka 2025 na Sera ya Maendeleo ya Wajasiriamali Ndogo na wa Kati ya Mwaka 2003 (Toleo la Mwaka 2025), ambazo zimezinduliwa rasmi Novemba 4, 2026, jijini Dodoma na Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba.

Sera hizo zinalenga kuimarisha uzalishaji, kuongeza thamani ya malighafi za ndani, kuboresha upatikanaji wa mitaji na masoko pamoja na kukuza ushindani wa bidhaa za Tanzania katika masoko ya ndani na nje ya nchi.



Read more »
Older Posts
Subscribe to: Posts (Atom)

Top News