Habari Za Hivi Punde Habari Za Hivi Punde
Soma zaidi

at Sunday, November 15, 2026 0

 Na Mwamvua Mwinyi, Pwani

Madereva 27 wamekamatwa na kuwekwa mahabusu kwa makosa mbalimbali ya usalama barabarani, kufuatia operesheni maalumu ya ukaguzi wa magari iliyofanywa na Jeshi la Polisi katika eneo la Vigwaza, Wilaya ya Kipolisi Chalinze, Mkoa wa Pwani.

Operesheni hiyo iliyofanyika nyakati za usiku ilihusisha ukaguzi wa magari 210 na kuongozwa na Kamishna Msaidizi wa Polisi Julius Mwakabonga, Mkuu wa Operesheni kutoka Kikosi cha Usalama Barabarani, akishirikiana na Mkuu wa Usalama Barabarani Mkoa wa Pwani, Mrakibu Mwandamizi wa Polisi Edson Mwakihaba, kwa lengo la kudhibiti ukiukwaji wa sheria za barabarani.

Ametoa rai kwa wamiliki wa mabasi kuhakikisha wanakuwa na madereva wawili kwa kila safari ili kuwezesha kubadilishana majukumu na kupata muda wa kupumzika. 

Aidha, amewataka Wakuu wa Usalama Barabarani wa Mikoa (RTO) kuimarisha ukaguzi wa mabasi na kudhibiti ubebaji wa abiria wanaozidi idadi inayoruhusiwa, akisisitiza kuwa hakuna mtu anayepaswa kupewa upendeleo, bila kujali nafasi au cheo chake.

Katika hatua nyingine, Mwakabonga amewataka madereva na watumiaji wengine wa barabara kuzingatia sheria, hasa kuelekea mwisho wa mwaka ambapo safari huongezeka, huku akionya kuwa Jeshi la Polisi litaendelea kuwafuatilia wanaokiuka taratibu, wakiwemo madereva wa magari ya kubeba mchanga. 

Amewahimiza abiria kutoa taarifa wanapobaini uzembe wa madereva ili kusaidia kuzuia ajali na kulinda maisha ya watu.




Read more »

at Sunday, November 15, 2026 0
Mwamvua Mwinyi, Mkuranga

MKUU wa Mkoa wa Pwani, Stanslaus Nyongo, ameonya baadhi ya vijana wanaopata ajira na vibarua viwandani kuacha vitendo vya udokozi na wizi wa mali za wawekezaji, akiwataka kuwa waadilifu ili kulinda uaminifu na kuvutia uwekezaji mkoani humo.

Aidha, amewataka wawekezaji kuhakikisha wanalipa wafanyakazi stahiki zao kwa mujibu wa taratibu na sheria za kazi, badala ya kuwakandamiza kwa kuwanyima haki zao, hali inayoweza kuwachochea kuingia katika tamaa na vitendo visivyo vya uadilifu.

Nyongo alitoa kauli hiyo alipotembelea kiwanda cha Everwell Cable & Engineering Co. Ltd, kilichopo wilayani Mkuranga, kinachozalisha vifaa vya umeme, ambapo alielezwa miongoni mwa changamoto zinazokikabili ni udokozi wa baadhi ya malighafi, umeme kutokuwa wa uhakika pamoja na miundombinu mibovu ya barabara.

Alilitaka Jeshi la Polisi kuwafuatilia na kuwakamata wote wanaotajwa kuhusika na vitendo hivyo ili wachukuliwe hatua za kisheria na iwe fundisho kwa wengine wenye nia ya kuharibu mali za wawekezaji.

"Serikali inafanya jitihada za kuhamasisha na kushawishi wawekezaji kuwekeza nchini kwa kuwa uwekezaji unasaidia kuongeza pato la Taifa na kutoa fursa za ajira, Isitokee mnapata bahati ya ajira kisha mnazichezea kwa kukosa uadilifu na kufanya wizi," alifafanua Nyongo.

Kuhusu changamoto ya barabara, Nyongo alizitaka taasisi zinazohusika kuhakikisha zinasimamia utatuzi wake ili kiwanda hicho pamoja na jamii inayokizunguka viweze kuondokana na adha hiyo.

Alisema kiwanda hicho kina umuhimu katika sekta ya nishati nchini kwa kuzalisha nguzo na nyaya zinazotumiwa na Shirika la Umeme Tanzania (TANESCO), ikiwemo katika mkakati wa kubadilisha nguzo chakavu.

Katika ziara hiyo, Nyongo pia alitembelea mradi wa ujenzi wa kituo cha kupoza umeme kinachounganisha Mkuranga na Chalinze unaogharimu Sh bilioni 135 na kutekelezwa na mkandarasi kutoka China, ambao unatarajiwa kupunguza changamoto ya upatikanaji wa umeme kwa viwanda na wananchi.

Kwa mujibu wa Meneja wa kiwanda hicho, Zilal Chen, kiwanda hicho kilianzishwa mwaka 2015 na kinazalisha bidhaa mbalimbali za umeme, zikiwemo nyaya za aina tofauti, transfoma, nguzo za zege na vifaa vya kuunganishia umeme kwa matumizi ya majumbani na miradi mikubwa ya nishati.








Read more »

at Sunday, November 15, 2026 0

WAZIRI MKUU Dkt. Mwigulu Nchemba amefanikisha zoezi la kuchangia sh. 1,074,972,600/- ikiwa ni harambee ya ununuzi wa vifaa tiba vya hospitali ya Bulongwa iliyoko wilayani Makete, mkoani Njombe.

Harambee hiyo ilifanyika leo (Jumapili, Novemba 15, 2026) katika viwanja hospitali hiyo iliyopo kijiji cha Bulongwa ambayo inamilikiwa na Kanisa la Kiinjili la Kilutheri Tanzania (KKKT) Dayosisi ya Kusini Kati Makete. 

Akizungumza na waumini wa kanisa hilo, viongozi na wananchi waliohudhuria hafla ya uchangiaji, Waziri Mkuu alisema Serikali itaendelea kushirikiana na madhehebu ya dini katika kuhakikisha huduma bora zinapatikana kwa wananchi wote.

Alitumia fursa hiyo kuwafikishia salamu za pongezi kutoka kwa Rais Dkt. Samia Suluhu Hassan kuhusiana na harambee hiyo iliyolenga kuchangisha sh. bilioni moja. "Mheshimiwa Rais Dkt.  Samia Suluhu Hassan amewatakia heri katika jambo hili jema na lenye manufaa makubwa kwa wananchi wetu bila kujali dini au itikadi zao," alisema. 

Mapema, Mkuu wa Dayosisi ya Kusini Kati, Askofu William B. Sanga alisema kufanyika kwa harambee hii ni udhihirisho jinsi kanisa linavyoweza kumhudumia mwanadamu kimwili na kiroho. 

Akitoa historia ya hospitali ya Bulongwa, Baba Askofu Sanga alisema lilianza kutoa huduma mwaka 1944 ikiwa ni zahanati tu na mhudumu wake alikuwa akitembea umbali wa zaidi ya km 100 kutokea Itete hadi hapo.

Alisema hospitali mpya ilijengwa kati ya mwaka 1967 na 1968 na imekuwa ikihudumia wananchi mbalimbali wa Nyanda za Juu Kusini hasa kwenye tiba ya viungo bandia. 

Akitoa ufafanuzi kuhusu harambee hiyo, Baba Askofu Sanga alisema wamepanga kununua vifaa tiba vipya kwa sababu hospitali ya sasa inapaswa kuhama ili kupisha ujenzi wa bwawa la umeme la mto Lumakalya.

"Watu wanajiuliza iweje tunafanya harambee ilhali tunatakiwa kuhama. Hatuhusiki na ujenzi wa miundombinu, tunahusika na ununuzi wa  vifaatiba. Naomba tusichanganye, hivi vifaa ni vya hospitali mpya. Tumeshapata eneo la ekari 49.8 kutoka kijiji cha Bulongwa."

"Vifaa vya mionzi kama vile X-Ray, CT SCAN na Mammogram tayari tumeshaviagiza. Sasa hivi tunahitaji vifaa vya upasuaji na maabara. Kwa hiyo, ujenzi wa hospitali ukiisha, tunahama na vifaa vyetu na tunaanza kutoa huduma mara moja," alisema. 

Naye, Mbunge wa Makete, Festo Sanga alisema Serikali imefanya kazi kubwa ya kuleta maendeleo katika wilaya hiyo. "Mwaka 2020 wakati naanza ubunge, kulikuwa na vituo vya afya vitatu na leo hii chini ya uongozi wa Dkt. Samia Suluhu Hassan tumejenga vituo vipya saba."

"Wakati naanza kazi, jimbo hili lenye vijiji 98, umeme ulikuwa upo kwenye vijiji 32 tu. Leo hii, vijiji vyote 98 vina umeme. Hata kwenye elimu, shule za sekondari zilikuwa hazifiki tano, lakini leo ziko 12. Tunaishukuru Serikali imefanya kazi kubwa sana," alisema. 

Ametumia fursa kuomba barabara ya kutoka Makete hadi Mbeya ijengwe kwa haraka kwa sababu imekuwa ni kilio cha muda mrefu cha wakazi wa wilaya hiyo. “Mkandarasi yupo lakini spidi yake ni ndogo sana,” alisisitiza.













Read more »

at Sunday, November 15, 2026 0

TAASISI ya Tanzania House of Talent (THT) imeendesha kampeni ya kuhamasisha matumizi ya nishati safi ya kupikia kwa watumishi wa Halmashauri ya Mji Mafinga mkoani Iringa, ikiwa ni sehemu ya juhudi za kuhimiza jamii kuachana na matumizi ya kuni na mkaa na kuhamia kwenye teknolojia rafiki kwa mazingira.

Akizungumza katika kikao na watumishi hao kilichofanyika kwenye ukumbi wa Halmashauri, Mratibu wa Mradi wa Pika Smart, Denari Ruhumbika, amesema majiko janja yanayotumia umeme yana gharama nafuu za uendeshaji, yakitumia kati ya unit 0.5 hadi 1 ya umeme kwa saa moja, huku yakiwa na uwezo wa kupika kwa ufanisi mara mbili ya majiko ya gesi.

Amesema matumizi ya teknolojia hiyo ni sehemu ya mabadiliko yanayolenga kuboresha maisha ya kaya, kulinda mazingira na kupunguza utegemezi wa nishati zisizo safi, hususan kuni na mkaa.

Kwa upande wake, Balozi wa Kampeni ya Pika Smart, msanii wa muziki Mrisho Mpoto, amesema kampeni hiyo ni hatua muhimu katika kuunga mkono malengo ya Taifa ya kuimarisha afya za wananchi na kuongeza kasi ya matumizi ya nishati safi ya kupikia.

Naye Kaimu Mkurugenzi wa Halmashauri ya Mji Mafinga, Peter Ngussa, ameiomba THT kufikisha salamu kwa Rais wa Jamhuri ya Muungano wa Tanzania, Dkt. Samia Suluhu Hassan, akieleza kuwa Halmashauri hiyo inaunga mkono juhudi za Serikali katika kuhamasisha matumizi ya nishati safi, ikiwemo matumizi ya gesi ya kupikia katika Shule ya Sekondari Mafinga Technical.

Kampeni ya Pika Smart ilizinduliwa Juni 2025 kwa ushirikiano na Wizara ya Nishati pamoja na Ofisi ya Rais – TAMISEMI, ikiwa na lengo la kuhamasisha Watanzania kuachana na matumizi ya kuni na mkaa na kutumia nishati safi ya kupikia.










Read more »

at Sunday, November 15, 2026 0

-Yavuna fursa za mabilioni ya uwekezaji nishati, kilimo,wawekezaji wamiminika

Na Said Mwishehe,Michuzi TV

IMEELEZWA ya Rais Dkt. Samia Suluhu Hassan nchini Uturuki imefungua fursa mpya za uwekezaji katika sekta ya nishati, teknolojia na mazingira, ikiwemo uwezekano wa kupata uwekezaji wa takribani dola milioni 200 kwa ajili ya miradi ya umeme.

Pia ziara hiyo imeimarisha ushirikiano wa kifedha na wadau wa maendeleo huku ikisisitizwa fursa hizo ni sehemu ya matokeo ya mazungumzo yaliyofanyika kati ya Tanzania na taasisi mbalimbali za kimataifa yaliyolenga kuongeza uwekezaji katika miundombinu ya nishati, kuhamisha teknolojia na kupata fedha za kutekeleza miradi ya maendeleo.

Akizungumza katika mkutano wa waandishi wa habari uliofanyika leo Novemba 15,2026 ,Ikulu jijini Dar es Salaam Waziri wa Nishati, Juma Homera ameelezea hatua kwa hatua fursa zilizopatikana kutokana na ziara ya Rais Samia nchini Uturuki.

Waziri Homela amesema jukumu la kutafuta fedha kwa ajili ya kukabiliana na mabadiliko ya tabianchi na kuendeleza nishati linahitaji ushirikiano wa Serikali, sekta binafsi na taasisi za fedha, ikiwemo benki mbalimbali nchini.

“Tanzania inaendelea kuimarisha mikakati ya kupata fedha za kukabiliana na mabadiliko ya tabianchi, pia inatambua umuhimu wa kuunganisha uwekezaji katika nishati na malengo ya kukuza uchumi pamoja na kupunguza uzalishaji wa hewa ukaa.

“Katika juhudi hizo, Tanzania imekuwa ikihitaji jumla ya dola milioni 19.3 za Marekani kwa lengo la kutekeleza hatua ilizojiwekea katika mchango wa taifa wa kukabiliana na mabadiliko ya tabianchi.Jumla ya dola milioni 7.3 zimepatikana na juhudi zinaendelea kutafuta kiasi kilichobaki.

Kuhusu uwekezaji wa nishati, ameeleza Serikali inaendelea kuendeleza miradi inayolenga kuongeza upatikanaji wa umeme na kupunguza matumizi ya nishati zinazochangia uchafuzi wa mazingira.

Miongoni mwa miradi hiyo ni nishati ya jotoardhi kuwa moja ya mradi unaohitaji uwekezaji mkubwa unakadiriwa kuwa na thamani ya zaidi ya dola milioni 200 na unalenga kuongeza upatikanaji wa nishati pamoja na kupunguza uzalishaji wa hewa ukaa.

Pia uwekezaji katika miradi hiyo una malengo kadhaa, yakiwemo kupanua mtandao wa nishati, kuongeza uwezo wa uzalishaji na kuchochea ukuaji wa uchumi, huku ukisaidia kupunguza athari za mabadiliko ya tabianchi.

Ameongeza Serikali imeweka mikakati ya kuhamasisha matumizi ya magari na vyombo vya usafiri vinavyotumia umeme na gesi, ikiwemo CNG na LNG, kwa kutoa unafuu wa kodi ili kupunguza matumizi ya vyombo vinavyozalisha hewa ukaa.

Kwa upande wake Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Jumanne Maghembe akielezea ziara ya hiyo amesema ushiriki wa Rais Samia katika mkutano huo umeimarisha nafasi ya Tanzania katika majadiliano ya kimataifa kuhusu uwekezaji, mazingira na maendeleo ya nchi zinazoendelea.

“Rais ametumia jukwaa hilo kutetea maslahi ya nchi zinazoendelea, hasa upatikanaji wa fedha za tabianchi, teknolojia na ushirikiano wa kimataifa unaohitajika kutekeleza mipango ya maendeleo.Katika mkutano wa ngazi ya juu kuhusu nishati safi kwa shule na vituo vya afya nchini, wadau wa maendeleo zaidi ya 20 walieleza dhamira ya kuunga mkono juhudi za Tanzania.

“Rais pia alisisitiza umuhimu wa ushirikiano wa kimataifa katika kufanikisha lengo la kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.”

Wakati huo huo Katibu Mkuu Ofisi ya Makamu wa Rais, Muungano na Mazingira, Richard Muyungi amesema ushiriki wa Rais katika mkutano huo umewezesha Serikali kuendeleza mazungumzo na taasisi za kimataifa na kupata fursa za ufadhili wa miradi yenye manufaa ya moja kwa moja kwa wananchi.

“Moja ya mafanikio hayo ni kukubaliwa kwa ufadhili wa fedha zote zilizobaki za kukamilisha mradi wa maji kutoka Ziwa Victoria kwenda Simiyu, wenye thamani ya takribani dola milioni 120.Mradi huo unatarajiwa kunufaisha wananchi zaidi ya 50,000 katika Mkoa wa Simiyu, kwa kusafirisha maji kutoka Ziwa Victoria kwa umbali wa zaidi ya kilomita 25 na kuhusisha vijiji 103.”

Pia amesema Tanzania imepata fursa ya uwekezaji wa zaidi ya dola milioni 150 katika sekta ya kilimo, kupitia mazungumzo na taasisi moja ya kimataifa, huku maeneo ya ushirikiano yakihusisha kilimo, misitu, viwanda na usambazaji.

“Uwekezaji ambao unalenga kuongeza fursa za wananchi kushiriki katika shughuli za kiuchumi.Taasisi za ndani, mashirika yasiyo ya kiserikali na Kituo cha Taifa cha Biashara ya Kaboni vikitarajiwa kuwa sehemu ya ushirikiano huo.

Kwa upande wa Waziri wa Fedha, Balozi Khamis Mussa Omar, amesisitiza umuhimu wa Serikali, sekta binafsi na taasisi za fedha kushirikiana katika kuhakikisha upatikanaji wa rasilimali za kutekeleza mipango ya kukabiliana na mabadiliko ya tabianchi.

“Jukumu la kutafuta fedha hizo si la Serikali pekee, bali linahusisha pia benki na taasisi nyingine za kifedha, ambazo zinapaswa kuimarisha uwezo wa kushiriki katika ufadhili wa miradi ya mazingira na nishati. Wizara ya Fedha inaendelea kuratibu juhudi za upatikanaji wa fedha kupitia taasisi za kimataifa na kuimarisha mifumo ya kifedha itakayowezesha miradi ya tabianchi kupata ufadhili.”

Ameongeza kwa ujumla matokeo ya ziara hiyo yanaweka msingi wa kupanua ushirikiano wa Tanzania na wadau wa kimataifa katika uwekezaji wa nishati, teknolojia, kilimo na mazingira.










Read more »

at Sunday, November 15, 2026 0


Na Mwandishi Wetu
HUDUMA za afya kwa watoto njiti na wanaozaliwa wakiwa na changamoto mbalimbali zimeonyesha mafanikio makubwa katika Wilaya ya Kwimba, Mwanza, baada ya kuanzishwa kwa Kitengo cha Huduma kwa Mama na Mtoto, hatua iliyosaidia kupunguza kwa asilimia 64 kiwango cha vifo vya watoto wanaolazwa katika kituo hicho.

Akizungumza Novemba 15, 2026, Muuguzi Daraja la II na Mkuu wa Wodi ya Watoto Wachanga katika Hospitali ya Wilaya ya Kwimba, Ernest John Kibona, amesema katika miezi tisa ya kwanza tangu kitengo hicho kuanza kufanya kazi, jumla ya watoto 542 wenye matatizo mbalimbali ya kiafya wamehudumiwa, ikilinganishwa na watoto 183 waliopatiwa huduma katika kipindi kama hicho kabla ya kuanzishwa kwa kitengo hicho.

Kibona amesema kati ya watoto 542 waliolazwa tangu kitengo hicho kilipoanza kufanya kazi Februari 26, 2026, watoto 250 sawa na asilimia 46 walikuwa wamezaliwa kabla ya wakati, huku watoto 66 sawa na takribani asilimia 12 ya waliolazwa wakifariki. Amesema hali hiyo ni tofauti na kipindi cha miezi tisa iliyotangulia, ambapo kati ya watoto 183 waliolazwa, 63 walifariki, sawa na asilimia 34.

Amesema takwimu hizo zinaonyesha kupungua kwa takribani asilimia 64 kwa uwiano wa vifo vya watoto waliolazwa, licha ya kuongezeka kwa kiasi kikubwa kwa idadi ya watoto wanaopatiwa matibabu katika kituo hicho.

Mbali na kuongeza upatikanaji wa huduma za matibabu, kuanzishwa kwa kitengo hicho kumepunguza pia ulazima wa familia kusafiri nje ya wilaya kutafuta huduma maalumu kwa watoto wachanga, hususan katika Jiji la Mwanza ambako hospitali za rufaa ziko zaidi ya kilomita 90 kutoka Kwimba.

Kabla ya kuanzishwa kwa kitengo hicho, watoto wachanga waliohitaji huduma maalumu walikuwa wakipelekwa katika Hospitali ya Rufaa ya Mkoa ya Sekou Toure na Bugando Medical Centre. Safari hizo ziliongeza gharama na changamoto za usafiri kwa familia, huku Kibona akisema idadi ya rufaa kwenda hospitali za Mwanza imepungua kwa zaidi ya asilimia 67, wakati kitengo hicho sasa kinahudumia pia wagonjwa kutoka wilaya tano jirani.

Kwa mujibu wa Mkurugenzi Mtendaji wa Doris Mollel Foundation, Doris Mollel, kabla ya huduma hizo kusogezwa karibu na wananchi, baadhi ya mama walilazimika kupitia hatua kadhaa za rufaa kabla ya watoto wao kupata huduma stahiki. Amesema mama anaweza kuanza safari ya kujifungua katika zahanati, lakini mtoto akizaliwa njiti huhitaji kupelekwa kituo cha afya kwa huduma maalumu, huku baadhi ya vituo hivyo vikiwa umbali wa hadi saa mbili kutoka Hospitali ya Wilaya ya Kwimba.

Amesema iwapo kituo cha afya hakina uwezo wa kutoa huduma inayohitajika, mtoto hulazimika kupewa rufaa nyingine kwenda hospitali ya mkoa, hali ambayo huongeza hatari kwa mtoto pamoja na mzigo wa kifedha na kimazingira kwa familia. Kwa hiyo, amesema kuanzishwa kwa Kitengo cha Huduma kwa Mama na Mtoto, kwa msaada wa Doris Mollel Foundation, kumechangia kusogeza huduma za watoto wachanga karibu na jamii na kupunguza safari ndefu za kutafuta matibabu.

Mafanikio hayo yanakuja wakati Tanzania ikiendelea kukabiliwa na changamoto ya vifo vya watoto wachanga, hasa ndani ya siku 28 za kwanza baada ya kuzaliwa. Kwa mujibu wa Utafiti wa Afya ya Uzazi na Mtoto pamoja na Viashiria vya Malaria Tanzania wa mwaka 2022, kiwango cha vifo vya watoto wachanga nchini kilikuwa vifo 24 kwa kila vizazi hai 1,000, kutoka vifo 25 kwa kila vizazi hai 1,000 vilivyorekodiwa katika utafiti wa mwaka 2015/16.

Hata hivyo, Kibona amesema kitengo hicho bado kinakabiliwa na changamoto za uhaba wa wataalamu na vifaa muhimu vya matibabu, hali inayopunguza uwezo wa kutoa huduma kamili kwa idadi inayoongezeka ya watoto wanaohitaji matibabu. Amesema kuna uhitaji wa mtaalamu wa huduma za watoto wachanga, madaktari zaidi pamoja na wauguzi wa kuongeza nguvu katika kitengo hicho.

Amesema pia kitengo hakina kiwanda cha kuzalisha oksijeni na kinahitaji vifaa zaidi, ikiwamo radiant warmers kwa ajili ya kudhibiti joto la mwili wa watoto wachanga pamoja na mashine za phototherapy zinazotumika kutibu manjano kwa watoto wachanga. Changamoto hizo zinaonyesha umuhimu wa kuambatana kwa uwekezaji katika miundombinu ya afya na uwezeshaji wa kutosha kwa wataalamu, vifaa na dawa ili huduma ziendelee kuwa bora.

Wakati huo huo, katika kuadhimisha Siku ya Watoto Njiti Duniani mwaka huu, Doris Mollel Foundation imeandaa hafla ya jioni jijini Dar es Salaam, ambapo vitabu vitatu vinavyolenga kuongeza uelewa kuhusu watoto njiti, ushiriki wa wazazi na huduma kwa watoto wachanga vinatarajiwa kuzinduliwa.

Machapisho hayo ni My Baby Is Born Too Soon. What Do I Do? (Nimezaa Njiti, Nifanyeje?), kinachotoa mwongozo kwa wazazi na walezi; How We Want Neonatal Care Units to Look Like, kilichoandaliwa na Tanzania Preterm Family Network; pamoja na mwongozo kuhusu utoaji wa huduma na msaada wa kisaikolojia kwa mama walio na watoto njiti.

Machapisho hayo yanalenga kushughulikia mahitaji ya kitabibu, kihisia na kisaikolojia ya familia zinazokumbwa na changamoto ya kujifungua watoto njiti, sambamba na kutoa mwongozo kwa wahudumu wa afya na wadau wanaohusika na upangaji na uendelezaji wa vituo vya huduma za watoto wachanga. Naibu Waziri wa Afya, Dkt. Florence George Samizi, anatarajiwa kuwa mgeni rasmi katika hafla hiyo.
Read more »

at Sunday, November 15, 2026 0

Na Victor Masangu, Kibaha

MBUNGE wa Jimbo la Kibaha Mjini, Silvestry Koka, ametoa viti 100 na Sh milioni moja kwa Umoja wa Vijana wa Chama Cha Mapinduzi (UVCCM), Kata ya Viziwaziwa, kwa ajili ya kuanzisha miradi ya kiuchumi itakayowawezesha vijana kujipatia kipato.

Katika msaada huo, Sh milioni moja zitatumika kuanzisha mradi wa maegesho ya pikipiki (bodaboda), huku viti 100 vikiwa sehemu ya mradi mwingine wa kuwawezesha vijana kuongeza kipato.

Koka ametoa msaada huo wakati wa kikao cha Baraza la UVCCM Kata ya Viziwaziwa, ambapo pia alifungua rasmi Shina la Umoja wa Vijana wa Bodaboda Mkomgeni na kuwataka vijana kuwa na mshikamano katika kusimamia na kuendeleza miradi yao.

Amewasisitiza vijana hao kuzingatia nidhamu ya fedha, usimamizi mzuri wa miradi na uwajibikaji ili kuhakikisha miradi hiyo inakuwa endelevu na kuleta manufaa kwa wanachama.

“Kitu kikubwa ninachowaomba vijana wa UVCCM Kata ya Viziwaziwa ni kuendelea kushikamana pamoja na kuwa na nidhamu katika suala zima la utunzaji wa fedha, sambamba na kuhakikisha miradi waliyoianzisha inakuwa na tija,” amesema Koka.

Kwa upande wake, Mwenyekiti wa UVCCM Kata ya Viziwaziwa, Jumanne Mwagiya, amempongeza Mbunge huyo kwa kuwashika mkono vijana kupitia msaada wa fedha na viti, akisema utawasaidia katika jitihada za kujikwamua kiuchumi.

Naye Diwani wa Kata ya Viziwaziwa, Mohamed Chamba, amesema juhudi zinazofanywa na Serikali inayoongozwa na Rais Dkt. Samia Suluhu Hassan, pamoja na Mbunge Koka, zimechangia utekelezaji wa miradi mbalimbali ya maendeleo.

Baadhi ya vijana walioshiriki kikao hicho wamemshukuru Mbunge huyo kwa msaada huo, wakieleza kuwa miradi ya maegesho ya pikipiki na viti 100 itakuwa sehemu ya fursa za kujiongezea kipato.





Read more »

at Sunday, November 15, 2026 0
Makamu wa Rais wa Jamhuri ya Muungano wa Tanzania, Mhe. Deogratius John Ndejembi, amekipongeza Chuo Kikuu cha Dar es Salaam (UDSM) kwa utekelezaji mzuri wa mradi wa ujenzi wa Kampasi ya Lindi.

Makamu wa Rais amesema ubora wa majengo yaliyojengwa unaonesha matumizi sahihi ya fedha za umma na thamani halisi ya fedha zilizowekezwa, huku ujenzi wa awamu ya kwanza ya mradi huo ukifikia asilimia 98.

Akiwa katika ziara ya kukagua maendeleo ya mradi huo katika eneo la Ngongo, Manispaa ya Lindi, Makamu wa Rais ameeleza namna alivyovutiwa na ubora wa miundombinu iliyojengwa, akisema uwekezaji huo wa takribani Sh. bilioni 14 umeleta matokeo yanayoonekana.

Aidha, amezitaka taasisi nyingine za umma kujifunza kutoka UDSM kuhusu namna bora ya kusimamia na kutekeleza miradi.

Pongezi hizo zimeonesha kuridhishwa na usimamizi wa mradi, ufuatiliaji wa utekelezaji wake pamoja na ubora wa miundombinu iliyojengwa kupitia Mradi wa Elimu ya Juu kwa Mageuzi ya Kiuchumi (HEET), unaotekelezwa kwa ufadhili wa Serikali ya Tanzania kwa mkopo kutoka Benki ya Dunia.

Aidha, Makamu wa Rais ameiagiza Wizara ya Elimu, Sayansi na Teknolojia kutoa kipaumbele kwa Kampasi ya Lindi katika awamu ya pili ya mradi wa HEET, hususan katika ujenzi wa nyumba za makazi kwa ajili ya wahadhiri na watumishi wa UDSM, ili kuimarisha mazingira ya kazi na uwezo wa kampasi kutoa huduma zake kwa ufanisi.

Kwa upande wake, Mkuu wa Chuo Kikuu cha Dar es Salaam na Rais Mstaafu wa Jamhuri ya Muungano wa Tanzania, Dkt. Jakaya Mrisho Kikwete, ameipongeza UDSM kwa hatua iliyofikia, akisisitiza umuhimu wa kukamilisha miundombinu hasa barabara za kuifikia kampasi hiyo pamoja na nyumba za watumishi.

Akizungumzia suala la barabara, Dkt. Kikwete alisisitiza kuwa kampasi inahitaji kuunganishwa vizuri na mji wa makao makuu ili kurahisisha upatikanaji wake, akieleza kuwa Serikali ina dhamira ya kushughulikia mahitaji yaliyosalia.

Msisitizo huo unaonesha umuhimu wa kuendeleza kampasi kama jumuiya kamili ya kitaaluma, yenye miundombinu na huduma zinazowezesha ufundishaji, ujifunzaji, utafiti pamoja na ustawi wa jamii.







Read more »

at Sunday, November 15, 2026 0
Mloka Rufiji,Pwani

Mamlaka ya Hifadhi ya eneo la Ngorongoro (NCAA) imekabidhi Shirika la hifadhi za Taifa Tanzania (TANAPA) kituo cha mwitikio wa haraka kwa ajili ya kukabiliana na changamoto ya wanyamapori wakali na waharibifu kilichojengwa katika kijiji cha Mwaseni, kata ya Mloka, Rufiji Mkoni Pwani.

Akizungumza wakati wa kukabidhi kituo hicho Naibu Kamishna wa Uhifadhi, utalii na maendeleo ya jamii Ngorongoro Joas Makwati , amesema ujenzi wa vituo vya askari wa wanyamapori unalenga kutoa mwitikio wa haraka kwa matukio ya wanyamapori wakali na waharibifu katika hifadhi ya Nyerere kama sehemu ya mchango wa Ngorongoro kuisaidia Serikali za kukabiliana na changamoto ya wanyamapori na kuimarisha usalama wa wananchi.

“Baada ya kukamilisha kituo hiki Serikali itahakikisha askari watakuwa karibu na wananchi na wataweza kuwahi kwa haraka pale wanyama wanapovamia makazi ya watu ili tuhakikishe wananchi wanakuwa salama na mali zao kama Ilani ya chama cha mapinduzi inavyotuelekeza ," amesema Kamishna Makwati

Mwenyekiti wa Kijiji cha Mwaseni, Hemed Rashid, ameishukuru Ngorongoro kwa ujenzi wa kituo hicho na kuahidi watakilinda na kushirikiana na askari wa uhifadhi kukabiliana na wanyamapori waharibifu.

Kwa upande wake Mwakilishi wa Kamishna wa uhifadhi TANAPA, PCO Davis Mushi ameshukuru uongozi wa Ngorongoro na kueleza kuwa “kituo hicho cha mwitikio kitaongeza ufanisi wa kazi za askari wa uhifadhi kuwa na ofisi, makazi bora na uwezo wa kulinda na kudhibiti wanyamapori wanaoleta uharibifu kwa wananchi wa Mloka na vijiji jirani."







Read more »
Older Posts
Subscribe to: Posts (Atom)

Top News