Chadema yameguka Dodoma, Kada mwingine ajiunga CCM

Na Charles James, Michuzi TV
ALIYEKUWA mwenyekiti wa Serikali ya Kijiji cha Izava, Kata ya Segala (Tarafa ya Itiso - Wilaya ya Chamwino) kwa tiketi ya CHADEMA  Sokoine Mndewa jana Julai 12 alitangaza rasmi kuhamia Chama cha Mapinduzi na kujivua nyadhifa zote ndani ya chama hicho.

Uamuzi huo ulifikiwa na kiongozi  huyo kupitia kikao cha Afisa Tarafa ItisoRemidius Emmanuel alipokutana na viongozi wa chama na serikali  kata ya Segala wakati wa majadiliano ya pamoja juu ya Utekelezaji wa Ilani ya Chama cha Mapinduzi katika kata hiyo.

Akichangia mada katika kikao hicho Sokoine mbali na mambo mengine  alitumia  nafasi hiyo kutangaza rasmi dhamira ya kuhamia CCM.

Sokoine amesema kuwa sababu za kujiunga na Chama cha Mapinduzi ni pamoja na tangu kuchaguliwa kwake mwaka 2014 hadi sasa  amekuwa akikosa ushirikiano  kutoka kwa viongozi wake wa juu wa Chama cha Demokrasia na  Maendeleo (CHADEMA).

Pia amesema kuwa amejiunga na CCM baada ya  kufurahishwa  zaidi na  kasi ya  utendaji kazi wa Rais  Mhe. Dkt. John Pombe Joseph Magufuli,

"Rais Magufuli ametufilisi yale yote ambayo tumekuwa tukiyapigia kelele miaka yote, sote ni mashahidi wakati wote  Chadema ilisisitiza kushughulikia Mafisadi, nidhamu katika utumishi, kuwachukulia hatua za haraka pasipo upendeleo wale wote wanaotoa na kupokea rushwa na bado tunaendelea kushuhudia mafanikio makubwa ya Serikali ya awamu ya tano katika Sekta ya Afya, elimu, na madini,  Sasa ninabaki huku kufanya nini? ni mwendawazimu pekee anaweza kupuuza mafanikio haya" ameeleza Sokoine.

Amesema kuwa ameamua rasmi kujivua uanachama wake ndani ya Chadema na   kujiuzulu nafasi yake ya uenyekiti kwa tiketi ya Chadema na  kujiunga rasmi  na CCM, na kuomba wanipokee.

 Aidha amesema hatua yake hiyo ni maamuzi yake binafsi pasipo shinikizo lolote.

 "Nimefikia uamuzi huu nikiwa na akili timamu  pasipo kushauriwa na mtu yeyote  na nipo tayari kujiunga na CCM kama mwanachama wa kawaida" ameeleza.

Akizungumza kwa niaba ya Chama cha Mapinduzi ngazi ya Wilaya  Katibu Mwenezi wa CCM  Wilaya ya Chamwino  Sostenes Tumbo  amempongeza kiongozi huyo kwa uamuzi sahihi na kueleza kwamba anakaribishwa CCM huku akiwahimiza wanachama wote kumpatia ushirikiano.

Mapema akizungumza katika kikao hicho Afisa Tarafa  Itiso Remidius Emmanuel  alisema ataendelea  kufanya vikao vya mara kwa mara baina ya viongozi wa Chama Tawala na  Serikali katika tarafa yake hatua ambayo anaamini inatoa fursa ya majadiliano ya pamoja katika  kutekeleza ilani ya Chama cha Mapinduzi.

 "Lazima mtupime na kujiridhisha juu ya Utekelezaji wa ilani ya CCM, mimi kama kiongozi mkuu wa Tarafa ya Itiso pamoja na viongozi walioko chini yangu imani yetu kubwa ni kuhakikisha kila mmoja anatimiza   wajibu wake  na kwa kufanya hivyo tutakuwa tunatekeleza vema Ilani ya Chama cha Mapinduzi" alieleza.

Kikao hicho pia kilihudhuriwa na  Diwani wa kata ya Buigiri  Keneth Yindi, Diwani wa Kata ya Segala  Hemed Sablugo, Diwani wa Viti Maalum  Mariam Chisonjela,  Kamati ya Utekelezaji UWT (W) na Mwakilishi wa Mbunge jimbo la Chilonwa  Josia George.

Aliyekuwa Mwenyekiti wa Kijiji cha Izava  kwa tiketi ya Chadema   Sokoine Mndewa (Kushoto) akikabidhi kadi  yake kwa Mwenyekiti wa CCM Kata ya Segala  ndugu Benjamin  Sadala. 

Aliyekuwa Mwenyekiti wa Kijiji cha Izava (Wilaya ya Chamwino) kwa tiketi ya Chadema Sokoine Mndewa akila kiapo mbele ya Katibu Mwenezi wa CCM Wilaya ya Chamwino  ndugu Sostenes Tumbo (Kulia) mara baada ya kujiuzulu wadhifa wake na kujiunga rasmi na Chama cha Mapinduzi.

AfisaTarafa Itiso, Remidius Emmanuel alizungumza na  viongozi wa Chama (CCM) na  Serikali wakati wa majadiliano ya pamoja juu ya  Utekelezaji wa Ilani ya CCM  kata ya Segala.

 Aliyekuwa Mwenyekiti wa Kijiji cha Izava Mkoani Dodoma kupitia tiketi ya Chama hicho, Sokoine Mndewa akizungumza na wananchama wa CCM (hawapo pichani) mara baada ya  Kujiuzulu nafasi zake zote na kujiunga na Chama cha Mapinduzi(CCM).

 Baadhi ya viongozi mbalimbali walioshiriki kikao hicho kilicholenga kujadili utekekelezaji wa Ilani ya Chama cha Mapinduzi kata ya Segala na kupelekea aliyekuwa Mwenyekiti wa Kijiji cha Izava kwa tiketi ya Chadema  Sokoine Mndewa kutangaza rasmi kujiunga na CCM.