MICHUZI BLOG

TIDO MHANDO ASTAAFU BBC

Mwandishi wa habari wa siku nyingi lTido Mhando leo amestaafu rasmi katika shirika la Utangazaji la Uingereza BBC kama mhariri wa idhaa ya kiswahili baada ya kushika wadhifa huo i tangu mwaka 1999.

Tido Mhando, ambaye amefanya kazi na idhaa hiyo ya kiswahili kwa miaka kumi na sita, ni mwafrika wa kwanza kushikilia nafasi hiyo ambayo muda wote ilikuwa ikishikiliwa na waingereza kutoka idara za utawala.

Wafanyakazi wa idhaa hiyo wakiongozwa na bosi wao mpya Solomon Mugera walipata fursa ya kumuaga Tido Mhando katika hafla iliyofanyika mara baada ya matangazo ya jioni siku ya Ijumaa.

Awali katika mahojiano na mtangazaji Ali Saleh kwenye kipindi cha dira ya dunia, Tido alisema anajivunia sana kuondoka akiwa ameiacha idhaa ya kiswahili ikiwa imevunja rekodi kwa idadi ya wasikilizaji ambayo imeongezeka kutoka milioni tisa na nusu alipoingia hadi kufikia milioni ishirini kwa wiki hivi sasa.

Katika tafrija hiyo, Tido Mhando aliwashukuru wafanyakazi hao kwa ushirikiano mkubwa waliompa kiasi cha kuweza kufanya mabadiliko makubwa katika idhaa hiyo.

''Katika kipindi cha miaka saba niliyokuwa katika nafasi hii tumefanikiwa kufanya mabadiliko makubwa sana ikiwemo kuweza kuwa ni radio ya kwanza BBC World Service kuweza kutangaza mpira wa Uingereza moja kwa moja, tumeongezewa muda wa kuwa hewani kwa kuwa na vipindi vingi sana.

"Lakini pengine mabadiliko nitakayoyakumbuka sana ni kuweza kuhamisha kabisa matangazo ya asubuhi na kuyahamishia Nairobi, yote haya yasingewezekana bila ushirikiano wenu'' alisema Bwana Tido.

Kumbukumbu: Tido Mhando ni mmoja wa watangazaji mahiri na wakongwe Tanzania imewahi kuwa nao.Alianzia redio ya taifa, Radio Tanzania Dar Es Salaam (RTD)kabla ya kuelekea Kenya ambako alifanya kazi kwa miaka mingi kabla ya kujiunga na shirika la utangazaji la Uingereza, BBC.
Baada ya kuhamishia makazi yake London, Tido Mhando alipewa majukumu ya ukuu wa Idhaa ya Kiswahili ya BBC mwaka 1999.Katika muda wake madarakani, Idhaa ya Kiswahili imepata mafanikio makubwa, ikiwa ni pamoja na idadi ya wasikilizaji kupanda mpaka milioni 19.

Umbea: Baada ya kustaafu anatarajiwa kurejea nyumbani Tanzania ambako haijajulikana atapewa majukumu gani. Kuna habari kuwa atakabidhiwa Tume ya Utangazaji Tanzania (TUT) inayojumuisha RTD na TVT, ili aindeshe kwa kutumia umahiri wake na kuifanya iendane na matakwa ya karne ya 21, kinyume na ilivyo sasa...