SINGIDA YAWEKEZA KWENYE SEKTA YA ELIMU

Mbunge wa Singida mjini Mh. Mohamed Dewji 'Mo' akijichanganya na wanafunzi
Mo na baadhi ya wanafunzi wa Singida

Mhe Mohammed Dewji akisalimiana na wanafunzi wa shule Singida Mjini.

KakaMichuzi,

tunashukuru kwa kutupa habari moto moto na mabreaking nyuzzzz muda wote. Leo ninataka niongelee sekta ya elimu, sekta nyingi muhimu za Tanzania zipo nyuma sana kimaendeleo, lakini binafsi ningeshauri viongozi wazidi kuwekeza katika sekta muhimu ya Elimu. Iwapo tukiwekeza kwenye elimu basi tutaweza kuwa na vijana wengi wasomi ambao watalisaidia taifa letu hapo baadae.

Hivi karibuni nilitembelea mkoa wa Singida, na nilifurahi kuona jinsi shule mpya za sekondari zilivyojengwa na nikapata kuwadadisi wakazi wa Singida mjini kuhusu majengo hayo mapya, wakanijibu kwa kuniambia kuwa wanawekeza kwa ajili ya watoto wao ili waweze kuwasaidia na kuinua maendeleo mkoani hapo na Taifa kwa ujumla.

Wakisaidiana na mbunge wa Singida mjini Mhe. Mohammed Dewji, tayari wameweza kujenga shule mpya za sekondari kumi na mbili na kufanya jumla ya idadi kuwa kumi na nne mjini Singida ndani ya miaka minne iliyopita kutoka sekondari mbili zilizokuwepo tokea kupatikana kwa uhuru ( Ongezeko la asilimia mia saba kwa idadi za shule za sekondari).

Wakishirikiana na Mhe. Dewji wameweza kuimarisha sekta hiyo ya elimu huku mbunge wao akichangia kujenga madarasa na shule hizo mpya na wananchi wakimpa ushirikiano katika ujenzi wa shule hizo pia.

Naamini iwapo tukiimarisha sekta ya elimu kama Singida, itakuwa mwanzo mzuri wa kupata wataalamu bora miaka ijayo kwa manufaa ya taifa letu, ingawa ujenzi wa shule sio ufumbuzi pekee, inabidi tuangalie suala la upatikanaji wa walimu na vitendea kazi katika sekta hiyo. Ujumbe wangu ni kuwa sekta ya elimu ikiboreshwa itakuwa ndio chachu ya maendeleo kwa taifa letu.

Mdau wa Singida