Habari Za Hivi Punde Habari Za Hivi Punde
Soma zaidi

at Saturday, November 07, 2026 0

▪️Waziri Mavunde aliitaka STAMICO kuwa Shirika imara la Madini Barani Afrika
▪️ Azindua Kiwanda cha nishati safi na salama Dodoma, aipongeza STAMICO kwa mageuzi makubwa
▪️ Kiwanda chagharimu Shilingi Bilioni 3.7, kina uwezo wa kuzalisha tani 20 za mkaa safi kwa saa
▪️ Ampongeza Rais Samia kwa uongozi na maono ya kuifanya Tanzania kinara wa matumizi ya nishati safi na salama ya kupikia duniani

📍 Chigongwe, Dodoma.
WAZIRI wa Madini, Mhe. Anthony Mavunde, amelitaka Shirika la Madini la Taifa (STAMICO) kuongeza tija katika uwekezaji wake na kujipanga kuwa mfano wa mashirika ya umma barani Afrika, huku akieleza kuwa Shirika hilo linaendelea na mipango ya kuanzisha mgodi mkubwa wa dhahabu litakaoumiliki kwa asilimia 100, hatua itakayoongeza uwezo wake wa uzalishaji na kuimarisha mchango wake katika uchumi wa Taifa.

Ameyasema hayo leo, Novemba 7, 2026, wakati akizindua rasmi Kiwanda cha nishati safi na salama ya kupikia cha Rafiki Briquettes, Chigongwe, Dodoma, chenye thamani ya Shilingi Bilioni 3.7 kinacholenga kuongeza thamani ya makaa ya mawe na kutoa fursa za ajira kwa Watanzania.

Mhe. Mavunde amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa maono na uongozi wake katika kuhamasisha matumizi ya nishati safi na salama ya kupikia, akimtaja kuwa kinara wa juhudi za kuifanya Tanzania kuwa sehemu ya mapinduzi ya kimataifa ya nishati safi na kuwa maelekezo ya Rais yamechochea uwekezaji unaolenga kulinda afya za wananchi, kutunza mazingira na kupunguza matumizi ya kuni na mkaa unaotokana na miti.

Aidha, amezipongeza Bodi na Menejimenti ya STAMICO kwa kusimamia mageuzi na kutekeleza maelekezo ya Serikali, akibainisha kuwa miaka mitano iliyopita Shirika hilo liliwekwa katika orodha ya mashirika yaliyopaswa kufutwa kutokana na changamoto za kiutendaji, lakini sasa limepiga hatua kubwa huku akisisitiza kuwa STAMICO inapaswa kuendelea kuwekeza kimkakati ili kuwa Shirika lenye tija na ushindani linaloweza kuigwa na mashirika mengine ya umma barani Afrika.

Waziri Mavunde amesema Wizara ya Madini kupitia STAMICO itaendelea kuimarisha uwekezaji katika nishati safi na salama pamoja na utunzaji wa mazingira, sambamba na kuelekeza Shirika hilo kutafuta mbia wa kimkakati kwa ajili ya kuzalisha umeme kupitia makaa ya mawe, ili kuchangia azma ya Serikali ya kuzalisha megawati 8,000 ifikapo mwaka 2030.

Vilevile, ameitaka STAMICO kushirikiana na kampuni nyingine kutangaza manufaa ya mkaa wa Rafiki Briquettes unaozalishwa kupitia Mgodi wa Kiwira na kutoa elimu ya matumizi yake kwa wananchi wa Dodoma.

Katika kuimarisha manufaa ya uwekezaji huo kwa jamii, Mhe. Mavunde ameelekeza kila kiwanda kitakachojengwa nchini kuwa na mpango wa uwajibikaji kwa jamii (CSR), lakini pia amelitaka STAMICO kupanda na kutunza miti katika eneo la Chigongwe na maeneo mengine ya shughuli zake, ili kukabiliana na ukame na kuwa mfano wa taasisi za Serikali katika uhifadhi wa mazingira.

Kwa upande wake, Mkurugenzi Mtendaji wa STAMICO, Dkt. Venance Mwasse, amesema kiwanda hicho kina uwezo wa kuchakata tani 20 za mkaa wa Rafiki Briquettes kwa saa na kutoa ajira za moja kwa moja kwa watu zaidi ya 150 na kuongeza kuwa kitatoa fursa za biashara na huduma kwa wananchi wa Dodoma na mikoa jirani huku akisisitiza kuwa kiwanda hicho ni cha nne katika mpango wa STAMICO wa kuzalisha nishati safi na salama ya kupikia, huku Shirika likilenga kupanua huduma hiyo hadi mikoa yote nchini.

Kwa niaba ya Mkuu wa Mkoa wa Dodoma, Mkuu wa Wilaya ya Chamwino, Mhe. Janeth Mayanja, amnesia uzinduzi huo ni hatua muhimu katika kukuza viwanda vya ndani, kuongeza thamani ya rasilimali za Taifa na kujenga uchumi unaozalisha fursa kwa wananchi, kuwahimiza wananchi kutumia fursa zitakazotokana na uwekezaji huo na kukipa kiwanda ushirikiano ili kiwe na tija endelevu katika maisha na uchumi wa jamii.

Mwenyekiti wa Kamati ya Kudumu ya Bunge ya Nishati na Madini, Mhe. Subira Mgalu, amesema uwekezaji huo utachangia kufikia lengo la Serikali la angalau asilimia 80 ya Watanzania kutumia nishati safi na salama ya kupikia ifikapo mwaka 2034 huku akiitaka Wakala wa Nishati Vijijini (REA) kuandaa majiko yanayoendana na matumizi ya mkaa wa Rafiki Briquettes ili kurahisisha matumizi yake kwa wananchi.

Mwenyekiti wa Bodi ya STAMICO, Mhe. Simon Sirro, amesema Shirika lina dhamira ya kuongeza thamani ya makaa ya mawe nchini kupitia uwekezaji wa viwanda na uzalishaji wa bidhaa zenye tija, sambamba na kuunga mkono azma ya Serikali ya kuimarisha matumizi ya nishati safi na salama ya kupikia ifikapo mwaka 2034 na kwamba kiwanda hicho ni mfano wa namna rasilimali za Taifa zinavyoweza kuchochea maendeleo ya viwanda na kuboresha maisha ya wananchi.

Naye Mwenyekiti wa CCM Mkoa wa Dodoma, Mhe Adam Kimbisa amesema chama hicho kinaridhishwa na mwenendo wa Serikali katika kuimarisha utoaji wa huduma kwa wananchi, ikiwemo uwekezaji katika nishati safi na salama ya kupikia, unaochochea maendeleo na kukuza uchumi wa ndani.

Uzinduzi wa Kiwanda cha Rafiki Briquettes ni hatua muhimu katika kuongeza thamani ya makaa ya mawe, kupanua matumizi ya nishati safi na salama ya kupikia, kuimarisha ajira na kuchochea ukuaji wa viwanda nchini, lakini pia uwekezaji huo unaakisi dhamira ya Serikali ya Awamu ya Sita chini ya uongozi wa Mhe. Dkt. Samia Suluhu Hassan ya kuhakikisha rasilimali za Taifa zinatumika kwa tija na kuleta manufaa ya kiuchumi, kijamii na kimazingira kwa Watanzania




Read more »

at Saturday, November 07, 2026 0
Na Byera Deus, Muleba

Mkuu wa Wilaya ya Muleba, Dkt. Abel Nyamahanga, amezindua mafunzo ya Programu ya Jenga Kesho Iliyo Bora (BBT), yanayolenga kuwawezesha vijana na wanawake kupata ujuzi na kushiriki kikamilifu katika kilimo biashara.

Uzinduzi huo umefanyika katika Kijiji cha Makongora, Kata ya Ruhanga, Wilaya ya Muleba mkoani Kagera, ambapo Dkt. Nyamahanga pia amefungua rasmi shughuli za maandalizi ya shamba la vijana na wanawake la Makongora Block Farm.

Shughuli hizo zinahusisha usafishaji wa mashamba kwa njia ya kupalilia pamoja na uchongaji wa barabara yenye urefu wa kilomita 20 ndani ya shamba hilo.

Akizungumza wakati wa uzinduzi huo, Dkt. Nyamahanga alisema Serikali inaendelea kuweka mazingira wezeshi kwa vijana kujiajiri na kujipatia kipato kupitia sekta za kilimo, mifugo na uvuvi.

Alisema kupitia shamba hilo, zaidi ya vijana na wanawake 300 wanatarajiwa kunufaika kwa kupata ajira na fursa za kiuchumi kupitia uzalishaji wa zao la biashara la kahawa.

Aidha, alisema Halmashauri ya Muleba ilianzisha mradi huo katika Kijiji cha Makongora, na kwamba ekari 28 ambazo bado hazijapatiwa vijana zitatolewa kwa vijana wengine wa kata hiyo ili kupanua mradi kutoka ngazi ya kijiji hadi kata.

Kwa mujibu wa Dkt. Nyamahanga, kila kijana anatarajiwa kupata mauzo ya kahawa yenye thamani ya takribani Sh milioni nane kwa msimu, huku shamba hilo likiwa na uwezo wa kutoa mavuno mara mbili kwa mwaka endapo vijana watazingatia kanuni bora za kilimo.

Kwa upande wake, Mratibu wa Programu ya BBT Wilaya ya Muleba, Daudi Kingu, aliyemwakilisha Mratibu wa BBT Taifa, alisema programu hiyo imeandaa mafunzo kwa wanufaika yatakayoanza Novemba 9, 2026.

Alisema mafunzo hayo yatahusisha kilimo bora, matumizi ya teknolojia na umwagiliaji, usimamizi wa biashara, upatikanaji wa masoko pamoja na mikopo, kwa lengo la kuwajengea vijana uwezo wa kuendesha shughuli za kilimo kwa tija na kujitegemea kiuchumi.

Kingu aliwahimiza vijana kufuatilia na kushiriki kikamilifu katika mafunzo hayo ili kunufaika na maarifa na fursa zinazotolewa kupitia programu hiyo.

Aliongeza kuwa BBT ni sehemu ya jitihada za Serikali za kuwawezesha vijana na wanawake kushiriki katika kilimo biashara, ujasiriamali na uzalishaji wenye tija, kwa lengo la kukuza ajira na kuboresha maisha yao.

Alifafanua kuwa kazi zinazotarajiwa kutekelezwa shambani hapo ni pamoja na kusafisha mashamba, kuchonga barabara, kuweka miundombinu ya maji, kujenga ofisi ya Chama cha Msingi cha Ushirika (AMCOS) kwa ajili ya shughuli za kahawa pamoja na kutoa huduma za ugani.

Naye Mwenyekiti wa vijana hao, Mdhamiru Ally, aliipongeza Serikali kwa kuendelea kuweka mikakati ya kuwawezesha vijana kupitia elimu ya kilimo.

Alisema vijana wako tayari kushiriki kikamilifu katika shughuli zote za mradi huo ili kufikia mafanikio na kutimiza malengo yaliyowekwa na Serikali.

Kwa upande wake, Mkuu wa Idara ya Kilimo wa Wilaya ya Muleba, Charles Ntaki, alisema shamba hilo lilianzishwa mwaka 2024 kwa lengo la kuinua uchumi wa vijana na kuongeza uzalishaji wa kahawa mkoani Kagera.

Alisema kuanzishwa kwa shamba hilo kumechochea watu binafsi na wawekezaji kuanzisha mashamba makubwa ya kahawa katika Kata ya Ruhanga.










Read more »

at Saturday, November 07, 2026 0
Na Mwamvua Mwinyi, Kibaha

Wafanyakazi wa viwandani wametakiwa kuhakikisha wanaelewa masharti yote ya mikataba ya ajira kabla ya kuisaini ili kuepuka migogoro na changamoto zinazoweza kujitokeza katika uhusiano wao na waajiri.

Ushauri huo umetolewa Novemba 6, 2026 na Timu ya Wataalamu wa Kampeni ya Msaada wa Kisheria ya Mama Samia (Samia Legal Aid), Manispaa ya Kibaha, iliyofika katika viwanda mbalimbali vilivyopo Kata ya Misugusugu, Mkoa wa Pwani.

Ziara hiyo imelenga kuwajengea wafanyakazi uelewa kuhusu haki na wajibu wao kwa mujibu wa sheria, hususan katika masuala yanayohusu mikataba ya ajira.

Katika kampeni hiyo, wafanyakazi wamepatiwa elimu kuhusu mambo muhimu ya kuzingatia kabla ya kuingia mikataba ya ajira, huku wakipewa nafasi ya kuuliza maswali na kueleza changamoto wanazokutana nazo katika utekelezaji wa mikataba hiyo.

Wataalamu wa sheria walitoa ufafanuzi kuhusu masuala mbalimbali yaliyoulizwa na wafanyakazi, kwa lengo la kuwasaidia kuelewa haki zao na wajibu wao katika mazingira ya kazi.

Kampeni hiyo ni sehemu ya jitihada za kuifikisha huduma ya msaada wa kisheria kwa wananchi katika maeneo yao, wakiwemo wafanyakazi wa sekta mbalimbali.







Read more »

at Saturday, November 07, 2026 0
Na Mwamvua Mwinyi

WADAU wa maendeleo wa Sekta ya Nishati wameeleza kuridhishwa na utekelezaji wa miradi ya usambazaji wa umeme vijijini na kuahidi kuendelea kushirikiana na Serikali katika kuimarisha huduma hiyo, inayotajwa kuwa chachu ya maendeleo ya kiuchumi na kijamii.

Akifungua Kikao Kazi cha Pili cha Mwaka cha Wadau wa Maendeleo wa Sekta ya Nishati kilichofanyika Kisawani, Wilaya ya Mafia, Mkuu wa Mkoa wa Pwani, Stanslaus Nyongo, amesema nishati ya umeme ni nyenzo muhimu ya maendeleo na kwamba vijiji zaidi ya 12,300 vya Tanzania Bara vimekwishafikishiwa huduma hiyo.

Amesema upatikanaji wa umeme ni muhimu kwa Mkoa wa Pwani kutokana na kuongezeka kwa shughuli za uwekezaji, ikiwemo ujenzi wa viwanda katika maeneo ya vijijini, vinavyohitaji nishati ya uhakika ili kuendesha shughuli za uzalishaji.

Nyongo amesema kuridhishwa kwa wadau hao na utekelezaji wa miradi hiyo ni ishara ya kuimarika kwa ushirikiano kati yao na Serikali ya Awamu ya Sita katika kuhakikisha huduma ya umeme inawafikia wananchi na kuchochea maendeleo.

Naye Mkurugenzi Mkuu wa Wakala wa Nishati Vijijini (REA), Mhandisi Hassan Saidy, amesema kikao hicho kinalenga kupitia utekelezaji wa mpango kazi wa miradi ya nishati pamoja na kuwapatia washirika wa maendeleo taarifa kuhusu namna fedha walizochangia zilivyotumika katika kutekeleza miradi hiyo.

Kwa upande wake, Katibu Mkuu wa Wizara ya Nishati (Umeme na Nishati Jadidifu), Mhandisi Felchesmi Mramba, amesema vijiji vyote vya Tanzania vimefikishiwa huduma ya umeme, huku Serikali ikiendelea kuangalia namna ya kuongeza matumizi ya nishati safi ya kupikia nchini.

Ameeleza kuwa hadi mwaka 2025, uwiano wa kaya zinazotumia nishati safi ya kupikia ulifikia asilimia 28.6, akibainisha umuhimu wa kuendelea kuhamasisha matumizi ya nishati hiyo ili kupanua upatikanaji wake kwa wananchi.







Read more »

at Saturday, November 07, 2026 0
Waziri wa Uchukuzi, Profesa Makame Mbarawa, ametoa maelekezo kwa Bodi mpya ya Magavana ya Chuo cha Bahari Dar es Salaam (DMI), yakilenga kuimarisha ubora wa elimu na mafunzo, kuongeza ajira kwa mabaharia wa Tanzania na kukifanya chuo kitambulike kimataifa.

Akizungumza katika uzinduzi wa Bodi hiyo, alisema ni mwanzo wa ukurasa mpya wa uwajibikaji, ufanisi na matokeo. Alitaka bodi isimamie uboreshaji wa mitaala, mafunzo kwa wakufunzi na upatikanaji wa vifaa vya kisasa vya kufundishia ili kuzalisha wahitimu wenye ujuzi wa kushindana katika soko la ajira la ndani na kimataifa.

Aliitaka bodi, kwa kushirikiana na menejimenti, kuweka mikakati ya kuongeza ajira kwa mabaharia kupitia ushirikiano na kampuni za meli, waendeshaji wa bandari na taasisi za kimataifa, pamoja na mfumo wa kufuatilia maendeleo ya wahitimu.

Pia alisisitiza utawala bora, uwajibikaji na uadilifu, na tafiti na ubunifu vielekezwe katika kutatua changamoto za bandari, usafiri wa majini, usalama baharini na uchumi wa buluu. Aliielekeza DMI kushirikiana na Shirika la Uwakala wa Meli Tanzania (TASAC) kuandaa kanzidata ya wataalamu wa Kitanzania wa sekta ya bahari waliopo nchini na nje ya nchi.

Aidha, alitaka fedha za Serikali zitumike kwa ufanisi, akionya dhidi ya ucheleweshaji, ongezeko la gharama lisiloelezeka na ununuzi wa vifaa visivyokidhi viwango, na akahimiza chuo kuongeza mapato kupitia mafunzo, tafiti na huduma za ushauri, kwa kuzingatia malengo yanayopimika na muda maalumu wa utekelezaji.

Mwenyekiti wa Bodi, Mhandisi Mkuu Paul Olekashe, alitaja changamoto kuwa ni upatikanaji wa meli ya mafunzo, vifaa vya kisasa na utambuzi wa vyeti vya mabaharia kimataifa. Alisema chuo kinaandaa mradi wa meli ya mafunzo, na akaiomba Wizara kuharakisha utekelezaji wake na kusaidia vyeti vitambuliwe kimataifa.

Kwa upande wake, Mkuu wa Chuo, Profesa Tumaini Gurumo, alisema wanafunzi wa mafunzo ya bahari wameongezeka kutoka 1,500 hadi 7,000 kwa mwaka, huku idadi ya walimu ikiongezeka kutoka chini ya 100 miaka mitano iliyopita hadi takribani 220 sasa, aliongeza kuwa Serikali inaendelea kukiimarisha chuo kwa kukipatia vifaa vya kisasa vya kufundishia ili kuboresha ubora wa mafunzo.




Read more »

at Saturday, November 07, 2026 0

Na Mwandishi Wetu
SERIKALI imesema imejipanga kuyawezesha mashirika yasiyo ya kiserikali (NGOs) ya ndani kupata vyanzo vya fedha nchini ili kupunguza utegemezi wa misaada kutoka nje na kuhakikisha yanaendelea kutekeleza majukumu yake kwa manufaa ya wananchi.

Hatua hiyo inafuatia uanzishwaji wa Mfuko wa Pamoja wa Ruzuku kwa Mashirika Yasiyo ya Kiserikali (NGOs Basket Fund - NBF), unaolenga kuimarisha uendelevu wa sekta hiyo kupitia rasilimali za ndani ya nchi.

Hayo yameelezwa katika kikao cha pili cha Kamati ya Kitaifa ya Kuratibu Uanzishwaji wa Mfuko huo, kilichofunguliwa rasmi jijini Dar es Salaam na Katibu Mkuu wa Wizara ya Maendeleo ya Jamii, Jinsia, Wanawake na Makundi Maalum, Eliakim Chacha Maswi, ambapo wajumbe walijadili hatua zilizofikiwa na mikakati ya kuhakikisha mfuko huo unakamilika kwa wakati.

Akizungumza katika kikao hicho, Maswi amesema nchini kuna zaidi ya mashirika yasiyo ya kiserikali 8,000, lakini mengi yanategemea misaada kutoka nje ya nchi, hivyo Serikali ina wajibu wa kuangalia namna ya kuyawezesha mashirika ya kitaifa kupata rasilimali za ndani ili yaweze kutekeleza shughuli zake nchini.

"Serikali inayachukulia mashirika haya kama washirika muhimu katika shughuli za maendeleo na utoaji wa huduma kwa jamii, hivyo kuna umuhimu wa kuwa na mpango wa pamoja utakaowezesha upatikanaji wa fedha za kusaidia utekelezaji wa majukumu yao"
Kwa upande wake, Msajili wa Mashirika Yasiyo ya Kiserikali, Vickness Mayao, amesema maagizo ya kuanzisha mfuko huo yalilenga kuwakutanisha wadau ili kuandaa utaratibu maalumu wa kusaidia mashirika ya ndani, hatua iliyosababisha kuundwa kwa Kamati ya Kitaifa ya Kuratibu Uanzishwaji wake.

Mayao amesema kamati hiyo inaongozwa na Dkt. Majid Nsekela, Mkurugenzi Mtendaji Mkuu wa Benki ya CRDB, na tayari hatua mbalimbali zimeanza kuchukuliwa kuhakikisha mfuko huo unaanza kufanya kazi mapema ili mashirika ya ndani yanufaike na rasilimali zilizopo nchini.

Naye Mwenyekiti wa Baraza la Taifa la Mashirika Yasiyo ya Kiserikali Tanzania, Jasper Makala, amesema mfuko huo unatarajiwa kupunguza utegemezi wa ufadhili kutoka nje ya nchi, ambao umekuwa ukipungua kadri siku zinavyokwenda.

Amesema mashirika yasiyo ya kiserikali yana mchango mkubwa katika maendeleo na utoaji wa huduma za kijamii katika sekta mbalimbali, hivyo upatikanaji wa mfuko wa ndani utayasaidia kujiendesha kwa uendelevu na kuendelea kuwahudumia wananchi.





Read more »

at Saturday, November 07, 2026 0
Na Victor Masangu, Pwani

Makamu wa Pili wa Rais wa Zanzibar na Mlezi mpya wa Chama Cha Mapinduzi (CCM) Mkoa wa Pwani, Mhe. Hemed Suleiman Abdulla, amewataka viongozi wa chama hicho kuachana na vitendo vya kuunda makundi, magomvi na mivutano, akisema hali hiyo inaweza kudhoofisha umoja na misingi ya chama.

Akizungumza na Wajumbe wa Halmashauri Kuu ya CCM Mkoa wa Pwani katika Ukumbi wa Shule ya Uongozi ya Mwalimu Julius Nyerere, eneo la Kwa Mfipa, Kibaha, amesema amekuja kukilea chama kwa ujumla na si makundi ndani ya chama.

"Chama chetu ni chama kilicho madarakani na kinapendwa sana na wananchi, lakini hakiwezi kujengwa kwa makundi wala mivutano," amesema Abdulla.

Amesisitiza kuwa viongozi wote wanapaswa kufanya kazi kwa ushirikiano na mshikamano, huku wakizingatia Katiba, Kanuni na miongozo ya CCM katika kusimamia shughuli za chama.

Ameongeza kuwa hakuna sababu ya viongozi kuvutana, akieleza kuwa migogoro na mivutano ni kama sumu inayoweza kukiumiza chama.

Katika hatua nyingine, amempongeza Rais wa Jamhuri ya Muungano wa Tanzania, Dkt. Samia Suluhu Hassan, kwa kile alichokieleza kuwa ni kurejesha heshima ya CCM na kuimarisha hali ya amani na utulivu nchini.

Kwa upande wao, baadhi ya viongozi wa CCM Mkoa wa Pwani wameahidi kumpa ushirikiano Mlezi huyo mpya na kutekeleza maelekezo aliyoyatoa kwa lengo la kuimarisha umoja na uendeshaji wa chama mkoani humo.



Read more »

at Saturday, November 07, 2026 0
WAZIRI wa Nchi, Ofisi ya Waziri Mkuu – Kazi, Ajira na Mahusiano, Deus Sangu, amewataka wajasiriamali nchini na Jumuiya ya Afrika Mashariki (EAC) kuongeza ubunifu, ubora na ushindani wa bidhaa zao ili kunufaika na fursa za masoko zinazotokana na ushirikiano wa kikanda.

Sangu ametoa wito huo Novemba 6, 2026, jijini Kigali, Rwanda, wakati wa Maadhimisho ya Siku ya Tanzania katika Maonesho ya 26 ya Jua Kali yanayofanyika nchini humo.

Amesema ubunifu ni nyenzo muhimu katika kukuza biashara na kuongeza ushindani wa bidhaa katika masoko ya ndani na kimataifa, huku akiwapongeza wajasiriamali wa Tanzania kwa kazi zao bunifu.

Amesema maonesho hayo ni jukwaa muhimu la kuimarisha ushirikiano wa kiuchumi, kupanua masoko, kukuza biashara na kuongeza fursa za ajira kwa wananchi wa nchi wanachama wa EAC.

Ameongeza kuwa maonesho hayo yamefanyika kwa mara ya 26 tangu kuanzishwa mwaka 1999 jijini Arusha, Tanzania, na mwaka huu yanashirikisha zaidi ya wajasiriamali 2,500 kutoka nchi wanachama, ikilinganishwa na 2,241 mwaka jana.

Aidha, ametaja changamoto zinazokabili sekta hiyo kuwa ni pamoja na upatikanaji wa mitaji, maeneo ya biashara, masoko, elimu ya ujasiriamali na viwango vya ubora wa bidhaa, pamoja na mazingira yasiyo bora ya kufanyia kazi, akiahidi kuzifanyia kazi kupitia nchi wanachama.

Maadhimisho ya Siku ya Tanzania yamepambwa na maonesho ya mavazi ya asili, ambapo wajasiriamali wameonesha bidhaa mbalimbali zikiwemo mavazi ya Kitenge na Batiki, mikoba na viatu vya ngozi pamoja na vyakula vya asili vya jamii za Tanzania.a







Read more »

at Saturday, November 07, 2026 0

KAMATI ya Uratibu ya Kitaifa ya Wataalamu wa Maandalizi ya Michuano ya Kombe la Mataifa ya Afrika (AFCON 2027) imekutana leo, Novemba 6, 2026, kupitia na kujadili taarifa za utekelezaji wa majukumu ya Kamati Ndogo mbalimbali zinazohusika na maandalizi ya michuano hiyo.

Katika kikao hicho, taarifa zilizowasilishwa zimehusu maeneo muhimu ya maandalizi, ikiwemo Miundombinu, Ulinzi na Usalama, Usafirishaji pamoja na Fursa za Kiuchumi, ambapo wajumbe wamejadili hatua zilizofikiwa, changamoto zilizopo na masuala mbalimbali yanayohitaji kupewa kipaumbele ili kuhakikisha maandalizi yanaendelea kwa kuzingatia mahitaji na viwango vya michuano hiyo.

Aidha, kikao hicho kimejadili mikakati ya kuimarisha uratibu na ushirikiano baina ya wadau mbalimbali ili kuhakikisha maeneo yote muhimu yanakuwa katika hali ya utayari kuelekea AFCON 2027.

Kesho, Novemba 7, 2026, Kamati hiyo inatarajiwa kufanya ziara ya kukagua hali ya utayari wa miundombinu na maeneo mbalimbali ya maandalizi ya AFCON 2027 jijini Dar es Salaam.

Ziara hiyo inalenga kujionea maendeleo ya maandalizi katika maeneo husika na kubaini hatua zinazopaswa kuchukuliwa ili kuhakikisha Tanzania inakuwa tayari kushiriki katika maandalizi ya pamoja ya kuandaa michuano hiyo kwa mafanikio.

AFCON 2027 inaandaliwa kwa pamoja na Tanzania, Kenya na Uganda.



Read more »

at Saturday, November 07, 2026 0

Mkuu wa Mkoa wa Arusha, Mhe. CPA Amos Gabriel Makalla, ameingilia kati mgogoro wa ardhi uliodumu kwa takribani miaka 20 katika Kijiji cha Makuyuni, Wilaya ya Monduli, baada ya wananchi kuvamia eneo la mwekezaji lenye ukubwa wa ekari 200 na kuanzisha makazi pamoja na shughuli mbalimbali za uzalishaji.

Akizungumza na wananchi wa Kitongoji cha Zaburi, Novemba 6, 2026, Mhe. Makalla amebainisha kuwa kampuni ya Rhino Equipment & Transportation ndiyo mmiliki halali wa eneo hilo, huku Serikali ikipendekeza mwekezaji huyo kutenga ekari 100 kwa ajili ya wananchi wa kitongoji hicho ambacho tayari kimesajiliwa na kuwa na miundombinu ya kijamii ikiwemo msikiti, kanisa, shule ya awali, maji na umeme.

Aidha, Mhe. Makalla ameuagiza uongozi wa kampuni hiyo kukaa na wananchi walioingia katika eneo lake jingine lenye ukubwa wa ekari 100 ili kujadiliana na kufikia makubaliano yatakayowezesha matumizi sahihi ya ardhi hiyo na kumaliza mgogoro uliodumu kwa muda mrefu.

Amewataka wananchi kuwa watulivu na kusitisha uvamizi pamoja na uendelezaji wa maeneo hayo hadi pale makubaliano yatakapokamilika. Pia, ameiagiza Halmashauri ya Wilaya ya Monduli kusimamia utekelezaji wa maelekezo hayo na kuhakikisha kunakuwa na mpango mzuri wa matumizi ya ardhi itakayotengwa kwa ajili ya wananchi.

Akizungumza kwa niaba ya wananchi, Mzee,Leng’ida , amesema busara na hekima zilizotumiwa na Mkuu wa Mkoa pamoja na timu yake katika kutafuta suluhisho la mgogoro huo zitarejesha matumaini na kuleta tabasamu jipya kwa wakazi wa Kitongoji cha Zaburi.

“Busara nyingi ambazo Mheshimiwa Mkuu wa Mkoa umetumia, pamoja na timu yako, zitasaidia kuleta tabasamu jipya kwetu wananchi wa Kijiji cha Zaburi. Tunakushukuru kwa hatua hii,” amesema.

Kwa upande wake, Mwenyekiti wa Kijiji cha Makuyuni,Ngayoki  amesema atahakikisha anasimamia utekelezaji wa maelekezo yote yaliyotolewa na Mkuu wa Mkoa katika ngazi ya kijiji na kata kwa kushirikiana na wananchi ili kuhakikisha suluhisho lililopatikana linatekelezwa.

Naye mkazi wa Kitongoji cha Zaburi, Bi. Naserian  Saitabau , amesema kwa miaka mingi wananchi wamekuwa wakiishi katika hali ya taharuki kutokana na mgogoro huo, huku wakikosa matumaini ya kupata suluhisho la kudumu.

Amesema hatua iliyochukuliwa na Mkuu wa Mkoa imewapa matumaini mapya, huku akiahidi kuwa wananchi wataendelea kumuombea na kuamini kuwa mazungumzo yake na mwekezaji yatatoa majibu ya kudumu kwa changamoto hiyo.

Ameongeza kuwa wananchi wana matumaini makubwa kuwa utekelezaji wa maelekezo yaliyotolewa utamaliza mgogoro huo na kuwawezesha kuishi kwa amani na kuendelea na shughuli zao za maendeleo.










 

Read more »
Older Posts
Subscribe to: Posts (Atom)

Top News