MICHUZI BLOG

Tanzania Yasisitiza Ufadhili wa Kilimo Himilivu COP31

MICHUZI BLOG at Thursday, November 12, 2026 0

Pembezoni mwa Mkutano wa 31 wa Nchi wanachama wa Mkataba wa Umoja wa Mataifa kuhusu Mabadiliko ya Tabianchi (COP31), unaondelea kufanyika Jijini, Antalya, Uturuki, kwa kipindi cha 9 - 20 Novemba 2026, tarehe 11 Novemba 2026, umefanyika Mkutano wa Wadau wa Sekta ya Kilimo uliolenga katika kuhamasisha ufadhili na uwekezaji wa miradi ya kukabiliana na athari za Mabadiliko ya Tabianchi kwa ajili ya kuimarisha uhimilivu wa sekta ya kilimo.

Mkutano huo uliwakutanisha wawakilishi kutoka Serikalini, taasisi za fedha, sekta binafsi na washirika wa maendeleo duniani kujadili mikakati ya kuongeza upatikanaji wa fedha za miradi ya kukabiliana na athari za Mabadiliko ya Tabianchi katika mifumo ya chakula na kuhakikisha wakulima hasa wanawake na vijana wananufaika na fursa za ufadhili huo.

Akizungumza katika mkutano huo, mwakilishi kutoka Wizara ya Kilimo Bi. Zaninabu T. Sheuya, Mkurugenzi wa Kitengo cha Usimamizi wa Mazingira alisisitiza umuhimu wa ushirikiano kati ya Serikali, sekta binafsi na washirika wa maendeleo katika kuongeza uwekezaji wa kilimo himilivu na dhamira ya Serikali ya kuhakikisha fedha za Mabadiliko ya Tabianchi zinapatikana kwa wingi na kutoa kipaumbele kwa wakulima wanaoathirika moja kwa moja.

Aidha, Bi. Prudence Masako, Mkurugenzi Mkazi wa Taasisi ya CARE Tanzania alitoa wito kwa Wadau kuendelea kuunga mkono juhudi za Serikali ya Jamhuri ya Muungano wa Tanzania katika kuongeza uwekezaji wa miradi ya kukabiliana na athari za Mabadiliko ya Tabianchi yenye matokeo chanya ili kuimarisha usalama wa chakula, kuongeza kipato cha wakulima wadogo ili kuimarisha uchumi endelevu.

Ufadhili wa miradi ya kukabiliana na mabadiliko ya tabianchi utawezesha kuchochea utekelezaji wa vipaumbele vya Dira 2050 katika sekta ya kilimo kwa kuelekeza rasilimali katika uwekezaji unaochangia maendeleo ya kilimo chenye tija, shindani na himilivu kwa athari za mabadiliko ya tabianchi.

HABARI

DKT. MWIGULU AHIMIZA MAANDALIZI YA ELIMU 2028

MICHUZI BLOG at Thursday, November 12, 2026 0

WAZIRI MKUU Dkt. Mwigulu Nchemba amewataka wadau wa elimu wajadili namna ya kuimarisha upatikanaji wa mapato ya ndani ambayo yataboresha uwezo wa nchi kutekeleza vipaumbele vya kitaifa.

Amesema kwenye suala la elimu, upatikanaji wa fedha unapaswa kuwa endelevu na unaoambatana na mipango ya uhakika, utoaji wa fedha kwa wakati, manunuzi sahihi, uwazi kwenye matumizi ya fedha na matokeo yanayoweza kupimika

Ametoa wito huo leo (Alhamisi, Novemba 12, 2026) wakati akifungua Mkutano wa Sita wa Kimataifa wa Ubora wa Elimu katika ukumbi wa JNICC, jijini Dar es Salaam.

Waziri Mkuu amesema katika kupanga matumizi ya fedha zinazopelekwa kwenye sekta ya elimu, hawapaswi kuangalia tu mgao wa fedha hizo, bali wahoji endapo zinafika kwenye shule zilikopangiwa na zinatumiwa na wanafunzi wanaozihitaji zaidi.

“Lazima tuimarishe utekelezaji wa bajeti zinazopelekwa, tupunguze uzembe, tuboreshe uratibu baina ya taasisi za kitaifa na za kwenye maeneo yetu na tutumie takwimu za kuaminika katika kufanya maamuzi. Kila shilingi iliyowekezwa kwenye elimu inapaswa kuchangia ufundishaji bora, matokeo bora na fursa za sawa,” amesema.

Amesema wanajadili suala upatikanaji wa fedha na ubora wa elimu, maamuzi yatakayofikiwa yanapaswa kuzingatia usawa na ujumuishi kwa wanafunzi. “Rasilimali zitakazopatikana zinapaswa kujibu mahitaji ya wanafunzi wa kike, wanafunzi wenye mahitaji maalum ya elimu, watoto walioathiriwa na umaskini, wale walio katika jamii ambazo hazijahudumiwa na wanafunzi wote wanaokabiliwa na vizuizi vya kielimu.”

“Hakuna mtoto anapaswa kuachwa kwenye mfumo wa elimu yetu kwa sababu ya mahali anapoishi au mazingira yanayomzunguka. Tunapaswa tuhakikishe kuwa shule ziko salama, zinafikika na zina mazingira ambayo kila mwanafunzi anaweza kushiriki.”

Akielezea kuhusu maandalizi ya mfumo wa kupokea makundi mawili ya wahitimu ifikapo mwaka 2028 kutokana na mabadiliko ya mfumo wa elimu kupitia Sera ya Elimu na Mafunzo ya Mwaka 2014, Toleo la 2023, pamoja na mitaala iliyoboreshwa, Waziri Mkuu amesema kipindi hiki cha mpito kinahitaji maandalizi yaliyoratibiwa baina ya taasisi za Serikali na wadau wa elimu.

Waziri Mkuu amesema lengo la mabadiliko hayo ni kuongeza elimu ya lazima, kuimarisha ujuzi wa vitendo na kuwawezesha wanafunzi kuingia kwenye ajira au kujiajiri.

“Hakuna wizara moja, taasisi, au shule inayoweza kusimamia mahitaji kama haya peke yake. Lazima tupange kwa pamoja, tutarajie kutakuwa na ongezeko la mahitaji ya walimu, madarasa, vifaa vya kujifunzia, fedha na tuhakikishe utekelezaji unalenga mahitaji ya wanafunzi,” amesisitiza.

Kwa upande wake, Waziri wa Elimu, Sayansi na Teknolojia, Prof. Adolf Mkenda alisema mkutano huo unafanyika katika wakati sahihi ambapo Serikali inasimamia mageuzi katika sekta ya elimu, mageuzi ambayo yana kalenda ya ukalimishaji na tayari safari imeshaanza.

“Mageuzi haya yanalenga kuongeza ujuzi katika elimu ili isiwe ya mafundisho tu ya kinadharia bali impe mwanafunzi uwezo wa kujiajiri. Hapa tuna mkondo wa elimu ya amali na mkondo wa elimu jumla,” alisema.

Akielezea mabadiliko hayo, Prof. Mkenda alisema elimu ya sasa itatoka miaka saba hadi 10 na itakuwa ni ya lazima kwa kila mtoto wa Kitanzania. Watoto lazima wasome hadi kidato cha nne, wazazi lazima wawasimamie watoto. Kwa hiyo, elimu ya msingi itakuwa ya miaka sita, na baada ya hapo inabidi waende kidato cha kwanza,” alisema.

Alisema Rais Dkt. Samia Suluhu Hassan alishawapa Wakuu wote wa Mikoa kipimo cha utekelezaji wa agizo lake kuhusiana na maandalizi ya kuanza kwa mfumo huo mpya na kwamba hivi sasa nguvu kubwa inapaswa ielekezwe kwenye suala hilo.

“Kalenda ya utekelezaji imeshatoka na ifikapo Januari, 2028 tutakuwa na wahitimu wa darasa la sita na darasa la saba ambao wote kwa pamoja wataingia kidato cha kwanza. Katika hili hakuna kufeli wala hakuna kurudi nyuma,” alisisitiza.

Alitumia fursa hiyo kuwaalika wadau wa elimu nchini waangalie fursa zilizopo na wapi wanaweza kusaidiana na serikali kufanikisha lengo hilo. “Tunaalika wadau kwa sababu bado tunahitaji shule zaidi. Tunahitaji taasisi za dini na sekta binafsi zituunge mkono.”

HABARI HABARI JAMII

Airtel Yafanya Ziara Maalum kwa Tume ya Ulinzi wa Taarifa Binafsi

MICHUZI BLOG at Thursday, November 12, 2026 0

Dodoma, Novemba 10, 2026

KAMPUNI ya Airtel Tanzania imesema itaendelea kuimarisha mifumo ya ulinzi wa taarifa binafsi za wateja wake ili kuendelea kutoa huduma bora na kuhakikisha usalama wa huduma zake za kidijitali.

Dhamira hiyo imetolewa na Mkurugenzi Mtendaji wa Airtel Tanzania, Charles Kamoto, wakati wa ziara ya heshima katika Tume ya Ulinzi wa Taarifa Binafsi (PDPC), ambapo alikutana na Mkurugenzi Mkuu wa Tume hiyo, Dkt. Emmanuel Lameck Mkilia, pamoja na viongozi wengine.

Katika ziara hiyo, Kamoto aliishukuru Tume kwa mwongozo na ushirikiano iliowapatia katika kuendana na mfumo wa ulinzi wa taarifa binafsi, akieleza kuwa mafunzo na miongozo yaliyotolewa kwa wafanyakazi wa Airtel yamekuwa muhimu katika kuongeza uelewa wa namna sahihi ya kuchakata, kuhifadhi na kushughulikia taarifa za wateja.

Alisema ulinzi wa taarifa binafsi haupaswi kuonekana kama suala la kutimiza matakwa ya kisheria pekee, bali ni sehemu muhimu ya uendeshaji wa biashara na kujenga uhusiano wa muda mrefu na wateja.

“Kwa Airtel Tanzania, kulinda taarifa binafsi si wajibu wa kutimiza matakwa ya kisheria pekee, bali ni jukumu la msingi na sehemu muhimu ya namna tunavyoendesha biashara yetu. Kulinda taarifa za wateja ni muhimu katika kujenga na kudumisha imani pamoja na mahusiano ya muda mrefu,” alisema Kamoto.

Aliongeza kuwa kampuni hiyo inaendelea kuwekeza katika mafunzo na programu za uhamasishaji kwa wafanyakazi, pamoja na kuweka sera na mifumo ya ndani inayolenga kuhakikisha kuwa ulinzi wa taarifa binafsi unazingatiwa katika shughuli zake za kila siku.

Kamoto alisema hatua hizo ni muhimu zaidi wakati kampuni ikiendelea kupanua huduma zake za kidijitali na mipango ya ujumuishaji wa huduma za kifedha, hali inayoongeza umuhimu wa kutunza vyema taarifa za wateja ipasavyo.

Kwa upande wake, Mkurugenzi Mkuu wa Tume ya Ulinzi wa Taarifa Binafsi (PDPC), Dkt. Emmanuel Lameck Mkilia, aliipongeza Airtel Tanzania kwa kutembelea ofisi za Tume na kutambua umuhimu wa ushirikiano kati ya Tume na sekta binafsi. Alisisitiza pia umuhimu wa makampuni mbalimbali kuelewa dhamira ya Tume, hususan katika kuhakikisha kuwa biashara zinaweka mifumo imara ya kulinda na kuhifadhi taarifa binafsi za wateja wao.

“Naipongeza Airtel Tanzania kwa utayari wake wa kushirikiana na Tume katika kuunga mkono utekelezaji wa malengo ya Dira ya Taifa ya Maendeleo 2050, hususan katika kuendeleza safari ya Tanzania kuelekea uchumi wa kidijitali na kuhakikisha Watanzania wengi zaidi wananufaika na fursa za kidijitali,” alisema Dkt. Mkilia.

Airtel Tanzania inathamini ushirikiano wake na Tume na inaendelea kujizatiti kuimarisha uhusiano huo katika kukuza usimamizi na utunzaji sahihi wa taarifa binafsi kwa lengo la kukuza na kujenga mazingira salama ya kidijitali nchini.

HABARI JAMII MICHEZO

BUNIFU ZA KISAYANSI KULENGA KUTATUA CHANGAMOTO ZA WANANCHI

MICHUZI BLOG at Thursday, November 12, 2026 0

Na Karama Kenyunko Michuzi Tv

TAFITI na bunifu za kisayansi zinazolenga kutatua changamoto za wananchi zinatarajiwa kuwa sehemu muhimu ya maadhimisho ya miaka 40 ya Tume ya Taifa ya Sayansi na Teknolojia (COSTECH), yatakayofikia kilele Novemba 18, 2026, jijini Dar es Salaam.

Miongoni mwa bunifu zilizooneshwa ni mkanda maalumu wa kusaidia kudhibiti upotevu wa damu kwa mama baada ya kujifungua, chanjo ya samaki inayolenga kukabiliana na magonjwa yanayoathiri ufugaji wa samaki pamoja na teknolojia ya kuzalisha gesi kwa kutenganisha hidrojeni na oksijeni kutoka kwenye maji.

Akizungumza na waandishi wa habari kuhusu maadhimisho hayo, Waziri wa Elimu, Sayansi na Teknolojia, Prof. Adolf Mkenda, amesema bunifu hizo ni sehemu ya mchango wa sayansi, teknolojia na utafiti katika kutafuta suluhisho la changamoto mbalimbali zinazowakabili wananchi.

mesema maonesho ya tafiti, teknolojia na bunifu yatafanyika Novemba 17 na 18 katika ukumbi wa Mlimani City, Dar es Salaam, huku kilele cha maadhimisho hayo kikitarajiwa kufungwa na Waziri Mkuu, Dkt. Mwigulu Nchemba, Novemba 18.

Kuhusu ubunifu wa kuzalisha gesi kwa kutenganisha hidrojeni na oksijeni kutoka kwenye maji, Prof. Mkenda amesema ameagiza wataalamu kuchunguza usalama wa teknolojia hiyo pamoja na uwezekano wa kuitumia kiuchumi na kibiashara.

Katika eneo la afya, amesisitiza umuhimu wa vyuo vikuu na taasisi za utafiti kufanya uchunguzi wa kisayansi kuhusu mimea inayotumika kutibu magonjwa, ili kubaini ufanisi wake, kiwango sahihi cha matumizi na madhara yanayoweza kujitokeza.

Amesema pia ni muhimu kuimarisha uwezo wa kufanya majaribio ya awali ya dawa nchini kabla ya kufikia hatua ya kuzijaribu kwa binadamu, hatua itakayoongeza nafasi ya watafiti wa Tanzania kushiriki katika maendeleo ya tiba.

Prof. Mkenda ameeleza kuwa maadhimisho hayo pia ni fursa ya kutathmini mchango wa COSTECH katika maendeleo ya nchi na kuweka msukumo mpya wa matumizi ya sayansi, teknolojia na ubunifu katika utekelezaji wa Dira ya Taifa ya Maendeleo 2050.

Amebainisha kuwa matumizi ya teknolojia na tafiti yanapaswa kuimarishwa katika sekta za kilimo, ufugaji, uvuvi na uchimbaji wa madini ili kuongeza tija na kuwezesha rasilimali za nchi kutumika kwa manufaa ya wananchi.

Amesema katika kilimo, tafiti zinapaswa kuelekezwa katika kuongeza uzalishaji katika eneo linalolimwa, kupunguza umaskini wa wakulima na kuchangia upatikanaji wa chakula kwa gharama nafuu.

Aidha, amezitaja jitihada za ufadhili wa masomo kupitia Samia Scholarship, utoaji wa tuzo kwa watafiti na Mfuko wa Samia wa Ubunifu kuwa miongoni mwa hatua zinazolenga kuendeleza wataalamu na kuwawezesha wabunifu nchini.

Ameeleza kuwa kabla ya kufikia kilele hicho, shughuli mbalimbali zimefanyika zikiwemo kliniki ya ubunifu wakati wa maonesho ya Nanenane, maonesho katika viunga vya Bunge na mikutano ya wadau wa sayansi na utafiti.

Amewakaribisha wananchi, waandishi wa habari na wadau mbalimbali kutembelea maonesho hayo ili kujionea tafiti, teknolojia na bunifu zinazolenga kuchangia maendeleo ya Tanzania.

HABARI

KAMATI YA BUNGE YAIPONGEZA WAMI/RUVU KWA UHIFADHI WA MAZINGIRA NA UFUATILIAJI WA RASILIMALI ZA MAJI

MICHUZI BLOG at Thursday, November 12, 2026 0

Katika kuimarisha usimamizi na uhifadhi wa rasilimali za maji nchini, Kamati ya Kudumu ya Bunge ya Maji na Mazingira imeendelea na ziara ya kutembelea na kukagua vituo vya ufuatiliaji wa mwenendo wa maji katika mito vinavyosimamiwa na Bodi ya Maji Bonde la Wami/Ruvu.

Katika ziara hiyo, wajumbe wa Kamati wametembelea kituo cha kupima hali ya wingi wa maji katika Mto Ruvu, kilichopo eneo la Ruvu Kibungo, Halmashauri ya Wilaya ya Morogoro, ambapo wamepata maelezo kuhusu namna kituo hicho kinavyofanya kazi katika kukusanya na kutoa takwimu za mwenendo wa maji mtoni.

Vituo hivyo vina umuhimu mkubwa katika usimamizi wa rasilimali za maji kwani huwezesha Bodi kupata takwimu sahihi na za uhakika kuhusu kiasi cha maji kinachopita katika mito kwa nyakati tofauti.

Taarifa hizo hutumika katika kupanga na kusimamia matumizi ya maji, kufanya maamuzi sahihi kuhusu ugawaji wa rasilimali hiyo, kutambua mabadiliko ya mwenendo wa maji pamoja na kutoa tahadhari mapema dhidi ya vihatarishi vinavyoweza kusababisha mafuriko au upungufu wa maji.

Akizungumza wakati wa ziara hiyo, Kaimu Mwenyekiti wa Kamati hiyo Mhe. Patrick Mwalunenge (Mb), ameipongeza Bodi ya Maji Bonde la Wami/Ruvu kwa juhudi zinazofanyika katika kusimamia na kuhifadhi mazingira, akieleza kuwa hatua hizo ni muhimu katika kulinda vyanzo vya maji na kuhakikisha upatikanaji endelevu wa rasilimali hiyo kwa matumizi ya sasa na vizazi vijavyo.

Ziara hiyo ni sehemu ya mwendelezo wa Kamati hiyo kukagua utekelezaji wa miradi na shughuli mbalimbali za usimamizi, uhifadhi na ulinzi wa rasilimali za maji zinazotekelezwa na Bodi ya Maji Bonde la Wami/Ruvu.

KILIMO

DED KIMARA ATAKA SHAMBA LA KOROSHO UGEZI KUWA CHACHU YA UCHUMI KIBITI

MICHUZI BLOG at Thursday, November 12, 2026 0

Na Mwamvua Mwinyi, Kibiti

Mkurugenzi Mtendaji wa Halmashauri ya Wilaya ya Kibiti, Ramadhan Ali Kimara, ameitaka Halmashauri na wadau mbalimbali kutumia uwekezaji wa shamba la mikorosho lenye ukubwa wa ekari 400 katika Kitongoji cha Ugezi, Kata ya Mtawanya, kuwa chachu ya kukuza uchumi wa eneo hilo kupitia uzalishaji wa korosho na ajira kwa vijana.

Alieleza ,uwekezaji huo una manufaa kwa Halmashauri na wananchi kutokana na fursa za ajira zinazopatikana katika shughuli za utunzaji wa shamba na uvunaji wa korosho, huku vijana wakipata nafasi ya kujifunza mbinu bora za kilimo cha kisasa.

Kwa upande wake, msimamizi wa shamba hilo, Gilbert Masawe, alifafanua kuwa shamba hilo lina miaka mitatu tangu kuanzishwa na uzalishaji wake bado haujafikia kiwango cha juu katika eneo lote la ekari 400 kutokana na mikorosho kuendelea kukua.

Alisema matarajio ni kuongeza uzalishaji kadri mikorosho inavyoendelea kukomaa, huku kukiwa na mpango wa kupanua matumizi ya zao hilo kwa kuanza uzalishaji wa mvinyo unaotokana na mabibo ya korosho.

Alieleza kuwa kwa sasa mvinyo huo huzalishwa kwa kiwango kidogo kwa ajili ya matumizi ya wafanyakazi wa shamba hilo, lakini kuna mpango wa kupanua uzalishaji wake siku zijazo ili kuongeza thamani ya zao la korosho na kupanua wigo wa fursa za kiuchumi.

HABARI

JKT YAWAFUNGULIA MILANGO VIJANA WA TEHAMA NA UFUNDI, YAONYA MATAPELI

MICHUZI BLOG at Thursday, November 12, 2026 0

Na Janeth Raphael - MichuziTv

JESHI la Kujenga Taifa (JKT) limewataka vijana wenye elimu ya Teknolojia ya Habari na Mawasiliano (TEHAMA) pamoja na fani mbalimbali za ufundi kujitokeza kuomba nafasi za kujiunga na mafunzo ya kujitolea kwa mwaka 2026/2027.

Wito huo umetolewa leo, Novemba 12, 2026, jijini Dodoma na Mkuu wa Tawi la Utawala wa JKT, Brigedia Jenerali Hassan Mabena, kwa niaba ya Mkuu wa Jeshi la Kujenga Taifa, Meja Jenerali Rajabu Nduka Mabele, wakati akizungumza na waandishi wa habari katika Makao Makuu ya Jeshi hilo.

Brigedia Jenerali Mabena amesema nafasi hizo zinawahusu wahitimu wa Shahada ya Sayansi ya Mitandao ya Kompyuta na Usalama wa Taarifa (Bachelor of Science in Computer Networks and Information Security), pamoja na walimu wa Elimu ya Ufundi na Mafunzo (VET) wenye utaalamu katika fani mbalimbali.

Miongoni mwa fani zinazohitajika ni uchomeleaji, ufundi magari, umeme wa magari, ufundi bomba, ufundi rangi, uashi, teknolojia ya habari na mawasiliano (TEHAMA), ubunifu wa mavazi, ukarani, useremala, ushonaji pamoja na ufundi wa friji na viyoyozi.

Amesema vijana wenye sifa zinazohitajika wanapaswa kuwasilisha maombi yao kupitia Ofisi za Wakuu wa Mikoa na Wilaya wanakotoka, huku usaili kwa waombaji ukitarajiwa kuanza Novemba 16, 2026, katika mikoa yote ya Tanzania Bara na Zanzibar.

Kwa mujibu wa Brigedia Jenerali Mabena, vijana watakaofaulu usaili huo na kuchaguliwa kujiunga na mafunzo watatakiwa kuripoti katika makambi ya JKT kuanzia Desemba 10 hadi 15, mwaka huu.

Hata hivyo, JKT limeweka wazi kuwa mafunzo ya kujitolea si njia ya kupata ajira serikalini au katika taasisi nyingine, likisisitiza kuwa halitoi ajira wala halihusiki kuwatafutia vijana ajira katika asasi, vyombo vya ulinzi na usalama, mashirika ya serikali au yasiyo ya kiserikali.

Badala yake, mafunzo hayo yanalenga kuwajengea vijana nidhamu, uzalendo na ujuzi mbalimbali utakaowawezesha kujitegemea na kujiajiri baada ya kumaliza mikataba yao ya kulitumikia jeshi hilo.

Wakati huohuo, Brigedia Jenerali Mabena amewaonya vijana, wazazi na wananchi kwa ujumla kujihadhari na watu wanaoweza kujitokeza wakidai kuwa wanauza nafasi za kujiunga na JKT kwa kujitolea.

Amesisitiza kuwa nafasi hizo haziuziwi na hakuna malipo yoyote yanayotakiwa kufanywa ili kupata nafasi, huku akiwataka wananchi kutokubali kushawishiwa na matapeli wanaotumia fursa ya matangazo ya kujiunga na jeshi hilo kujipatia fedha kwa njia zisizo halali.

Aidha, wananchi wametakiwa kutoa taarifa kwa vyombo vya dola wanapokutana na watu wanaodai kuwa na uwezo wa kuwapatia vijana nafasi za JKT kwa malipo, ili hatua stahiki zichukuliwe dhidi ya wanaojihusisha na vitendo hivyo.

JKT limewahimiza vijana wenye sifa zinazohitajika kutumia fursa hiyo kwa kufuata taratibu rasmi zilizotolewa na kujitokeza kuomba nafasi za kushiriki mafunzo ya kujitolea kwa mwaka 2026/2027.

HABARI

RC NYONGO AITAKA RUWASA PWANI KUIMARISHA HUDUMA YA MAJI SAFI NA SALAMA

MICHUZI BLOG at Thursday, November 12, 2026 0

Na Victor Masangu, Pwani

Mkuu wa Mkoa wa Pwani, Stanslaus Nyongo, ameitaka RUWASA mkoani humo kuimarisha utoaji wa huduma ya maji safi na salama kwa wananchi, akisisitiza kuwa taasisi hiyo inapaswa kuweka mbele maslahi ya wananchi na kuhakikisha wanapata huduma hiyo kwa uhakika.

Aidha, Nyongo ameitaka RUWASA kuwa wabunifu katika uendeshaji wa huduma za maji kwa kuweka mikakati ya kuongeza mapato na kujiendesha kibiashara badala ya kutegemea Serikali pekee kugharamia shughuli zake.

Nyongo ametoa maelekezo hayo wakati wa kikao kazi kilichowakutanisha mameneja wa RUWASA kutoka wilaya zote za Mkoa wa Pwani pamoja na viongozi wa mkoa, kilichofanyika katika ukumbi wa Ofisi ya Mkuu wa Mkoa.

Amesema Mkoa wa Pwani una wawekezaji wengi wanaohitaji huduma ya maji safi na salama, ambao wanaweza kuwa sehemu ya kuongeza mapato ya taasisi hiyo kupitia utoaji wa huduma.

Ameeleza kuwa pamoja na Serikali kuendelea kuwekeza katika miradi ya maji, mahitaji ya huduma hiyo bado ni makubwa, hivyo RUWASA inapaswa kuimarisha mikakati ya kuwahudumia wananchi na wawekezaji.

Katika hatua nyingine, Nyongo amemtaka Meneja wa RUWASA Wilaya ya Mkuranga kutafuta suluhu ya changamoto za upatikanaji wa maji katika maeneo yake ili wananchi waondokane na utegemezi wa vyanzo vya maji visivyo salama.

Kwa upande wake, Meneja wa RUWASA Mkoa wa Pwani, Upendo Lugongo, amesema upatikanaji wa huduma ya maji kwa wakazi wa vijijini mkoani humo umefikia asilimia 84.3.

Amesema RUWASA inaendelea kutekeleza Programu ya 1575 inayolenga kufikisha huduma ya maji katika vijiji 13 katika mwaka wa fedha 2026/2027, kati ya vijiji 22 vilivyo kwenye programu hiyo.

Amevitaja vijiji hivyo kuwa katika Halmashauri za Rufiji (1), Kibiti (3), Kisarawe (3), Mkuranga (3) na Mafia (3).

Aidha, amesema RUWASA inaendelea kutekeleza miradi 36 ya maji katika hatua mbalimbali, huku ikiandaa utekelezaji wa miradi mipya 24.

Amebainisha kuwa katika mwaka wa fedha 2026/2027, RUWASA Mkoa wa Pwani imetengewa Sh bilioni 14.64, ambapo Sh bilioni 5.51 zitatumika kutekeleza miradi 36 inayoendelea na Sh bilioni 9.13 zitaelekezwa katika miradi mipya 24.

HABARI

DC MUFINNDI ATOA WITO KWA MADIWANI MAFINGA KUHAMASISHA WANANCHI KUJIUNGA NA BIMA YA AFYA

MICHUZI BLOG at Thursday, November 12, 2026 0

NA DENIS MLOWE, IRINGA

MKUU wa Wilaya ya Mufindi, Dk. Linda Selekwa, ametoa wito kwa madiwani wa Halmashauri ya Mji wa Mafinga kuimarisha juhudi za kutoa elimu kwa wananchi kuhusu umuhimu wa kujiunga na Bima ya Afya, akisema hatua hiyo itasaidia kupunguza gharama za matibabu na kuwawezesha wananchi kupata huduma za afya kwa uhakika.

Dk. Selekwa alitoa wito huo wakati akitoa salamu za Serikali katika kikao cha Baraza la Madiwani la Halmashauri ya Mji wa Mafinga, ambapo alisisitiza kuwa madiwani wana nafasi kubwa ya kuhamasisha wananchi katika maeneo yao kutokana na ukaribu wao na jamii.

Alisema Serikali imeendelea kuchukua hatua mbalimbali za kuhakikisha wananchi wanapata huduma za afya kupitia mfumo wa bima, hivyo ni muhimu viongozi wa ngazi za chini kuelewa mfumo huo na kuwahamasisha wananchi kujiunga.

Alieleza kuwa wananchi wengi wamekuwa wakifika katika ofisi za viongozi kuomba msaada wa gharama za matibabu, wakati baadhi ya changamoto hizo zingeweza kupunguzwa kwa kuwa na bima ya afya inayowasaidia kugharamia matibabu kwa kipindi chote cha uanachama.

“Tunawaomba madiwani kutumia nafasi zenu kuhakikisha mnaendelea kuhamasisha wananchi kujiunga na Bima ya Afya. Mtu anapougua katika jamii, mara nyingi kiongozi wa kwanza anayemfuata ni diwani au mwenyekiti wa eneo husika, hivyo ni muhimu kuhakikisha wananchi wanapata elimu kuhusu mfumo huu,” alisema.

Dk. Selekwa alisisitiza kuwa uhamasishaji huo unapaswa kwenda sambamba na maandalizi ya kutosha katika vituo vya kutolea huduma za afya, ikiwemo miundombinu, vifaa na utayari wa watumishi ili wananchi wanapojiunga na bima wapate huduma zinazostahili.

Alionya kuwa endapo wananchi watahamasishwa kujiunga na bima lakini vituo vya afya vikakosa uwezo wa kutoa huduma kwa wakati, hali hiyo inaweza kuwakatisha tamaa na kupunguza imani yao kwa mfumo huo.

Aidha Dk. Selekwa aliipongeza Halmashauri ya Mji wa Mafinga kwa kuendelea kuimarisha shughuli za maendeleo, hususan maonyesho ya biashara yaliyofanyika hivi karibuni ya biashara Mufindi.akisema yamekuwa na mchango katika kukuza shughuli za kiuchumi na kuwapa wananchi fursa za kutangaza bidhaa na huduma zao.

Alisema maonyesho yamekuwa na matokeo chanya kutokana na ushirikiano wa Baraza la Madiwani na wataalamu wa halmashauri, huku akiwataka viongozi hao kuendelea kuyasimamia ili yawe endelevu na kuongezeka ukubwa kila mwaka.

Aliwasisitiza madiwani kuhakikisha maonyesho hayo yanakuwa sehemu ya utamaduni wa halmashauri, akieleza kuwa hata viongozi watakapobadilika, mipango na mafanikio yaliyopatikana yanapaswa kuendelezwa.

Aidha, Mkuu huyo wa Wilaya alilitaka Baraza la Madiwani kusimamia kwa karibu mabadiliko ya kiutendaji yanayotokea katika halmashauri, akisisitiza umuhimu wa ushirikiano kati ya madiwani, watumishi na viongozi wapya wanaopangiwa majukumu mbalimbali.

Alisema mabadiliko ya viongozi hayapaswi kuwa sababu ya kuyumba kwa utendaji wa halmashauri, bali yanapaswa kuwa fursa ya kuimarisha taasisi na kuendeleza misingi mizuri iliyowekwa na viongozi waliotangulia.

Aliongeza kuwa mafanikio yanayopatikana katika halmashauri yanapaswa kuonekana kama matokeo ya ushirikiano wa viongozi na watumishi wote, hivyo ni muhimu kulinda sifa na heshima ya taasisi hiyo kwa kuimarisha usimamizi na uwajibikaji.

Dk. Selekwa pia alitambua mchango wa aliyekuwa kiongozi wa halmashauri, Federica Myovela ambaye alisema ameacha msingi mzuri wa utendaji, huku akiwataka madiwani na watumishi kuendeleza ushirikiano na uongozi unaoendelea.

HABARI

VODACOM YAKABIDHI KOMPYUTA 30, MADAWATI 90 NA VIFAA VINGINE SHULE YA MSINGI NA UFUNDI MBEZI

MICHUZI BLOG at Thursday, November 12, 2026 0

Kampuni ya mawasiliano ya Vodacom Tanzania kupitia taasisi yake ya Vodacom Tanzania Foundation imetoa msaada wa vifaa vya elimu kwa Shule ya Msingi na Ufundi Mbezi, iliyopo Wilaya ya Ubungo, ikiwa ni sehemu ya juhudi za kuboresha mazingira ya kujifunzia na kufundishia pamoja na kuimarisha matumizi ya teknolojia katika sekta ya elimu.

Msaada huo unajumuisha kompyuta 30, vifaa vya UPS 30, televisheni moja yenye ukubwa wa inchi 75 pamoja na madawati 90, ambavyo vinatarajiwa kuongeza ufanisi wa ufundishaji na ujifunzaji shuleni hapo.

Akizungumza katika hafla hiyo, Mkuu wa Idara ya Vodacom Tanzania Foundation, Uendelevu na Ubia, Pauline Alexander Koola, amesema Vodacom inaendelea kutekeleza wajibu wake wa kijamii kwa kushirikiana na wadau mbalimbali katika kuchangia maendeleo ya jamii, hususan katika sekta ya elimu.

Kwa upande wake, Mkuu wa Wilaya ya Ubungo, Albert Msando, ameeleza umuhimu wa ushirikiano kati ya Serikali na sekta binafsi katika kuboresha huduma za kijamii, akitambua mchango wa Vodacom katika kuimarisha mazingira ya elimu.

Msaada huo unatarajiwa kuwanufaisha wanafunzi na walimu wa Shule ya Msingi na Ufundi Mbezi kwa kuboresha upatikanaji wa vifaa vya kujifunzia na kufundishia, pamoja na kuongeza fursa za wanafunzi kujifunza kupitia teknolojia.