MICHUZI BLOG

Na Mwandishi Wetu

HUDUMA za afya kwa watoto njiti na wanaozaliwa wakiwa na changamoto mbalimbali zimeonyesha mafanikio makubwa katika Wilaya ya Kwimba, Mwanza, baada ya kuanzishwa kwa Kitengo cha Huduma kwa Mama na Mtoto, hatua iliyosaidia kupunguza kwa asilimia 64 kiwango cha vifo vya watoto wanaolazwa katika kituo hicho.

Akizungumza Novemba 15, 2026, Muuguzi Daraja la II na Mkuu wa Wodi ya Watoto Wachanga katika Hospitali ya Wilaya ya Kwimba, Ernest John Kibona, amesema katika miezi tisa ya kwanza tangu kitengo hicho kuanza kufanya kazi, jumla ya watoto 542 wenye matatizo mbalimbali ya kiafya wamehudumiwa, ikilinganishwa na watoto 183 waliopatiwa huduma katika kipindi kama hicho kabla ya kuanzishwa kwa kitengo hicho.

Kibona amesema kati ya watoto 542 waliolazwa tangu kitengo hicho kilipoanza kufanya kazi Februari 26, 2026, watoto 250 sawa na asilimia 46 walikuwa wamezaliwa kabla ya wakati, huku watoto 66 sawa na takribani asilimia 12 ya waliolazwa wakifariki. Amesema hali hiyo ni tofauti na kipindi cha miezi tisa iliyotangulia, ambapo kati ya watoto 183 waliolazwa, 63 walifariki, sawa na asilimia 34.

Amesema takwimu hizo zinaonyesha kupungua kwa takribani asilimia 64 kwa uwiano wa vifo vya watoto waliolazwa, licha ya kuongezeka kwa kiasi kikubwa kwa idadi ya watoto wanaopatiwa matibabu katika kituo hicho.

Mbali na kuongeza upatikanaji wa huduma za matibabu, kuanzishwa kwa kitengo hicho kumepunguza pia ulazima wa familia kusafiri nje ya wilaya kutafuta huduma maalumu kwa watoto wachanga, hususan katika Jiji la Mwanza ambako hospitali za rufaa ziko zaidi ya kilomita 90 kutoka Kwimba.

Kabla ya kuanzishwa kwa kitengo hicho, watoto wachanga waliohitaji huduma maalumu walikuwa wakipelekwa katika Hospitali ya Rufaa ya Mkoa ya Sekou Toure na Bugando Medical Centre. Safari hizo ziliongeza gharama na changamoto za usafiri kwa familia, huku Kibona akisema idadi ya rufaa kwenda hospitali za Mwanza imepungua kwa zaidi ya asilimia 67, wakati kitengo hicho sasa kinahudumia pia wagonjwa kutoka wilaya tano jirani.

Kwa mujibu wa Mkurugenzi Mtendaji wa Doris Mollel Foundation, Doris Mollel, kabla ya huduma hizo kusogezwa karibu na wananchi, baadhi ya mama walilazimika kupitia hatua kadhaa za rufaa kabla ya watoto wao kupata huduma stahiki. Amesema mama anaweza kuanza safari ya kujifungua katika zahanati, lakini mtoto akizaliwa njiti huhitaji kupelekwa kituo cha afya kwa huduma maalumu, huku baadhi ya vituo hivyo vikiwa umbali wa hadi saa mbili kutoka Hospitali ya Wilaya ya Kwimba.

Amesema iwapo kituo cha afya hakina uwezo wa kutoa huduma inayohitajika, mtoto hulazimika kupewa rufaa nyingine kwenda hospitali ya mkoa, hali ambayo huongeza hatari kwa mtoto pamoja na mzigo wa kifedha na kimazingira kwa familia. Kwa hiyo, amesema kuanzishwa kwa Kitengo cha Huduma kwa Mama na Mtoto, kwa msaada wa Doris Mollel Foundation, kumechangia kusogeza huduma za watoto wachanga karibu na jamii na kupunguza safari ndefu za kutafuta matibabu.

Mafanikio hayo yanakuja wakati Tanzania ikiendelea kukabiliwa na changamoto ya vifo vya watoto wachanga, hasa ndani ya siku 28 za kwanza baada ya kuzaliwa. Kwa mujibu wa Utafiti wa Afya ya Uzazi na Mtoto pamoja na Viashiria vya Malaria Tanzania wa mwaka 2022, kiwango cha vifo vya watoto wachanga nchini kilikuwa vifo 24 kwa kila vizazi hai 1,000, kutoka vifo 25 kwa kila vizazi hai 1,000 vilivyorekodiwa katika utafiti wa mwaka 2015/16.

Hata hivyo, Kibona amesema kitengo hicho bado kinakabiliwa na changamoto za uhaba wa wataalamu na vifaa muhimu vya matibabu, hali inayopunguza uwezo wa kutoa huduma kamili kwa idadi inayoongezeka ya watoto wanaohitaji matibabu. Amesema kuna uhitaji wa mtaalamu wa huduma za watoto wachanga, madaktari zaidi pamoja na wauguzi wa kuongeza nguvu katika kitengo hicho.

Amesema pia kitengo hakina kiwanda cha kuzalisha oksijeni na kinahitaji vifaa zaidi, ikiwamo radiant warmers kwa ajili ya kudhibiti joto la mwili wa watoto wachanga pamoja na mashine za phototherapy zinazotumika kutibu manjano kwa watoto wachanga. Changamoto hizo zinaonyesha umuhimu wa kuambatana kwa uwekezaji katika miundombinu ya afya na uwezeshaji wa kutosha kwa wataalamu, vifaa na dawa ili huduma ziendelee kuwa bora.

Wakati huo huo, katika kuadhimisha Siku ya Watoto Njiti Duniani mwaka huu, Doris Mollel Foundation imeandaa hafla ya jioni jijini Dar es Salaam, ambapo vitabu vitatu vinavyolenga kuongeza uelewa kuhusu watoto njiti, ushiriki wa wazazi na huduma kwa watoto wachanga vinatarajiwa kuzinduliwa.

Machapisho hayo ni My Baby Is Born Too Soon. What Do I Do? (Nimezaa Njiti, Nifanyeje?), kinachotoa mwongozo kwa wazazi na walezi; How We Want Neonatal Care Units to Look Like, kilichoandaliwa na Tanzania Preterm Family Network; pamoja na mwongozo kuhusu utoaji wa huduma na msaada wa kisaikolojia kwa mama walio na watoto njiti.

Machapisho hayo yanalenga kushughulikia mahitaji ya kitabibu, kihisia na kisaikolojia ya familia zinazokumbwa na changamoto ya kujifungua watoto njiti, sambamba na kutoa mwongozo kwa wahudumu wa afya na wadau wanaohusika na upangaji na uendelezaji wa vituo vya huduma za watoto wachanga. Naibu Waziri wa Afya, Dkt. Florence George Samizi, anatarajiwa kuwa mgeni rasmi katika hafla hiyo.

KOKA ATOA VITI 100 NA SH MILIONI MOJA KUSAIDIA MIRADI YA UVCCM VIZIWAZIWA

Na Victor Masangu, Kibaha

MBUNGE wa Jimbo la Kibaha Mjini, Silvestry Koka, ametoa viti 100 na Sh milioni moja kwa Umoja wa Vijana wa Chama Cha Mapinduzi (UVCCM), Kata ya Viziwaziwa, kwa ajili ya kuanzisha miradi ya kiuchumi itakayowawezesha vijana kujipatia kipato.

Katika msaada huo, Sh milioni moja zitatumika kuanzisha mradi wa maegesho ya pikipiki (bodaboda), huku viti 100 vikiwa sehemu ya mradi mwingine wa kuwawezesha vijana kuongeza kipato.

Koka ametoa msaada huo wakati wa kikao cha Baraza la UVCCM Kata ya Viziwaziwa, ambapo pia alifungua rasmi Shina la Umoja wa Vijana wa Bodaboda Mkomgeni na kuwataka vijana kuwa na mshikamano katika kusimamia na kuendeleza miradi yao.

Amewasisitiza vijana hao kuzingatia nidhamu ya fedha, usimamizi mzuri wa miradi na uwajibikaji ili kuhakikisha miradi hiyo inakuwa endelevu na kuleta manufaa kwa wanachama.

“Kitu kikubwa ninachowaomba vijana wa UVCCM Kata ya Viziwaziwa ni kuendelea kushikamana pamoja na kuwa na nidhamu katika suala zima la utunzaji wa fedha, sambamba na kuhakikisha miradi waliyoianzisha inakuwa na tija,” amesema Koka.

Kwa upande wake, Mwenyekiti wa UVCCM Kata ya Viziwaziwa, Jumanne Mwagiya, amempongeza Mbunge huyo kwa kuwashika mkono vijana kupitia msaada wa fedha na viti, akisema utawasaidia katika jitihada za kujikwamua kiuchumi.

Naye Diwani wa Kata ya Viziwaziwa, Mohamed Chamba, amesema juhudi zinazofanywa na Serikali inayoongozwa na Rais Dkt. Samia Suluhu Hassan, pamoja na Mbunge Koka, zimechangia utekelezaji wa miradi mbalimbali ya maendeleo.

Baadhi ya vijana walioshiriki kikao hicho wamemshukuru Mbunge huyo kwa msaada huo, wakieleza kuwa miradi ya maegesho ya pikipiki na viti 100 itakuwa sehemu ya fursa za kujiongezea kipato.

NDEJEMBI AIPONGEZA UDSM KWA UJENZI BORA WA KAMPASI YA LINDI, YAGHARAMU BILIONI 14

Makamu wa Rais wa Jamhuri ya Muungano wa Tanzania, Mhe. Deogratius John Ndejembi, amekipongeza Chuo Kikuu cha Dar es Salaam (UDSM) kwa utekelezaji mzuri wa mradi wa ujenzi wa Kampasi ya Lindi.

Makamu wa Rais amesema ubora wa majengo yaliyojengwa unaonesha matumizi sahihi ya fedha za umma na thamani halisi ya fedha zilizowekezwa, huku ujenzi wa awamu ya kwanza ya mradi huo ukifikia asilimia 98.

Akiwa katika ziara ya kukagua maendeleo ya mradi huo katika eneo la Ngongo, Manispaa ya Lindi, Makamu wa Rais ameeleza namna alivyovutiwa na ubora wa miundombinu iliyojengwa, akisema uwekezaji huo wa takribani Sh. bilioni 14 umeleta matokeo yanayoonekana.

Aidha, amezitaka taasisi nyingine za umma kujifunza kutoka UDSM kuhusu namna bora ya kusimamia na kutekeleza miradi.

Pongezi hizo zimeonesha kuridhishwa na usimamizi wa mradi, ufuatiliaji wa utekelezaji wake pamoja na ubora wa miundombinu iliyojengwa kupitia Mradi wa Elimu ya Juu kwa Mageuzi ya Kiuchumi (HEET), unaotekelezwa kwa ufadhili wa Serikali ya Tanzania kwa mkopo kutoka Benki ya Dunia.

Aidha, Makamu wa Rais ameiagiza Wizara ya Elimu, Sayansi na Teknolojia kutoa kipaumbele kwa Kampasi ya Lindi katika awamu ya pili ya mradi wa HEET, hususan katika ujenzi wa nyumba za makazi kwa ajili ya wahadhiri na watumishi wa UDSM, ili kuimarisha mazingira ya kazi na uwezo wa kampasi kutoa huduma zake kwa ufanisi.

Kwa upande wake, Mkuu wa Chuo Kikuu cha Dar es Salaam na Rais Mstaafu wa Jamhuri ya Muungano wa Tanzania, Dkt. Jakaya Mrisho Kikwete, ameipongeza UDSM kwa hatua iliyofikia, akisisitiza umuhimu wa kukamilisha miundombinu hasa barabara za kuifikia kampasi hiyo pamoja na nyumba za watumishi.

Akizungumzia suala la barabara, Dkt. Kikwete alisisitiza kuwa kampasi inahitaji kuunganishwa vizuri na mji wa makao makuu ili kurahisisha upatikanaji wake, akieleza kuwa Serikali ina dhamira ya kushughulikia mahitaji yaliyosalia.

Msisitizo huo unaonesha umuhimu wa kuendeleza kampasi kama jumuiya kamili ya kitaaluma, yenye miundombinu na huduma zinazowezesha ufundishaji, ujifunzaji, utafiti pamoja na ustawi wa jamii.

NGORONGORO, TANAPA DAM DAM

Mloka Rufiji,Pwani

Mamlaka ya Hifadhi ya eneo la Ngorongoro (NCAA) imekabidhi Shirika la hifadhi za Taifa Tanzania (TANAPA) kituo cha mwitikio wa haraka kwa ajili ya kukabiliana na changamoto ya wanyamapori wakali na waharibifu kilichojengwa katika kijiji cha Mwaseni, kata ya Mloka, Rufiji Mkoni Pwani.

Akizungumza wakati wa kukabidhi kituo hicho Naibu Kamishna wa Uhifadhi, utalii na maendeleo ya jamii Ngorongoro Joas Makwati , amesema ujenzi wa vituo vya askari wa wanyamapori unalenga kutoa mwitikio wa haraka kwa matukio ya wanyamapori wakali na waharibifu katika hifadhi ya Nyerere kama sehemu ya mchango wa Ngorongoro kuisaidia Serikali za kukabiliana na changamoto ya wanyamapori na kuimarisha usalama wa wananchi.

“Baada ya kukamilisha kituo hiki Serikali itahakikisha askari watakuwa karibu na wananchi na wataweza kuwahi kwa haraka pale wanyama wanapovamia makazi ya watu ili tuhakikishe wananchi wanakuwa salama na mali zao kama Ilani ya chama cha mapinduzi inavyotuelekeza ," amesema Kamishna Makwati

Mwenyekiti wa Kijiji cha Mwaseni, Hemed Rashid, ameishukuru Ngorongoro kwa ujenzi wa kituo hicho na kuahidi watakilinda na kushirikiana na askari wa uhifadhi kukabiliana na wanyamapori waharibifu.

Kwa upande wake Mwakilishi wa Kamishna wa uhifadhi TANAPA, PCO Davis Mushi ameshukuru uongozi wa Ngorongoro na kueleza kuwa “kituo hicho cha mwitikio kitaongeza ufanisi wa kazi za askari wa uhifadhi kuwa na ofisi, makazi bora na uwezo wa kulinda na kudhibiti wanyamapori wanaoleta uharibifu kwa wananchi wa Mloka na vijiji jirani."

NBC, Sanlam Allianz Waimarisha Ushirikiano Kurahisisha Upatikanaji wa Huduma za Bima Nchini

Benki ya Taifa ya Biashara (NBC) na kampuni ya bima ya Sanlam Allianz zimesisitiza dhamira yao ya kuimarisha ushirikiano katika kupanua wigo na kurahisisha upatikanaji wa huduma za bima nchini kupitia mfumo wa utoaji wa huduma za bima kupitia benki (Bancassurance), kwa lengo la kukuza ujumuishi wa kifedha na kuwawezesha wananchi kupata kinga dhidi ya vihatarishi vinavyoweza kuathiri afya, maisha na mali zao.

Ushirikiano huo unalenga kuongeza elimu kwa wananchi, kurahisisha upatikanaji wa huduma za bima na kuimarisha uwazi pamoja na ufanisi katika kushughulikia madai ili kujenga imani na kuongeza matumizi ya bima nchini.

Dhamira wa wadau hao imebainishwa katika semina mtandao ya pili iliyoandaliwa na NBC kwa ushirikiano na Sanlam Allianz, yenye mada “Building Trust Through Transparency in Insurance” (Kujenga Imani Kupitia Uwazi Katika Huduma za Bima), iliyowakutanisha pia wawakilishi wa Mamlaka ya Usimamizi wa Bima Tanzania (TIRA) na DigiCash.

Akizungumza katika semina hiyo, Mkuu wa Kitengo cha Bima wa NBC, Benjamin Nkaka, amesema benki zina nafasi muhimu katika kuwafikishia wananchi huduma za kinga ya kifedha kupitia bima, kwa kutumia mtandao wa matawi, wateja na mifumo ya kidijitali.

“Ushirikiano wetu na Sanlam Allianz umekuwa muhimu katika kupanua upatikanaji wa huduma za bima nchini. Kupitia mtandao wetu, tunawezesha upatikanaji wa bidhaa za bima, malipo ya ada za bima, elimu na mikopo ya kugharamia huduma hizo,” amesema Nkaka.

Alisisitiza kuwa bima haipaswi kuonekana kama huduma ya anasa, bali nyenzo muhimu ya usalama wa kifedha kwa kila mwananchi.

Kwa upande wake, Meneja wa Usambazaji wa Bidhaa za Bima wa Sanlam Allianz, Geofray Masige, alisema ushirikiano huo unawawezesha wateja kupata huduma za kibenki, mikopo, bima na msaada wa kushughulikia madai kupitia kituo kimoja.

“Ushirikiano huu unaunganisha huduma za benki na bima ili kumrahisishia mteja kupata suluhisho mbalimbali za kifedha sehemu moja,” alisema Masige.

Aliongeza kuwa kupitia ‘Insurance Premium Financing’, wateja wanaweza kugharamia ada za bima mbalimbali zinazotolewa na kampuni hiyo kwa njia ya mikopo kutoka benki na kurejesha fedha kwa awamu, badala ya kulipa gharama zote kwa mkupuo.

Akizungumzia usimamizi wa sekta hiyo, Mkurugenzi wa Huduma za Uzingatiaji na Tathmini wa TIRA, Alex Rocky, alisema ushirikiano kati ya mamlaka, benki na kampuni za bima ni muhimu katika kuongeza elimu na kulinda haki za watumiaji.

“Ukuaji wa soko la bima unapaswa kwenda sambamba na uwazi na ufanisi katika kushughulikia madai ya wateja. Ni muhimu madai yanayostahili kulipwa kwa wakati ili kuimarisha imani ya wananchi,” alisema Rocky.

Alieleza kuwa taarifa ya utendaji wa soko la bima kwa mwaka 2025 imeonesha ongezeko la thamani ya ada za bima kutoka Sh trilioni 1.52 hadi Sh trilioni 2.25. Katika mwaka huo, kampuni za bima zililipa asilimia 80.8 ya madai yaliyopokelewa, yenye thamani ya takribani Sh trilioni 1.6, huku malipo yakifikia Sh trilioni 1.29.

Naye Dkt. Alfred Msemo kutoka DigiCash alisema uwazi katika utoaji wa huduma ni msingi wa kujenga uaminifu na kuongeza matumizi ya bima.

“Kampuni za bima zinapaswa kutumia lugha rahisi kueleza bidhaa, masharti ya mikataba na taratibu za madai ili wateja waelewe haki na wajibu wao,” amesema Dkt. Msemo, akisisitiza pia umuhimu wa teknolojia katika kurahisisha upatikanaji wa huduma hizo.

Akizungumza kuhusu elimu kwa umma, Mkurugenzi wa Uzingatiaji na Masuala ya Udhibiti wa NBC, Sarah Laizer Sumaye, alisema baadhi ya wananchi bado wanaichukulia bima kama huduma inayotakiwa kisheria pekee badala ya kutambua manufaa yake katika kuwalinda dhidi ya hasara za kifedha, mali na afya.

“Tunatambua kuwa elimu ni muhimu katika kubadili mtazamo wa wananchi kuhusu bima. Kupitia ushirikiano na wadau mbalimbali, NBC inaendelea kutoa elimu ya kifedha ili wananchi waelewe aina za bima, manufaa yake na umuhimu wake katika maisha yao,” alisema Sarah.

Alisisitiza kuwa elimu na ushirikiano wa wadau ni muhimu katika kujenga utamaduni wa matumizi ya bima nchini

Meneja wa Usambazaji wa Bidhaa za Bima wa Sanlam Allianz, Geofray Masige (aliyeshika kipaza sauti), akizungumza wakati wa semina mtandao (webinar) maalum yenye mada “Building Trust Through Transparency in Insurance” (Kujenga Imani Kupitia Uwazi katika Huduma za Bima), iliyoandaliwa na Sanlam Allianz kwa kushirikiana na Benki ya NBC, kwa lengo la kuhamasisha Watanzania kuhusu umuhimu wa kutumia huduma mbalimbali za bima, ikiwemo bima ya maisha.

Waliokaa meza kuu kutoka kushoto ni Mkurugenzi wa Huduma za Uzingatiaji na Tathmini wa Mamlaka ya Usimamizi wa Bima Tanzania (TIRA), Alex Rocky; Meneja Mkuu (Tathmini) wa Sanlam Allianz Life Insurance, Bi. Mary Murya; Mkuu wa Kitengo cha Bima wa NBC, Benjamin Nkaka; na Mtathmini kutoka kampuni ya DigiCash, Dkt. Alfred Msemo.

Mkuu wa Kitengo cha Bima wa NBC, Benjamin Nkaka (katikati), akizungumza wakati wa semina mtandao (webinar) maalum yenye mada “Building Trust Through Transparency in Insurance” (Kujenga Imani Kupitia Uwazi katika Huduma za Bima), iliyoandaliwa na Sanlam Allianz kwa kushirikiana na Benki ya NBC, kwa lengo la kuhamasisha Watanzania kuhusu umuhimu wa kutumia huduma mbalimbali za bima, ikiwemo bima ya maisha. Kushoto ni Meneja Mkuu (Tathmini) wa Sanlam Allianz Life Insurance, Bi. Mary Murya na kulia ni Meneja wa Usambazaji wa Bidhaa za Bima wa Sanlam Allianz, Geofray Masige

Mkurugenzi wa Huduma za Uzingatiaji na Tathmini wa Mamlaka ya Usimamizi wa Bima Tanzania (TIRA), Alex Rocky (katikati), akizungumza wakati wa semina mtandao (webinar) maalum yenye mada “Building Trust Through Transparency in Insurance” (Kujenga Imani Kupitia Uwazi katika Huduma za Bima), iliyoandaliwa na Sanlam Allianz kwa kushirikiana na Benki ya NBC, kwa lengo la kuhamasisha Watanzania kuhusu umuhimu wa kutumia huduma mbalimbali za bima, ikiwemo bima ya maisha. Kulia ni Meneja Mkuu (Tathmini) wa Sanlam Allianz Life Insurance, Bi. Mary Murya na kushoto ni Mkuu wa Idara ya Ushauri wa Biashara NBC na Muendesha mjadala huo Ibrahim Nzutu.

Meneja Mkuu (Tathmini) wa Sanlam Allianz Life Insurance, Bi. Mary Murya (katikati) akizungumza wakati wa semina mtandao (webinar) maalum yenye mada “Building Trust Through Transparency in Insurance” (Kujenga Imani Kupitia Uwazi katika Huduma za Bima), iliyoandaliwa na Sanlam Allianz kwa kushirikiana na Benki ya NBC, kwa lengo la kuhamasisha Watanzania kuhusu umuhimu wa kutumia huduma mbalimbali za bima, ikiwemo bima ya maisha. Kulia ni Mkuu wa Kitengo cha Bima wa NBC, Benjamin Nkaka na kushoto ni Mkurugenzi wa Huduma za Uzingatiaji na Tathmini wa Mamlaka ya Usimamizi wa Bima Tanzania (TIRA), Alex Rocky

Mtathmini kutoka kampuni ya DigiCash, Dkt. Alfred Msemo (Kulia) akizungumza wakati wa semina mtandao (webinar) maalum yenye mada “Building Trust Through Transparency in Insurance” (Kujenga Imani Kupitia Uwazi katika Huduma za Bima), iliyoandaliwa na Sanlam Allianz kwa kushirikiana na Benki ya NBC, kwa lengo la kuhamasisha Watanzania kuhusu umuhimu wa kutumia huduma mbalimbali za bima, ikiwemo bima ya maisha. Kushoto ni Mkuu wa Kitengo cha Bima wa NBC, Benjamin Nkaka na katikati ni Meneja wa Usambazaji wa Bidhaa za Bima wa Sanlam Allianz, Geofray Masige

Akizungumza kuhusu elimu kwa umma, Mkurugenzi wa Uzingatiaji na Masuala ya Udhibiti wa NBC, Sarah Laizer Sumaye (Alieshika kipaza) alisema baadhi ya wananchi bado wanaichukulia bima kama huduma inayotakiwa kisheria pekee badala ya kutambua manufaa yake katika kuwalinda dhidi ya hasara za kifedha, mali na afya.

Baadhi ya washiriki wa semina mtandao (webnar) hiyo wakifuatilia mada mbalimbali zilizowasilishwa wakati wa tikio hilo.

KAMBI YA MATIBABU YA KIBINGWA YAFIKISHA WATU 20,291, WAGONJWA 14 WAPELEKWA JKCI

Kambi ya uchunguzi na matibabu ya kibingwa imeingia siku ya nne sasa tangu kufunguliwa kwake katika Tarafa ya Ngerengere, Halmashauri ya Morogoro.

huduma hizo kwa Sasa zimehamia katika Tarafa ya Mikese ambapo hadi sasa, idadi ya watu waliioonwa na kutibiwa imefikia 20,291 huku wagonjwa 14 kati yao wakipewa rufaa na kupelekwa katika Hospitali ya Moyo ya Jakaya Kikwete (JKCI) kwa matibabu zaidi ya kibingwa.

Kambi hiyo inayodhaminiwa na Mbunge wa Jimbo la Morogoro Kusini Mashariki, Mheshimiwa Hamiss Taletale, kwa kushirikiana na Serikali na Taasisi ya Moyo ya Jakaya Kikwete.

Akitoa taarifa fupi ya mwendelezo wa huduma hizo katika eneo la Mikese, Kaimu Mganga Mfawidhi wa Halmashauri ya Morogoro, Dkt. Kazmil Subi amesema huduma zinaendelea kutolewa kama zilivyopangwa.

"Huduma zinaendelea vizuri kama tulivyopanga hivyo tunawasihi wakazi wa Mikese na maeneo ya jirani wajitokeze kwa wingi, kwani madaktari bingwa wapo hapa kwa ajili yao, na huduma ni zinatolewa bila malipo." Alisema

Aidha Dkt. Subi amebainisha magonjwa yanayowasumbua wananchi katika ukanda huo ni pamoja na magonjwa ya wanawake, hasa ya uzazi na saratani ya shingo ya kizazi, magonjwa ya watoto ikiwemo malaria, pamoja na magonjwa ya wanaume aina ya busha na ngiri.

Akizungumza na wananchi waliojitokeza kupata huduma hiyo, Katibu wa Chama Cha Mapinduzi (CCM) Mkoa wa Morogoro, Bw. Robert Mwega amesema CCM ina wajibu wa kuisimamia Serikali kuhakikisha inatoa huduma bora kwa wananchi.

Mwega amewataka wananchi kuendelea kuiamini CCM na Serikali yake kwa kuwa afya ya wananchi ndiyo kipaumbele cha kwanza.

Kwa upande wake, Mbunge wa Jimbo la Morogoro Kusini Mashariki, Mheshimiwa Hamiss Taletale, amewataka wananchi wa Mikese na maeneo ya jirani kuendelea kujitokeza kwa wingi.

"Nawaombawananchi wangu wa Mikese na maeneo yote ya jirani, muendelee kujitokeza kwa wingi kwani huduma hizi zinatolewa kwa kila mwenye uhitaji, bila kujali kipato chake, itikadi ya chama,dini Wala kabila. hata hivyo Afya yenu ndiyo nguvu ya maendeleo ya jimbo letu. Msiogope, njooni mpimwe, mtibiwe, na mkitakiwa kwenda JKCI tutawasafirisha wenyewe." Alisema

Mhe. Taletale amesema lengo lake ni kuhakikisha hakuna mwananchi anayekosa matibabu kwa sababu ya ukosefu wa fedha.

Kambi hiyo itaendelea kwa siku zijazo katika Tarafa ya Mikese kabla ya kuhamia katika tarafa ya mkuyuni.

MAHAKAMA YA AFRIKA YATUPILIA MBALI MAOMBI YA WALALAMIKAJI DHIDI YA MALAWI, BURKINA FASO, MALI NA BENIN

Na Seif Mangwangi, Michuzi TV, Arusha

MAHAKAMA ya Afrika ya Haki za Binadamu na Watu (AfCHPR), imeyatupilia mbali maombi manne yaliyowasilishwa na walalamikaji dhidi ya nchi za Malawi, Burkina Faso, Mali na Benin, baada ya kubaini kuwa hayakukidhi baadhi ya masharti ya kisheria yanayotakiwa ili kesi zisikilizwe na Mahakama hiyo.

Hukumu hizo zilisomwa Novemba 13, 2026, na majaji watatu tofauti wa Mahakama hiyo, wakiongozwa na Rais wa Mahakama, Jaji Blaise Chikaya, kesi hizo zilihusu madai ya ukiukwaji wa haki za binadamu, ikiwamo haki ya kumiliki mali, usawa mbele ya sheria, haki ya kusikilizwa na haki za kisiasa.

Katika shauri la kwanza namba 007/2022, lililowasilishwa na Mlalamikaji Patroklos Tsaperas dhidi ya Jamhuri ya Malawi, mwombaji ambaye ni raia wa Afrika Kusini na mkurugenzi wa kampuni ya Malawi Mobile Limited (MML), aliituhumu Serikali ya Malawi kukiuka haki zake za msingi, ikiwamo haki ya kumiliki mali, kutobaguliwa, usawa mbele ya sheria na haki ya kusikilizwa kwa mujibu wa sheria.

Serikali ya Malawi iliwasilisha pingamizi la awali ikidai kuwa mwombaji hakumaliza kutumia njia za ndani za kisheria kabla ya kuifikisha kesi hiyo Mahakamani hapo pamoja na kuchelewa kuwasilisha maombi yake.

Baada ya kupitia hoja za pande zote, Mahakama ilibaini kuwa suala la haki ya kumiliki mali lilikuwa limefikia hatua ya kukamilisha taratibu za ndani za kisheria.

Hata hivyo, Mahakama ilibaini kuwa Tsaperas aliwasilisha maombi yake Oktoba 17, 2022, takribani miaka saba, miezi saba na siku saba baada ya Mahakama Kuu ya Rufaa ya Malawi kutoa uamuzi wake Machi 10, 2015 na kwa kuwa hakutoa maelezo ya kuridhisha kuhusu sababu za kuchelewa kuwasilisha maombi hayo, Mahakama iliamua kuwa maombi yake hayakuwasilishwa ndani ya muda unaokubalika kisheria na hivyo kuyatupilia mbali.

Aidha katika uamuzi huo, Mahakama ilielekeza kila upande kubeba gharama zake za shauri.

Katika shauri la pili, Jean Roger M’BA dhidi ya Burkina Faso, namba 015/2019, mwombaji aliomba Mahakama itoe nafuu mbalimbali, zikiwamo msamaha au kupunguziwa adhabu ya kifo, kuhamishiwa katika nchi alikozaliwa pamoja na kulipwa fidia.

Mahakama ilibaini kuwa mwombaji aliwasilisha maombi yake Aprili 23, 2019, ikiwa ni miaka sita, miezi miwili na siku 29 tangu kukamilika kwa taratibu za ndani za kisheria.

Hata hivyo, hakutoa sababu zilizothibitishwa kueleza kwa nini alichukua muda mrefu kuifikisha kesi hiyo mbele ya Mahakama ya Afrika.Katika kufafanua uamuzi wake, Mahakama ilisisitiza kuwa ukweli kwamba mtu amefungwa jela pekee hautoshi kuwa sababu ya kuhalalisha kuchelewa kuwasilisha maombi.

Aidha mahakama hiyo Ilieleza kuwa mwombaji anapaswa kutoa maelezo na ushahidi unaoonyesha kuwa muda alioutumia kuwasilisha shauri ulikuwa wa kuridhisha hivyo kutokana na kutokuwepo kwa maelezo hayo, Mahakama ilitangaza maombi hayo kutokubalika na kuelekeza kila upande kubeba gharama zake.

Shauri la tatu lililotolewa hukumu ni namba 023/2020 la mlalamikaji Babarou Bocoum dhidi ya Jamhuri ya Mali, ambapo mwombaji alidai kukiukwa kwa haki zake za usawa mbele ya sheria na kushiriki katika shughuli za uongozi wa nchi, kufuatia kuondolewa kwa jina lake katika daftari la wapiga kura na mchakato wa uchaguzi wa wabunge uliofanyika Machi 29, 2020.

Katika maombi yake, Bocoum aliiomba Mahakama kufuta matokeo ya uchaguzi husika, kurejesha jina lake katika daftari la wapiga kura, kufanya mageuzi ya mfumo wa uchaguzi ikiwamo kuanzishwa kwa tume huru ya uchaguzi, pamoja na kumlipa fidia ya faranga kiasincha CFA milioni 100.

Hata hivyo, Mahakama ilibaini kuwa sheria za Mali zilikuwa zimeweka njia za kiutawala na kimahakama ambazo mwombaji angeweza kuzitumia kupinga kuondolewa kwa jina lake katika daftari la wapiga kura lakini hakuwasilisha ushahidi unaoonyesha kuwa alitumia au hata kujaribu kutumia njia hizo kabla ya kuifikisha kesi yake katika Mahakama ya Afrika ya Watu na haki za binaadam.

Kutokana na hali hiyo, Mahakama hiyo ilisema kuwa Bocoum hakutimiza sharti la kumaliza kutumia njia za ndani za kisheria kabla ya kuwasilisha maombi yake katika Mahakama hiyo, hivyo, ilitangaza maombi yake kutokubalika na kuamuru kila upande kubeba gharama zake.

Katika shauri la nne namba 063/2019 lililofunguliwa na ,mlalamikaji, Ida Afiavi Ajavon (née Goudjo) na wenzake dhidi ya Jamhuri ya Benin, waombaji walikuwa ni raia wa Benin wanaoishi Paris, Ufaransa, kama wakimbizi wa kisiasa.

Walalamikaji hao ni Ida Afiavi Ajavon, Ludmila Isis Ayelé Ajavon, Evaëlle Jonella Noémie Ajavon na Ronald K. Steeven Karen Ayité Ajavon.

Waombaji waliwasilisha shauri hilo Novemba 29, 2019, wakidai kukiukwa kwa haki zao za kumiliki mali na kusikilizwa kwa haki, kufuatia hatua zilizochukuliwa dhidi ya kampuni ya COMON SA pamoja na kutaifishwa au kuzuiwa kwa akaunti zao binafsi za benki.

Ilidaiwa na walalamikaji kuwa hatua hizo zilihusishwa na hukumu iliyotolewa dhidi ya Sébastien Germain Marie Aïkoué Ajavon, aliyekuwa mkurugenzi mkuu na mwanahisa wa kampuni hiyo.

Katika maombi yao, walalamikaji waliomba kulipwa fidia ya faranga za CFA milioni 170 kila mmoja, pamoja na fidia nyingine kwa hasara walizodai kupata na gharama za kesi.

Hata hivyo, Mahakama ilibaini kuwa sheria za kiraia za Benin zilitoa njia za kisheria ambazo wanahisa wangeweza kuzitumia kwa kuwasilisha madai yao, huku Sheria inayojulikana kama OHADA inayotumika nchini humo ikiwa na utaratibu wa kupinga hatua za kukamatwa au kuzuiwa kwa akaunti za benki.

Mahakama ilieleza kuwa waombaji hawakuwasilisha ushahidi unaoonyesha kuwa walitumia au kujaribu kutumia njia hizo za kisheria zilizokuwepo nchini Benin. Kwa msingi huo, ilihitimisha kuwa hawakutimiza sharti la kumaliza kutumia njia za ndani za kisheria kabla ya kuwasilisha shauri lao.

Aidha, Mahakama ilikataa pingamizi nyingine zilizowasilishwa na Serikali ya Benin, zikiwamo hoja zilizohusu suala la shauri hilo kuwa tayari limeamuliwa na kutokuwepo kwa madai mahususi.

Mahakama ilifafanua kuwa fidia iliyowahi kutolewa kwa Sébastien Ajavon ilikuwa inamhusu yeye binafsi na haikumaanisha moja kwa moja kuwa wanahisa wengine wa kampuni hiyo nao walikuwa wamefidiwa.

Katika kuhitimisha hukumu yake Mahakama ilitangaza maombi ya Ida Afiavi Ajavon na wenzake kutokubalika kutokana na kushindwa kutumia njia za ndani za kisheria, na kuelekeza kila upande kubeba gharama zake za shauri

MTAFUTAJI HACHOKI,AKICHOKA KESHAPATA

Kamishna wa Uhifadhi wa Mamlaka ya Hifadhi ya Ngorongoro (NCAA), Dkt.Abdul-Razaq Badru, amewataka waongoza watalii nchini kuendelea kujiongezea maarifa kuhusu vivutio na bidhaa za utalii ili kuboresha huduma kwa wageni.

Akizungumza katika Mkutano Mkuu wa Uchaguzi wa Chama cha Waongoza Watalii wa Kanda ya Kaskazini (NTSGS) Dkt.Badru alisema mtu anayetafuta maarifa hachoki hasa ikizingatiwa kuwa waongoza watalii ni kiungo muhimu kati ya vivutio vya utalii na wageni hivyo wanapaswa kuwa na uelewa wa kina wa maeneo wanayoyaeleza.

Alisema mtalii anayefika nchini anatarajia kupata taarifa sahihi na za kutosha kuhusu vivutio anavyotembelea, jambo ambalo huongeza thamani ya huduma anayolipia na kumhamasisha kurejea tena nchini.

Dkt.Badru aliongeza kuwa utalii ni miongoni mwa sekta zinazochangia kwa kiwango kikubwa uchumi wa taifa, huku akisisitiza umuhimu wa ushirikiano wa wadau wote, wakiwemo waongoza watalii, katika kuendeleza sekta hiyo.

Amewahakikishia waongoza watalii kuwa Ngorongoro kwa kushirikiana na Wizara ya Maliasili na Utalii itaendelea kuandaa mafunzo ya kujengea uwezo, ikiwemo mafunzo maalum ya kuwaboresha kitaaluma kabla ya msimu mkubwa wa utalii na tukio kubwa na la muhimu kabisa la Michezo ya AFCON.

Kwa upande wake, Mwenyekiti wa NTSGS, Angelbert Aloyce Qorro, alisema chama hicho tangu kuanzishwa mwaka 2019 kimekuwa mstari wa mbele katika kuimarisha taaluma ya uongozaji watalii na kujenga ushirikiano na taasisi za uhifadhi.

BILIONI 4.22 ZIMELIPWA, KAZI ASILIMIA 24: MAKAMU AAGIZA UCHUNGUZI WA MRADI LINDI

Makamu wa Rais wa Jamhuri ya Muungano wa Tanzania Mhe. Deogratius Ndejembi ameagiza Taasisi ya Kuzuia na Kupambana na Rushwa (TAKUKURU) na Jeshi la Polisi kuchunguza matumizi ya fedha za mradi wa kuboresha miundombinu ya Manispaa ya Lindi, baada ya taarifa kuonesha kuwa mkandarasi amelipwa shilingi bilioni 4.22, lakini utekelezaji umefikia asilimia 24 pekee huku asilimia 80 ya muda wa mkataba ikiwa imetumika.

Akitoa maelekezo hayo leo wakati wa ziara yake mkoani Lindi, Makamu wa Rais ametaka kufahamishwa namna malipo yalivyofanyika, fedha zilivyotumika na sababu za kazi kutotekelezwa kwa kasi iliyotarajiwa. Pia ametaka taarifa ya uchunguzi imfikie yeye mwenyewe ili aiwasilishe kwa Rais Dkt. Samia Suluhu Hassan.

Amehoji sababu za Mkandarasi kuendelea kulipwa fedha nyingine wakati Halmashauri yenyewe ilieleza kuwa hakuwa na nidhamu katika matumizi ya malipo ya awali.

Aidha, Makamu wa Rais hakuridhishwa na maelezo ya halmashauri kwamba imemwandikia mkandarasi barua 16 kuhusu kusuasua kwa kazi. Amesisitiza umuhimu wa kuchukua hatua badala ya kuendelea kuandikiana barua wakati fedha za umma zimeshalipwa.

Kwa mujibu wa taarifa ya utekelezaji iliyowasilishwa wakati wa ukaguzi, mradi huo wenye thamani ya shilingi bilioni 19.06 unatekelezwa na Hamerkop International Limited JV KIKIM Contractor’s Limited.

Mkandarasi amelipwa jumla ya shilingi bilioni 4.22, zinazojumuisha malipo ya awali ya shilingi bilioni 2.86 na malipo kupitia hati namba mbili ya shilingi bilioni 1.36.

Mkataba wa mradi huo ulisainiwa Juni 25, 2025, mjini Dodoma, na kazi kuanza rasmi Novemba 7, 2025. Mradi unatakiwa kukamilika Februari 5, 2027. Kwa mujibu wa taarifa, utekelezaji ulitarajiwa kufikia asilimia 80 katika hatua hii, hivyo kiwango cha asilimia 24 kilichofikiwa kiko nyuma kwa pointi 56 za asilimia.

Mradi huo, unaotekelezwa kupitia mpango wa TACTIC, unajumuisha Soko Kuu la Matopeni, barabara za kilomita 5.3, Stendi ya Mabasi Mitwero na Ofisi ya Uratibu wa Mradi. Unafadhiliwa na Benki ya Dunia kupitia Serikali chini ya TAMISEMI, huku usimamizi wa kitaalamu ukifanywa na Inter-Consult Limited kwa kushirikiana na Tanzo Vision Engineering Limited.

Kusuasua kwa ujenzi kulimfanya Waziri anayehusika na TAMISEMI, Profesa Riziki Shemdoe, kufanya ukaguzi Septemba 14, 2026. Aliagiza mkandarasi atafute wakandarasi wadogo wenye uwezo, pamoja na kuundwa kwa timu maalumu ya ufuatiliaji. Timu hiyo ilibaini kuwa mkandarasi hana uwezo wa kukamilisha mradi kwa wakati uliopangwa. Ilipendekeza abaki na ujenzi wa soko, huku kazi nyingine tatu zikitekelezwa na wakandarasi wadogo.

Kwa mujibu wa taarifa, mkandarasi mdogo wa barabara amepatikana, lakini stendi na ofisi bado zinatafutiwa wakandarasi wengine.

NAIBU WAZIRI REGINA AKABIDHI MIFUKO 200 YA SARUJI YA UJENZI WA KANISA MAGUGU

Na Mwandishi wetu, Babati

NAIBU Waziri wa Nchi Ofisi ya Rais Menejimenti ya Utumishi wa Umma na Utawala Bora Regina Ndege amekabidhi mifuko 200 ya saruji kwa ajili ya ujenzi wa Kanisa Katoliki Parokia ya Magugu Wilayani Babati Mkoani Manyara.

Naibu Waziri Regina ambaye pia ni Mbunge wa viti maalum Mkoa wa Manyara, ameshiriki Ibada ya misa takatifu ya kipaimara kwenye Parokia ya Magugu iliyoongozwa na Askofu wa Jimbo Katoliki la Mbulu, mhashamu Anthony Lagwen.

Naibu Waziri Regina katika ibada hiyo amejitolea kiasi cha mifuko 200 ya saruji kwa ajili ya ujenzi wa Kanisa hilo ambapo pia kulifanyika harambee na kupatikana fedha taslimu kiasi zaidi ya shilingi milioni 12.

Naibu Waziri Regina akizungumza kwenye harambee hiyo ameliomba Kanisa kuliombea Taifa, kudumisha amani, umoja na mshikamano.

Mhe Regina aliambatana na Mwenyekiti wa UWT Mkoa wa Manyara, Fatuma Tsea, Diwani wa Kata ya Magugu, Mhe. Stanley Dismas na Diwani wa Viti Maalum, Mhe. Stahimili Masasi.

Askofu wa Jimbo Katoliki la Mbulu mhashamu Anthony Lagwen amemshukuru Naibu Waziri Regina kwa majitoleo yake ya ujenzi wa Kanisa hilo la Magugu.

HABARI HABARI JAMII

NYONGO AITAKA MKURANGA KUHARAKISHA UJENZI WA SHULE YA SEKONDARI MBEZI GONGONI