spia

mwandishi mwandamizi wa deliniuzi alfred ngotezi akisoma gazeti la spia. anasema hii ni nyenzo iliyosaidia sana kumpa mtu tizi la kiinglishi enzi hizo tofauti na sasa ambapo majarida kama haya ni adimu. ngotezi alikuwa mgombea ubunge jimbo la buchosa, sengerema, mwanza na leo kachafua magazeti kwa habari hii

Mbunge Chitalilo aburuzwa mahakamani

Na Mwandishi wetu,

Hatimaye mbunge machachari wa Buchosa mkoani Mwanza Samuel Mchele Chitalilo amefikishwa mahakamani na wananchi wa jimbo hilo kwa tuhuma za kugushi vyeti na kudanganya kuhusu elimu yake katika chaguzi za 2000 na 2005.

Kwa mujibu wa taarifa iliyotolewa jana na mlalamikaji wa kwanza katika suala hilo, Henriko Msheleja, kesi hiyo imefunguliwa katika Mahakama Kuu mjini Mwanza na kupewa namba za usajili 25 ya 2007.

Mlalamikaji wa pili katika suala hilo ni Alfred Ngotezi ambaye ndiye aliyefungua jalada na. SEN/IR/104/2006 la uchunguzi kuhusu elimu ya Chitalilo,mapema mwaka jana mjini Sengerema mkoani Mwanza.

Msheleja aliliambia gazeti hili jana kwa njia ya simu kutoka Mwanza kuwa wamepeleka maombi rasmi Mahakama Kuu ili waruhusiwe kumshitaki Chitalilo kwa utaratibu wa uendeshaji mashtaka binafsi (Private Prosecution) chini ya kifungu cha 99 cha Mwenendo wa Makosa ya Jinai.

Mwezi uliopita Msheleja alikuja jijini Dar es Salaam akiwa na mpiga kura mwenzie Ramadhani Amani wakiwa na majina na sahihi za wapiga kura wengine 184 wa jimbo la Buchosa wakiomba msaada wa kisheria ili kumshitaki Chitalilo kwa kughushi vyeti na kudanganya kuhusu elimu yake.

Hatua hiyo ilifuatia Mkurugenzi wa Makosa ya Jinai DCI Robert Manumba kuthibitisha mapema mwezi Februari kuwa ni kweli mbunge huyo alikuwa ameghusi vyeti katika chaguzi za 2000 na 2005 lakini akasema hawawezi kumshitaki kwa madai kuwa hakuvunja sheria ya uchaguzi.

Msheleja alibainisha kuwa wao wanamshtaki mbunge huyo kwa kuvunja sheria dhidi ya kughushi ingawa hakutaka kutaja vifungu watakavyotumia kumshitaki akisema bado ni mapema mno. Hata hiyo baadhi ya wanasheria walioulizwa kuhusu suala hilo waliliambia gazeti hili majuzi kuwa Chitalilo anaweza kushtakiwa kwa kifungu 333 au 335 cha Mwenendo wa Makosa ya Jinai.

Msheleja alieleza kuwa wamefanikiwa kufanya hivyo baada ya kupata msaada wa kisheria kutoka Kituo cha Sheria na Haki za Binadamu kilichoko mjini Dar es Salaam. Mkurugenzi wa Kituo hicho Hellen Kijo-Bisimba alilithibitishia gazeti hili jana kuwa wanawasaidia wananchi hao wa Buchosa kutafuta haki mahakamani kwa kumfungulia mashtaka mbunge huyo.

Kwa kawaida, masuala yote ya jinai hushughulikiwa na Mkurugenzi wa Mashtaka (DPP), isipokuwa pale inapobidi kufanya kinyume ambapo ruhusa maalumu inaweza kutolewa na Mahakama Kuu kwa kutumia kifungu cha 99 cha Mwenendo wa Makosa ya Jinai.

Hati ya kiapo iliyowakilishwa mahakamani jana Jijini Mwanza ambayo gazetil hili limepata nakala yake imeorodhesha hoja 13 na viambatanisho sita katika maombi hayo ya kutaka Chitalilo ashtakiwe kwa utaratibu wa binafsi.

Hati hiyo inadai kuwa Chitalilo alighushi vyeti na kujipatia sifa zisizokuwa zake na kuwa alifanya makosa hayo katika chaguzi za 2000 na 2005. Inaongeza kuwa aliwadanganya wapiga kura kwa kutoa vipeperushi akionyesha kuwa alimaliza kidato cha nne kwenye Shule ya sekondari ya Bupandagila mkoani Shinyanga kati ya 1985 hadi 1990, na kuwa alisoma Sekondari ya Katikamu nchini Uganda kati ya 1990 na 1991.

Walalamikaji wanadai pia katika hati hiyo kuwa Baraza la Mitihani la Uganda na Shule ya Katikamu wametoa nyaraka kukanusha kuwa Chitalilo aliwahi kusoma huko. Wanadai pia kuwa wamewasilisha malalamiko yao katika ngazi mbali za utawala lakini bila mafanikio yoyote.

Hati pia inadai kuwa walalamikaji walimwandikia Rais wa Jamhuri ya Muungano wa Tanzania na Spika wa Bunge la Jamhuri kuhusu tatizo hilo lakini wanadai hakuna kilichofanyika. Wameongeza kuwa wanatafuta haki katika suala hilo ili liwe fundisho kwa watu wengine wenye mwenendo kama huo.

Wamesema kuwa Mkurugenzi wa Upelelezi wa Makosa ya Jinai (DCI) alithibitsha bayana Machi 4 mwaka huu kuwa baada ya uchunguzi wao, Polisi walibaini kuwa Mbunge huyo alikuwa ametenda kosa la Jinai kwa kughushi vyeti.

Wameongeza kuwa pindi Polisi walipoanza kuchunguza elimu yake alibadilisha wasifu aliokuwa ameweka kwenye Tovuti ya Bunge, mabadiriko ambayo hata hivyo wanadai yanaonyesha kuwa hakumaliza kidato cha pili kwenye sekondari ya Bupandagila mwaka 1991, sembuse kuingia kidato cha tano mwaka huo huo wa 1991. Katika mabadiriko hayo Chitalilo anakiri wazi katika tovuti hiyo kuwa hakumaliza shule popote pale isipokwa shule ya msingi ya Nguduluguru.

Ngotezi alipoulizwa kuhusu suala hilo alisema wamefikia uamuzi huo baada ya kuvuta subira ya muda mrefu bila hatua zozote kuchukuliwa dhidi ya mbunge huyo. Alisema kuwa sasa muda wa kulifanya suala la Chitalilo la kisiasa umekwisha; “ tuache sheria ichukue mkondo wake,” alisema.