penati

Penati yavunja mechi ya Simba, Yanga Marekani

Na Mobhare Matinyi, Washington DC

Penati iliyotolewa kwa ‘Yanga’ na mwamuzi Lucas Mkami ‘DJ Luke’ kunako dakika ya 89 ya mchezo, ilisababisha kuvunjika kwa pambano kali jana Jumapili baada ya wachezaji wa ‘Simba’ kuigomea na kutoka uwanjani huku matokeo yakiwa 3-3.

Mwamuzi Lucas ambaye kwa kawaida ndiye kocha wa timu wa mashabiki wa Yanga mjini hapa, alilazimika kutoa penalti hiyo baada ya mshambuliaji hatari wa Yanga, Abdallah Maqubel, kuangushwa ndani ya eneo la hatari na beki wa Simba mwenye misuli, Ray Abraham. Hiyo ilikuwa penalti ya pili kugomewa na Simba baada ya ile ya kipindi cha kwanza.

Wachezaji wa Simba wakiongozwa na kipa wao, Saleh Londa ‘Mstahiki Meya’, walilalamikia kwa madai kuwa mshambualiaji wa Yanga alipiga chini na kuumia baada ya kubanwa na beki wao. Wachezaji wa Yanga wakati huo walimbeba mwenzao kumtoa nje na wote kuwahi maji kabla ya kurejea kumpongeza mwamuzi.

Zogo hilo lilidumu kwa dakika takriban kumi na ndipo kocha wa Simba, Santa Chacha ‘Popadic’ alipoamua kuitoa timu uwanjani huku baadhi ya wachezaji wake wakiongozwa na Vincent Ndusilo, wakiwa tayari wameshavua jezi na kuvamia nyama zilizokuwa zikichomwa uwanjani hapo.

“Huwezi kutoa penalti kwenye mechi ya Simba na Yanga dakika ya 90 ya mchezo,” alidai kipa wa Simba, Londa ambaye dakika kumi kabla ya penalti hiyo alionesha umahiri wa ajabu alipookoa mkwaju wa kichwa uliopigwa na Hussein kufuatia kona. Awali Londa aliyekuwa kikwazo kwa Yanga, aliokoa shuti baada ya Maqubel kubaki naye uso kwa uso kwenye dakika ya 18.

Simba ilianza kwa kufunga bao la kustua kwenye dakika ya kwanza kupitia kwa Shabaan Ramadhani ambaye pia aliisawazishia Simba bao la tatu kwenye dakika ya 84. Bao la pili lilifungwa na kiungo machahari Liberatus Mwang’ombe kwenye dakika ya 34.

Yanga walisawazisha bao la kwanza kwenye dakika ya 15 lililofungwa na Hussein Ibrahim. Dakika ya 38 Maqubel aliyeinyanyasa ngome ya Simba alipachika bao la pili na kuongeza la tatu kwenye dakika ya 58.

Ukiondoa dosari hiyo ya penalti kulalamikiwa, mchezo huo ulikuwa mkali hasa kufuatia kila timu kuwa na mchezaji wa kiwango cha kimataifa na uwanja kufurika mashabiki waliokuwa katika sherehe za kumaliza majira ya joto, huku karibu nusu yao wakiwa akina dada warembo.

Ili kuidhibiti Simba, Yanga ilimuagiza kocha wake Lucas, kumuita mshambuliaji Maqubel kutoka Reading, Uingereza. Habari ambazo hazijathibitishwa zinadai mshambuliaji huyo Mtanzania anatarajiwa kwenda Sweden kucheza soka la kulipwa hivi karibuni.

Simba ilimtumia kiungo hatari Elvis Mnyamuru ‘Doto’ ambaye itakumbukwa kwamba alikuwa mmoja wa wachezaji walioitwa na kocha Maxime kuunda kikosi cha Taifa Stars kabla ya kwenda safai ya Brazil. Hata hiivyo, Doto ambaye amewahi kuichezea Twiga ya Dare s Salaam na timu ya daraja la kwanza Botswana, alirejea Marekani kwa sababu za kikazi kabla ya mchujo wa kwenda Brazil.

Timu katika mchezo huo uliohudhuriwa na Mtanzania mcheza basketi nyota hapa Marekani, Hashim “Tall”, zilikuwa:

SIMBA: Saleh Londa, Raymond Abraham, Naumu Chahe, Evans Shangarai, Adam, Elvis Mnyamuru, Rashid Beach-Boy, Liberatus Mwang’ombe, Shabaan Ramadhani, Kendo, Vincent Ndusilo.

YANGA: Dadi Rouba, Tiffa, Victor, David, Yahaya, Abdallah, Richard, Hussein, Dickson, Maqubel na Danny Kiondo.