Si kila kiongozi Afrika anakula rushwa - JK

Na Mwandishi Maalum, Washington D.C., Marekani

Rais Jakaya Mrisho Kikwete amesema kuwa siyo kila kiongozi wala kila mtumishi wa umma ni mwizi wala mla rushwa, hata kama ni kweli kuwa, kwa kiasi fulani, bado lipo tatizo la rushwa katika nchi za Afrika.

Amesema kuwa tatizo la wale ambao wanachagua kutangaza kuwa Afrika inanuka rushwa, ni kwamba wanafanya jaribio la kupuuza mambo yote mazuri yanayotokea katika Afrika na kuishia katika kushikia bango rushwa tu.

“Tusijiweke katika hali ya kutengeneza mazingira ya kwamba kila jambo linaloendelea katika Afrika ni rushwa tu,” Rais Kikwete amewaambia wajumbe wa taasisi ya Foreign Policy Brain Trust ya Wabunge Wenye Asili ya Afrika mjini Washington, D.C.

Rais Kikwete alikuwa anajibu maswali ya wajumbe wa mkutano huo baada ya kuwa amemaliza kutoa hotuba-mada (keynote address) muhimu kwenye mkutano huo jana (Ijumaa, Septemba 26, 2008) katika Kituo cha Walter E Washington Centre. Alikuwa anatoa hotuba-mada iliyozungumza nini Afrika inatarajia kutoka kwa Rais mpya wa Marekani atakayeingia madarakani Januari 20, mwakani.

Rais Kikwete aliyewasili mjini Washington akitokea mjini New York juzi (Alhamisi, Septemba 25, 2008) usiku amewaambia wajumbe wa mkutano huo:

“Hatukatai kuwa ipo rushwa katika Afrika. Tunachosema ni kwamba jambo hilo linatiwa chumvi nyingi kupita kiasi. Ni kama vile iko rushwa katika inchi ya Bara letu na katika kila senti inayoingizwa Barani Afrika… kuna wezi kila mahali, siyo Afrika pekee.”

Amesema kuwa kama kuna rushwa katika fedha za misaada inayotolewa kwa Afrika, misaada inayodhibitiwa kwenye kila hatua na wafadhili wenyewe wanayoitoa, bado liko tatizo kubwa zaidi kuliko Waafrika kuwa wala rushwa.

“Hii ni fedha yenu, na mnataka kujenga barabara katika nchi yoyote ya Afrika, na mnatoa fedha yenu na kuisimamia nyie wenyewe, sasa kama inatokea rushwa katika fedha hiyo ya ujenzi wa barabara, basi lazima mjiulize ni mfuko upi hasa fedha hiyo imeingia,” amesisitiza Rais Kikwete.

Kuhusu Tanzania, Rais Kikwete amesema kuwa Serikali yake inapambana kweli kweli na changamoto hiyo ya rushwa kuliko wakati mwingine wowote katika historia ya Tanzania.

“Moja ya dalili za Serikali inayokula rushwa ni kushuka kwa mapato ya Serikali, ama Serikali kushindwa kukusanya mapato. Mapato yetu yamekuwa yanaongezeka kila mwaka tokea tulipoingia madarakani,” amesema Rais Kikwete na kuongeza huku akiwa anashangiliwa:

“Mapato ya Serikali yameongezeka kutoka sh trilioni tatu hadi kufikika trilioni saba kwa mwaka, kiasi cha kwamba katika mwaka huu wa fedha tunagharimia sisi wenyewe bila msaada wa yoyote bajeti yetu ya matumizi ya Serikali. Haijapata kutokea. Sisemi hakuna rushwa, lakini hili ni suala la nani anataka kusema na kutangaza jambo gani kuhusu wewe.”

“Kama mtu anasema mabaya tu kuhusu wewe, basi ni mabaya tu yatakayojulikana. Katika hali hiyo, mazuri yote yatawekwa pembeni ama kupuuzwa, na hivyo kujenga picha kama vile kinachoendelea katika Afrika ni rushwa tupu.”

Rais pia ametumia muda mwingi kuwaelezea wajumbe wa mkutano huo kuhusu jinsi Afrika ilivyopiga hatua, iwe katika demokrasia, ama katika utoaji wa huduma za kijamii, ama watu kujiongezea pato.

Amesifia uhusiano mzuri kati ya Tanzania na Marekani na kusema kuwa anatarajia kuwa rais ajaye wa Marekani ataongeza na kuimarisha zaidi uhusiano huo.