libeneke na nginde nginde bado lipo palepale

Wanamuziki wa Mlimani Park Orchestra wakiwa na mratibu wao Juma Mbizo (kati juu, tai nyeupe) baada ya kuongea na waandidhi wa habari Dar.

Uongozi wa Shirika la Maendeleo la Dar (DDC) umesema utawainunulia bendi ya Mlimani Park vyombo vipya vya muziki na kuwakabidhi Machi 1, 2009 siku ambapo ndoa ya bendi hiyo na mmiliki huyo itapovunjwa rasmi.

Kiongozi wa bendi hiyo, Shaaban Dede, amesema hatua hiyo imefikwia baada ya mazungumzo marefu na uongozi wa DDC ambao umeamua kuwatema kwa kile kilichoonekana kuwa mzigo kwa shirika kutikana na ukosefu wa faida.

Wakati huo huo amesema wanamuziki wa iliyokuwa bendi ya muziki wa dansi ya DDC Mlimani Park (Sikinde Ngoma ya Ukae) hawatasambaratika, badala yake wataiendeleza bendi yao.

Akizungumza na waandishi wa habari kwenye ukumbi wa Idara ya Habari (Maelezo) jana, kiongozi wa bendi hiyo Shaaban Dede alisema, bendi hiyo sasa itarejea kwenye jina lake la Mlimani Park iliyokuwa ikitumia mwaka 1978 ilipoanzishwa kabla ya kuchukuliwa na Shirika la Maendeleo Dar es Salaam (DDC).

Bendi hiyo ilichukuliwa na Shirika hilo mwaka 1982 na kuitwa DDC Mlimani Park. Hatua hiyo ya wanamuziki hao imekuja baada ya DDC kuelemewa na kushindwa kuigharamia bendi hiyo na hivyo kuamua kujitoa kuihudumia.

“Biashara yoyote inatangazwa ili iuzike, sasa sisi tulikuwa hatutangazwi tutauzika vipi ndiyo maana imekuwa kama mzigo,” alisema.

“Kwa hiyo sasa tuko wenyewe, hivyo burudani ipo palepale ya Wanasikinde, hatumtegemei mtu, ratiba yetu ya kila siku ipo palepale kila Jumapili tutapiga DDC Kariakoo,”alisema.

Alisema kwa sasa wanajipanga upya na licha ya kuwa na albam zaidi ya 20 wakiwa DDC, lakini wataanza upya na bendi yao ya Mlimani Park na kwamba wanajiandaa kuzindua albam yao ya Supu Umeitia Nazi.

“Mazoezi yetu tunafanya kama kawaida Mlimani Park Klabu na waliosema upinzani na Msondo umekwisha, tunawaambia hapana upo palepale na kama wao wanaitwa Msondo Ngoma basi sisi Mlimani Park,”alisema.

Sikinde ambayo wapenzi wake hupenda kuiita Nginde ni moja ya bendi kongwe za muziki wa dansi nchini, nyingine ni Msondo ambayo imepita katika majina mengi kama Nuta, Juwata, Ottu kwa vile ilikuwa ikimilikiwa na Jumuiya ya Wafanyakazi, kabla ya kutemwa, ambapo sasa wanamuziki hao wanajitegemea wenyewe wakiitwa Msondo Ngoma Music Band.

Kwa sasa Mlimani Park ipo chini ya Mratibu wake Juma Mbizo.

Ikiwa DDC Mlimani Park, ambao wanamuziki wote ndiyo wamiliki wa bendi hiyo. Wanamuziki wanaounda bendi hiyo ni Ally Jamwaka, Shaaban Dede, Hamisi Milambo, Hassan Rehani ‘Bitchuka’, Hassan Kunyata na Ramadhani Mapesa.

Wengine ni Abdallah Hemba, Mjusi Shemboza, Juma Choka, Mbaraka Ousmane na Thomas Mwamwingi. Wengine ni Juma Mkoba, Shaaban Mabuyu, Mwape Ndilima, Mikidadi Abdallah, Steven Maufi, Yusufu Benard, Yasini Rashidi, Karama Regessu, Mustafa Ngosha na Hassan Jeff.