Viongozi wa Jumuiya za Uswisi na Japani wakutana Geneva

Mwenyekiti wa Jumuiya ya Watanzania wanaoishi nchini Uswisi Dk B. S. Nyenzi (kushoto) na Mgeni wake Mwenyekiti wa Jumuiya ya watanzania wanaoishi Japani Dk A. Y. Simba walipokutana katika Mgahawa wa La Lomana mjini Geneva kwa mazungumzo juu ya Jumuiya zao.

Mwenyekiti wa Jumuiya ya Watanzania Wanaoishi Nchini Uswisi (TAS), Dr B. S. Nyenzi, juzi jioni (12/6/2009) alikutana na Mwenyekiti wa Jumuiya Watanzania wa Japani (Tanzanite Society), Dr A. Y. Simba, katika mgahawa wa La Lomana mjini Geneva. Katika mkutano huo viongozi hao walijadili mambo mbalimbali ikiwa ni pamoja na kupeana historia na mchakato mzima wa uanzishwaji wa Jumuiya hizo, malengo ya jumuiya hizo, mafanikio waliyopata na matatizo wanayokabiliana nayo.

Kimsingi malengo ya Jumuiya hizi ni kuwakutanisha watanzania wanaoishi katika nchi hizo ili kuweza kusaidiana wakati wa shida na raha. Jumuiya hizi mbili zimefanikiwa kupata wanachama wengi kwa kipindi kifupi kutokana na viongozi wa Jumuiya hizo kufanya shughuli zao kwa uwazi zaidi.

Kwa mfano, Dr Simba alisema yeye na viongozi wenzake walipoingia madarakani, waliamua kuwa suala la mapato na matumizi ya fedha za Jumuiya kuwa ni ajenda katika kila mkutano wa wanachama wote, na kuruhusu wanachama kupata mahesabu ya fedha za Jumuiya muda wowote watakapotaka taarifa hizo.

Ikumbukwe kuwa ubadhirifu wa fedha za Jumuiya limekuwa ndio tatizo kubwa linalosababisha migogoro ya Jumuiya nyingi za watanzania waishio ughaibuni.

Viongozi hao pia walikubaliana kuwa wakati umefika kwa Jumuiya hizi kuangalia uwezekano wa kuwa na malengo ya kutoa misaada nyumbani Tanzania kadiri uwezo wao utakavyoruhusu. Kwa mfano Jumuiya hizi zinaweza kuamua kusomesha wanafunzi wasio kuwa na uwezo au kutoa misaada ya madawati kwa shule nyumbani Tanzania. Jumuiya hizi na watanzania wa ughaibuni kwa ujumla hawawezi kukwepa Jukumu la kutoa misaada ya maendeleo ya jamii.

Pia kwa kuwa kumekuwa na mwamko wa uanzishaji wa Jumuiya za watanzania, Wenyeviti hao pia walijadili kuhusu umuhimu wa kuanzisha Jumuiya mama ya Jumuiya zote za ughaibuni ili kuweza urahisi wa kubadilishana mawazo na kusaidiana kwa urahisi zaidi.

Mwisho viongozi hao wanapenda kutoa wito kwa watanzania wanaoishi nje ya nchi kuanzisha Jumuiya katika nchi ambazo hazijafanya hivyo, na katika nchi zile ambazo kuna Jumuiya basi watanzania wajiunge kwa wingi kwenye jumuiya hizo. Pia walilisitiza suala la kuepusha migogoro isiyokuwa ya msingi na kuongeza upendo miongoni mwetu.

Mwenyekiti wa Tanzanite Society aliwashukuru wenyeji wake kwa kufanikisha mkutano huo, na hasa katibu mkuu wa TAS Bw. S. M. Sillayo, ambaye hata hivyo hakufanikiwa kuhudhuria kutokana na kuwa Tanzania kikazi. Dr Simba alindoka Geneva Jumamosi kuelekea Davos kuhudhuria mkutano wa kimataifa wa madhara ya mawimbi ya mawasiliano kwa afya za binadamu.

Umoja ni nguvu na utengano ni udhahifu