pongezi kwa wabunge walioamua kuachia ngazi wenyewe

Bwana Michuzi

Nashukuru kwa kunipa nafasi niwapongeze Wabunge wazalendo, kutokana na maamuzi yao ya kuamua kung’atuka wakati bado wana uwezo wa kufanya kazi. Kitendo cha Mhe Keenja kutangaza kutogombea Ubunge tena jimbo laUbungo ni cha Kizalendo na kinachoonyesha ukomavu wa kisiasa na uelewa halisi wa Matatizo ya Watanzania.

Kama Tanzania tungekuwa na akina Keenja, Mzindakaya , Pius Ng'wandu na wabunge wengine walioamua kuachia madaraka kwa uhuru wao, Tanzania isingekuwa na viongozi wanaojipenda kama tulionao leo.

Mheshimiwa Keenja, anaacha historia nzuri sana katika siasa za Tanzania, ikikumbukwa kazi aliyoifanya ya kuisafisha Jiji la Dar baada ya Halmashauri kufutiliwa mbali na Sumaye.

Mhe Keenja ameweka maslahi ya taifa mbele kwa kutambua kuwa Dodoma imefika wakati tupeleke mawazo mapya yenye uwezo wa kuchambua na kutatua matatizo ya wananchi.

Katika Bunge lijalo tunahitaji Wabunge wenye uchungu na nchi na rasilimali zake. Tunahitaji tubadilishe utamaduni wa kuongea nje ya bunge na kunyamaza ndani ya bunge. Wazee walioko bungeni ni wazee wenye busara sana. Ni Wazazi wetu ambao wameitumikia nchi yetu kwa
mioyo yao ya Upendo.

Wabunge wengine walipata ajali ama walifariki wakitoka kuwasikiliza wananchi. Yote haya tunayatambua sisi kama vijana, na hatupingi wala hatukatai hata kama wataamua kuuendelea kuwa Bungeni mpaka miaka 100 ijayo. Lakini ninachopenda kuwaaasa ni kitu kimoja, kwanini tuwe watoto wao halafu wasituamini kama tunaweza kuwa wasaidizi wao pale wakapozidiwa nguvu katika shughuli zao.

Muda umefika Wazee wetu watuamini sisi vijana. Sio busara kwa Kijana wa Kiafrika kusimama kwenye Jukwaa kuwashambulia hawa Wazee wetu ambao hata kama tungesema tuwalipe dhahabu na almasi hazitalingana na thamani ya utumishi walioonyesha kwa wananchi.

Utamaduni wa kuacha madaraka kwa hiyari ni heshima kubwa sana katika Jamii, Muangalieni Rais Mandela, kama Mandela angeamua kubadilisha Katiba ili aweze kugombea Uraisi kwa miaka 27 sawa na miaka aliyokaa jela, mimi kama mwafrika ningekuwa wa kwanza kukubali.

Lakini Mzee wetu aliona kuwa Urais haukuwa shida, bali shida ilikuwa ni kasi ya kuwaunganisha Waafrika kusini kuwa Taifa moja baada ya miaka nenda rudi ya Ubaguzi. Kuna wazee wengi sana ambao tunahitaji kuwasikia siku zijazo wakifuata nyayo za akina Keenja.

Kama kijana wa Kiafrika ninafikiri wakati umefika tuwatambue Wabunge walioamua kuachia madaraka kwa hiyari yao, tuwawekee "Red Carpet' tuwaimbie wimbo wa Taifa, tuwashukuru kwa Utumishi wao, ili kukuza utamaduni wa kustaafu kwa hiyari.

Zaidi ya yote napenda kuwaongea na vijana wenzangu, kuwa zile siasa za kuwaita Vijana Taifa la Kesho ziondolewe, kwasababu taifa ni vijana na Watoto. Sisi ndio tutakaokwenda vitani, sisi ndio tunaojenga mabarabara na kulima. Kwanini wazee wasituamini kuwa tunaweza pia kuongoza?.

Nitachukua Likizo kwa ajili yako wewe kijana mwenzangu, nitakuja kukusaidia kupiga Kampeni utakapoamua kugombea kiti chochote kile ili mradi umeonesha hari ya kuitumia nchi yako. Ninapoongea na Vijana ninaongea na Issa Michuzi na Vijana wote wa Kitanzania. Matabaka tunayojenga ya kuwaita wenzetu watoto wa vigogo na walalahoi inatugawa zaidi kuliko kutuunganisha. Haijalishi umetoka Mkoa gani, au wazazi wako wanafanya nini, jitokeze tukupeleke Dodoma ukaitumie Taifa letu.

Vijana wengi wanadai siasa za Tanzania ni hatari lakini Martin Luther King alisema "The ultimate measure of a man is not where he stands in moments of comfort and convenience, but where he stands at times of challenge and controversy,.... I submit to you that if a man hasn't discovered something he will die for, he isn't fit to live"

Kwa maneno haya namkumbuka Mh Amina Chifupa, ambaye alijitoa mhanga kupambana kwa ajili ya Taifa la Vijana. Mimi na wewe tuna kazi ya kufanya ambalo ni kulitumia taifa letu. Kwa wale mnaoishi nje ya nchi yetu, nafikiri wote ni mashahidi kwa jinsi vijana na raia wa maitaifa hayo wanavyozipenda nchi zao, lakini ukisoma historia yao utakuta kuna kitu kinawachowafanya wazipende nchi zao. Mwalimu Nyerere alisema "Freedom to many means immediate betterment, as if by magic.

Unless I can meet at least some of these aspirations, my support will wane and
my head will roll just as surely as the tickbird follows the rhino.”

Nguvu na maarifa tunayo, Nia na malengo ya kutumikia taifa letu tunayo. Tusimame kama watoto wa baba mmoja tulijenge taifa letu. Tutafute suluhisho ya matatizo ya wazazi na kusimamia wadogo zetu tukitambua kuwa wanakua na kutuangalia tunakoelekea.

Sote ni Watanzania kwanza halafu unafuata U-CCM na U-pinzani. Kama tutaweka Utanzania mbele, tukafanya kazi kwa bidii, tukawa na uchungu na nchi yetu, tukagawana Rasilimani ya Nchi kwa uwiano sawa, tutazidi kupendana na kuendelea Kulijenga Taifa la Watanzania lililo imara lenye kukaribisha wageni kuja kushuluhisha migogoro ya mataifa yao kwetu.

Aksanteni sana
Mungu Ibariki Tanzania
Kuja WP