maunga adakwa na bwimbwi dar

Kijana huyu mzaliwa wa Tanzania anayejitambulisha kuwa ni raia wa Uingereza akiwa chini ya ulinzi baada ya kudakwa katika Uwanja wa Ndege wa Julius Nyerere jijini Dar akidaiwa kutaka kusafirisha madawa ya kulevya aina ya Cocaine maarufu kama bwimbwi pamoja na Bangi ambavyo inadaiwa alivificha katika vinyago na pindo za suruali.

Kamanda wa kikosi cha polisi uwanjani hapo, Afande Mwajuma Kiponza alisema Maunga alikamatwa baada ya kukaguliwa katika mashine ya kawaida wakati akiingia uwanjani na akafanikiwa kupita.

Alisema baadaye polisi walimtilia shaka na kuamua kumkagua zaidi maungoni na kumkuta akiwa na pipi 69 za dawa za kulevya aina ya Cocaine na gramu 610 za bangi.

Kamanda Mwajuma alisema Maunga (35) alikamatwa juzi saa 1.30 asubuhi wakati akiwa njiani kuelekea Ungireza, ambapo alikuwa abiria wa Shirika la ndege la Uingereza na paspoti yake ilikuwa na namba 10948353, iliyotolewa mwaka 2007 nchini Uingereza.

Baada ya kumtilia shaka askari walimpekuwa kwa njia ya kumpapasa maunguni mwake ndipo walimkuta amehifadhi pipi 16 kwenye upindo wa suruali aliyokuwa ameivaa.Kutokana na kukutwa na pipi hizo alipekwa kituoni pamoja na sanduku kwa ajili ya ukaguzi zaidi ambapo ndani ya sanduku hili kulikutwa vinyago vitatu, viwili vilikuwa na taswira ya binadamu vikiwa na pipi 39 aina ya kokein pamoja na bangi.

Katika kinyago kingine ambacho kilikuwa na umbo la mfano wa kifaru ambacho kilikuwa kimechongwa kwa ndani na kuwekewa mfuniko kilikuwa na bangi.“Hii njia iliyotumika ni mpya hivyo ci changamoto kwetu kwani kutokana na jinsi vilivyokuwa vimehifadhiwa mashine hazikuweza kugundua na mzigo ulikuwa umeshapita katika ukaguzi,” alisema.

Mwajuma alisema mbali na kuhifadhi katika vinyago hivyo pia pipi nyingine 14 walizikuta zikiwa zimehifadhiwa ndani ya pindo la suruali iliyokuwa kwenye sanduku la mtuhumiwa huyo.Kwa mujibu wa Kamanda, awali Maunga alikuwa raia wa Tanzania kabla ya kubadilisha aliingia nchini wiki mbili zilizopita na alifikia Kijitonyama kwa jamaa zake.

Kamanda alisema mtuhumiwa alipokamatwa aliulizwa kama alikuwa ametumwa na mtu kusafirisha mzigo huo alikanusha na kudai ni wa kwake na alikuwa akiupeleka Uingereza. Alisema thamani ya madawa hayo haijafahamika na mtuhumiwa anatarajia kupelekwa katika mahakama ya kisutu leo.

Kamanda Mwajuma alisema hilo ni tukio la kwanza kutokea tangu kuanza kwa mwaka huu, na kuongezea kuwa kikosi chake kiko macho sana na matukio kama hayo.

Kamanda wa Kikosi cha Polisi Uwanja wa Ndege wa Julius Nyerere jijini Dar, Afande Mwajuma Kiponza, akionesha 'bidhaa' alizokutwa nazo Maunga