pinda ziarani japan

Waziri Mkuu Mh. Mizengo Pinda akisalimiana na Waziri wa Mambo ya Nje wa Japan, Katsuya Okada kabla ya mazungumzo yao kwenye ukumbi wa mikutano wa Ofisi ya Waziri huyo, Tokyo akiwa katika ziara ya kiserikali nchini Japan wikiendi hii. Waziri Mkuu Mh. Mizengo Pinda akiongozwa na Waziri Mkuu wa Japan, Yukio Hatoyama kuelekea kwenye ukumbi wa mazungungumzo yao kwenye Ofisi ya Waziri Mkuu huyo jijini Tokyo Machi 26, 2010 akiwa katika ziara ya kikazi nchini Japan. Waziri Mkuu, Mizengo PInda akiwa katika mazungumzo na Waziri Mkuu wa Japan, Yukio Hatoyama (kulia) kwenye Ofisi ya Waziri Mkuu huyo jijini Tokyo Waziri Mkuu Mh. Mizengo Pinda akipokea vifaa maalumu 10 vyenye thamani ya shilingi milioni 1.5 kutoka kwa Mtanzania aishiye Japan Willy Mgoya vyenye uwezo wa kumgundua mtu aliyekunywa pombe katika mkutano kati yake na watanzania waishio Japan uliofanyika kwenye ukumbi wa Hoteli ya New Otani jijini Tokyo. Vifaa hivyo vimetolewa kwa Waziri Mkuu ili avikabidhi kwa Jeshi la Polisi nchini ili livitumie kuwabaini madereva wanaoendesha magari wakiwa wamelewa.

Baadhi ya Watanzania waishio Japan wakimsikiliza Waziri Mkuu, Mizengo Pinda wakati alipozungumza nao kwenye hoteli ya New Otani , Tokyo akiwa katika ziara ya kikazi nchini Japan.

Waziri Mkuu, Mizengo Pinda akizungumza baadhi ya watanzania waishio Japan kwenye hoteli ya New Otani , Tokyo akiwa katika ziara ya kikazi nchini Japan.

Waziri Mkuu, Mizengo Pinda akiwa amembeba mototo, Alisa Charles Kilinda (6) ambaye baba yake alikuwa mmoja wa watanzania waishio Japan waliokutana na Waziri Mkuu Mizengo Pinda katika mkutano uliofanyika kwenye Hoteli ya New Otani jijini Tokyo.

SERIKALI ya Japan imelikubali ombi la Serikali ya Tanzania la kutaka
igharimie ujenzi wa nyongeza wa barabara mbili muhimu Kusini na Kaskazini
mwa nchi na hivyo kupanua mtandao wa barabara za zinazounganisha mikoa yote nchini.

Makubaliano hayo yalifikiwa katika mazungumzo rasmi ya kiserikali baina ya
Waziri Mkuu Mizengo Pinda na Waziri Mkuu Yukio Hatoyama wa Japan mjini Tokyo jana (Ijumaa Machi 26, 2010) katika siku ya tatu ya ziara ya siku nne ya
Mhe. Pinda nchini humo.

Baada ya mazungumzo hayo, Waziri Mkuu Pinda alisema kuwa aliwasilisha ombi kwa Waziri Mkuu wa Japan, Mhe. Yukio Hatoyama, kutaka msaada zaidi wa nchi hiyo kugharimia ujenzi wa Barabara kati ya Mangaka hadi Tunduru na kati ya Dodoma na Babati na Waziri Mkuu wa Japan akakubali.

Barabara ya Mangaka -Tunduru ni kilomita 146 na ya Dodoma Babati ni
kilomita 188. Barabara hizo ni nyongeza katika barabara Tunduru
-Tandahimba (k.m. 186) na Iringa – Dodoma (k.m. 250) ambazo tayari Japan
ilikubali kuchangia ujenzi wake kwa lami pia.

Katika mazungumzo hayo Serikali ya Japan pia imekubali kuisaidia Serikali ya Tanzania katika utekelezaji wa mradi wa Kilimo Kwanza, hasa kwa
kuwafundisha wahandisi wa kilimo cha umwagiliaji maji ambao ni wachache mno nchini.

Waziri Mkuu Pinda aliwaambia Waandishi wa Habari katika mahojiano na Shirika la Utangazaji la Japan (NHK) kuwa kwa jumla ziara yake ya Japan, kwa mwaliko wa Serikali ya nchi hiyo, imekuwa ya mafanikio.

“Naona tumefanikiwa sana. Hii ilikuwa ni ziara ya kuendeleza uhusiano na
ushirikiano baina ya nchi zetu na kuja kuwashukuru wenzetu kwa kutuunga
mkono kwa dhati katika jitihada za kujiletea maendeleo na kufuta umasikini,”
Mhe. Pinda alisema.

Mhe. Pinda alisema amemwalika Waziri Mkuu wa Japan kutembelea Tanzania
katika tarehe itakayopangwa baadaye na kwamba Mhe. Hatoyama ameukubali mwaliko huo.

Katika ziara yake hii ya Japan, Waziri Mkuu alitembelea shughuli za ushirika
wa wakulima na taasisi za utafiti wa kilimo na kuwa na mazungumzo na
viongozi wa Japan kuhusu kuendeleza uhusiano na ushirikiao wa maendeleo.

Jana (Ijumaa Machi 26, 2010) usiku, Mhe. Pinda alikutana na Watanzania
wanaoishi kwa kusoma na kufanyakazi Japan katika Hoteli ya Otani mjini Tokyo na kuwaambia kuwa wasikusahau nyumbani pindi wanapomaliza masomo yao au kupata nafasi ya kutoa misaada au kuwekeza.

Umoja wa Watanzania hao ulimkabidhi Waziri Mkuu Dola 2,000 (karibu Sh.
Milioni 3) zikiwa ni msaada kwa waliopatwa na maafa ya mafuriko katika
Wilaya ya Kilosa, mkoani Morogoro.

Mtanzania mmoja anayeishi Japan, Willy Ngoya pia alimkabidhi Waziri Mkuu
msaada wa vifaa 10 vya kupimia kilevi kwa madereva ili kusaidia jitihada za
Jeshi la Polisi nchini kukabiliana na madareva walevi wanaosababisha ajali
nyingi za barabarani.

.