unamkumbuka martina chambiri?

Video ya Martina akiwa jukwaani Italia

kwenye sherehe ya Kinamama

Martina anavyoonekana leo akiwa na umri

wa miaka 19 akiwa na Tuzo yake ya Zeze

aliyokabidhiwa na mfuko wa utamaduni Tanzania
Martina wakati huo akiwa na umri wa miaka 4 akiongoza wenzie kuimba wimbo wa 'Tanzania eeee' katika tamasha maalum la watoto liliofahamika kama ZECCHINO D’ORO katika mji wa Bolognia nchini Italia mwaka 1995

"....Tanzania eee,

Nchi yangu eeeeee,

yapendeza eeeeee,

karibu muioneeee,

Sura yake yavutiaaa,

kila konaaaaaaa,

kwa maziwa na bahari,

nchi kavu na mipakaa….."

Hii ni sehemu ya wimbo maarufu sana ambao ulitokea kupendwa na watu wengi ndani na nje ya nchi katika miaka 1994 na 1995, wakiwemo zaidi watoto, vijana na hata watu wazima.

Nyakati hizo vituo mbalimbali vya Televisheni na Radio vilikuwa vikiupiga wimbo huo na vipo ambavyo vilikuwa vikiutumia wimbo huo kuwavutia watoto ambao walikuwa wakialikwa kushiriki katika vipindi vyao vya redio na Televisheni ambavyo moja kwa moja vilikuwa vikishirikisha watoto.

Martina na wanafunzi wenzie shule ya chekechea ya Clara Kawe, Dar

Na Ripota wetu

Sababu kubwa ambazo zilichangia watu kuupenda wimbo huo ni mbili.
Mojawapo ni kwamba wimbo huo unasifia kwa uhalisia wake rasilimali zilizopo nchini ambazo pindi watu wakitembelea wanaweza kunufaika kuziona, pamoja na uzuri wa Taifa la Tanzania ambalo limejaaliwa duniani kuwa na vivutio vya kila aina vikiwemo mbuga za wanyama, ardhi zenye rutuba, maliasili kama madini ya thamani na kadhalika.

Sababu nyingine ya pili ambayo iliwafanya watu kuupenda sana wimbo huo ni kutokana na ukweli kuwa uliimbwa na mtoto mdogo wa miaka minne kutoka barani Afrika tena nchini Tanzania ambapo pia alilenga kuisifia nchi yake.

Hapa namzungumzia Martina Chambiri ambaye miongoni mwa watanzania wengi jina hili siyo geni, Martina aliimba wimbo huo katika tamasha maalumu la watoto liliofahamika kama ZECCHINO D’ORO ambalo lilifanyika nchini Italia katika mji wa Bolognia mwaka 1995.

Tamasha hilo liliwashirikisha watoto wa umri wake kutoka nchi mbalimbali duniani na wimbo huo wa Tanzania ambao yeye alifanikiwa kuuimba ukaingia tano bora na kushika nafasi ya tatu.

Martina akipongezwa na Profesa Philemon Sarungi, Waziri wa Elimu wakati huo ambapo alikwenda kukabidhiwa bendera ya Taifa akiwa mwakilishi wetu katika tamasha la watoto. Hii ndiyo ilikuwa safari yake ya kwanza kati ya tatu alizofanya.

Martina Chambiri alizaliwa Januari 1990 katika hospitali ya Aghakan jijini Dar es salaam, wakati akiwa na umri wa miaka minne alianza chekechea katika shule ya Masista ya Clara Nursery School, iliyoko Kawe ambako ndiko nyumbani kwao.

‘’nakumbuka tulikuwa shuleni Sista akasema kuna mashindano ya kuimba, hivyo tukashindanishwa wote na mimi pale shuleni nikawa mshindi na hivyo kupata nafasi ya kushiriki katika tamasha hilo’ Anasema.

Anasema anachokumbuka zaidi ni kwamba wimbo huo ulitungwa na mwalimu wa muziki katika shule hiyo aliyekuwa akifahamika kama mwalimu Julius Kapinga, na hatimaye yeye kufanikiwa kuuimba kwa ufasaha.

Anasema wimbo huo aliweza kuuimba kwa lugha mbili yaani Kiitaliano na Kiswahili, ambapo sehemu ya kiitaliano ilitungwa na waandaaji wa shindano hilo wakiongozwa na mama mmoja kwa jina la Mariella ambaye kwa sasa ni Marehemu.

Martina katika mahafali ya kidato cha sita Shule ya sekondari Loyola na mdogo wake Lilian Chambiri (shoto) na ndugu yao. Kidato cha nne alipata daraja la kwanza pointi 14 na anasema wakati huu akisubiri majibu ya kidato cha sita anategemea kufanya vyema.

Anasema kabla ya kufanyika kwa tamasha hilo ilibidi aende Italia kwa ajili ya kujifunza na kuchanganyika na washiriki wenzake ikiwa ni pamoja na kuimba kwa kupokezana kwa kuwa alikuwa akiimba Verse na wenzake wakiimba Chorus.
Anasema pia katika safari hiyo ya kwanza alikuwa akifundishwa jinsi ya kulitawala jukwaa wakati anaimba , ikiwa ni pamoja na kuzoea kuimba kwenye umati mkubwa wa watu.

Martina anabainisha kuwa alitakiwa tena kurudi Italia mwaka huo huo kwa ajili ya Tamasha lenyewe ambapo Tanzania ilishika nafasi ya Tatu, huku nafasi ya pili ikichukuliwa na Pedro(Costa Rica), na mshindi wa kwanza akiwa Eugenia(Russia).

Aidha anasema alitakiwa tena kurudi tena Italia kwa ajili ya kutumbuiza katika Tamasha la wanawake lililofahamika kama Women’s Festival ambapo alialikwa kutumbuiza na kwa mara nyingine akafanikiwa kukonga nyoyo za watu wengi.

Martina na wenzie huko Italia

‘Baada ya kumalizika kwa matamasha hayo nchini Italia, niliporudi hapa nyumbani bado nilikuwa na shauku kubwa ya kuimba na hatimaye kutaka kuendeleza kipaji changu kwa sababu ninaweza kuimba na ninapenda sana”. Anasema.

Anasema alikutanishwa na baba mmoja anayemkumbuka kwa jina la Gideon ambaye alimtungia nyimbo 6 zote zikihusu mazingira na zote zikarekodiwa na kisha kutengeneza album moja.

‘sababu kubwa ya kutungwa kwa nyimbo hizo zikiwa na mada kuhusu mazingira ni kutokana na kutaka kuihamasisha jamii kuhusu umuhimu wa kuhifadhi na kutunza mazingira kwa faida ya vivazi na vizazi’. Anasema.

Baada ya kuimba nyimbo hizo za mazingira, sauti ya Martina ikawa haisikiki, mpaka mashabiki wake wakawa wanajiuliza kulikoni, maana wengi walikuwa na shauku ya kufahamu hatima yake katika tasnia hii ya uimbaji na hasa kutokana na uwezo mkubwa aliouonesha katika matamasha yaliyofanyika nje ya nchi.

Kilichogundulika baadaye ni kwamba ulikuwa ni wakati ambao alitakiwa kuanza shule, hivyo mawazo yake mengi ikabidi yahamie shuleni zaidi kuliko kuimba hivyo akaanza shule ya St. Constantine iliyoko Arusha, na kujikuta alipoanza darasa la kwanza akarushwa darasa hadi darasa la tatu.

Martina akiwa na wazazi na mdogo wake Lilian
Aidha baada ya hapo wazazi wake wakaamua kumhamisha shule hiyo na kumuandikisha shule ya St. Mary’s Tabata, na kisha kumalizia darasa la saba katika shule hiyo hiyo eneo la Mbezi Beach.Anasema pamoja na kufaulu vizuri kujiunga na shule za serikali, lakini wazazi wake waliamua afanye usaili katika shule za Marian, Kifungilo na St. Francis, alifanikiwa kupata nafasi katika shule ya Marian na kisha kuanza kidato cha kwanza na kufanikiwa kumaliza kidato cha nne mwaka 2007.

‘nilipenda sana masomo ya biashara, nilipomaliza kidato cha nne nikafaulu kwa kupata daraja la kwanza pointi 14 na masomo ya Hesabu, Commerce na Book-keeping nilifaulu vizuri , na kwa kuwa niliyapenda nikaamua kusomea masomo hayo kidato cha tano’. Anasema.

Binti huyo anasema anafurahia kuwa wazazi wake walikuwa hawamlazimishi kusomea masomo ambayo hataki isipokuwa hawakusita kumpa ushauri kwa kile ambacho yeye alikuwa anachagua kukifanya.

‘baba yangu alikuwa akipenda sana niimbe na pia nishiriki kwenye michezo, na mimi napenda sana michezo na hasa kuogelea, ila mama alikuwa akiuliza ni kwa nini nisisome masomo ya Sayansi, ila masomo ambayo nilichagua walikubaliana na mimi kisha wakaniambia niyasome kwa bidii ili niyafaulu vizuri’Anafafanua.

Anasema alipomaliza kidato cha nne akafanya usaili Loyola Sekondari na kufanikiwa kupata nafasi kwa ajili ya kujiunga na kidato cha tano ambapo mwezi uliopita alifanya sherehe na wenzake kwa ajili ya kumaliza kidato cha sita.

Aidha mhitimu huyo wa kidato cha sita anasema kuna tofauti kubwa kati ya shule ya bweni na kutwa kama alivyojionea Marian na Loyola kwa kuwa Marian ilikuwa ni wasichana watupu na Loyola ilikuwa mchanganyiko, lakini jambo la msingi ilikuwa ni kuhakikisha anasoma kwa bidii.

Martina anasema jambo muhimu ambalo anamshukuru mungu ni kumpatia wazazi ambao walishirikiana kumpatia malezi mema, na pia walimjengea misingi ya kumpenda mungu na hivyo kumuwezesha angalau kufikia sehemu ya malengo yake.

Lakini anasema katika maisha yake aliwahi kupatwa na mshituko mkubwa sana alipopata taarifa ya kifo cha baba yake mzazi mwaka jana kilichotokana na ajali ya gari huko Lindi.

‘ulikuwa ni mshituko ambao siwezi kuuelezea, baba yangu alipenda sana maendeleo yangu, na alikuwa anaeleza ni jinsi gani anajisikia fahari kuwa na mtoto kama mimi, lakini hakuna jinsi ni mipango ya mungu. Namuombea mungu ampumzish kwa amani” Anasema.

Ukifanikiwa kukutana na Martina Chambiri hutaweza kuamini kuwa ni yeye alililetea sifa kubwa taifa hili kwa kufanikiwa kupeperusha bendera ya Tanzania nchini Italia na pia alikuwa ni mshiriki pekee kutoka bara la Afrika.