wafanyakazi nchini watakiwa kufanya kazi kwa bidii ili kukuza pato la taifa

Mwenyekiti wa Chama cha Mpira wa Wavu nchini Bw. Agustino Israel Agapa akimkabidhi vifaa mbalimbali vya michezo Katibu mkuu Wizara ya Habari Utamaduni na Michezo Bw. Sethi Kamuhanda(kushoto) kusaidia Chuo cha Maendeleo ya Michezo Marya leo jijini Tanga. Vifaa vilivyokabidhiwa leo ni pamoja na mipira, jezi, vitabu na Cds zenye mafunzo mbalimbali kwa ajili ya kufundishia.
Katibu mkuu Wizara ya Habari Utamaduni na Michezo Bw. Sethi Kamuhanda (wa pili kutoka kushoto) akiwa katika picha ya pamoja na Wakuu wa Idara, Viongozi na wafanyakazi bora wa Wizara ya Habari, Utamaduni na Michezo mara baada ya kuwakabidhi vyeti na zawadi mbalimbali jijini Tanga.

======================

WAFANYAKAZI WATAKIWA KUFANYA KAZI KWA BIDII.

Na. Aron Msigwa – MAELEZO.

Changamoto imetolewa kwa Wafanyakazi nchini kufanya kazi kwa bidii ili kukuza pato la taifa.

Changamoto hiyo ilitolewa leo jijini Tanga na Katibu Mkuu wa Wizara ya Habari na Utamaduni Bw. Sethi Kamuhanda wakati akihitimisha mkutano wa sita wa baraza la wafanyakazi wa Wizara ya Habari, Utamaduni na Michezo.

Alisema wafanyakazi wanao wajibu na jukumu kubwa la kutumia rasilimali na fursa walizonazo kuleta ufanisi mahali pa kazi sanjari na kuhakikisha kuwa michango ya huduma wanazozitoa zinawafikia walengwa husika katika jamii.

Alifafanua kuwa serikali kwa kutambua mchango wa wafanyakazi itaendelea kuboresha huduma mbalimbali za kiofisi zikiwemo nyenzo mbalimbali za kufanyia kufanyia kazi zikiwemo huduma za usafiri ili kuweka mazingira mahali pa kazi .

Aliongeza kuwa serikali kupitia sekta mbalimbali itaendelea kutoa fursa zaidi kwa wafanyakazi kupata nafasi za masomo kwa lengo la kuinua viwango vya elimu kwa lengo la kuwajengea uwezo wa kufanya kazi kwa ufanisi na kuendana na mabadiliko ya sayansi na teknolojia nchini.

Awali akizungumza kuhusu mkutano Baraza la wafanyakazi Bw. Sethi Kamuhanda alisema mkutano huo umetoa changamoto na kuamsha ari kwa wafanyakazi kwa sababu umezishirikisha ngazi zote za uongozi huku akitoa wito kwa wafanyakazi kutekeleza yale waliyokubaliana katika mkutano huo.

Aidha Bw. Sethi Kamuhanda aliwapongeza baadhi ya wafanyakazi wa Wizara ya Habari, Utamaduni na Michezo waliopata bahati ya kuchaguliwa kuwa wafanyakazi bora na kusema kuwa wao ni mfano wa kuigwa.

“Kuchaguliwa kwenu kusiwafanye mbweteke bali kuwe kichocheo na kuwafanye kuongeza bidiikatika utendaji wa kazi za kila siku ndani ya wizara, napenda kuwasihi wafanyakazi wengine waogeze bidii ili tushirikiane katika kuleta tija na ufanisi mahali pa kazi” alisema.

Alisema Wizara ya Habari, Utamaduni na Michezo bado ni Wizara mpya maana iliundwa mwaka 2006 na kuongeza kuwa inalo jukumu kubwa sana kwa watanzania katika kusimamia sekta ya Michezo, Habari na Utamaduni.

Aliendelea kufafanua kuwa mbali na wizara ya Habari, Utamaduni na Michezo inalo jukumu kubwa sana kuhakikisha kuwa sekta ya Habari, Utamaduni na Michezo inatoa huduma bora kwa watanzania pia ina mchango mkubwa katika kuhakikisha Jumuiya ya Afika Mashariki inapata ustawi mzuri.

Aidha alitoa wito kwa wafanyakazi wa wizara kujipanga kikamilifu katika nafasi zao ili waweze kukabiriana na ushindani utakaokuwepo kutokana na Tanzania kuwa miongoni mwa nchi za Jumuiya ya Afrika Mashariki.

“ Tanzania ni Mwanachama wa Jumuiya ya Afrika Mashariki (EAC) naomba tujipange namna tutakavyokabiriana na ushindani kwani kuna maeneo ambayo tutalazimika kuyafanya ili tuendane na ushindani na hali itakayokuwepo” alisisitiza.

Kwa upande wake Bw. Rish Urio ambaye alishika nafasi ya kwanza kwa kuwa mfanyakazi bora kati ya wafanyakazi 9 wa Wizara hiyo waliopewa vyeti na zawadi mbalimbali aliushukuru uongozi wa Wizara kwa kutambua mchango wa wafanyakazi na kutoa wito kwa wafanyakazi wengine kutumia muda wao wawapo kazini kufanya kazi kwa bidii.