Njemba labambwa wodini likiiba nusu kaputi, ambazo yeye hutumia kama dawa za kulevya.

Afisa tabibu katika hospitali ya Machame wilayani Hai,mkoani Kilimanjaro Beatus Sumni muda mfupi baada ya kukutwa akitaka kuiba dawa za usingizi (Pethedine) alizokuwa akizitumia kama dawa za kulevya. Chini akiwa anaonesha jinsi alivyoingua wodini akiwa kavaa kininja

Mkaazi mmoja wa jirani na hospitali ya Machame wilayani Hai, mkoani Kilimanjaro, Beatus Sumni(29) anadaiwa kuchukua dawa za usingizi(Pethedine),wanazotakiwa kutumia wagonjwa na kujichoma mwilini kama sehemu ya dawa za kulevya.

Hali hiyo ilibainika hivi karibuni ikiwa ni baada ya mtu huyo aliyekuwa mtumishi katika hospitali hiyo inayomilikiwa na kanisa la KKKT dayosisi ya kaskazini,kukamatwa akiingia katika wodi ya kujifungulia wanawake na kutaka kuiba funguo za kabati lilikokuwa likiifadhia dawa hizo.Tukio hilo lililoleta tafrani hospitalini hapo na kusababisha baadhi ya wagonjwa kutoka wodini,lilitokea wakati wa madaktari na wauguzi,wakihudhuria sherehe za mahali ya 39 ya chuo cha Uganga hospitalini hapo.

Sumni anadaiwa aliingia katika wodi hiyo huku akiwa amejifunika usoni kama Ninja alitaka kuchukua funguo za kabati iliyokuwa imehifadhi dawa hizo,ingawa jaribio lake lilikwama baada ya mmoja wa wagonjwa kupiga kelele za kuomba msaada.Mmoja wa wagonjwa aliyelazwa wodini hapo,Lucy Salema alisema alishtushwa na mavazi ya afisa huyo ambaye alichukua ghafla funguo za kabati na kuziweka katika mifuko ya suruali yake.

Kwa upande wake muuguzi mkuu wa hospitali hiyo,Edward Mushi, alithibitisha kutokea kwa tukio hilo na kuongeza kuwa afisa huyO alikuwa mtumishi wa hospitali hiyo lakini alifuzwa kazi Februari mwaka huu kwa madai ya kutumia vibaya taaluma yake.

Alisema kwa mujibu wa uchunguzi uliOfanyika kati ya Januari 12 na Februari 20 mwaka huu walibaini mtumishi huyo aliwaandikia wagonjwa 24 dawa ya Pethedine yenye ujazo wa Miligramu 3200 lakini dawa hiyo alijichoma mwilini mwake kwa nyakati tofauti.

Mushi alisema baada ya mahojiano mtumishi huyo alikiri kujichoma dawa hizo mwilini kwake kwa barua yake ya Februari 12 mwaka huu huku pia akitaka kupewa msamaha kwa kosa lililokuwa likimkabili.

Akizungumzia tukio hilo,Sumni, alikiri kuingia katika wodi hiyo hiyo lakini akafafanua kuwa alikuwa na lengo la kumuona mpenzi wake aliyemtaja kuwa ni Josephine Kabululu ingawa taarifa hizo zilikanushwa na wauguzi kwamba hapakuwa na mgonjwa mwenye jina hilo.