Tanzania Investment Centre yanyakua tena Umakamu wa Rais Shirikisho la Taasisi za Uwekezaji Duniani (WAIPA).

Mh. Emmanuel Ole Naiko akitoa shukurani baada ya kuchaguliwa bila kupingwa kuwa Makamu wa Rais wa shirikisho la Taasisi za Uwekezaji duniani huko Buenos Aires Argentina.
Mh. Emmanuel Ole Naiko akiwa na Raisi wa Taasisi hiyo kubwa duniani
kwa Upande wa Uwekezaji aliyechaguliwa kwa mara ya pili bwana Allessandro
Texeira kutoka Brazil. Picha na habari na Pendo Gondwe

Mkurugenzi Mkuu wa Kituo cha Uwekezaji nchini, bwana Emmanuel Ole Naiko, kwa mara nyingine tena amechaguliwa bila kupingwa katika nafasi ya Umakamu wa Rais wa Shirikisho la Taasisi za Uwekezaji duniani (World Association of Investment Promotion Agencies (WAIPA) lenye makao yake Makuu nchini Geneva Uswisi.

Uchaguzi huo ambao ulifanyika hapo jana mjini Buenos Aires Argentina ulishirikisha wanachama wa WAIPA kutoka Taasisisi za Uwekezaji zipatazo 250 kutoka nchi zaidi ya 150 duniani kote.

WAIPA ndio shirikisho kubwa kabisa duniani linalosimamia taasisi za Uwekezaji duniani na lilianzishwa na Umoja wa Mataifa chini ya Usimamizi wa UNCTAD huko Geneva likiwa na mamlaka ya kusimamia na kupanga mikakati na mbinu zitakazoongeza na kuboresha Uwekezaji na Mazingira ya Uwekezaji duniani.

WAIPA pia ilianzishwa kwa lengo la kusaidia na kutoa Ushauri kwa taasisi za Uwekezaji duniani ili ziweze kuzishauri serikali zao kuhusiana na kuundwa na kutengeneza sera na mikakati mizuri ya kuweza kuvutia wawekezaji.

Mkutano Mkuu wa Shirikisho hilo pia ulimchagua tena bila kupingwa Alessandro Teixeira kutoka Brazil kuwa Rais wake ili aweze kuongoza WAIPA tena kwa kipindi cha miaka miwili ijayo.