Uchimbaji wa madini ya uranium hauna madhara – Dk. Bilal

Na Mwandishi Maalum – Ruvuma

Makamu wa Rais Dk. Mohammed Gharib Bilal amewahakikishia wananchi wa wilaya ya Namtumbo mkoani Ruvuma kuwa uchimbaji wa madini ya uranium hauna madhara.

Dk. Bilal ametoa kauli hiyo baada ya Mkuu wa mkoa wa Ruvuma Said Mwambungu kueleza kwenye mkutano wa hadhara kuwa pamoja na nia nzuri ya serikali ya kuanzisha mradi huo baadhi ya watu wamekuwa wakipita kwenye vijiji kikiwemo cha Likuyu Sekamaganga wakipotosha wananchi kwamba madini hayo

yana mionzi ambayo yana athari kwa binadamu na hasa kwa wanaume.

Makamu wa Rais alipata fursa ya kuzungumza na wananchi hao wa Likuyu Sekamaganga wakati wa ziara yake ya kikazi wilayani Namtumbo baada ya kutembelea kampuni ya MANTRA inayotekeleza mradi huo na kujionea shughuli za utafiti wa uranium zinavyoendelea.

Dk. Bilal ambaye amebobea katika masuala ya nyuklia alisema ni kweli kuwa madini hayo ambayo yako chini ya ardhi yanatoa mionzi lakini aina hiyo ya mionzi haina nguvu sana na inazuilika kitalaamu.

Hapa tulipo kuna mionzi. Watalaamu wameweka kiwango cha mionzi binadamu anaweza kuhimili. Mtu unapougua unaenda kufanyiwa X-Ray ni mionzi, ma-TV ya zamani yale ni mionzi, hewa hii tunaivuta inatoa mionzi, mionzi ni maumbile ya kiulimwengu,” alisema na kuongeza.

Alisema kwa hapa Tanzania kuna Tume ya Atomiki yenye makao yake makuu kule Arusha ambayo imekabidhiwa kazi ya kuhakikisha wananchi wako salama kutokana na mionzi ya madini na vifaa.

“Msiwe na hofu ye yote. Sisi tunasimamia usalama wenu. Tuna watalaamu wa kutosha, taasisi za uhakika. Kama kuna hatari mimi nitakuwa wa kwanza kusema. Watalaamu wapo watashirikiana na wa wilaya na mkoa kuhakikisha usalama wenu,” alidokeza

Dk. Bilal aliwataka wananchi kupuuza upotoshaji huo kwa kuwa mradi huo una faida nyingi ikiwemo ya kuzalisha umeme kwa urahisi na kutoa ajira jambo ambalo litasaidia kuleta maendeleo kwa wananchi wenyewe, wilaya, mkoa na taifa kwa ujumla.

Kwa mujibu wa Meneja Mkuu wa Kampuni ya MANTRA Assah Mwaipopo kazi ya upembuzi yakinifu imekamilika, sasa hivi kinachoendelea, wanasubiri kupata majibu ya maombi ya leseni kutoka UNESCO kutokana na eneo hilo kuwa chini ya urithi wa dunia ili shughuli za kujenga mgodi zianze na hatimaye

wafanikishe matarajio yao ya kuanza kuchimba madini hayo ya uranium ifikapo mwaka 2014.

Dk. Bilal ambaye amemaliza ziara yake katika wilaya za songea na Namtumbo,leo Feb 16, pamoja na mambo mengine atatembelea na kukagua mradi wa makaa ya mawe huko Mbinga.

Atakamilisha ziara yake ya mkoa wa Ruvuma kesho Feb 17 kwa kufanya majumuisho na viongozi wa chama na serikali wa mkoa huo kwenye ukumbi wa UMATI mjini Mbinga na baadaye ataelekea mkoani Rukwa.