ankal afunguka: asherehekea maisha ya rafiki yake Steve Charles Kanumba

Steven Kanumba akiwa ofisini kwa Ankal alikokuwa
akimtembelea mara kwa mara

Si kawaida yangu kuwaingilia wadau watukufu katika ukurasa huu na kuanza kumwaga mistari kama sina akili nzuri, isipokuwa labda likitokea jambo kubwa ama kama kuna jambo la msingi au  tangazo muhimu. 

 Ankal akiwa na Frank Eyembe wa Urban Pulse huko Reading, Uingereza,  wakati akimalizia kutengeza filamu ya 'Lovely Gamble' ya Steve kanumba aliyocheze jijini London

 Ankal akiwa na Steve na DJ Bonny Luv ndani ya Thai Village jijini Dar. Kama alivyo Ankal STEVE alikuwa hanywigi wala havutigi. Alikuwa CLEAN

Ankal akiwa na Steve Kanumba na John Mashaka katika hafla ya Tanzania Mitindo House Hellenic Club jijini Dar

Kifo cha rafiki yangu Steven Charles Kanumba si jambo dogo.

Naandika nikiwa na huzuni moyoni, nikiwa siamini kwamba rafiki yangu wa karibu ambaye tulikuwa tunashauriana mambo mengi, hususan ya kutumia mitandao ya jamii (naona fahari kusema nilimshawishi, naye alikubali, kuanzisha blog yake mwenyewe miaka 4 iliyopita  BOFYA HAPA) kwa manufaa yake binafsi na wapenzi wake lukuki ndani na nje ya Tanzania.

Usishangae kuwa nimechukua muda mrefu kabla ya kuandika haya kwani hata bado siamini kwamba sintopata tena simu ya Steve akiniuliza haya na yale, kubwa likiwa: “Umeangalia blogu yangu leo? Aisee picha zinanisumbua, haziwi kubwa kama zako – nifanyeje??” Au saa ingine, usiku wa manane, ananipigia na kuniuliza “Kaka lini ntapata nafasi ya kuonana na Mzee (JK). Nataka niwawakilishe wenzangu kumuomba atupe tafu katika tasnia ya filamu – we si unacheki uhuru wa kuwa wajasiriamali anaotusisitiza vijana tunavyoutekeleza kwa vitendo??”

Ni kweli kwamba mtu anapotutoka tunakuwa na maneno mengi mema juu yake, lakini si uwongo kwamba haya niyaandikayo hayako katika tafsiri hiyo. Ni ya kweli na yanatoka ndani ya kilindi cha moyo wangu unaougulia hivi sasa; Steve alikuwa mcheshi, asiyependa ubishoo japo ni nyota katika jamii, na mdhalilifu mno unapoongea naye kiasi cha kukufanya ujisikie vibaya kana kwamba unamwonea vile. Najua wengi hamkujua kwamba Steve alikuwa mtu wa aibu sana awapo ‘uraiani’ au  mbali na lensi ya kamera. Kama hamjazoeana alikuwa hajui aseme nini mbele yako.

Hilo nalijua kwa sababu nilipokutana naye kwa mara ya kwanza miaka 7 iliyopita, tukiwa katika saluni ya Bitebo Hair Designer pale Magomeni Mapipa ‘Lango la jiji’ jijini Dar, alipata kigugumizi nilipothubutu kumsemesha wakati tukinyolewa nywele tukiwa tumeketi juu ya viti jirani. Kumbe yeye pia alikuwa amesikia jina langu toka zamani sana na kazi zangu alikuwa anazitambua kama ambavyo mimi nilikuwa nazihusudu za  kwake yeye, ambapo kila mmoja alikuwa anamhusudu mwenzie kwa kazi zake kimya kimya. Baada ya kumaliza kunyolewa hapo hapo  tulipinga  kuwa marafiki kwa kubadilishana namba za simu. Kuanzia siku hiyo niliweza kuona upande wa pili wa Steve kirahisi mno, kwamba pamoja na ustaa wake, ndani na chini kabisa alikuwa mtu wa kawaida sana sana. Huwezi amini!

Steve hakuwa mpenda umaarufu wa kirahisi (cheap publicity) na amini usiamini pamoja na urafiki wetu wa karibu, hakuwahi kunikubalia kufanya naye mahojiano ili nimnadi kwa mashabiki wake, akidai kila mara kwamba neno  la mdomo (word of mouth) kwake linatosha.  Hata kuandikwa kwake kila mara katika magazeti, hasa ya udaku, hakuwahi kuhojiwa ana kwa ana. Stori nyingi, alinihakikishia, zilikuwa  za kutungwa.  Naye hakujali akisema kila mara kwamba MUNGU ndiye mwelewa wa yote.

Nilishangaa mwaka 2009, mara tu aliporejea toka Afrika ya Kusini kwenye Big Brother House, alikoalikwa kama mmoja wa nyota wanne wa  filamu wa Afrika, alipokubali nimhoji. Siku hiyo (angalia video hapo chini) kulikuwa na bonanza la michezo, nakumbuka, katika viwanja vya TCC Club Chang’ombe jijini Dar es salaam. Natumai mahojiano hayo mdau mpendwa umeyaona na kuyasikiliza. Hakika yanatia huzuni, ikizingatiwa kwamba alikuwa akilalamikia Watanzania wenzake ambao wengine walitengeneza hata matangazo ya redio na SMS kibao za kumponda kwa kutoongea kiingereza kwa ufasaha, wakati ukweli ni kwamba Steve alikuwa na uwezo mkubwa kutema ‘yai’ kuliko pengine hata hao waliokuwa wakimponda.

Naandika haya nikikukumbuka neno lake  la mwisho katika mahojiano hayo, aliposisitiza haja ya Watanzania kupendana na kutiana moyo pale mwenzetu akiwa amefanya vyema, jambo ambalo kwa kweli limeota mizizi miongoni mwetu kiasi cha kutia kinyaa. Yaani baadhi ya Watanzania wako kama ‘Nyoka wa Mndimu’, yaani nyoka huyo aliye juu ya mti wa ndimu hataki mtu achume ndimu japo kuwa yeye hazili. Kwa lugha nyepesi ROHO YA KOROSHO ama ROHO MBAYA bila sababu ya msingi.

Japo nalia kwa uchungu, lakini nina furaha ya kusherehekea maisha ya rafiki yangu mpendwa Steve, ambaye mara ya mwisho kuongea naye ilikuwa juzi, baada ya kurusha youtube ya mahojiano yetu, akisema “Aisee, siamini kwamba ni mimi yule, nilikuwa naongea utadhani pastor!  Yaani safari hii ndio nimeifaidi hiyo video – bila shaka Watanzania watakuwa wamepata ujumbe na kuamua kuanza kupendana”.

Naweza kujaza kurasa mia za Globu ya Jamii lakini nisiwe nimeeleza robo tu ya sifa za Steve. Naomba nimalizie hapa kwa kuomba Watanzania popote mlipo duniani mkiisoma Globu ya Jamii, tujipeleleze, tujiulize na tuchukue hatua ya kuanza KUPENDANA. Kanumba amefariki dunia akiwa anatupenda, kuna ugumu gani na sie tusherehekee maisha yake kwa KUPENDANA??

Kaka Steve Kwa heri ya kuonana.  Hupo nasi kimwili lakini tutakuwa nawe Kiroho milele. Mwisho kabisa naomba nikubalie nisikuite Marehemu ama Hayati Steven Charles Kanumba.

Acha tu niendelee kukuita STEVE. 

-MUHIDIN ISSA MICHUZI