Makosa ya Barabarani yaiingizia Polisi Mil 7.6

POLISI mkoani Morogoro imefanikiwa kukusanya jumla ya shilingi mil 7.6 baada ya kukamata makosa 267 ya usalama barabarani katika kipindi cha siku mbili.

Kwa Mujibu wa taarifa iliyotolewa na Kamanda wa polisi mkoani humo Faustine Shilogile amesema makosa hayo yalikamatwa novemba 24 na novemba 25 mwaka huu.

Kamanda Shilogile amesema makosa ya usalama barabarani yaliyokamatwa novemba 24 ni makosa 146 ambapo makosa 141 yamelipishwa faini na kukusanywa jumla ya shilingi mil 4,230,000.

Amesema hakuna mtuhumiwa aliyepewa onyo kutokana na makosa hayo ambapo hakuna watuhumiwa waliofikishwa mahakamani.

Aidha makosa 121 ya usalama barabarani yalikamatwa novemba 25 mwaka huu ambapo makosa 115 yamelipiwa faini na kufanya makusanyo ya shilingi mil 3,450,000.

Kamanda wa Kikosi cha Usalama barabarani Leonard Richard Gyndo amesema makosa hayo yamekamatwa kufuatia utaratibu wa kukusanya makosa ya kila siku yanayotokea ya usalama barabarani.

Kamanda Gyndo ameyataja baadhi ya makosa hayo kuwa ni makosa ya mwendo kasi , ubovu wa magari, kutofuata ratiba, kuzidisha abiria na matumizi mabovu ya barabara hasa katika eneo la nanenane kituo cha mafuta cha Oil com .

Pia amesema madereva wamekuwa na tabia ya kupitana kwa mbele (overtake) bila kuangalia eneo hilo ambalo lina michoro isiyoruhusu kupita na kujaribu kusababisha ajali.

Hivyo amewataka madereva kuwa makini wakati wanaendesha magari na kuhakikisha wanafuata alama za barabarani ili kuepusha ajali ambazo zinaeoukika.