POLISI TANZANIA YAENDELEA KUTESA NAMIBIA

 Mchezaji wa Mchezo wa Vishale kutoka Polisi Tanzania Julius Mwiru akicheza wataki wa mechi kati ya Tanzania na Angola wakati Michezo ya nane ya Majeshi ya Polisi kwa Nchi za Kusini mwa Afrika  (SARPCCO nchini Namibia.Tanzania iliifunga Angola 34 kwa 2.

 Mlinda mlango wa Polisi Tanzania Madopi Mwingira akiokoa mpira katika lango lake wakati wa mechi kati yake na Lesotho katika Michezo ya nane ya Majeshi ya Polisi kwa Nchi za Kusini mwa Afrika  (SARPCCO) nchini Namibia.Tanzania iliifunga Lesotho 1 kwa 0

 Washabiki wa Polisi Tanzania  wakishangilia kwa kumbeba mwanariadha wa Tanzania Wilblado Peter baada ya kushika nafasi ya kwanza katika mbio za KM 21 katika Michezo ya nane ya Majeshi ya Polisi kwa Nchi za Kusini mwa Afrika  (SARPCCO) nchini Namibia.

Wachezaji wa mpira wa pete kati ya Tanzania na Namibia wakipambana katika uwanja wa chuo cha Polisi nchini Namibia katika Michezo ya nane ya Majeshi ya Polisi kwa Nchi za Kusini mwa Afrika  (SARPCCO nchini Namibia.Timu hizo zilitoka sare ya 29 kwa 29.

 

Picha na habari na Frank Geofray wa Jeshi la Polisi

Wanamichezo wa Polisi Tanzania  wanaoshiriki michezo ya nane ya Umoja wa wakuu wa Polisi kusini mwa Afrika (SARPCCO) nchini Namibia wameendelea kufanya vyema katika michezo ya mpira wa miguu,riadha, kurusha vishale na mpira wa pete kwa wanawake.

Katika mpira wa miguu, timu ya Polisi Tanzania imefanikiwa kuzifunga timu za Polisi za Lesotho 1kwa 0  na Angola 2 kwa 0 na hivyo kufanikiwa kuingia hatua ya robo fainali ya mashindano hayo.

 

Katika mechi na Polisi Lesotho timu ya Tanzania ilifanikiwa kuifunga Lesotho bao moja bila majibu huku bao hilo likipatikana  kupitia kwa Winga machachari Nicholaus Kibipe katika kipindi cha kwanza.

Katika mechi na Angola mabao ya Tanzania yalifungwa na Ahmed Bello baada ya kutumia vyema mpira uliopigwa na Mokili Lwambo huku bao la pili likifungwa tena na Ahmed Bello kwa kisigino baada ya walinzi wa Angola kushindwa kuutoa mpira katika eneo la hatari.

Katika riadha watanzania waliibuka tena washindi katika mbio za Km 21 baada ya mkimbiaji wake Wilblado  Peter kuchukua nafasi ya kwanza baada ya kutumia muda wa lisaa 1:07:45 na hivyo kufanikiwa kunyakua medali ya dhahabu huku nafasi ya pili ikienda kwa Polisi Zimbabwe na nafasi ya tatu kuchukuliwa na Osward Revelian wa Tanzania aliyepata medali ya shaba.

Mtanzania mwingine Silvester Simon alichukua nafasi ya tano huku wanawake wakichukua nafasi ya sita na saba kupitia kwa Neema Emanuel nafasi ya sita na Fabiola Willium nafasi ya saba.

Kwa upande wa Mpira wa pete, timu ya Tanzania iliifunga Botswana mabao 46 kwa 17,na kutoka sare na wenyeji Namibia kwa mabao 29 huku ikipata kichapo cha mabao 45 kwa 17 kutoka kwa timu hatari na mabingwa watetezi Zambia.

Aidha katika mchezo wa vishale (dats) Tanzania ilizifunga timu za Polisi Kongo,Angola  na wenyeji Namibia hivyo kujiweka katika nafasi nzuri ya kuingia hatua ya fainali ya mchezo huo.