MAGARI MAWILI YAWAKA MOTO IRINGA WAKATI WANAFUNZI WA WELDING WAKIJIFUNZA KUUNGA NGAO

Na Francis Godwin, Iringa 

 BASI mmoja limenusurika kuwaka moto na daladala moja imeteketea yote kwa moto leo wakati wanafunzi wa masomo ya welding  katika gereji moja eneo la uwanja wa Samora mjini Iringa wakijifunza kuunga ngao ya daladala hiyo yenye namba za usajili T189 AWN . 

 Tukio hilo limetokea leo majira ya 8.15  mchana wakati vijana wawili wanaojifunza kuunga wakiendelea na mafunzo ya kuunga ngao ya daladala hilo. 

 Akizungumzia ajali hiyo mmoja kati ya wafanyakazi wa gereji hiyo Filibert Mwihava alisema kuwa chanzo cha daladala hilo kuwaka moto ni vijana wawili ambao wanajifunza ufundi wa kuunga vyuma katika eneo hilo kufanya kazi hiyo bila kuzingatia kanuni ya kazi hiyo. 

Alisema vijana hao walikuwa wakiunga ngao ya nyuma ya daladala hilo jirani na tenki la mafuta na kutokana na cheche zilizokuwa zikitoka zilisababisha moto kulipuka.

 Hata hivyo alisema lichaya kuwa na kifaa cha kuzimia moto bado walishindwa kukitumia kifaa hicho kutokana na kutokuwa na elimu ya kutosha ya kukitumia. Mwihava alisema kutokana na moto huo kushika daladala hilo linalofanya safari zake kati ya Tumaini na Zizi la Ng'ombe mjini Iringa hakuna mtu aliyedhurika zaidi ya basi lenye namba za usajili T 457 AMQ ambalo limetekea upande wa mbele kabla ya kuokolewa . 

 Pia alishukuru kikosi cha zimamoto na uokoaji mjini Iringa ambao walifika kwa wakati na kufanikiwa kuzima moto huo ambao ungeweza kusababisha madhara makubwa katika eneo hilo ikiwa ni pamoja na ofisi maduka ya watu waliojenga kuzunguka uwanja wa Samora kuteketea.. 

 Akithibitisha kutokea kwa tukio hilo kiongozi wa askari wa zimamoto ambao walifika eneo hilo John Zacharia alisema kuwa kuwa chanzo cha moto huo ni uzembe wa ofisi hiyo. 

Alisema hata kifaa cha zimamoto walichokuwa nacho kilikuwa hakifanyi kazi kutokana na kuharibika muda mrefu, wakati  kifaa cha kuzimia moto kilichokuwemo katika daladala hilo ni  kidogo zaidi na maalum kwa gari dogo ambacho pia kilikuwa hakifanyi kazi. 

 Zacharia aliwataka wamiliki wa vyombo vya usafiri kuzingatia sheria za zimamoto ya kuwa na vifaa vya kuzimia moto badala ya kudanganya na kuona kama wanaonewa pale wanapolazimishwa kuwa na vifaa hivyo.

Wananchi Iringa  mjini  wakilitazama daladala  lililowaka  moto wakati likiwa kwa mafundi welding  likichomelewa leo eneo la uwanja wa  samora

Daladala  likiwaka  moto  huku kikosi cha zimamoto na uokoaji  wakizima moto huo. Kwa picha zaidi BOFYA HAPA