NECTA yatoa ufafanuzi wa maswali mbalimbali ya wadau wa elimu kuhusu matokeo ya mtihani wa kidato cha nne

Na Hellen kwavava

Baraza la Mitihani Tanzania (NECTA) limetoa ufafanuzi wa maswali mbalimbali ya wadau wa elimu kuhusu matokeo ya mtihani wa kidato cha nne yaliyotangazwa Februari 21 mwaka huu ambayo ni viwango vya ufaulu, alama ya chini ya ufaulu na ufaulu wa jumla wa mtahiniwa.

Akitoa ufafanuzi huo kwa waandishi wa habari jijini Dar es salaam Kaimu Katibu mtendaji wa Baraza hilo Dakta CHARLES MSONDE amesema viwango vya ufaulu ni makundi ya alama yanayopangwa ili kuweka pamoja watahiniwa wenye uwezo unaofanana katika somo husika na kuwatofautisha na wale walio katika kundi jingine.

Amesema mkanganyiko uliojitokeza katika mitihani hiyo ni kutokana na baraza kuanza kutumia utaratibu wa makundi 7 ambayo ni A ikiwa ni 75-100,B+ ikiwa ni 60- 74, B ikiwa ni 50-59, C ikiwa ni 40-49, D ni 30-39, E ni 20-29 na F ni 0-19 lengo likiwa ni kupunguza mlundikano mkubwa wa alama katika kundi moja.

Ameongeza kuwa madaraja hayo yamepangwa kwa mujibu wa kifungu cha 20 (1)6 cha kanuni za mitihani ambacho kinaeleza kuwa ufaulu katika daraja la kwanza hadi la tatu upangwe kwa kuzingatia jumla ya alama na ufaulu katika daraja la Nne unapangwa kwa kuzingatia ufaulu katika masomo yasiyopungua mawili.

Kuhusu kujiunga na mafunzo katika ngazi mbalimbali kwa kutumia mfumo huu mpya wa madaraja MSONDE amesema ufafanuzi utatolewa na Kamishna wa elimu.