WATUMISHI WA MUNGU KEMEENI VITENDO VYA UVUNJIFU WA AMANI - DC KINGU

Na Allan Ntana, Tabora 

 IMEELEZWA kuwa tunu ya amani na utulivu iliyohapa nchini ni matokeo ya maombi ya wacha Mungu yanayofanyika katika nyumba za ibada kila iitwapo leo pasipokukoma. 

 Hayo yamebainishwa leo na Mkuu wa wilaya ya Igunga Elibariki Kingu aliyemwakilisha Mkuu wa mkoa wa Tabora Fatma Mwassa katika sherehe za Jubilee ya Miaka 75 ya kanisa la Tanzania Assemblies of God (TAG) zinazoendelea katika majimbo yote ya kanisa hilo hapa nchini. 

 Kingu alisema katika ibada maalumu iliyofanyika katika uwanja wa ofisi mpya za jimbo mjini Tabora kuwa serikali ya Jamhuri ya Muungano wa Tanzania inajivunia sana mchango wa kanisa katika kudumisha amani, mshikamano na utulivu wa Watanzania kupitia maombi kwa kuwa Mungu anasikia maombi yao. 

 ‘Ndugu zangu wana TAG, serikali inatambua sana mchango wenu katika kudumisha amani na utulivu wa nchi hii, nina amini kama makanisa yangekuwa hayaombei taifa, amani ya nchi hii isingekuwa kama ilivyo sasa, machafuko yangekuwa mengi zaidi’, alisema. 

 Aliwataka watumishi wa Mungu kote nchini kupitia ibada zao au mikutano ya hadhara kuisaidia serikali kukemea vitendo vyote vinavyoashiria uvunjifu wa amani au baadhi ya watumishi wa umma kutumia madaraka yao vibaya kwa kujihusisha na vitendo vya wizi wa mali ya umma. "Kanisa ndilo jicho la nchi, watumishi wa Mungu mkisimama imara mkamlilia Mungu maadui wote wanaoitazama nchi hii kwa jicho la husuda huku wakitamani kuvuruga amani iliyopo, hila zao za chokochoko na mauaji hazitafanikiwa kabisa, aliongeza. 

 DC Kingu aliwataka watumishi hao kuwa na maadili mema katika utumishi wao huku akionya wale wote wenye nia ya kuligawa taifa katika misingi ya udini kuwa nia na dhamira zao hazitafanikiwa kwani serikali ipo macho na wote wenye nia hiyo watashughulikiwa mara moja. Aidha DC Kingu alimshukuru Askofu Mkuu wa kanisa hilo Dr Barnabas Mtokambali na waumini wote wa kanisa hilo hapa nchini kwa moyo wao wa upendo wa kuwajali na kuwasaidia wagonjwa na wanajamii walio katika mazingira magumu sambamba na kujali usafi wa mazingira.

Wakati huo huo kanisa la Tanzania Assemblies of God hapa nchini limetenga jumla ya sh mil.270 kwa ajili ya kutoa misaada mbalimbali ya kijamii katika sherehe za maadhimisho ya Jubilee ya kanisa hilo hapa nchini.
Hayo yalibainishwa jana na Askofu Mkuu wa kanisa hilo hapa nchini Dr Barnabas Mtokambali katika ibada maalumu iliyofanyika katika uwanja wa ofisi mpya za jimbo mjini Tabora.
Alisema katika kuadhimisha miaka 75 tangu kuanzishwa kwa kanisa hilo hapa nchini kanisa limeandaa kiasi cha sh milioni 270 kwa ajili ya kutoa misaada mbalimbali ya kijamii kwa makundi ya watu mbalimbali wenye uhitaji. 
Dr Mtokambali alifafanua kuwa watatoa vyandarua, damu na vitu mbalimbali kwa jamii ya watanzania wenye uhitaji pasipo kujali dini ya mtu, rangi wala kabila, lengo likiwa ni kumshukuru Mungu kwa kuliwezesha kanisa hilo kutimiza miaka 75.
Alisema sherehe za maadhimisho ya Jubilee ya kanisa hilo lililoanzishwa mwaka 1932 hapa nchini na sasa likiwa na waumini zaidi ya milioni 5 tayari zilishaanza katika makanisa ya TAG hapa nchini na zinaendelea katika majimbo yote 32 ya kanisa hilo. 
Kilele cha maadhimisho hayo ya kihistoria  yatakayohudhuriwa na maelfu ya watu wakiwemo maaskofu , wachungaji, viongozi wa taasisi, mashirika, dini mbalimbali, viongozi wa serikali na wananchi kitakuwa tarehe 13 Julai 2014 jijini Mbeya na mgeni rasmi anatarajiwa kuwa Rais wa Jamhuri ya Muungano wa Tanzania, alisema.
Awali askofu wa jimbo la Tabora Paul Meivukie alimweleza Askofu Mkuu Mtokambali kuwa wameazimia kutekeleza miradi mbalimbali ya kijamii ikiwemo kuanzisha vituo 2 vya kuhudumia watoto yatima katika wilaya za
Sikonge na Uyui,  tayari vimeanza kazi. Mradi mwingine ni mradi wa kufyatua matofali ya kuuza (interlock) mashine yenye uwezo wa kufyatua tofali 1000 kwa siku moja tayari imenunuliwa na ujenzi wa kituo cha jimbo la Tabora nao tayari umeanza. 
Miradi inayotarajiwa kuanzishwa ni pamoja na ujenzi wa Chuo Kikuu cha
Wachungaji, ujenzi wa shule 2 za sekondari, uchimbaji visima 3 vya maji na ujenzi wa kituo cha afya katika eneo la Ipuli katika manispaa  ya Tabora.

Mkuu wa wilaya ya Igunga Mhe. Elibariki Kingu aliyemwakilisha Mkuu wa mkoa wa Tabora Mhe. Fatma Mwassa akiongea katika sherehe za Jubilee ya Miaka 75 ya kanisa la Tanzania Assemblies of God (TAG) katika ibada maalumu iliyofanyika katika uwanja wa ofisi mpya za jimbo mjini Tabora.

 

Mhe Kingu akishukuru baada ya kupokea misaada  toka kwa Askofu Mkuu wa kanisa hilo hapa nchini Dr Barnabas Mtokambali  (mwenye fulana ya hudhurungi) katika sherehe za Jubilee ya Miaka 75 ya kanisa la Tanzania Assemblies of God (TAG) katika ibada maalumu iliyofanyika katika uwanja wa ofisi mpya za jimbo mjini Tabora leo.