Waziri Makame azindua Mtandao wa Kuunganisha Taasisi za Elimu ya Juu na Utafiti

Mhe. Prof. Makame Mbarawa, Waziri wa Mawasiliano, Sayansi na Teknolojia ( mwenye mkasi) akikata utepe kuashiria uzinduzi wa Mtandao wa Kuunganisha Taasisi za Elimu ya Juu na Utafiti nchini. Anayeshuhudia ni Prof. Tolly Mbwete, Makamu Mkuu wa Chuo Kikuu Huria Tanzania na mwakilishi wa Benki ya Dunia, Tanzania.

Mtandao huo umeunganisha Taasisi za Elimu ya Juu na Utafiti 22 nchini ambapo Vyuo Vikuu mbalimbali nchini vinaweza kuwasiliana, kutoa huduma ya elimu mtandao, maktaba mtandao, utunzaji wa taarifa na nyaraka, kufundishia, kuendesha mikutano kwa kutumia huduma ya audio na video, kuhifadhi, kutunza na kulinda taarifa.

Mtandao huo Taasisi za Elimu ya Juu na Utafiti umeunganishwa na Mkongo wa Taifa wa Mawasiliano ambapo unaziwezesha Taasisi hizo 22 kuwasiliana kwa haraka na kwa wakati. Wizara ya Mawasiliano, Sayansi na Teknolojia imesimamia na kuratibu jukumu hilo la Uunganishaji wa Taasisi za Elimu ya Juu na Utafiti kwa kushirikiana na Benki ya Dunia. 

Aidha, Tume ya Taifa ya Sayansi na Teknolojia, Kampuni ya Simu Tanzania, Taasisi ya Serikali Mtandao na Chuo Kikuu Huria Tanzania kwa pamoja zitashirikiana kufanikisha matumizi Endelevu ya mtandao huo kwenye Taasisi za Elimu ya Juu na Utafiti nchini kwa manufaa ya Taifa letu na kuongeza kasi ya matumizi ya Tekonolojia ya Habari na Mawasiliano.

Uzinduzi huo umefanyika Chuo Kikuu Huria Tanzania, Dar es Salaam na kuhudhuriwa na Wadau mbalimbali wa sekta ya TEHAMA nchini.

Imetumwa na Prisca Ulomi, 

Msemaji wa Wizara