MDAU WA MAZINGIRA ASIKITISHWA NA NAMNA USAFI UNAVYOFANYWA JIJINI DAR

Ankal,

Leo nimeshuhudia kitu kimoja ambacho hakikunipendeza hata kidogo na nimeona bora nikiongelee kwa vile ni hatarishi kwa mazingira yetu.

Picha hii inaonyesha mdada mwenye t-shirt ya kijani ambaye alikuwa anafanya usafi hapo kwenye maeneo ya junction ya AHM na Barak Obama roads. Wakati sisi tunasubiri kuitwa na trafiki kipindi cha asubuhi, nimemshuhudia dada huyo akisafisha na kuzisukumiza taka ndani ya huo mtaro wa pembeni. 

Kwenye hizo takataka alizosukumiza ndani ya huo mtaro ilikuwepo na chupa ya plastiki ya nusu lita.

Sasa nikajiuliza huu ndiyo usafi gani? Huyu dada kweli amepewa maelekezo afanye hivi au ni uvivu wake wa kuzoa hizo taka taka? 

Kwa maana hizo takataka zitabaki kwenye mtaro huo mpaka itakaponyesha mvua na ndiyo balaa la mafuriko litatokea. Na huu umeelekea ndiyo mtindo wake kwa hivyo hizo taka zitakuwa ni nyingi tu humo kwenye mtaro.

Nilitaka kumwambia kwamba hivyo anavyofanya siyo vizuri lakini akasonga mbele na sisi tukaitwa na trafiki na kuendelea na safari yetu.

Kampuni inayohusika na usafi tafadhali chukua hatua kuhusu hili, mueleweshe huyo dada kwamba hizo takataka zinatakiwa kuzolewa na siyo kutiwa kwenye mitaro kama anavyofanya yeye.

                                                   Mdau wa mazingira