Umoja wa Mataifa wamuenzi na Katibu Mkuu wa Sita Boutros Boutros-Ghal

Katibu Mkuu wa Umoja wa Mataifa Ban Ki Moon, akitoa heshima  zake mbele ya Picha  ya  aliyekuwa Katibu Mkuu wa Sita wa Umoja wa Mataifa marehemu  Boutros Boutros-Ghali aliyefariki siku ya jumanne akiwa na miaka 93. Baraza  Kuu la  Umoja wa Mataifa jana  (alhamis) lilitenga  muda maalum wa kumkumbuka na kumuenzi   kiongozi huyo ambaye aliuongoza  Umoja wa Mataifa mwishoni wa kipindi  cha  Vita Baridi

Na Mwandishi Maalum, New York

Jumuiya ya Kimataifa imemuelezea  aliyekuwa  Katibu Mkuu wa Sita wa Umoja wa Mataifa,  Marehemu Boutros Boutros- Ghali, kama kiongozi ambaye siyo tu  alifanya  kazi katika mazingira  magumu lakini pia  alitoa  mchango mkubwa katika  kuijenga na  kuimarisha Taasisi hiyo ya Kimataifa.

“ Leo  tumekusanyika hapa kutambua  na kuheshimu mchango mkubwa  wa mtangulizi wangu katika kukijenga na kukiimarisha chombo hiki. Hapana shaka aliingia katika kipindi kigumu  mwishoni mwa vita baridi” akaeleza Ban Ki Moon.

Jana ( alhamisi) Baraza Kuu la Umoja wa Mataifa likiongozwa na Katibu Mkuu wa Umoja wa Mataifa  litenga  muda maalum wa kumuenzi na kukumbuka  mchango mkubwa wa Marehemu  Boutros Boutros Ghali.

Katibu Mkuu Ban Ki Moon,  katika salamu zake amebainisha kwamba,  pamoja na   mazingira magumu ya utekelezaji wa majukumu  yake,  na hasa ikizingatiwa kwamba alishika wadhifa huo  mwisho wa vita  baridi,bado aliweza kuweka misingi  mingi  mizuri  ikiwamo ya uboreshaji wa Operesheni za Ulinzi wa Amani kupitia kofia ya  Umoja wa Mataifa  pamoja na  utendaji wa sekretarieti ya Umoja wa Mataifa.

“ Alikuwa mpenda  Amani, usalama, haki za binadamu,  mwanadiplomasia, msomi na  mwanazuoni  aliyebobea  ambaye hakuogopa kusema ukweli na kusimamia kile alichokiamini.  Akasema Ban Ki Moon.

Marehenu  Boutros Boutros- Ghali ambaye amefariki   siku ya jumanne akiwa na  miaka 93 alikuwa Katibu Mkuu wa Kwanza kutoka Barani Afrika na Mwarabu wa Kwanza.

Wazungumzaji  wengi waliozungumza kwa niaba ya  Kanda  zao wanazoziwakilisha walieleza kwamba Jumuiya ya Kimataifa ilikuwa imeondokewa na  mtu mashuhuri ambaye bado alikuwa na mchango  mkubwa katika diplomasia ya  kimataifa.

Kwa  upande wake,  Mwakilishi wa  Kudumu wa  Marekani katika Umoja wa Mataifa, Balozi Samantha  Power,  katika salamu za  serikali yake,  amemuelezea  Boutros Boutros- Ghali  kama kiongozi ambaye alikuwa na  uzoefu mkubwa katika   uendeshaji wa majadiliano .

Akataja  baadhi ya  mafanikio  yaliyotoka na  usimamizi  na uongozi wake ni pamoja na  kuushawishi utawala wa Makaburu wa Afrika ya  Kusini kumwachia huru Marehemu Mzee  Nelson Mandela.

Pamoja na  kueleza kwamba  Boutrous Boutrous – Ghali alikuwa  kiongozi mwenye  vipaji vipingi,    na aliyefanya mengi katika  diplomasia ya  Umoja wa Mataifa, lakini pia  akaeleza  wazi kwamba     serikali yake  ( Marekani)  mara kwa mara ilitofautiana na  Katibu Mkuu Boutros Ghali.

Na  akaongeza kwamba pamoja na kutofautiana huko  bado Marekani inaheshimu na kutambua mchango mkubwa wa Katibu Mkuu huyo wa Sita. Na kusisitiza kwamba Jumuiya ya Kimataifa  inapashwa kuyaendeleza na kuyadumisha mema  ya Marehemu Boutros Ghali.