MEYA ISAYA MWITA WA JIJI LA DAR AKIMBILIA KORTINI KUZUIA MCHAKATO WA KUTAKA KUNG'OLEWA KATIKA NAFASI YAKE ,ATAKA MAOMBI YAKE YASIKILIZWE

Na Karama Kenyunko, Michuzi Globu.

MEYA wa Jiji la Dar es Salaam Isaya Mwita amewasilisha maombi katika Mahakama ya Hakimu Mkazi Kisutu  akiomba Mahakama itoe amri ya kusitisha mchakato wa kung'olewa kwenye nafasi hiyo hadi maombi yake ya msingi yatakaposikilizwa.

Mwita ambaye anawakilishwa na Wakili Hekima Mwasipu amewasilisha maombi hayo leo Januari 8,2020 dhidi ya Mkuu wa Mkoa wa Dar es Salaam, Paul Makonda, Halmashauri ya Jiji hilo na Mwanasheria Mkuu wa Serikali.

Maombi hayo ambayo yanalenga kuwazuia Mkuu wa Mkoa na Halmashauri kujihusisha katika mchakato wa kumng'oa kwenye nafasi ya Umeya wa jiji hilo yamewasilishwa chini ya hati ya dharula na yametajwa mbele ya Hakimu Mkazi Mkuu, Janeth Mtega.

"Tunaomba Mahakama izuie mchakato huo au hata kama kutakuwa na kikao chenye ajenda hiyo isizungumziwe  na Mkuu wa Mkoa  pamoja na Halmashauri  wazuiliwe kufanya mchakato huo. Mahakama isipofanya hivyo mleta maombi (Mwita) hatapata haki yake ya kusikilizwa,"alidai Mwasipo.

Akijibu hoja hiyo, Naibu Wakili Mkuu wa Serikali, Gabriel  Malata amedai kesi hiyo imekuja kusikilizwa chini ya hati ya dharura na kwamba hawajui  kama kuna  kitu chochote kinachoweza kutokea kuhusu kung'olewa kwa mleta maombi (Meya), huyo hivyo, aliiomba mahakama kukataa maombi hayo  kwa gharama.

Amedai hakuna mazingira ya moja kwa moja yanayoashiria kwamba kwenye kikao kitakachofanyika kutakuwa na ajenda inayohusu kumtoa katika nafasi hiyo meya huyo.

Hata hivyo, jopo la mawakili wa serikali tayari limewasilisha mapingamizi kupinga maombi ya msingi yaliyopo mahakamani hapo. Kesi hiyo itatolewa maamuzi kesho Mtega Januari 9,mwaka 2020