HALMASHAURI YA MADABA YAFANIKIWA KUPELEKA SHULE WATOTO WOTE WALIOCHAGULIWA KUINGIA KIDATO CHA KWANZA

 

Na Muhidin Amri, Madaba

HALMASHAURI ya Madaba wilayani  Songea, imefanikiwa kupeleka watoto

wote  1148,waliofanya mtihani wa kumaliza elimu ya msingi mwaka jana

na kuchaguliwa kuanza elimu  ya sekondari katika muhula wa masomo 2021

kwenye shule walizopangiwa.

Akizungumza na waandishi wa habari ofisini kwake, Afisa Elimu sekondari wa

Halmashauri hiyo Michael Hadu  alisema, wamefanikiwa kupeleka watoto

wote walio kuchaguliwa kuendelea na elimu ya sekondari mwaka huu baada

ya kukamilisha ujenzi wa vyumba vya madarasa.

Hadu alisema, kati ya wanafunzi hao wavulana 585 na Wasichana 563

ambapo wanafunzi 10 wamechaguliwa kwenda katika shule  mbalimbali  za

Bweni za serikali zilizopo nje ya Halmashauri ya Madaba.

“ katika Halmashauri yetu ya Madaba tumefaulisha wanafunzi  1148 na

wote wamepata nafasi ya kujiunga na  kidato cha kwanza  kwenye shule

walizopangiwa na hakuna mwanafunzi aliyekosa nafasi na wote wako

shuleni”alisema Hadu.

Alisema, Rais Dkt John Magufuli  ameweka dhamira ya dhati ya kutoa

elimu bure, na Halmashauri  imehakikisha wanafunzi wote waliochaguliwa

 wanaendelea na elimu ya sekondari ambapo ameipongeza Serikali kwa

kutoa fedha za kujenga madarasa mapya kwa ajili ya wanafunzi hao.

Kwa upande wa vyumba vya madarasa alisema,  mahitaji kwa wanafunzi hao

ilikuwa  25  na  wakati wanachaguliwa kulikuwa na vyumba 23 hivyo kuwa

na upungufu wa vyumba 2,hata hivyo darasa moja limekamilika

lililojengwa kwa ushirikiano kati ya wananchi na Halmashauri.

Alisema,darasa lingine lipo katika hatua ya boma ambapo Ofisi ya

Mkurugenzi Mtendaji wa Halmashauri ya wilaya imeshatoa kiasi cha

shilingi milioni 6 ili kukamilisha ujenzi wake.

Kuhusu mahitaji ya viti kwa wanafunzi wa kidato cha kwanza mwaka 2021

ilikuwa 1148,vilivyokuwepo 987 na pungufu 161,mahitaji ya meza 1148

zilizowepo 976 hivyo kuwa na upungufu wa meza 172.

Hata hivyo,  kutokana na uhusiano mzuri kati ya Halmashauri na wadau

mbalimbali, ikiwemo Benki ya NMB Tawi la Madaba  iliyotengeneza viti

50 na meza 50 na Halmashauri imetoa shilingi milioni 10 ambazo

zimesaidia kumaliza  upungufu huo.

Kwa upande wake Mkurugenzi Mtendaji wa Halmashauri hiyo Shafi Mpenda,

ameishukuru Serikali kwa kutoa fedha ambazo zimetumika kuboresha sekta

ya elimu  mwaka hadi mwaka.

Alisema,  Serikali imetoa kiasi cha shilingi milioni 299.678 kwa ajili

ya kutekeleza miradi ya  P4R kwa kujenga vyumba vya madarasa,matundu

ya choo kwa baadhi ya shule.

Alieleza kuwa,changamoto kubwa  katika utekelezaji wa miradi ni

kuchelewa kwa vifungu vya matumizi ya fedha,saruji kutopatikana kwa

wakati,ukiukaji wa maadili  katika matumizi ya fedha na uzembe kwa

walimu uliosababisha baadhi ya miradi kuchelewa kukamilika.

Alisema, kutokana na kasoro hizo amelazimika kuwavua madaraka walimu

waliofanya uzembe na kutumia fedha hizo vibaya, na  hatua hiyo

inalenga kujenga nidhamu juu ya  matumizi ya fedha za miradi.

Mpenda alitoa mfano wa Mkuu wa shule ya Sekondari Gumbiro  aliyemlipa

fedha nyingi fundi aliyepewa kazi ya kujenga matundu ya vyoo  katika

shule hiyo kupitia fedha za mradi wa ujenzi wa vyoo  bora unaofahamika

kwa jina la Swash  kuliko  kazi iliyofanyika ambapo amemtaka Mwalimu

huyo kumalizia  kazi hiyo kwa gharama zake.

Katika hatua nyingine Mpenda alisema, Halmashauri hiyo imetekeleza

agizo la Waziri Mkuu Kassim Majaliwa lililowataka Wakurugenzi wa

Halmashauri za wilaya,miji,Manispaa na Majiji kumaliza ujenzi wa

vyumba vya madarasa, madawati na viti kwenye shule za sekondari

ifikapo tarehe 28 Mwezi uliopita.

Mpenda alibainisha kuwa, Halmashauri  kwa kushirikiana na wadau

wengine wa elimu imekamilisha agizo hilo kwa asilimia 100 na hakuna

mtoto anayekaa chini kwa kukosa kiti na meza au kusoma chini ya miti.