TAKUKURU MANYARA YAFUATILIA MIRADI 82 YA MAENDELEO

Na Mwandishi wetu, Babati

MIRADI ya maendeleo 82 yenye thamani ya shilingi bilioni 1.6 imefuatiliwa na dawati la uzuiaji rushwa kupitia Taasisi ya Kuzuia na Kupambana na Rushwa (TAKUKURU) Mkoa wa Manyara.

Kamanda wa TAKUKURU wa Mkoa wa Manyara, Holle Joseph Makungu, ameyasema hayo mjini Babati wakati akizungumza kupitia taarifa yake ya miezi mitatu iliyopita.

Makungu amesema kwa mujibu wa ufuatiliaji huo, mingi ya miradi hiyo imekuwa ikitumia njia ya manunuzi kupitia ‘force account’ na mingi iliyotembelewa inaakisi thamani ya fedha.

Hata hivyo, amesema katika ufuatiliaji huo walibaini kuwepo kwa baadhi ya wakandarasi wanaoomba ujenzi wa miradi hiyo kuwa na mafundi wa mitaani wanaoomba kazi kwa bei inayowawezesha kuwashinda washindani ila baadaye huanza madai ili wapate mapato ya ziada.

“Ni rai yetu kwa wakurugenzi wa halmashauri kuwa macho na watu wa aina hiyo ikizingatia kuwa utekelezaji wa miradi ya serikali kwa utaratibu wa kutegemea mafundi wa mtaani unaendelea kufanyika,” amesema Makungu.

Amesema wananchi wanapaswa kutoa taarifa kwao TAKUKURU endapo watabaini kuna matendo machafu yanafanyika kwenye miradi mbalimbali ya maendeleo katika vijiji, mitaa au kata zao. 

“Rai yetu kwa wana Manyara ni kuwaomba kuendelea kutoa taarifa za rushwa na wanaojihusisha na vitendo hivyo, kupitia namba yetu ya dharura 113 au kwa kufika katika ofisi zetu zilizopo karibu nao, kama sehemu ya kuunga mkono kauli mbiu ya kupambana na rushwa ni jukumu langu,” amesema Makungu.

Kamanda wa TAKUKURU Mkoa wa Manyara, Holle Joseph Makungu akizungumza na waandishi wa habari Mjini Babati.