MKATABA WA SIMBA SC, SPORTPESA WAFIKA KIKOMO

 

Na Bakari Madjeshi, Michuzi TV

BAADA ya kumaliza mkataba wa awali wa miaka mitano, Klabu ya Simba imeandika barua ya kufika kikomo cha kutoendelea na mkataba mpya na Kampuni ya Sportpesa, mkataba wa awali ulidumu kwa kipindi cha miaka mitano tangu May, 2017 uliposainiwa.

Akizungumza na Waandishi wa Habari jijini Dar es Salaam, Nwenyekiti wa Bodi ya Wakurugenzi Sportpesa, Abbas Tarimba amesema Kampuni hiyo ilipokea barua ya kutoendelea mkataba mwingine baada ya kufika kikomo cha mkataba wa awali.

“Jana tumepokea barua kutoka Simba SC ikitufahamisha kwamba, mkataba wetu na wao wa kipindi cha miaka mitano kuanzia May, 2017 umefika tamati”, amesema Tarimba.

Amesema Sportpesa wamepokea taarifa hiyo, na kuwatakia kila la kheri kwenye udhamini na Kampuni nyingine.

“Tungependa kuendelea nao lakini lazima tuheshimu maamuzi ya kila mmoja, sisi tunajivua kwenye miaka mitano ya kupata mafanikio makubwa ya kunyanyua viwango vya timu ya Simba SC”, ameeleza

Amesema, Sportpesa imefurahi kumaliza mkataba huo bila misuguano au migogoro yoyote na Simba SC, amesema Sportpesa wataendelea kuwepo kwenye Soka sanjari na kudhamini timu nyingine mbalimbali.