SERIKALI YAOMBWA KUMALIZIA FEDHA ZA MRADI WA MAJI WA MIJI 28 UNAOTEKELEZWA KATIKA MJI WA SONGEA

Na Mwandishi Wetu,Ruvuma

CHAMA cha Mapinduzi wilaya ya Songea mkoani Ruvuma,kimempongeza Rais Dkt Samia Suluhu Hassan kwa kutoa Sh.bilioni 145.77 kwa ajili ya kuboresha huduma ya maji kwa wakazi wa Manispaa ya Songea mkoani Ruvuma.

Pongezi hizo zimetolewa jana na Mwenyekiti wa Chama hicho Mwinyi Msolomi,wakati wa ziara yawajumbe wa kamati ya Siasa ya Chama cha Mapinduzi Songea mjini baada ya kutembelea mradi wa maji wa miji 28 unaotekelezwa na Mkandarasi kampuni ya China Civil Engineering Contruction Corporation(CCECC).

Mradi huo,unatarajiwa kumaliza kero ya upatikanaji wa huduma ya maji kwa wakazi wa Manispaa ya Songea hasa wanaoishi mtaa wa Sokoine kata ya Bombambili na Making’inda kata ya Msamala ambao mara kwa mara wanapata maji kwa mgao.

Msolomi,ameishukuru Serikali kupitia wizara ya maji na Mamlaka ya maji safi na usafi wa mazingira Manispaa ya Songea(Souwasa), kuanza kutekeleza mradi huo unaosubiriwa kwa hamu kubwa na wakazi wa Manispaa hiyo na maeneo mengine ya jirani.

Alisema,mradi huo ni muhimu kwani utakuwa suluhisho la changamoto ya upatikanaji wa huduma ya maji na utatoa fursa kwa wananchi wa Songea kupata muda mwingi kujikita katika shughuli zao za kiuchumi badala ya kutumia kwenda kutafuta maji.

Katibu wa Chama hicho wilaya ya Songea mjini James Mgego,ameiomba Serikali kuhakikisha inatoa fedha zilizobaki ili mkandarasi aweze kuendelea na utekelezaji wa mradi huo ambao umesimama kutokana na ukosefu wa fedha.

“Tumekagua mradi huu na kulidhishwa na ubora wake,hata hivyo changamoto tuliyoelezwa na wataalam ni ukosefu wa fedha ambazo zingemwezesha Mkandarasi kuendelea na kazi ya ujenzi,sisi kama Chama kilichopewa dhamana na Watanzania tunaishauri Serikali itoe fedha kwa wakati ili mradi huu ukamilike kwa wakati kama yalivyo matarajio ya wananchi wa Manispaa ya Songea”alisema Mgego.

Alisema,kwa sasa wananchi wa Songea wanapata huduma ya maji lakini bado hayatoshelezi hasa kwenye kata za pembezoni,kwa hiyo mategemeo yao ni mradi huo ambao ukikamilika utatoa huduma ya maji kwa zaidi ya maiaka 20.

Naye Mjumbe wa kamati hiyo Pascal Msigwa,amefurahishwa na maendeleo ya ujenzi wa mradi huo,lakini ameiomba Serikali kuharakikisha ujenzi wake ili wananchi waweze kupata huduma ya maji ya uhakika na kuwaondolea adha ya kupata huduma hiyo kwa mgao.

Kwa upande wake Msimamizi wa mradi huo kutoka Mamlaka ya maji na usafi wa mazingira Songea mjini(Souwasa) Vicenti Bahemana alisema,mradi ulianza kutekelezwa mwezi Januari 2024 na unatarajia kukamilika mwezi Septemba 2026.

Alisema,tayari Serikali kupitia wizara ya maji imeshamlipa mkanadarasi fedha za malipo ya awali kiasi cha Sh.bilioni 21.87 kati ya Sh.bilioni 145.77 ambayo ni gharama halisi ya utekelezaji wa mradi huo.

Alitaja kazi zilizopangwa kutekelezwa ni ujenzi wa kidaka maji katika Mto Njuga chenye uwezo wa kuzalisha lita milioni 17 kwa siku,ujenzi wa mtambo wa kuchuja na kutibu maji lita milioni 16 na kujenga matenki matatu yenye uwezo wa kuhifadhi lita milioni 9.

Kwa mujibu wa Bahemana, kazi nyingine zinazotekelezwa ni kulaza bomba za kusambaza maji urefu wa kilometa 30.2,upanuzi wa mtandao wa bomba za usambazaji maji kilometa 34.7 kukarabati mtambo wa kuchuja na kutibu maji lita milioni 11.5 ambao kwa sasa ufanisi wake upo chini ya kiwango ili kukidhi mahitaji.

“mpaka sasa mkandarasi amekamilisha ujenzi wa matenki mawili kati ya matatu yenye uwezo wa kuhifadhi lita milioni 2 kila moja ambayo ni tenki la Chandamali na Milaya na tenki la Mahilo litakalo kuwa na uwezo wa kuhifadhi lita milioni 5 lipo katika hatua za uchimbaji wa msingi”alisema.

Alisema,mpaka kufikia tarehe 30 Novemba mwaka jana utekelezaji wa mradi umefikia asilimia zaidi ya 4.8 na utakuwa na mafanikio makubwa katika kuboresha huduma za maji safi na usafi wa mazingira katika Manispaa ya Songea.