ZAIDI YA WAKIMBIAJI 3500 WAJITOKEZA ABSA DAR CITY MARATHON 2025

Dar es Salaam,  Mei 2025 – Mitaa ya jiji la Dar es Salaam ilifurika shamrashamra Jumapili hii baada ya zaidi ya washiriki 3,500 kushiriki katika mbio ambazo sasa zimekuwa tukio maarufu la jiji – Absa Dar City Marathon 2025. Idadi hii imepanda kutoka washiriki 2,500 mwaka jana, ishara tosha kuwa mashindano haya yameendelea kuvutia umma na kuchangia katika michezo, jamii na sekta ya utalii nchini.

Mbio hizi ambazo huandaliwa na The Runners Club kwa udhamini mkubwa wa Benki ya Absa Tanzania, sasa zimejikita kama tukio la kila mwaka la mbio katikati ya jiji – zikiwa na ndoto ya kuwa tukio kubwa zaidi la riadha siyo tu Tanzania bali pia Afrika Mashariki. Washiriki walichuana katika viwango vitatu: kilomita 5, kilomita 10 na nusu marathon ya kilomita 21, huku mipango ikiendelea kupanua zaidi tukio hili.

Mbio hizi ni zaidi ya ufanisi wa kiufundi wa wanariadha. Kiini chake ni kukuza afya, mazoezi, mshikamano wa jamii na uzalendo wa kitaifa. Akizungumza baada ya tukio, Beda Biswalo, Meneja wa chapa na Mawasiliano wa Benki ya Absa Tanzania alieleza kuwa mbio hizi zinaendana na lengo lao la kuhamasisha maisha yenye afya, kukuza mwingiliano wa kijamii na kuchangia maendeleo ya jamii.

“Kwetu Absa, tunaamini kuwa Hadithi yako ni Muhimu. Huu siyo msemo tu – bali ni dhamira yetu ya kutembea bega kwa bega na Watanzania wanapoandika sura mpya zenye hamasa katika maisha yao. Afya bora ni msingi wa maisha yenye maana, na marathon hii ni sehemu yetu ya kusaidia maelfu kuanza au kuendeleza safari hiyo,” alisema Aron Luhanga, Mkuu wa Masoko na Mawasiliano ya Shirika wa Absa Bank Tanzania.

Tukio hili limekuwa fursa muhimu kwa wakazi wa Dar es Salaam kupumzika kutoka shughuli zao za kila siku na kuungana – iwe ni kushindana, kushangilia au kuwasiliana kijamii. Vilevile, linamuunga mkono Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan, katika jitihada zake za kuitangaza Tanzania kama kivutio cha utalii. Washiriki kutoka nje ya nchi wanatarajiwa kuongezeka katika matoleo yajayo, hivyo kuiweka Dar es Salaam kwenye ramani ya dunia ya mashindano ya mbio.

Kwa kuendeleza lengo la kusaidia jamii, sehemu ya ada za usajili wa mwaka huu itaelekezwa kusaidia wodi ya wazazi katika Hospitali ya Mnazi Mmoja. Aidha, kama sehemu ya shughuli za baada ya mbio, Absa inapanga kuendesha zoezi la uchangiaji damu kwa ajili ya benki ya damu ya taifa – jambo linaloonyesha wazi dhamira ya mashindano haya kutoa mchango kwa jiji na wakazi wake