Naibu Waziri wa Viwanda na Biashara, Patrobas Katambi , amekiasa Kituo cha Biashara na Usafirishaji Afrika Mashariki (EACLC) kufanya kazi na Wafanyabiashara Wageni wanaoleta teknolojia na ujuzi ambao haupo nchini ili kuhakikisha vijana wa Kitanzania wanajifunza na kukuza biashara zao.
Katambi ameyasema hayo, Novemba 29, 2025, alipotembelea na kufungua Maonesho ya Kwanza ya Biashara ya EACLC, Ubungo jijini Dar es Salaam na kubainisha kuwa jukumu kuu la kituo hicho ni kuelimisha, kutangaza na kukuza biashara ndani na nje ya nchi.
Vilevile, Katambi amewasisitiza wafanyabiashara nchini kutumia kikamilifu Maonesho hayo katika kuongeza ubunifu, kupanua masoko na kuimarisha ubora wa bidhaa za Kitanzania.
Katambi pia amebainisha umuhimu wa wafanyabiashara kuunganisha nguvu na kutumia majukwaa ya maonesho kama fursa ya kuongeza tija na ushindani katika soko la kikanda na kimataifa.
Akiongea kuhusu uboreshaji wa mazingira ya biashara, Katambi amefafanua kuwa serikali imefanya marekebisho ya sera, sheria na kanuni 66 pamoja na kupunguza au kufuta zaidi ya tozo, ada na faini 380 zilizokuwa kero kwa wafanyabiashara ili kuvutia wawekezaji wa ndani na nje ya nchi kuja kuwekeza nchini.
Aidha, Katambi ameipongeza EACLC Limited kwa kuandaa maonesho hayo muhimu ambayo yamewakutanisha washiriki zaidi ya 200 na watembeleaji wanaotarajiwa kufikia 1,000, akisema hatua hiyo inaunga mkono juhudi za serikali ya Awamu ya Sita katika kuimarisha diplomasia ya uchumi na kuiweka Tanzania kuwa kitovu cha biashara katika Afrika Mashariki, Kusini na Kati.
Ametaka washirika wa maonesho kutumia siku za maonesho kujenga mitandao mipya ya kibiashara, kuingia mikataba yenye tija na kuboresha bidhaa ili ziweze kushindana kimataifa, akisisitiza kuwa maendeleo ya viwanda hayawezi kupatikana bila ushirikiano wa karibu kati ya serikali na sekta binafsi.
Kwa upande wake, Mkurugenzi Mkuu wa EACLC Limited, Bi Cathy Wang, amesema maonesho hayo yameandaliwa ili kuimarisha miundombinu ya biashara ikiwemo maghala, ofisi, maeneo ya maonyesho na huduma za usafirishaji, sambamba na kuwaunganisha wafanyabiashara na wateja wao moja kwa moja ili kuongeza uelewa wa bidhaa na fursa za uwekezaji.
Toa Maoni Yako:
0 comments so far,add yours
Hii ni Blog ya Watanzania popote walipo duniani kwa ajili ya kuhabarisha, kutoa/kupokea taarifa na kuelimisha mambo yote yaliyo chanya kwa Taifa letu. Tafadhali sana unapotoa maoni usichafue hali ya hewa wala usijeruhi hisia za mtu/watu. Kuwa mstaarabu...