RC KHERI JAMES MGENI RASMI MKESHA MKUBWA WA KUSIFU NA KUABUDU IRINGA

IDARA ya Vijana ya Kanisa la Kiinjili la Kilutheri Tanzania (KKKT) Dayosisi ya Iringa, Usharika wa Kanisa Kuu Iringa, kwa kushirikiana na huduma ya The Healing Missionaries kutoka Dar es Salaam, imeandaa mkesha mkubwa wa kusifu na kuabudu utakaofanyika Machi 20, 2026, mkoani Iringa.

Mkuu wa Mkoa wa Iringa, Khery James, anatarajiwa kuwa mgeni rasmi katika tukio hilo la kiroho linalolenga kuwakutanisha waumini na wananchi kwa pamoja katika kumsifu na kumshukuru Mungu.

Akizungumza na waandishi wa habari, Mwenyekiti wa Kamati ya Maandalizi, Luckson maarufu kama Kaka Mtumishi, amesema lengo la mkesha huo ni kumsifu Mungu na kumshukuru kwa mambo makuu aliyoyatenda, huku akiwahamasisha wananchi kujitokeza kwa wingi kushiriki na kupokea baraka zitakazopatikana kupitia ibada hiyo.

Aidha, ameeleza kuwa mgeni mwenyeji atakuwa Askofu wa KKKT Dayosisi ya Iringa, Blaston Gaville, ambaye ataungana na viongozi wengine wa dini kuongoza ibada hiyo maalum.

Kwa upande wake, Mwenyekiti wa The Healing Missionaries, Patrick Mulunda, amesema taasisi hiyo imejikita katika kupeleka habari njema katika maeneo mbalimbali ambayo huduma haijafika, kwa lengo la kueneza Injili na kuwafikia watu wengi zaidi.

Mkesha huo unatarajiwa kupambwa na waimbaji mbalimbali wa nyimbo za Injili, sambamba na ushiriki wa viongozi wa dini na kijamii, katika tukio hilo maalum lenye lengo la kuimarisha imani, umoja na kumtukuza Mungu.