MABARAZA YA USHINDANI,MASOKO YA MITAJI KUIMARISHA USHIRIKIANO

Baraza la Masoko ya Mitaji linatarajia kuimarisha ushirikiano kwa kubadilishana uzoefu katika usimamizi wa kesi, utatuzi wa migogoro na matumizi ya teknolojia, huku shughuli za biashara na uwekezaji nchini zikiendelea kukua.

Ushirikiano huo utaliwezesha baraza la masoko ya mitaji ambalo ni baraza jipya, kujifunza kutokana na uzoefu wa baraza la ushindani  ambalo tangu lilipoanza kusikiliza migogoro mwaka 2007, limewahi kushughulikia zaidi ya kesi 525.

Maofisa wa taasisi hizo walijadili ushirikiano huo wakati ujumbe wa baraza la masoko ya mitaji ulipotembelea baraza la ushindani.

Akizungumza kuhusu ushirikiano huo Msajili wa baraza la ushindani Mbegu Kaskasi, alisema pia kubadilishana uzoefu kutasaidia taasisi hizo kuboresha huduma na kuhakikisha migogoro inayohusu wafanyabiashara na wawekezaji inatatuliwa ndani ya muda unaofaa.

“Tumekuwa hapa kwa karibu miaka 20. Wao wamekuja kujifunza kutokana na uzoefu wetu, lakini sisi pia tumejifunza mengi kutoka kwao licha ya kuwa wameanzishwa miaka mitatu iliyopita,” alisema.

Kaskasi alisema baraza hilo hushughulikia wastani wa kesi 45 hadi 50 kwa mwaka, zikiwamo zinazohusu bidhaa bandia na migogoro inayotokana na maamuzi ya mamlaka za udhibiti.

Alisema uzoefu huo unaweza kusaidia baraza la masoko ya mitaji kujenga mifumo bora ya usimamizi wa kesi kadri idadi ya wawekezaji na wafanyabiashara inavyoongezeka.

Kaskasi alisema utatuzi wa migogoro kwa haraka ni muhimu kwa sababu kesi zinazochukua muda mrefu zinaweza kuathiri thamani ya bidhaa na mali za kifedha.

“Ikiwa bidhaa zinashikiliwa kwa miaka miwili, zinaweza kuharibika. Kwa upande wa fedha, kama fedha zimefungwa na haziwezi kutumika kwa miaka miwili, thamani yake hupungua. Katika sekta ya fedha, muda ni kila kitu,” alisema.

Alisema lengo kuu la mabaraza hayo ni kuwezesha shughuli za biashara na kujenga mazingira bora zaidi kwa wawekezaji.

“Lengo la mabaraza haya ni kuchochea maendeleo ya nchi, kurahisisha biashara na kuvutia wawekezaji,” alisema.

Kwa upande wake, Msajili wa baraza la masoko ya mitaji Dk Martin Kolikoli, alisema taasisi hiyo ina nia ya kujifunza zaidi namna baraza la ushindani inavyopanga na kuratibu kesi ili kuhakikisha maamuzi yanatolewa kwa wakati.

baraza la masoko ya mitaji limekuwa likifanya kazi kwa takribani miaka mitatu na hadi sasa limesajili migogoro sita. Kesi mbili zilirudishwa kutokana na changamoto za kiutaratibu, tatu zimeamuliwa na moja bado inaendelea.

Dk Kolikoli alisema migogoro iliyowasilishwa hadi sasa imehusisha zaidi wawekezaji na wasuluhishi wa masoko ya mitaji, hususan madalali.

Alisema baadhi ya wawekezaji wamekuwa na malalamiko kuhusu maamuzi yaliyofanywa na madalali bila kuwashirikisha, huku wengine wakiwa na migogoro kuhusu fedha baada ya mauzo ya uwekezaji.

Alisema kujifunza kutoka kwa baraza lenye uzoefu zaidi kutaiwezesha baraza la masoko ya mitaji kujiandaa kwa ongezeko la kesi kadri ushiriki katika masoko ya mitaji unavyoendelea kukua.

Dk Kolikoli alisema baraza pia inaandaa mfumo wa usimamizi wa kesi utakaowawezesha wahusika kushiriki katika vikao kwa njia ya mtandao na kupata nakala za maamuzi bila kulazimika kufika katika baraza hilo.