MWENGE WATEMBELEA HOTELI YA KER BUKOMBE KUHAMASISHA NISHAFI SALAMA YA KUPIKIA

Kiongozi wa Mbio za Mwenge wa Uhuru Kitaifa 2026, Ndugu Wazo Michael Mwang’onda, leo tarehe 28 Agosti 2026 ametembelea na kuzungumza na wafanyabiashara katika Hoteli ya KER iliyopo Mtaa wa Butambala, Kata ya Igulwa Wilaya ya Bukombe.

Ziara hiyo ni sehemu ya Programu ya Nishati Safi na Salama ya Kupikia inayotekelezwa na Serikali ya Awamu ya Sita inayoongozwa na Rais Dkt. Samia Suluhu Hassan. Lengo ni kuhamasisha matumizi ya nishati safi katika hoteli na migahawa.

Akizungumza na wamiliki na wafanyakazi wa Hoteli ya KER, Mwang’onda amesema Serikali ina dhamira ya kuwawezesha wafanyabiashara wa vyakula kutumia nishati safi ili kupunguza gharama za uendeshaji na kuboresha mazingira ya kazi.

Amesema matumizi ya nishati safi kama gesi ni ya ufanisi zaidi, yanaokoa muda na yana afya kuliko kutumia kuni na mkaa. Hii inawasaidia mama lishe na baba lishe kuongeza kipato chao kwa sababu gharama zinapungua na huduma inakuwa ya haraka.

Mwang’onda pia amesisitiza umuhimu wa kulinda mazingira. Amesema kupunguza matumizi ya kuni na mkaa kutaokoa misitu na kusaidia kupunguza athari za mabadiliko ya tabianchi.

Ameipongeza Halmashauri ya Wilaya ya Bukombe kwa kuwekeza katika kuhamasisha wananchi kuhamia nishati safi kupitia mapato yake ya ndani. Amesema hatua hiyo inaonyesha nia ya dhati ya Serikali ya Mitaa kuleta maendeleo.

Wafanyabiashara wa Hoteli ya KER wamemshukuru Kiongozi wa Mwenge kwa ziara hiyo na wameahidi kuzingatia matumizi ya nishati safi katika shughuli zao za kila siku. Wamesema wamepata elimu ya namna ya kupika kwa usalama na kwa haraka.

Mwishoni Mwang’onda amewataka wafanyabiashara wengine wilayani Bukombe kuiga mfano wa Hoteli ya KER na kuanza kutumia nishati safi. Amesema kwa kufanya hivyo Tanzania itakuwa imepiga hatua kubwa katika kuhifadhi mazingira na kuboresha afya ya wananchi.