TANZANIA YAIDHINISHA MIRADI MINNE YA KABONI YA BILIONI 135.5

Na Mwandishi Wetu

TANZANIA imeidhinisha  miradi minne ya biashara ya kaboni yenye thamani ya zaidi ya Shilingi bilioni 135.5, ikifungua njia ya mauzo  ya kaboni katika soko la kimataifa.

Miradi hiyo imeidhinishwa chini ya Kifungu cha 6 cha Mkataba wa Paris kuhusu Mabadiliko ya Tabianchi, kinachoruhusu nchi kushiriki biashara ya kimataifa ya mikopo ya kaboni kama sehemu ya juhudi za kupunguza uzalishaji wa gesi chafuzi.

Akizungumza jijini Dar es Salaam, Waziri wa Nchi, Ofisi ya Makamu wa Rais (Muungano na Mazingira), Hamad Yussuf Masauni, alisema idhini hiyo ilitolewa baada ya Kamati ya Kitaifa ya Tathmini ya Miradi ya Kaboni kukamilisha uchambuzi wa kitaalamu na kupendekeza miradi hiyo kwa Serikali.

Kwa mujibu wa Masauni, Serikali itanufaika na zaidi ya dola milioni 4.2 (Shilingi bilioni 10.8) kupitia mgao wake wa asilimia nane wa mapato yatokanayo na mauzo ya mikopo ya kaboni, kama inavyoelekezwa na Kanuni za Biashara ya Kaboni za mwaka 2022.

Miradi hiyo inatekelezwa na Burn Manufacturing Company Ltd, UpEnergy Group kwa kushirikiana na Sayari Safi Ltd, Water Mission International Tanzania pamoja na Bridge Carbon TZ Co. Limited.

 Miradi hiyo inalenga kuongeza matumizi ya nishati safi ya kupikia na kupanua upatikanaji wa maji salama, huku ikipunguza uzalishaji wa hewa ukaa.

Zaidi ya majiko banifu 900,000, yakiwemo ya umeme, yatasambazwa kwa zaidi ya kaya 600,000 katika maeneo ya mijini na vijijini. 

Hatua hiyo inatarajiwa kuongeza matumizi ya nishati safi ya kupikia na kusaidia utekelezaji wa mkakati wa Serikali wa kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.

Sambamba na hilo, mradi wa maji safi utakaotekelezwa katika mikoa yote 26 unatarajiwa kuwafikia zaidi ya kaya milioni moja, kuunda ajira za moja kwa moja 1,000, kushirikisha zaidi ya wasambazaji 100 na kuzalisha ajira nyingine 350 wakati wa utekelezaji.

Kwa mujibu wa tathmini ya Serikali, miradi hiyo kwa pamoja itapunguza kati ya tani milioni moja na mbili za hewa ukaa sawa (tCO₂e) kila mwaka, hatua itakayochangia utekelezaji wa Malengo ya Kitaifa ya Kukabiliana na Mabadiliko ya Tabianchi pamoja na ahadi za Tanzania chini ya Mkataba wa Paris.

Masauni alisema Tanzania imeendelea kuimarisha mfumo wa usimamizi wa biashara ya kaboni kwa kuanzisha Kituo cha Taifa cha Ufuatiliaji wa Kaboni, huku miradi 117 ikiwa tayari imesajiliwa hadi Julai 2026.

 Alisema ongezeko hilo linaashiria kuimarika kwa mazingira ya uwekezaji na kuongezeka kwa imani ya wawekezaji katika sekta hiyo.

Aliongeza kuwa Serikali inaendelea kupitia maombi mengine ya miradi katika sekta za misitu, kilimo kinachostahimili mabadiliko ya tabianchi, urejeshaji wa ardhi, usimamizi wa taka, biochar, usafiri na miundombinu ya magari ya umeme ili kupanua wigo wa biashara ya kaboni nchini.

Aliwataka wawekezaji wa ndani na nje ya nchi kutumia fursa zinazotokana na mfumo wa udhibiti ulioimarishwa na ushiriki wa Tanzania katika Kifungu cha 6 cha Mkataba wa Paris, akisema hatua hizo zinaifanya Tanzania kujijengea nafasi kama moja ya vituo muhimu vya uwekezaji wa biashara ya kaboni barani Afrika.