TUGHE: KATIBU MKUU MPYA KUTOKOMEZA UZEMBE KATIKA UTENDAJI

Na Victor Masangu, Pwani

KATIBU Mkuu mpya wa Chama cha Wafanyakazi wa Serikali na Afya Tanzania (TUGHE), Rugemarila Rutatina, amesema hatasita kuwachukulia hatua viongozi na watumishi watakaobainika kuchelewesha utekelezaji wa majukumu yao ndani ya chama hicho.

Amesema atahakikisha viongozi wanatimiza wajibu wao ipasavyo na kuacha kutoa visingizio visivyo na msingi, akisisitiza kuwa wakati wa maneno umepita na sasa ni kipindi cha kuchapa kazi kwa vitendo ili kuwatumikia wanachama na kulinda maslahi yao.

Rutatina ameyasema hayo wakati wa hafla ya makabidhiano ya ofisi kwa uongozi mpya uliochaguliwa hivi karibuni, iliyofanyika katika makao makuu ya chama hicho na kuhudhuriwa na viongozi mbalimbali, wastaafu pamoja na wanachama kutoka matawi mbalimbali, wakiwemo wa Mkoa wa Pwani.

Amesema viongozi na watendaji wanapaswa kuweka mikakati madhubuti ya kuhakikisha wanatekeleza majukumu yao kwa wakati na kwa ufanisi, akionya kuwa hatachukulia kwa uzito mdogo vitendo vya uzembe katika utendaji.

“Kitu kikubwa ni watendaji na viongozi kuhakikisha wanatimiza majukumu yao ipasavyo, kuweka mikakati ya kuwatumikia wanachama, na nitakuwa na msimamo mkali dhidi ya wale watakaobainika kufanya uzembe,” amesema Rutatina.

Aidha, amesema atashirikiana na viongozi wenzake kuweka malengo ya kuongeza idadi ya wanachama na kuimarisha chama ili kiweze kutekeleza majukumu yake kwa ufanisi zaidi.

Kwa upande wake, Mwenyekiti wa Taifa wa TUGHE, Aloisi Mapembe, amewataka viongozi waliochaguliwa kutobweteka baada ya kupata madaraka, badala yake waweke mikakati ya kuongeza wanachama na kuimarisha ushiriki wao katika chama.

Mapembe amesema kila kiongozi anapaswa kuweka mkakati wa kusajili angalau wanachama wapya 100 kwa mwaka, akieleza kuwa hatua hiyo itasaidia kupanua wigo wa chama na kuimarisha nguvu yake katika kutetea maslahi ya wafanyakazi.

Pia ameahidi kuwa katika kipindi chake cha uongozi ataanzisha miradi mbalimbali ya kiuchumi itakayoongeza kipato cha wanachama na kukifanya chama hicho kujitegemea kiuchumi.

Naye Mwenyekiti wa TUGHE Mkoa wa Pwani, Catherine Katele, amesema baada ya uchaguzi kukamilika, jukumu lililopo mbele yao ni kufanya kazi kwa bidii ili kutimiza matarajio ya wanachama waliowapa dhamana ya kuwaongoza.

Amesema uongozi huo utajitahidi kurejesha imani waliyopewa kwa kuhakikisha unasimamia na kutetea maslahi ya wafanyakazi kwa mujibu wa wajibu wao.

Kwa upande wake, mwakilishi wa wafanyakazi, Sara Stephano, ameahidi kuwa watafanyia kazi maelekezo yaliyotolewa na uongozi mpya ili kuleta mabadiliko chanya katika utetezi wa maslahi ya wafanyakazi wa sekta ya afya na serikali nchini.