at Wednesday, October 21, 2026 0
MAMLAKA ya Hali ya Hewa Tanzania (TMA) inatoa taarifa ya uwepo wa mgandamizo mdogo wa hewa katika Bahari ya Hindi karibu na Visiwa vya Ushelisheli umbali wa takribani kilomita 1600 kutoka pwani ya nchi yetu.

Katika taarifa iliyotolewa na TMA Oktoba 20,2026, inasema uchambuzi wa mifumo ya hali ya hewa unaonesha kuwa mgandamizo huo mdogo wa hewa unatarajiwa kuimarika na kuwa Kimbunga katika eneo la Bahari ndani ya kipindi cha siku nne zijazo na mgandamizo huo unaelekea pwani ya nchi yetu.

"Uwepo wake katika Bahari ya Hindi unatarajiwa kuimarisha kiasi mifumo inayosababisha mvua katika maeneo ya ukanda wa pwani ya nchi yetu na maeneo jirani hususani kuanzia tarehe 24 Oktoba, 2026." Imesema sehemu ya taarifa hiyo

Aidha, watumiaji wa bahari na jamii kwa ujumla wanashauriwa kuendelea kufuatilia na kuzingatia taarifa za utabiri kutoka Mamlaka ya Hali ya Hewa pamoja na kupata ushauri na miongozo ya wataalam wa kisekta.

TMA inaendelea kufuatilia mwenendo wa mgandamizo huo mdogo wa hewa pamoja na athari zake kwa mifumo ya hali ya hewa hapa nchini na itaendelea kutoa taarifa kila inapobidi. Andika title nzuri





Read more »

at Wednesday, October 21, 2026 0
WAZIRI MKUU Dkt. Mwigulu Nchemba amekutana na Makamu wa Rais wa Mfuko wa Kimataifa wa Maendeleo ya Kilimo (IFAD), Dkt. Geraldine Mukeshimana na kujadiliana naye masuala ya kilimo, uvuvi na uchumi wa bluu.

Mazungumzo hayo yalifanyika jana (Jumanne, Oktoba 20, 2026) kando ya Mkutano wa Kimataifa wa Norman E. Borlaug (Borlaug Dialogue) ulioanza Oktoba 20, 2026 katika Kituo cha Mikutano cha Iowa, jijini Des Moines, Marekani.

Katika majadiliano yao, Waziri Mkuu alimshukuru Dkt. Mukeshimana kwa ufadhili unaotolewa na IFAD kwenye uvuvi wa bahari kuu chini ya Wizara ya Mifugo na Uvuvi pamoja na uendelezaji wa uchumi wa bluu kupitia Wizara ya Uchumi wa Bluu na Uvuvi ya Zanzibar.

“Hii miradi ni ya muhimu na inapewa kipaumbele zaidi kwani inasaidia kuzalisha ajira kwa wanawake na vijana,” alisema.

Kwa upande wake, Makamu wa Rais wa IFAD, Dkt. Mukeshimana aliipongeza Serikali ya Tanzania kwa kuendelea kuwa kitovu cha upatikanaji wa chakula kwa maeneo yanayoizunguka. “Binafsi ninawapongeza kwa sababu mmeendelea kuwa kitovu cha uzalishaji wa chakula cha uhakika barani Afrika. Mnafanya kazi kubwa na nzuri mno ya kulisha chakula kwenye maeneo ya jirani,” alisema.

Kipekee, Dkt. Mukeshimana alimsifu Dkt. Mwigulu akisema: “Tanzania imebahatika sana kupata Waziri Mkuu ambaye zamani alishawahi kuwa Waziri wa Kilimo na baadaye akawa Waziri wa Fedha. Siyo kila nchi imepata bahati kama hiyo, Tanzania mmebarikiwa sana.”

Alisema taasisi hiyo itaendelea kufadhili miradi inayolenga kuondoa njaa na umaskini kwa kuwekeza kwa watu wa vijijini, kuwezesha ushiriki wao katika masoko na kuimarisha ustahimilivu wa hali ya hewa wa maisha yao.

Waziri Mkuu ameambatana na Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Maghembe, Naibu Waziri wa Kilimo, David Silinde, Balozi wa Tanzania Washington, Elsie Kanza na watendaji wengine wa Serikali.









Read more »

at Wednesday, October 21, 2026 0
Waziri Mkuu, Dkt. Mwigulu Nchemba, amefanya mazungumzo na mshindi wa Tuzo ya Chakula Duniani ya mwaka 2026, Bw. Huub Lelieveld, Oktoba 20, 2026, katika ukumbi wa Iowa Events Center, jijini Des Moines, nchini Marekani.

Katika mazungumzo hayo, Waziri Mkuu amemweleza hatua zinazochukuliwa na Serikali kuimarisha sekta ya kilimo. Aidha, amemwambia kuwa watafiti wa kilimo nchini Tanzania wanaendelea kujifunza kutokana na kazi zake ikiwemo uhifadhi wavyakula kwa njia za asili.

Bw. Lelieveld ni mwanasayansi kutoka Uholanzi anayejihusisha na masuala ya usalama wa chakula. Ametangazwa kuwa mshindi wa tuzo hiyo kwa mwaka 2026 na Taasisi ya Tuzo ya Chakula Duniani (World Food Prize Foundation).









Read more »

at Wednesday, October 21, 2026 0
▪️ Yashirikiana na Strathmore Business School kuimarisha ujuzi wa uongozi na kuwaandaa wakuu wa idara kushika nafasi za juu zaidi.


Kampuni ya mawasiliano ya Yas Tanzania imeimarisha juhudi za kuandaa viongozi wa baadaye kutoka miongoni mwa wafanyakazi wake, baada ya wakuu wa idara zaidi ya 20 kuhitimu programu maalum ya mafunzo inayolenga kuwaandaa kwa majukumu makubwa zaidi ya usimamizi na uongozi.

Programu hiyo, iliyoandaliwa kwa ushirikiano na Strathmore Business School, inalenga kuimarisha ujuzi wa kuongoza timu, kusimamia utendaji wa wafanyakazi na kutekeleza mikakati ya biashara. Pia, inawaandaa washiriki kushika nafasi za juu za uongozi, zikiwemo za kiutendaji na za bodi za wakurugenzi.

Akizungumza katika hafla ya mahafali iliyofanyika hivi karibuni jijini Dar es Salaam, Ofisa Mtendaji Mkuu wa Yas Tanzania, Pierre Canton Bacara, alisema kuendeleza uwezo wa wafanyakazi ni muhimu katika kuboresha maamuzi, kuongeza ufanisi wa biashara na kuhakikisha shughuli za kampuni zinakuwa endelevu wakati wa mabadiliko ya uongozi.

“Kadri biashara yetu inavyobadilika, viongozi wetu wanapaswa kuwa tayari kufanya maamuzi magumu, kuongoza timu zao na kufikia malengo. Kuwaandaa kabla ya kuwapa majukumu makubwa zaidi kunawajengea msingi imara na kusaidia kampuni kuendelea na shughuli zake bila kukwama,” alisema Bacara.

Programu hiyo inalenga kujenga kundi la wafanyakazi wenye sifa na uwezo wa kujaza nafasi muhimu za uongozi ndani ya kampuni, huku ikipunguza mapungufu ya ujuzi na kupanua fursa za kuku ana kuendelea kitaaluma. Katika sekta ya mawasiliano nchini Tanzania, kuimarisha uwezo wa uongozi na usimamizi kunaweza kusaidia kampuni kukabiliana na mabadiliko ya soko na kuboresha huduma kwa wateja, biashara na taasisi zinazotegemea huduma za kidijitali.

Mkuu wa Mafunzo na Maendeleo wa Yas Tanzania, Janet Igogo, alisema programu hiyo ni sehemu ya mkakati mpana wa kampuni wa kuendeleza rasilimali watu, unaojumuisha mafunzo kwa wakuu wa idara na viongozi wengine waandamizi.

“Nafasi muhimu ndani ya kampuni zinapokuwa wazi, tunataka kuwa na wafanyakazi wenye uwezo wa kushika nafasi hizo. Hili linahitaji maandalizi ya makusudi katika hatua mbalimbali za maendeleo na utendaji kazi wao, kupitia mafunzo yanayowaandaa kwa majukumu watakayokabiliana nayo,” alisema Igogo.

Yas inapanga kuendeleza programu hiyo sambamba na mipango mingine ya kuimarisha ujuzi na uwezo wa rasilimali watu, ili kuongeza idadi ya wafanyakazi walio tayari kushika nafasi za usimamizi na uongozi na kusaidia kampuni kutekeleza malengo yake ya biashara kwa ufanisi.
Ofisa Mtendaji Mkuu wa Yas Tanzania, Pierre Canton Bacara (katikati), akifurahi pamoja na wakuu wa idara wa kampuni hiyo wakati wa mahafali yao yaliyofanyika jijini Dar es Salaam hivi karibuni. Zaidi ya wakuu wa Idara 20 walihitimu mafunzo ya uongozi kupitia programu iliyoandaliwa na Kampuni hiyo kwa ushirikiano na Chuo Kikuu cha Biashara cha Strathmore.

Read more »

at Tuesday, October 20, 2026 0

Wadau wa Uhifadhi nchini wameendelea kuimwagia pongezi kwa hifadhi ya Ngorongoro kutokana na ushindi wa kishindo ilioupata wa kushinda tuzo ya kutukuka ya Ubora katika Utalii Endelevu na Usimamizi wa Uhifadh iliyopokelewa mwishoni mwa wiki jijini Accra, Ghana.


Salamu za pongezi za karibuni zimetolewa na Taasisi ya Uhifadhi na Urithi nchini yenye makao makuu yake jijini Dar essalaam ambapo katika taarifa iliyotolewa na Mtendaji mkuu wa taasisi Costantine Akitanda imeeleza kuwa ushindi wa Ngorongoro ni ushindi wa wadau wote wa Uhifadhi.

“Tuzo hii inathibitisha upya utambulisho wa kudumu wa Ngorongoro kama chimbuko lenye ushahidi kisayansi wa asili ya binadamu, ambapo hatua za kwanza za binadamu zilisikika, uhifadhi endelevu wa urithi wa utamaduni uliopo, mazingira, wanyamapori wakiwa katika mazingira yao ya asili na gunduzi mbalimbali zinaleta upekee kuwa Ngorongoro ni bustani ya Eden iliyotunzwa” imeeleza taarifa hiyo

Taarifa hiyo imeongeza kuwa pamoja na Ngorongoro kuwa sehemu ngumu katika usimamizi kutokana na mfumo wake wa matumizi mseto ya ardhi lakini mamlaka hiyo imeweza kujipambanua katika uhifadhi endelevu

Akizungumza mara baada ya kurejea kutoka Accra, Ghana kamishna wa Uhifadhi wa NCAA Abdul-Razaq Badru alisema kuwa tuzo hiyo imetokana na ushirikiano wa wadau wote katika mnyororo wa Uhifadhi, utalii na maendeleo ya jamii na kuongeza kuwa wadau wote wana wajibu wa kulinda urithi wake wa kipekee wa asili na utamaduni, huku tukihakikisha kuwa uhifadhi huo unaleta thamani ya kudumu kwa watu, asili na vizazi vijavyo.








Read more »

at Tuesday, October 20, 2026 0
Naibu Katibu Mkuu wa CCM Zanzibar, Abdi Mahamoud Abdi, amekutana na ujumbe wa viongozi wa Chama cha Kikomunisti cha China (CPC), ambapo wamejadili namna ya kuimarisha uhusiano na ushirikiano wa maendeleo kati ya vyama hivyo viwili.

Kikao hicho kimefanyika katika Afisi Kuu ya CCM Kisiwandui, Zanzibar, kikijikita katika masuala ya uongozi, miundombinu, biashara, pamoja na kuimarisha umoja na mshikamano.

Akizungumza baada ya kikao hicho, Abdi amesema CCM imekuwa na utaratibu wa kuwaandaa viongozi wake kutembelea China kwa ajili ya kujifunza uzoefu wa maendeleo katika sekta mbalimbali, ikiwemo uongozi na biashara.

Pia, amewapongeza viongozi wa China kwa msaada wanaoendelea kutoa katika Chuo cha Mafunzo cha Dambwe, akieleza kuwa mchango huo una umuhimu katika maendeleo ya chuo hicho.

Kwa upande wake, Balozi wa China nchini Tanzania, Chen Mingjian, amesisitiza umuhimu wa kuendeleza ushirikiano kati ya Zanzibar na China, akieleza kuwa CPC itaendelea kutoa fursa kwa viongozi wa CCM kutembelea China kwa ajili ya kubadilishana uzoefu na maarifa katika sekta mbalimbali.

Chen amesema maendeleo ya miundombinu ya barabara nchini Tanzania yana mchango katika kukuza uchumi na kuboresha maisha ya wananchi.

Kikao hicho kimehudhuriwa pia na Naibu Katibu Mkuu wa UWT Zanzibar, Khadija Nassor Abdi; Katibu wa Kamati Maalumu ya NEC, Idara ya Siasa na Uhusiano wa Kimataifa (SUKI) CCM Zanzibar, Khadija Salum Ali; Balozi Mdogo Mkuu wa China Zanzibar, Li Qianghua; Mshauri katika Ubalozi wa China nchini Tanzania, Peng Yongjia; pamoja na Katibu wa Pili katika ubalozi huo, Zhang Lianchuang.












Read more »

at Tuesday, October 20, 2026 0

Mjumbe wa Kamati Kuu ya Halmashauri Kuu ya Chama Cha Mapinduzi (CCM) Taifa (MCC), Salim Abri Asas, ametembelea wanafunzi wa Shule ya Msingi Weru, iliyopo katika jimbo la kalenga,wilaya ya Iringa Vijijini, na kupongeza mazingira ya kujifunzia kwa wanafunzi shuleni hapo.

Asas ameeleza kuridhishwa na mazingira hayo huku akitambua juhudi za Serikali inayoongozwa na Rais wa Jamhuri ya Muungano wa Tanzania, Dkt. Samia Suluhu Hassan, katika kuboresha sekta ya elimu nchini.

Amesema utekelezaji wa Ilani ya Uchaguzi ya Chama Cha Mapinduzi (CCM) unaendelea kuonekana kupitia maboresho ya miundombinu ya elimu na utoaji wa elimu bila malipo, hatua zinazolenga kuwawezesha wanafunzi kupata elimu katika mazingira bora.

Aidha, amewahimiza wanafunzi kusoma kwa bidii, kuzingatia nidhamu na kujituma katika masomo yao ili kunufaika na fursa za elimu na kupata matokeo mazuri katika mitihani.

Amisisitiza kuwa juhudi za kuboresha mazingira ya kujifunzia zinapaswa kwenda sambamba na uwajibikaji wa wanafunzi, walimu na wazazi katika kuhakikisha elimu inayotolewa inaleta matokeo yanayotarajiwa.



Read more »

at Tuesday, October 20, 2026 0
▪️Atoa wito kwa nchi za Afrika kuimarisha ushirikiano wa kikanda, kuongeza thamani ya madini na kuharakisha utekelezaji wa Dira ya Madini ya Afrika.


📍Accra, Ghana

Waziri wa Madini, Mhe. Anthony Peter Mavunde, amezitaka nchi za Afrika kuacha kufanya kazi kwa kujitenga na badala yake kuunganisha nguvu katika usimamizi na uendelezaji wa rasilimali za madini ili kukuza viwanda, ajira na uchumi wa bara hilo.

Ameyasema hayo leo Oktoba 19 wakati akizungumza katika mjadala wa jopo la Mawaziri kutoka nchi za Tanzania, Nigeria na Liberia uliokuwa na mada isemayo “From Vision to Delivery: Making the African Mining Vision Work for Member States”,katika mkutano wa Kimataifa wa Mining in Motion unaofanyika kwasiku tatu kuanzia Oktoba 19 hadi 21, 2026 jijini Accra Ghana.

Mhe. Mavunde amesema wakati umefika kwa nchi za Afrika kuweka pembeni tofauti zao na kushirikiana kutekeleza mikakati ya pamoja ya maendeleo ya Sekta ya Madini.

Amesema Afrika ina zaidi ya asilimia 32 ya rasilimali za madini muhimu zinazojulikana duniani, lakini bado sehemu kubwa ya utajiri huo husafirishwa nje ya bara bila kuongezwa thamani ya kutosha na kuwa hali hiyo inanyima nchi za Afrika fursa za kujenga viwanda, kutengeneza ajira na kuongeza mapato.

Akifafanua hatua zinazochukuliwa na Tanzania, Mhe. Mavunde amesema mageuzi ya kisheria yaliyofanyika mwaka 2017 yameimarisha usimamizi wa rasilimali za madini na ushiriki wa Serikali, huku hatua za kuzuia usafirishaji wa madini ghafi zikichochea uongezaji thamani nchini.

Ameeleza kuwa Tanzania sasa chini ya uongozi wa Rais Mhe. Dkt. Samia Suluhu Hassan ina zaidi ya viwanda vinane vya kusafisha dhahabu na viwanda zaidi ya 16 vya uchakataji na usafishaji wa madini ya metali za msingi na kuwa Sekta ya Madini inachangia asilimia 10.3 ya Pato la Taifa, huku wachimbaji wadogo wakichangia takribani asilimia 40 ya uzalishaji wa sekta hiyo ikiwa ni matokeo ya hatua za dhati za Serikali kuimarisha sekta hiyo.

Katika kuimarisha ushirikiano wa kikanda, Mhe. Mavunde amezitaja Tanzania, Madagascar na Msumbiji kuwa na fursa ya kuunganisha nguvu katika uendelezaji wa rasilimali za grafiti, uchakataji na uoanisha wa sera ili kujenga mnyororo wa thamani unaowanufaisha wananchi wa nchi hizo.

Amesisitiza kuwa Dira ya Madini ya Afrika haipaswi kubaki kwenye nyaraka na majadiliano, bali inapaswa kuambatana na utekelezaji wa vitendo huku akihimiza nchi wanachama kuimarisha mifumo ya mazungumzo na maamuzi ya pamoja ili kuharakisha utekelezaji wa mikakati iliyokubaliwa.

“Ni wakati sasa kwa Afrika kuanza kufanya kazi pamoja. Afrika ni moja, na tunapaswa kufanya kazi kama timu moja,” amesisitiza Mhe. Mavunde, akieleza kuwa ushirikiano ni muhimu katika kuhakikisha rasilimali za madini zinachochea maendeleo ya viwanda na ukuaji wa uchumi.

Waziri Mavunde ametoa wito kwa nchi za Afrika kugeuza utajiri wa madini kuwa fursa za viwanda, ajira, teknolojia na mapato zaidi, badala ya kuendelea kuuza madini ghafi na kununua bidhaa zilizoongezwa thamani kutoka nje ya bara hilo.

Awali akifungua rasmi Mkutano huo, Rais wa Jamhuri ya Ghana Mheshimiwa John Dramani Mahama amesema kuwa ni muda wa Afrika kugeukia soko la madini muhimu na mkakati kutokana na uhitaji mkubwa wa nishati safi ulimwenguni, lengo ni kuyaongezea thamani madini haya kabla hayajaenda katika soko la dunia.









Read more »

at Tuesday, October 20, 2026 0
Wasanii wa tasnia mbalimbali wakiwemo wa vichekesho, Wanamuziki, Wanamichezo na Watu wenye ushawishi nchini wametajwa kuwa ni nyenzo na nguzo muhimu katika kukuza, kuimarisha na kuenzi misingi ya Muungano.

Hayo yamesemwa na Katibu Mkuu Ofisi ya Makamu wa Rais, Dkt. Richard Muyungi wakati akifungua kikao kati ya Ofisi hiyo na Wadau hao kilicholenga kujadili mpango wa elimu kwa umma kuhusu Muungano kilichofanyika jijini Dar es Salaam Oktoba 19, 2026.

Alisema kuwa wadau hao ni kundi muhimu lenye uwezo wa kujenga ushawishi na kuhamasisha jamii, hivyo Ofisi hiyo imekusudia kutumia majukwaa yao ili kufikisha elimu ya Muungano kwa makundi mbalimbali ikiwemo vijana.

“Vipaji vyenu ni nyenzo muhimu ya kufikisha elimu ya Muungano…Tunapaswa kutambua kuwa Muungano wetu ni historia ambayo jamii hususani vijana inapaswa kutambua tulipo, tulipotoka na tunapokwenda” alisema Dkt. Muyungi.

Alieleza kuwa kwa kutambua umuhimu wa elimu kuhusu historia, misingi na chimbuko la Muungano, Ofisi ya Makamu wa Rais imekusudia kuwatumia wasanii, waigizaji na watu wenye ushawishi ambao wamekuwa na wafuatiliaji wengi hususani vijana katika mitandao ya kijamii.

Aidha, Katibu Mkuu huyo alisema maudhui yanayoandaliwa na kundi hilo yamekuwa yakivuta hisia na hamasa kwa vijana, hivyo Ofisi hiyo imebaini nafasi hiyo kuwa ni nyenzo na nguzo muhimu katika kufikisha elimu ya Muungano kwa jamii.

“Hili ni kundi muhimu katika jamii, vipaji mlivyonavyo tutahakikisha vinatumika vyema kwa ajili ya manufaa endelevu yanayolenga katika kulinda, kuimarisha na kuenzi misingi ya Muungano” alisema Dkt. Muyungi.

Alisema elimu ya Muungano ni agenda ya kudumu inayolenga kutambulisha taifa na jamii kufahamu historia na chimbuko lao, hivyo ushirikishaji wa wasanii, waigizaji, watengezaji wa maudhui ni suala lisiloepukika.

Kwa upande wake, Naibu Katibu Mkuu (Muungano) Ofisi ya Makamu wa Rais, Dkt. Latifa Mohammed Khamis alisema kuwa ushirikishaji wa wasanii, waigizaji na watengezaji maudhui ni mojawapo ya mikakati iliyoandaliwa na Ofisi hiyo katika kuhakikisha elimu ya Muungano inaifikia jamii.

“Wasanii, waigizaji na Mabalozi hawa wanatoka katika pande zote mbili za Muungano na hii ni moja ya mbinu mahsusi itakayotumika katika kuhakikisha jamii yetu hususani vijana inafahamu historia, chimbuko na misingi ya Muungano” alisema Dkt. Latifa.

Wakichangia mjadala katika kikao hicho, baadhi ya wadau akiwemo mwimbaji maarufu wa taarabu Bi. Hadija Omary Kopa pamoja na kupongeza hatua hiyo ya kuwashirikisha katika suala hilo walionesha nia ya kutoa elimu ya Muungano kupitia mitandao yao ya kijamii.

Walisema kuwa kwa ushirikiano na Ofisi ya Makamu wa Rais wako tayari muda wowote kutumia vipaji vyao kutoa elimu ya Muungano kwa jamii hususan vijana ambao wawafuatilia kupitia akaunti zao za mitandao ya kijamii.

Sanjari na hilo pia walielelezea umuhimu wa wanamuziki mbalimbali kuungana na kuandaa tungo (nyimbo) maalumu za kuhamasisha jamii kuuenzi Muungano huu adhimu ambao unatajwa kuwa ni wa kipekee duniani.

Pia, walishauri uzalendo wa kupenda nchi yao na kutambua umuhimu wa Muungano upandikizwe kuanzia ngazi ya chini hususan kwenye taasisi za elimu ya msingi hadi vyuo kwani kwa mujibu wa Sensa ya Watu na Makazi ya mwaka 2022, Watanzania waliozaliwa baada ya Muungano ni asilimia 77.3, hivyo ni muhimu kuwapa elimu.

Kikao hicho cha siku moja kilishirikisha wasanii na waigizaji mbalimbali wakiwemo wachekeshaji maarufu mtandaoni Victor Victor ‘Nanga’, Mohamed Mwinchande ‘Matofali’, Ester Luckson ‘Mama Chanja’, Amani Nzala “Nzala”, mtengeneza maudhui mtandaoni Vicent Njau ‘Kiredio’, Mwandishi wa habari na mjasiriamali Bw. Fredrick Bundala ‘Sky Walker’, John Rojas ‘Simple the Boy’ na wengine wengi.



Katibu Mkuu Ofisi ya Makamu wa Rais Dkt. Richard Muyungi akifungua kikao kati ya Ofisi hiyo na wasanii, waigizaji na watu wenye ushawishi cha kujadili mpango wa elimu kwa umma kuhusu Muungano kilichofanyika Oktoba 19, 2026 jijini Dar es Salaam. Kulia ni Naibu Katibu Mkuu (Muungano) Ofisi ya Makamu wa Rais Dkt. Latifa Mohammed Khamis na Mkurugenzi wa Muungano Dkt. Juma Mohammed Salum.

Katibu Mkuu Ofisi ya Makamu wa Rais Dkt. Richard Muyungi akimsikiliza Mkurugenzi wa Muungano Ofisi ya Makamu wa Rais Dkt. Juma Mohammed Salum kabla ya kuanza kwa kikao cha Ofisi hiyo na Wadau kutoka makundi ya wasanii, waigizaji na watu wenye ushawishi wakiwa katika kikao cha kujadili mpango wa elimu kwa umma kuhusu Muungano kilichofanyika Oktoba 19, 2026 jijini Dar es Salaam.

Naibu Katibu Mkuu (Muungano) Ofisi ya Makamu wa Rais Dkt. Latifa Mohammed Khamis akizungumza wakati wa kikao kati ya Ofisi hiyo na wasanii, waigizaji na watu wenye ushawishi cha kujadili mpango wa elimu kwa umma kuhusu Muungano kilichofanyika Oktoba 19, 2026 jijini Dar es Salaam na kufunguliwa na Katibu Mkuu Ofisi ya Makamu wa Rais Dkt. Richard Muyungi.

Wadau kutoka makundi ya wasanii, waigizaji na watu wenye ushawishi wakiwa katika kikao cha kujadili mpango wa elimu kwa umma kuhusu Muungano kilichofanyika Oktoba 19, 2026 jijini Dar es Salaam kilichofunguliwa na Katibu Mkuu Ofisi ya Makamu wa Rais Dkt. Richard Muyungi.
Read more »
Newer Posts
Older Posts
Subscribe to: Posts (Atom)