at Friday, November 13, 2026 0

WAZIRI MKUU, Dkt. Mwigulu Nchemba, amempongeza Rais Dkt. Samia Suluhu Hassan kwa kupanua elimu ya amali nchini, akisema uwekezaji huo unalenga kuwapatia vijana ujuzi utakaowawezesha kujitegemea.

“Hii ni hatua kubwa sana, na inalenga kuwaandaa vijana wa Kitanzania kuwa na ujuzi,” amesema.

Dkt. Mwigulu ameyasema hayo leo (Ijumaa, Novemba 13, 2026), alipotembelea Shule ya Sekondari ya Amali ya Mkoa wa Njombe, inayojulikana kama Njombe Technical, iliyopo Mlangali, wilayani Ludewa.

Amesema katika kipindi cha miaka minne hadi mitano, Serikali imejenga shule za amali zaidi ya 100. Pia, amesema shule za uhandisi zimefikia 29, mojawapo ikiwa Njombe Technical.

Katika ziara hiyo, Waziri Mkuu ameweka jiwe la msingi la shule na kusikiliza maelezo ya wanafunzi wa kidato cha kwanza wa fani ya umeme kuhusu mafunzo yao kwa vitendo.

Amewahakikishia wanafunzi kuwa Serikali itaendelea kukamilisha upatikanaji wa vifaa vya mafunzo na ujenzi uliobaki, baada ya Kiranja Mkuu, Yusufu Masumbuko Malulu, kueleza upungufu wa vifaa, hususan katika fani za umeme na uashi.

“Kwa hatua itakayofuata itakuwa ni ya kuhakikisha vitendea kazi vyote vinapatikana,” amesema Dkt. Mwigulu.

Kwa mujibu wa taarifa ya Halmashauri ya Wilaya ya Ludewa, Serikali imetoa shilingi bilioni 1.6 kupitia Mradi wa Kuboresha Elimu ya Sekondari (SEQUIP) kwa ajili ya ujenzi wa shule hiyo, ambao umefikia asilimia 75.

Shule hiyo ilianza kupokea wanafunzi Januari 2026, ikiwa na wanafunzi 83 na walimu 17. Inatoa mafunzo katika fani sita za umeme wa majumbani, ufundi ujenzi, ufundi bomba, umeme wa jua, ushonaji na uchomeleaji.

Katika hatua nyingine, Waziri Mkuu amesema Serikali inaendelea kutekeleza ahadi ya ujenzi wa barabara ya Mlangali, akieleza matumaini kuwa sehemu iliyobaki inaweza kukamilika katika bajeti mbili zijazo.

Kaimu Meneja wa Wakala wa Barabara Tanzania (TANROADS) Mkoa wa Njombe, Mhandisi Kipembawe Msekwa, amesema kilomita 1.5 kati ya kilomita 4.55 zimekwishajengwa, huku mkandarasi akiwa amepatikana kwa ajili ya kujenga kilomita nyingine 1.3 katika mwaka wa fedha 2026/2027.

Dkt. Mwigulu pia amepanda mti wa parachichi katika eneo la shule, ambapo jumla ya miti 64 imepandwa kwa ajili ya kuanzisha bustani ya zao hilo.













Read more »

at Friday, November 13, 2026 0


Na Mwamvua Mwinyi, Kibaha

Vijana na wanawake 229 katika Halmashauri ya Wilaya ya Kibaha mkoani Pwani wamepata fursa ya kuingia katika kilimo biashara kupitia Programu ya Jenga Kesho Iliyo Bora (BBT), baada ya Serikali kutenga ekari 300 za ardhi katika Kata ya Kikongo, ambapo kila mnufaika atapatiwa ekari moja kwa ajili ya shughuli za kilimo.

Kati yao wanawake 115 na wanaume 114, ikiwa ni sehemu ya juhudi za Serikali za kuwawezesha vijana kupata ardhi, kujiajiri na kujenga uchumi kupitia sekta ya kilimo, chini ya maono ya Rais Dkt. Samia Suluhu Hassan.

Kwa upande wake, Muhidin Semgonde kutoka Timu ya Uratibu wa BBT ya Wizara ya Kilimo, amesema programu hiyo inalenga kuzalisha ajira milioni 1.6 na kuwawezesha vijana kuanzisha kampuni za biashara za kilimo.

Ameelezea, katika awamu ya pili, Serikali imechagua vijana 2,960 kunufaika kupitia mashamba ya pamoja 19 katika halmashauri 18.

Aidha, amesema Serikali imetambua ekari 136,216 kwa ajili ya mashamba ya pamoja, sawa na asilimia 40 ya lengo la ekari 340,000 lililowekwa katika kipindi cha utekelezaji wa mradi huo.

Ameeleza kuwa katika awamu ya kwanza iliyoanza mwaka 2022/2023, vijana 686 walidahiliwa kupitia mchakato wa ushindani wa kitaifa kabla ya kugawiwa mashamba katika maeneo ya Chinangali na Ndogowe, Wilaya ya Chamwino mkoani Dodoma.

Kwa upande wao, wanufaika wa programu hiyo, Hamida Abdallah, Paulina Bendera, Sanane Malulo na Rose Liymo, wameishukuru Serikali kwa kuwapatia fursa hiyo, wakiahidi kufanya kazi kwa bidii na kuzingatia miongozo ya kitaalamu ili kufanikisha malengo ya mradi.





Read more »

at Friday, November 13, 2026 0
Vodacom Tanzania Foundation imekabidhi Kituo cha Rasilimali za Walimu kilichokarabatiwa katika Shule ya Msingi na Ufundi Mbezi, Wilaya ya Ubungo, Dar es Salaam, ikiwa ni sehemu ya juhudi za kuboresha mazingira ya ufundishaji na ujifunzaji.

Maboresho hayo yamehusisha uwekaji wa dari, viyoyozi, kompyuta 30 zilizounganishwa na intaneti, vifaa 30 vya UPS, meza na viti 30, televisheni ya inchi 75 pamoja na madawati 90 kwa wanafunzi.

Akizungumza katika hafla ya makabidhiano, Mkuu wa Wilaya ya Ubungo, Mhe. Albert Msando, aliipongeza Vodacom kwa mchango huo na kusisitiza umuhimu wa kutunza vifaa hivyo ili viweze kuleta manufaa endelevu.

Kwa upande wake, Mkuu wa Idara ya Uendelevu na Ubia wa Vodacom Tanzania Foundation, Pauline Koola, alisema uwekezaji huo unalenga kuwawezesha walimu kutumia teknolojia kuimarisha ujuzi na ubora wa ufundishaji.

Kupitia ushirikiano na Taasisi ya Elimu Tanzania (TIE) katika programu ya MEWAKA, Vodacom imeondoa gharama za data kwa zaidi ya walimu 100,000 wanaotumia mfumo wa mafunzo mtandaoni, huku walimu 300,000 wakitarajiwa kunufaika nchini. Hatua hiyo inaendeleza dhamira ya Vodacom kushirikiana na Serikali kuimarisha sekta ya elimu kupitia teknolojia na miundombinu bora.
Mkuu wa Wilaya ya Ubungo, Albert Msando (aliyevaa skafu) akikata utepe kuzindua Kituo cha Rasilimali za Walimu (TRC) kilichofanyiwa maboresho na Vodacom Tanzania Foundation katika Shule ya Msingi na Ufundi Mbezi, Wilaya ya Ubungo. Uzinduzi wa jengo hilo umeambatana na makabidhiano ya vifaa vya kisasa vya TEHAMA, vikiwemo kompyuta 30 zilizounganishwa na intaneti), UPS 30, meza na viti 30, televisheni ya inchi 75 pamoja na madawati 90 kwa ajili ya wanafunzi. Makabidhiano hayo yamefanywa na Mkuu wa Idara ya Uendelevu na Ubia wa Vodacom Tanzania Foundation, Pauline Koola, huku yakishuhudiwa na Meneja Mauzo wa Vodacom Tanzania, eneo la Kibaha Fadhili Linga, Mwenyekiti wa Mtaa wa Mbezi, Lois Bawazir Hassani na mwakilishi wa Afisa Elimu Msingi Wilaya ya Ubungo, Hamida Semkuya.
Mkuu wa Idara ya Uendelevu na Ubia wa Vodacom Tanzania Foundation, Pauline Koola, akizungumza wakati wa makabidhiano ya Kituo cha Rasilimali za Walimu (TRC) Mbezi, Ubungo. Kupitia ushirikiano na Taasisi ya Elimu Tanzania (TIE) katika programu ya MEWAKA, Vodacom Tanzania Foundation imeboresha na kukipatia kituo hicho vifaa vya kisasa, huku ikiwezesha zaidi ya walimu 100,000 kupata mafunzo kupitia mfumo wa LMS bila gharama za data wanapotumia mtandao wa Vodacom, kati ya walimu 300,000 wanaolengwa nchini kote.
Mwonekano wa nje wa jengo la Kituo cha Rasilimali za Walimu katika Shule ya Msingi na Ufundi Mbezi, Wilaya ya Ubungo, baada ya kufanyiwa maboresho na Vodacom Tanzania Foundation. Ukarabati huo umehusisha uwekaji wa dari na viyoyozi, pamoja na upatikanaji wa vifaa mbalimbali vikiwemo kompyuta 30 za mezani zilizounganishwa na intaneti, vifaa vya akiba ya umeme (UPS) 30, seti 30 za meza na viti na televisheni janja ya inchi 75, kwa lengo la kuimarisha mazingira ya walimu kujiendeleza kitaaluma na kutumia teknolojia katika ufundishaji.
Mwonekano wa ndani wa Kituo cha Rasilimali za Walimu katika Shule ya Msingi na Ufundi Mbezi, Wilaya ya Ubungo, baada ya kufanyiwa maboresho na Vodacom Tanzania Foundation. Ukarabati huo umehusisha uwekaji wa dari na viyoyozi, pamoja na upatikanaji wa vifaa mbalimbali vikiwemo kompyuta 30 za mezani zilizounganishwa na intaneti, vifaa vya akiba ya umeme (UPS) 30, seti 30 za meza na viti na televisheni janja ya inchi 75, kwa lengo la kuimarisha mazingira ya walimu kujiendeleza kitaaluma na kutumia teknolojia katika ufundishaji.
Baadhi ya madawati 90 yaliyokabidhiwa na Vodacom Tanzania Foundation kwa Shule ya Msingi na Ufundi Mbezi, Wilaya ya Ubungo, ikiwa ni sehemu ya mchango wa taasisi hiyo katika kuboresha mazingira ya kujifunzia.
Read more »

at Friday, November 13, 2026 0

Makamu wa Rais wa Jamhuri ya Muungano wa Tanzania Mhe. Deogratius Ndejembi amekagua mradi wa ulazaji Bomba la Gesi asilia kutoka kitalu cha Ntorya hadi kiwanda cha kuchakata gesi cha Madimba, mkoani Mtwara, akiwa ziarani mkoani humo, leo tarehe 13 Novemba 2026.

Mradi huo unaogharimu takribani Sh bilioni 119. Ulazaji wa bomba umekamilika, huku uunganishaji wa mwisho ukiendelea.

 Bomba hilo lenye urefu wa takriban kilomita 34 litasafirisha gesi asilia kutoka Ntorya hadi Madimba, na kuongeza upatikanaji wa gesi kwa ajili ya kuzalisha umeme na matumizi ya viwandani, usafiri pamoja na matumizi ya majumbani kama kupikia.

Akiwa katika eneo hilo, Makamu wa Rais, ameridhishwa na utakelezaji wa mradi huo ambao utachochea ukuaji wa uchumi kwa wananchi wa Mtwara na Taifa kwa ujumla.






Read more »

at Friday, November 13, 2026 0

- STANBIC YAPELEKA UJUMBE WA UWEKEZAJI KWA VIJANA KATIKA MKUTANO WA KIMATAIFA WA ONE YOUNG WORLD

Vijana viongozi kutoka zaidi ya nchi 190 walipokutana jijini Cape Town, Afrika Kusini, wiki iliyopita kwa ajili ya Mkutano wa Kimataifa wa One Young World, Benki ya Stanbic Tanzania iliwakilishwa na mmoja wa wafanyakazi wake ambaye safari yake ya kikazi inaonesha matokeo ya kuwekeza katika vijana.

Farid Ally alijiunga na Stanbic kupitia mpango wa mafunzo kwa wahitimu wa vyuo vikuu (Graduate Trainee Programme). Leo hii, anashikilia nafasi ya Mkuu wa Idara ya Masoko ya Fedha katika benki hiyo. Safari yake ni mfano wa namna kuwapa vijana nafasi za kujifunza, kupata uzoefu na kupewa majukumu kunavyoweza kuwaandaa kushika nafasi za juu za uongozi.

Mkutano huo uliofanyika kuanzia Jumanne, Novemba 3 hadi Ijumaa, Novemba 6, 2026, ulirejea barani Afrika kwa mara ya kwanza tangu ulipofanyika Johannesburg, Afrika Kusini, mwaka 2013. Uliwakutanisha vijana pamoja na viongozi wa biashara, watunga sera na watu mashuhuri kutoka mashirika zaidi ya 250 duniani.

Standard Bank Group, benki kubwa zaidi barani Afrika na benki mama ya Stanbic Bank Tanzania, ilishiriki kama mdhamini wa mkutano huo. Aidha, kundi hilo lilidhamini ushiriki wa vijana 61, wakiwamo wahitimu wa zamani na washiriki wa sasa wa mpango wake wa mafunzo kwa wahitimu wa vyuo vikuu.

Katika kundi hilo, wajumbe 30 walikuwa sehemu ya ujumbe maalumu uliojumuisha wahitimu na washiriki wa sasa wa programu hiyo kutoka maeneo mbalimbali, ikiwemo Afrika Mashariki. Ushiriki huo pia ulikuwa sehemu ya kuadhimisha miaka 30 tangu kuanzishwa kwa Mpango wa Maendeleo ya Wahitimu wa Standard Bank.

Akizungumzia uzoefu wake na safari ya kikazi, Farid Ally Mkuu wa Idara ya Masoko ya Fedha wa Stanbic Bank Tanzania, alisema:

“Nilijiunga na Stanbic kama mhitimu wa chuo kikuu kupitia mpango wa mafunzo, nikiwa na shahada na maswali mengi. Watu walionizunguka walinipa nafasi ya kujifunza, kufanya makosa na kupewa majukumu makubwa zaidi kila mwaka.

“Nilipokuwa Cape Town, nilikutana na vijana kutoka sehemu mbalimbali duniani wenye ari kama yangu. Nilirudi nikiwa na imani kuwa vijana wa Tanzania wanaweza kushindana na mtu yeyote duniani wanapopata mtu anayewaamini na kuwapa nafasi.”

Uwekezaji kwa vijana katika muktadha wa Tanzania

Ujumbe uliotolewa katika mkutano huo unaendana na umuhimu wa uwekezaji kwa vijana nchini Tanzania, ambako kundi hilo ni sehemu kubwa ya idadi ya watu na nguvu kazi ya taifa.

Kwa mujibu wa Sensa ya Watu na Makazi ya mwaka 2022 iliyotolewa na Ofisi ya Taifa ya Takwimu (NBS), Tanzania ina watu milioni 21.3 wenye umri wa miaka 15 hadi 35, sawa na asilimia 34.5 ya watu wote nchini. Vijana wanachangia zaidi ya asilimia 55 ya nguvu kazi ya taifa.

Hata hivyo, ukosefu wa ajira kwa vijana bado ni changamoto, huku kiwango hicho kikiwa asilimia 9.5 kitaifa na kufikia asilimia 15.9 katika maeneo ya mijini, ambako wahitimu wengi hutafuta ajira zao za kwanza.

Serikali imewaweka vijana katikati ya Dira ya Taifa ya Maendeleo 2050 na inalenga kutengeneza angalau ajira milioni 8.5 katika kipindi cha mwaka 2025 hadi 2030.

Akiwasilisha bajeti ya Ofisi ya Rais, Maendeleo ya Vijana kwa mwaka wa fedha 2026/27 bungeni, Waziri wa Nchi, Dk Joel Arthur Nanauka, alisema: “Serikali inawaona vijana si kama mzigo, bali kama rasilimali muhimu kwa maendeleo ya taifa.”

Kwa upande wake, Stanbic imejikita katika kuwaajiri vijana wa Kitanzania na kuwaendeleza kupitia programu zinazowapa nafasi ya kujifunza na kujenga uwezo wa kushika nafasi za uongozi.

Mpango wa mafunzo kwa wahitimu wa vyuo vikuu unawawezesha vijana kuanza kufanya kazi katika majukumu halisi ndani ya benki, huku wakipata nafasi ya kuzungushwa katika idara mbalimbali ili kuelewa kwa kina namna shughuli za benki zinavyoendeshwa.

Kwa mujibu wa takwimu zilizotolewa wakati wa mahafali ya programu hiyo mwaka 2024, asilimia 93 ya washiriki huendelea kubaki ndani ya benki. Wahitimu wa programu hiyo sasa wanashikilia nafasi mbalimbali ndani ya Stanbic na katika kampuni nyingine za Standard Bank Group.

Benki hiyo pia inaendesha programu ya mafunzo kwa vitendo kwa wanafunzi wa vyuo vikuu, inayowapa fursa ya kupata uzoefu wa awali wa kufanya kazi katika sekta ya benki. Aidha, Chuo cha Mameneja wa Matawi (Branch Managers Academy) kimeanzishwa kwa ajili ya kuwaandaa wafanyakazi waliopo ndani ya benki kushika nafasi za uongozi wa matawi.

Akizungumzia mkakati huo, Mkuu wa Idara ya Rasilimali Watu, Rabina Masanja Rienks, alisema benki hiyo huwaajiri vijana kwa kuzingatia uwezo wao wa kukua na kufikia mafanikio ya baadaye, badala ya kuangalia tu maarifa waliyonayo wakati wa kuajiriwa.

“Tunawaajiri vijana wa Tanzania kwa kuangalia kile wanachoweza kuwa baadaye, si tu kile wanachokijua sasa. Wahitimu wetu huanza kufanya kazi halisi tangu wiki yao ya kwanza, huku viongozi wetu wakiwapa muda, mrejesho na majukumu.

“Safari ya Farid kutoka kuwa mhitimu wa mafunzo hadi kuwa Mkuu wa Idara ya Masoko ya fedha ndiyo mfano tunaoutoa kwa kila kundi jipya la wahitimu, kwa sababu inaonesha kuwa nafasi za juu za uongozi ndani ya benki hii ziko wazi kwao,” alisema.

Imani hiyo pia inashirikishwa na Standard Bank Group. Akizungumzia uwekezaji kwa vijana kabla ya mkutano huo, Mtendaji Mkuu wa Kanda za Afrika na Shughuli za Nje ya Afrika wa Standard Bank, Lungisa Fuzile, alisema ukuaji na ustawi wa baadaye wa Afrika unategemea uwekezaji katika uwezo wa vijana wake.

Mwaka 2025, wahitimu 251 walijiunga na programu za mafunzo kwa wahitimu wa vyuo vikuu za Standard Bank Group katika nchi 11.

Akizungumzia mchango wa Stanbic katika maendeleo ya Tanzania, Rabina alisema benki hiyo imehudumia nchi kwa zaidi ya miongo mitatu na kwamba vijana wanaojiunga nayo leo ndio watakaokuwa sehemu ya uongozi wake katika miaka ijayo.

“Stanbic imehudumia Tanzania kwa zaidi ya miongo mitatu, na vijana wa Tanzania wanaojiunga nasi leo ndio watakaoiongoza benki hii katika miongo ijayo. Kuwekeza kwao ni namna ya kuwekeza katika nchi yetu. Tanzania ni nyumbani kwetu, na tunachochea ukuaji wake,” alisema.











Read more »

at Friday, November 13, 2026 0


​

Na Mwandishi Wetu, Tabora

​SERIKALI Mkoani Tabora imewataka wadau na viongozi wa vyama vya msingi vya ushirika wa tumbaku kukomesha vitendo vya utumikishwaji watoto mashambani, huku ikionya dhidi ya matumizi ya wafanyakazi wa kigeni bila kufuata taratibu za kisheria.

Maagizo hayo yametolewa na Wakuu wa Wilaya za Sikonge na Kaliua katika kikao cha wadau wa zao la tumbaku kilichoandaliwa na Kampuni ya Ununuzi na Uchakataji ya Alliance One, kilicholenga kuboresha maendeleo ya mkulima na kuimarisha utaratibu wa uzalishaji.

Kikao hicho kiliwakutanisha viongozi mbalimbali wa wilaya hizo mbili pamoja na wadau mbalimbali, wakiwemo Makatibu Tawala wa Wilaya, Mkurugenzi Mtendaji wa Wilaya,maafisa wa uhamiaji, wataalamu wa maendeleo ya jamii, Maafisa Watendaji wa Vijiji, Maafisa Watendaji wa Kata, pamoja na wawakilishi wa wakulima.

Akizungumza katika kikao hicho, Mkuu wa Wilaya ya Kaliua, Dk. Gerald Mongella, amekemea vikali ajira za utotoni na kuonya kuwa hatua kali za kisheria, ikiwemo kufunguliwa mashtaka ya uhujumu uchumi, zitachukuliwa dhidi ya yeyote atakayebainika kukiuka maagizo hayo.

Dk. Mongella amesema serikali haitavumilia kuona haki za watoto zinaminywa kupitia ajira hizo, jambo linaloweza kuathiri vibaya soko la kimataifa la tumbaku inayozalishwa nchini.

​Kwa upande wake, Mkuu wa Wilaya ya Sikonge, Michael Semindu, amewasihi viongozi wa wakulima kuhakikisha wanatumia njia halali wanapoleta wafanyakazi wa mashamba ya tumbaku kutoka nchi za jirani ili kuepuka migogoro na changamoto za kisheria.

“Hili la wahamiaji haramu likomeshwe na pale mnapohitaji kuwa na wafanyakazi wa namna hiyo, bora muwaendee Maafisa wa Uhamiaji watoe elimu ya kina kuhusu namna ya kuwaleta nchini kwa ajili ya kazi za misimu nchini,” amesisitiza Mhe. Semindu.

Msimamo huo umeungwa mkono na Idara ya Uhamiaji kupitia wilaya ya Kaliua, Rogatian Chuwa aliyeongea kwa niaba ya wenzake. Aliwataka waajiri kuwaombea vibali vya kazi wafanyakazi wa kigeni pamoja na kuwapa mikataba ili kuepuka makosa yanayoweza kufananishwa na kazi za kulazimishwa.

​Naye Meneja na Msemaji wa Kampuni ya Alliance One, Wakili John Magoti, amewataka viongozi wa vyama vya msingi (AMCOS) kuwakumbusha wakulima kuacha kabisa kutumikisha watoto chini ya umri wa miaka 18 na badala yake kuwapa kazi nyepesi zisizozidi masaa sita kwa siku endapo hawapo shuleni.

​“Watoto wasitumikishwe mashambani. Haki za binadamu na mikataba ya Umoja wa Mataifa inakataza jambo hili. Kampuni yetu imeweka mifumo thabiti kupitia sera ya ALP (Agricultural Labour Practices) kuzuia ajira za watoto na kuweka namba maalum za kuripoti matukio hayo,” amesema Wakili Magoti.

​Pamoja na usimamizi wa sheria, Alliance One imepongezwa kwa mchango wake mkubwa wa kiuchumi mkoani humo. Wakili Magoti ameeleza kuwa mwaka huu kampuni hiyo imelipa shilingi bilioni 1.1 kama ushuru kwa Halmashauri ya Wilaya ya Kaliua, pamoja na kulipa Dola za Marekani milioni 13 kama ushuru kwa AMCOS.

Wakiongea katika kikao hicho maafisa wengine mbalimbali walitoa ushauri kuhusu ajira za watoto na wafanyakazi wa kigeni. Ofisa Maendeleo na Ustawi wa Jamii wilaya ya Kaliua, Magdalena Kanje amesema wamekubaliana kuendelea kutoa elimu kwa jamii na kuhamasisha miradi endelevu kama VICOBA ili kutokomeza ajira za watoto na kuinua kipato cha wakulima wa tumbaku.
Meneja Uhusiano na Msemaji wa Kampuni ya Tumbaku ya Alliance One Wakili John Magoti (Katikati) akiwasilisha mada kwenye mkutano wa wadau wa tumbaku wa wilaya za Sikonge na Kaliua uliofanyika mkoani Tabora.Kulia ni Mkuu wa Wialaya ya Sikonge Bw.Michael Semindu, kushoto ni Afisa Tawala wa wilaya hiyo Bw.Andrea Ng'hwani.Mkuu wa Mkoa wa Wilaya ya Sikonge Michael Semindu, akitoa hotuba ya ufunguzi katika kikao cha wadau wa tumbaku kwa wilaya za Sikonge na Kaliua, kilichofanyika mwishoni mwa wiki, huku Meneja Mahusiano kwa Umma na Msemaji wa Kampuni ya Alliance One Wakili John Magoti(kushoto) akifuatilia kwa makini.Katibu Tawala wa Wilaya ya Sikonge, Andrea Ng'hwani akifafanua jambo katika kikao cha wadau wa tumbaku kwa wilaya za Sikonge na Kaliua kilichoandaliwa na Kampuni ya Tumbaku ya Alliance One.Kulia ni Meneja Uhusiano na Msemaji wa Kampuni hiyo, Wakili John Magoti.







Read more »

at Friday, November 13, 2026 0


Na. Peter Haule, WF, Dar es Salaam

Finland imeeleza nia ya kuimarisha ushirikiano wa kiuchumi na Tanzania kwa kuongeza uwekezaji na shughuli za maendeleo katika sekta za teknolojia ya kidijitali, mawasiliano, misitu na madini.

Hayo yamebainishwa na Balozi wa Finland nchini, Mhe. Anna Merrifield wakati wa Mkutano na Katibu Mkuu Wizara ya Fedha, Dkt. Natu El-Maamry Mwamba, uliofanyika Ofisi Ndogo za Wizara ya Fedha, jijini Dar es Salaam.

Mhe. Balozi Merrifield amesema nia ya nchi yake ni kuongeza ushirikiano kutoka katika mfumo wa kawaida wa ushirikiano wa maendeleo na kuelekea katika ushirikiano zaidi unaohusisha pia sekta binafsi, uwekezaji na matumizi ya teknolojia katika kukuza uchumi.

“Finland ina uzoefu mkubwa katika sekta ya teknolojia na ubunifu, hususan katika maeneo ya huduma za kidijitali na mawasiliano, ambayo yanaweza kusaidia Tanzania kufikia malengo yake ya maendeleo”, alisema Mhe. Balozi Merrifield.

Amebainisha kuwa teknolojia ya kidijitali na mawasiliano ni muhimu katika kufanikisha azma ya Tanzania ya kujenga uchumi wa dola za Marekani trilioni moja ifikapo mwaka 2050, akisisitiza kuwa maendeleo hayo hayawezi kufikiwa bila matumizi ya teknolojia katika sekta mbalimbali za uchumi.

Kuhusu ushirikiano na sekta binafsi, amesema Finland inataka kuimarisha uhusiano kati ya miradi ya maendeleo na uwekezaji wa kampuni binafsi, ili kutumia utaalamu wa kampuni za Finland kutatua changamoto za maendeleo nchini Tanzania.

Amesema mkazo utawekwa katika miradi yenye manufaa ya kijamii na kiuchumi ambayo huenda isiweze kujiendesha kibiashara kwa faida ya moja kwa moja, lakini inaweza kuleta matokeo chanya kwa wananchi na kusaidia maendeleo ya Tanzania.

Ameongeza kuwa miradi hiyo inapaswa kuzingatia mahitaji na vipaumbele vya maendeleo vya Tanzania, huku ikitumia utaalamu na uwezo wa kampuni za Finland kwa manufaa ya pande zote mbili.

Akizungumza awali Katibu Mkuu Wizara ya Fedha, Dkt. Natu El- Maamry Mwamba, amesema anafurahishwa na mfumo mpya wa ushirikiano wa uwekezaji katika sekta ya umma (Public Sector Investment Framework – PIF), unaowezesha Tanzania kupata mikopo yenye masharti nafuu inayofadhiliwa kwa ruzuku na Serikali ya Finland kwa ajili ya kutekeleza miradi iliyokubaliwa.

Amefafanua kuwa mfumo huo unalenga kusaidia miradi ya umma yenye manufaa makubwa ya kiuchumi, kijamii na kimazingira, ambayo inaweza kukabiliwa na changamoto za upatikanaji wa fedha kupitia mifumo ya kawaida ya kibiashara.

Akizungumzia utekelezaji wa mfumo huo, alisema mradi wa awali unaotarajiwa kutekelezwa ni Awamu ya Tano ya upanuzi wa Mkongo wa Taifa wa Mawasiliano (NICTBB), utakaotekelezwa na Wizara ya Mawasiliano na Teknolojia ya Habari kupitia Shirika la Mawasiliano Tanzania (TTCL), kwa kushirikiana na kampuni ya Nokia ya Finland.

Amesisitiza kuwa Wizara ya Fedha itaendelea kufuatilia kwa karibu maandalizi ya mradi huo ili kuhakikisha hatua zinazohitajika zinakamilishwa kwa wakati, akibainisha kuwa nyaraka za mradi huo zinafanyiwa mapitio na Tume ya Taifa ya Mipango.

Dkt. Mwamba ameipongeza Serikali ya Finland kwa ushirikiano wake na kumshukuru Balozi mstaafu wa Finland nchini Tanzania, Theresa Zitting, kwa mchango wake katika kuimarisha mahusiano ya nchi hizo, hususan katika kuwezesha upatikanaji wa fedha kwa ajili ya miradi ya kimkakati.

Mkutano huo ulihudhuliwa pia na Mkurugenzi wa Maendeleo ya Fedha na Ushirikiano na Sekta Binafsi, Wizara ya Mambo ya Nje ya Finland, Bi. Emmi Oikari, Mwakilishi Mkazi wa Kampuni ya Nokia, Bw. Amouneu Lopy na Kamishna Msaidizi wa Idara ya Fedha za Nje, Wizara ya Fedha, Bw. Melckizedeck Mbise.



Katibu Mkuu Wizara ya Fedha, Dkt. Natu El- Maamry Mwamba akiongoza mkutano kati yake na Balozi wa Finland nchini, Mhe. Anna Merrifield, uliofanyika katika Ofisi ya Katibu Mkuu, Ofisi Ndogo za Wizara ya Fedha, jijini Dar es Salaam.


Katibu Mkuu Wizara ya Fedha, Dkt. Natu El- Maamry Mwamba, akiagana na Balozi wa Finland nchini, Mhe. Anna Merrifield, baada ya Mkutano wao kuhusu ushirikiano wa maendeleo, uliofanyika katika Ofisi ya Katibu Mkuu, Ofisi Ndogo za Wizara ya Fedha, jijini Dar es Salaam.



Katibu Mkuu Wizara ya Fedha, Dkt. Natu El- Maamry Mwamba, Balozi wa Finland nchini, Mhe. Anna Merrifield (wa nne kushoto) wakiwa katika picha ya pamoja na wajumbe kutoka Wizara ya Fedha na Finland, baada ya kumalizika kwa mkutano kati yao, uliofanyika katika Ofisi ya Katibu Mkuu, Ofisi Ndogo za Wizara ya Fedha, jijini Dar es Salaam.

(Picha na Kitengo cha Mawasiliano Serikalini, Wizara ya Fedha, Dar es Salaam)
Read more »
Newer Posts
Older Posts
Subscribe to: Posts (Atom)