flavian matata aalikwa hungary, apaa leo usiki

Mrembo wa Miss Universe Tanzania 2007, Flaviana Matata, anaondoka leo usiku nchini akielekea Budapest, nchini Hungary ambapo atahudhuria sherehe ya kitamaduni inayojulikana kama Budapest Opera Ball.

Mwaliko wa mrembo huyu kupitia waandaji wa Miss Hungary, inalenga kujenga mahusiano ya kitamaduni kati ya Tanzania na Hungary. Flaviana Matata anatarajia kuhudhuria tafrija kubwa tarehe 2 mwezi Februari 2008 na atarejea nchini tarehe 6 Februari.

Budapest Opera Ball ni sherehe inayofanyika kila mwaka na ni tafrija yenye hadhi kubwa nchini Hungary ambapo wanasiasa, wakuu wa nchi, mabalozi na watu mashuhuri kutoka nchi ya Hungary na nchi zingine za jirani barani Ulaya hudhuria.

Hii itakuwa ni mara ya kwanza kwa mrembo kutoka Afrika kuhudhuria halfa hii.

"Hii ni heshima kubwa sana kwa mtu yoyote kualikwa kwani watu wengi hulipa pesa nyingi sana kupata mwaliko wa Budapest Opera Ball. Miss Universe Tanzania inaendelea kuweka rekodi nchini na duniani", Maria Sarungi Tsehai, mkurugenzi wa kitaifa wa Miss Universe Tanzania, ameiambia globu hii sasa hivi.

Akizungumzia safari yake, Flaviana ameeleza kufurahishwa kwake na mwaliko huu " Hii ni kutokana na ukweli kwamba nchi za wenzetu wanatambua umuhimu wa warembo katika jamii. Mimi naenda pale kama balozi wa Tanzania."

Tanzania iliweka historia katika mashindano ya Miss Universe ambayo yalifanyika May 28 mwaka jana, Mexico City, huko nchini Mexico.

Flaviana Matata mwakilishi wa kwanza wa Tanzania katika mashindano aliwakilisha nchi yetu katika mashindano ya kumtafuta Miss Universe, na alifanikiwa kuingia katika kumi Bora (Top10) katika mashindano hayo akishika nafasi ya sita, ambapo yalishirikisha warembo 77 kutoka nchi mbali mbali duniani.

Kwa maelezo zaidi wasiliana na Compass Communications:

Tel: 2182405/ 2182596

au 0784 305122