THT YAJIUNGA KWENYE KAMPENI DHIDI YA MALARIA NCHI NZIMA

Tanzania House of Talent (THT) imetangaza kuungana kwake na taasisi ya Malaria No More. Kuungana huko kulitangazwa kwenye makao makuu mapya ya kikundi hicho yaliyopo karibu na viwanja vya Leaders Club, Kindondoni jijini Dar es Salaam na kwamba THT itashirikiana na Wizara ya Afya na wadau wengine wa afya kusambaza ujumbe wa malaria na kuhimiza mabadiliko ya tabia nchini kote.

THT iliungana rasmi na Malaria No More mwezi Novemba mwaka 2009 kama sehemu ya mpango wa kuwahusisha vijana wa Kitanzania kwenye vita dhidi ya malaria.

THT imeanza maandalizi ya Maigizo katika Elimu ambayo yatatumia muziki, uchezaji na maigizo maalumu kwa ajili ya vijana kuelewa mbinu za kujikinga na kutibu malaria.Sadaka Gandi, Afisa Mawasiliano ya Afya wa THT alisema, “THT imeombwa kuandaamaigizo katika elimu ambayo yatafungua macho ya vijana kuhusiana na ujumbe wa malaria.

Maigizo ni chombo chenye nguvu na hamasa kubwa katika kuwaelimisha vijana kupitia burudani na THT inafahamika nchi nzima.

Tulimaliza maigizo yanayohusu ukimwi mwezi Machi mwaka jana pamoja na maigizo yanayohusu ugomvi wa majumbani; vijana 12 wamechaguliwa kuwa mabalozi wa malaria miongoni mwa wenzao mashuleni.

”Z!NDUKA Malaria Haikubaliki ni sehemu ya kampeni ya taifa ya Malaria Haikubaliki ambayo itafanya shughuli kadhaa zinazohusu malaria zitakazolenga vijana. “Vijana wa THT wameanza mafunzo yatakayowasaidia kuelewa njia za kujikinga na kutibu malaria na watatembelea vituo kadhaa vya afya, hospitali na kliniki kama sehemu ya utafiti wao wa malaria.

”Msami, mmojawapo wa vijana wa THT alisema, “Mwaka jana tulikwenda Arusha kutembelea kiwanda cha vyandarua ziara ambayo ilitusaidia kuelewa utengenezaji na usambazaji wa vyandarua nchini Tanzania.

Kikubwa ni kwamba Tanzania ina kiwanda kikubwa cha vyandarua kuliko vyote barani Afrika lakini bado hatulali kwenye vitanda vyenye vyandarua vilivyowekwa dawa. Kama sehemu ya maigizo yetu katika elimu tutajumuisha suala la kulalia vitanda vyenye vyandarua, kwenda hospitali mapema kupima malaria na kuelezea kwa nini ni muhimu kwa vijana kumaliza dozi zao za dawa.

”THT itaendelea kushirikiana na Wizara ya Afya na mradi wa taifa wa kudhibiti malaria kabla ya kwenda Morogoro na Tanga mwezi Julai mwaka huu. Sadaka Gandi alisema, “THT inajisikia vizuri kuwa sehemu ya kampeni ya taifa dhidi ya malaria na itakuwepo kwenye Viwanja vya Mnazi Mmoja siku ya Jumapili Aprili 25 katika Siku ya Malaria Duniani pamoja na Mheshimiwa Rais Kikwete na mabalozi wa Z!NDUKA.

Kampeni ya Malaria Haikubaliki inaongozwa na Serikali ya Tanzania chini ya uongozi wa Rais Jakaya Kikwete. Inasaidiana na wadau mbalimbali wakiwemo Malaria No More, Tanzania House of Talent(THT), Johns Hopkins University, Population Services International na United Against Malaria. Lengo la mpango ni kuhakikisha vyandarua vinapatikana nchini kote na kutokomeza vifo vitokanavyo na malaria kwa kuwahimiza Watanzania kuZ!NDUKA dhidi ya malaria na kujikinga.