MH NYALANDU AIPONGEZA KAMPUNI YA sAIDI SALIM BAKHRESSA

Naibu Waziri wa Viwanda na Biashara Lazaro Nyalandu akisalimiana na Viongozi wa Kampuni ya SS BAKHRESSA mara baada ya kuwasili kwa ziara fupi ya kutembelea viwanda vya kampuni hiyo na kujionea uzalishaji wa chakula unaofanywa na kampuni hiyo.

Naibu Waziri wa Viwanda na Biashara Lazaro Nyalandu(Kushoto) akisikiliza maelezo ya utendaji wa kampuni ya SS BAKHRESSA kutoka kwa Afisa Mtendaji wa Kampuni hiyo Bw Hussein Sufian (Kulia)

Naibu Waziri wa Viwanda na Biashara Lazaro Nyalandu( Kulia) na Mkurugenzi Msaidizi wa Idara ya Viwanda katika Wizara ya Viwanda na Biashara Eng Marwa(Kushoto), wakionja kinywaji kipya cha Azam Cola kinachozalishwa na kampuni ya SS BAKHRESSA

Mkuu wa Kitengo cha Uzalishaji wa Kampuni ya SS BAKHRESSA Bw Patrick Muriuki ( Mwenye Kofia) akitoa maelezo kwa Naibu Waziri wa Viwanda na Biashara Lazaro Nyalandu(Mwenye suti) kuhusu aina mbali mbali za unga wa ngano zinazozalishwa na kampuni hiyo.

Naibu Waziri wa Viwanda na Biashara Mh Lazaro Nyalandu, ameipongeza kampuni ya SS BAHKRESA kwa uamuzi wake wa kuwekeza kwa dhati katika uzalishaji wa bidhaa za chakula za aina mbali mbali.

Mh Nyalandu ametoa pongezi hizo Jijini Dar es salaam mara baada ya ziara yake ya  kutembelea viwanda vya kampuni hiyo ili kujionea hali halisi ya uzalishaji wa bidhaa za chakula unaofanywa na kampuni hiyo.

“Ndugu zangu ninawapongeza sana kwa kazi iliyotukuka ambayo mnaifanya kwa miongo kadhaa sasa, juhudi zenu zipo dhahiri, mnagusa maisha ya Watanzania na Afrika Mashariki kwa ujumla, Vyakula na Vinywaji mnavyozalisha sio tu vinalinda afya zetu, bali pia ni chanzo kikubwa cha ajira hasa kwa vijana, serikali itaendelea kuwaunga mkono kwa kila linalowezekana” amesema Nyalandu.

Mh Nyalandu ameiomba kampuni hiyo kuwa tayari kuwafundisha na kuwaonesha njia wajasiriamali wadogo ili nao washiriki kikamilifu katika kuzalisha bidhaa za chakula kwa ubora unaokubalika huku akisisitiza umuhimu wa vyakula hivyo kuuzwa kwa bei nafuu ambayo watu wote watamudu.

Pamoja na kushiriki katika kilimo cha mazao mbali mbali ambayo ni malighafi kwa viwanda vyake, SS Bahkressa ni wanunuzi wakubwa wa mazao mbali mbali na matunda yanayozalishwa kwa wingi kote nchini na pia ni miongoni mwa kampuni zilizoajiri idadi kubwa ya Vijana.